ဇွန်လ ၁၁ ရက်၊ ၂၀၁၄
M-Media
ခလီဖွာ စိုက်ယစ်မြီရ်အလီ အတ်ကဘရ်သည် ကာဘွလ်မြို့သား စိုက်ယစ် အန်ဆွာရီ၏ အဆက်အနွယ်ဖြစ်သည်။ စိုက်ယစ်မြီရ် အလီအတ်ကဘရ်၏ ဖခင်သည် စိုက်ယစ်မြီရ်မဟာမွတ်။ စိုက်ယစ်မြီရ်မဟာမွတ်၏ ဖခင်သည် စိုက်ယစ်မြီရ်ဟိုင်ဒရ်။ စိုက်ယစ်မြီရ်ဟိုင်ဒရ်၏ဖခင်သည် စိုက်ယစ် အီဘရာဟင်။ စိုက်ယစ် အီဘရာဟင်၏ ဖခင်သည် စိုက်ယစ်အဗ္ဗဒွလ် ကာဒေရ်။ စိုက်ယစ်အဗ္ဗဒွလ်ကာဒေရ်၏ ဖခင်သည် စိုက်ယစ် အန်ဆွာရီ ဖြစ်သည်။ ထို့ကြောင့် စိုက်ယစ် အန်ဆွာရီသည် ဆွေမျိုးစပ်ဝေါဟာရ အရ ဘင်တော်ပြီး ခလီဖွာမြီရ်အလီသည် ကျွတ်တော်သူဖြစ်သည်။
ခလီဖွာသည် – ဇမ္ဗူဒိပ်၊ ဗျာဒိတ်ပုံနှိပ်၍
မြိုင်ဆိပ်က မအန၀ီ၊ ကြွေးကြော်လိုက်သည်´
ဟု ဆိုခဲ့သည်။ မော်လမြိုင်မြို့ ဈေးကြီးရပ်ကွက်တွင် နေထိုင်ခဲ့သူဖြစ်သည်။ ပြုစုသည့် ကျမ်းအမည်မှာ “မဟာ ဗျာဒိတ်တော်၊ မဟာ ပဋိညာဉ်တမန် တော်မူခန်း၊ သယမ္မူ ရွှေဥာဏ်ရှင်တစ်ပါးတည်း အသီးအခြား ရှိတော်မူကြောင်း၊ ဘရှာရတ် အတ်ကဘရ်၊ မောင်လွတ်အတ်ကဘရ်၊ တောင်ဟစ်အတ်ကဘရ်ဖြစ်သည်။
ခုနှစ်အမှတ်အသားအဖြစ် ဗုဒ္ဓသာသနာ ၂၄၄၂၊ ခရစ်ယာန် သာသနာ ၁၈၉၇၊ ပသီလူမျိုး မုဟမ္မဒ် သာသနာ ၁၁၁၆၊ မူဆာ သာသနာ နှစ် ၃၀၀၀ ကျော်ဟု ကျမ်းတွင် ဖော်ပြထားသည်။ ကျမ်းနိဒါန်းတွင် ကျမ်းပြုသူက-
“မှန်ညီတရား၊ မျိုးလေးပါးတို့၊ ထင်ရှားရည်သန်၊ ကျမ်းဂန်အယူ၊ အများလူတို့၊ ကြည်ဖြူစေရန်၊ ကျမ်းဂန်အထွတ်၊ လမ်းမှန်မညွတ်၊ ယူရွတ် ဘုရင်အပေါင်းတို့၏ သမ္မာကျမ်း၊ ခရစ်ဝင်စာတွင် ပါရှိသော ဗျာဒိတ်တော်များနှင့် ၎င်းပြင် အဆ်ရာအိလ်၊ ယေဟူဒီလူမျိုးတို့၏ သမ္မာကျမ်းစာ၊ ၎င်းပြင် ဗုဒ္ဓဘာသာတို့ အနာဂတ် သမ္မာကျမ်းစာ၊ ၎င်းအပြင် အစ္စလာမ် ပသီလူမျိုးတို့၏ ကုရ်အာန်နှင့်၊ ပဋိညာဉ် တမန်တော်၏ ဟဒိဆ်ကျမ်းဂန်၊ လမ်းအမှန်ကို ရွှေဥာဏ် သတိစံတင်၍၊ ကြည့်ကြစေရန်”
ဟု နှိုးဆော်ထားသည်။
ကျမ်းတွင် စာမျက်နှာ ၆၄ မျက်နှာပါဝင်သည်။ မဟာ ဗျာဒိတ်ခန်းသည် ကျမ်း၏ ရှစ်ပုံငါးပုံ၊ ဖွားတော်မူခန်းသည် ကျမ်း၏ ရှစ်ပုံနှစ်ပုံ၊ သယမ္မူ ရွှေဥာဏ်ရှင် အခန်းသည် ကျမ်း၏ရှစ်ပုံ တစ်ပုံ ဖြစ်သည်။
ပထမအခန်း ဘရှာရတ်အတ်ကဘရ် မဟာဗျာဒိတ်တော် ခန်းတွင် ကမ္ဘာ့ဘာသာကြီးများလာ တမန်တော်ပွင့်မည် မဟာ ဗျာဒိတ်တော်များကို စုဆောင်းတင်ပြ ထားသည်။ ခရစ်ယာန်၊ ယဟူဒီဘာသာ၊ ဗုဒ္ဓဘာသာကျမ်းဂန်များမှ ဆီလျော်ဆက်စပ်ရာ ဗျာဒိတ်တော်များကို ထုတ်နုတ်ကိုးကားပြသည်။ အစ္စလာမ်တမန်တော်သည် အစစ်အမှန်ဖြစ်ကြောင်း ဖော်ကျူးခြင်းဖြစ်သည်။
ဒုတိယအခန်း မောင်လွတ်အတ်ကဘရ် မဟာပဋိညာဉ် တမန်တော်ဖွားတော်မူခန်းတွင် ကမ္ဘာအ၀ှန်း အံ့သြဖွယ်နိမိတ် လက္ခဏာတော် များဖြစ်ပေါ်ပုံများကို ကာက်နုတ်တင်ပြသည်။ မြန်မာရာဇ၀င်လာ ထွန်ပစ်မင်း(အေဒီ-၅၈၂)၊ ပုပ္ပားစောရဟန်းမင်း(အေဒီ-၆၁၃)၊ ရွှေအုန်းသီး မင်း (အေဒီ-၆၄၀) တို့ ခေတ်အခြေအနေကို ဖော်ပြသည်။ (ခုနှစ်မှားဟန်တူ သည်။) နေနှစ်စင်း ထွက်ပုံ၊ မိုးခေါင်ပုံ၊ ကြယ်ခွပ်ပုံ၊ နန်းတော် တလင်းတနားပုံ၊ ကျားဝင်ပုံများ ပါရှိသည်။
ကမ္ဘာပေါ်တွင်လည်း မှောင်အတိကျရောက်ပုံ၊ “တိရစ္ဆာန်အပေါင်း သားရဲနှင့် သားယဉ်၊ ကောင်းကင်၍ ကျင်လည်သောငှက်၊ အတောင်ပေါက် အမြီးပေါက် အမောက်နှင့် ဆောင်းဆောင်း၊ သတ္တ၀ါအပေါင်းတို့ ပဋိညာဉ် တမန်တော် မုဟမ္မဒ် အလိုင်ဟစ်စလာမ် ဖွားတော်မူကြောင်း ထင်ရှားစွာ ဗျာဒိတ်စကား၊ ကြွေးကြော် ပြောကြလေသည်” ဟု ဖော်ပြထားသည်။
မယ်တော်ဝမ်းတွင်း သက်ဆင်းပုံ၊ နတ်ဒေ၀ါအပေါင်းက ကောင်းချီးပေးပုံ၊ ဖွားတော်မူပုံ၊ ဗျာဒိတ်ရပုံ၊ တရားဓမ္မပြသပုံတို့ကို အသေးစိတ် သရုပ်ဖော်သည်။ ဤအခန်း၌လည်း ယဟူဒီတို့၏ ဇဗူရ်ကျမ်း၊ ဗုဒ္ဓဘာသာ ၀င်တို့၏ အနာဂတ်ဝင်ကျမ်းကိုးများကို ဖော်ပြသေးသည်။
တတိယအခန်း တောင်ဟစ်အတ်ကဘရ် သယမ္မူ ရွှေဥာဏ်ရှင် တစ်ပါးတည်း အသီးအခြားရှိတော်မူကြောင်း တင်ပြရာတွင် ရှုပအစိန္နေယျ၊ ၀ါစအစိန္နေယျ၊ န္ဒဓိအစိန္နေယျ၊ ဥာဏအစိန္နေယျတို့ကို သဘာဝယုတ္တိ၊ သာဓကယုတ္တိ၊ အာဂမယုတ္တိများဖြင့် လက်ခံယုံကြည် လိုက်နာဖွယ် တင်ပြထားသည်။
ကျမ်းနိဂုံးတွင်-
“နမူနာ ပုံစံမရှိသော၊ အရာရာကို ပုံစံပြုလုပ်ခြင်းသည်၊ ပသီလူမျိုးတို့ ဥာဏ်၌ အလွန်အံ့လောက်စဖွယ်၊ ကြောက်မက် ဖွယ်ဟု ထင်မှတ်ကြသည်။ သင်္ချေ ၂၀ ကို မဆိုထားနှင့် သင်္ချေ အနန္တပါရမီဖြည့်သော်လည်း အတုလံကို မမီဟု ပသီ လူမျိုးတို့ သဘော၌ ရှိကြ၏”
ဟု ယုံကြည်ချက်ကို ခိုင်မာစွာ တင်ပြသည်။
ပထမအခန်းတွင် ကျမ်းပြုသူက ခိုင်လုံမှုကို အဓိကပြုသည်။ နှိုက်နှိုက်ချွတ်ချွတ် လေ့လာပြီး အထောက်အထား အများအပြား ထုတ်နုတ်ပြသည်။ ပြွတ်သိပ်လွန်း လှသည်ဟု ဆိုနိုင်သည်။ ဤအကြောင်းရပ်မျိုးကို ယခင်က Proof of the Muhammad from the Holy Bible and Ray to Paradise for Eternal Life တွင် တွေ့ရဖူးသည်။
ဒုတိယအခန်းတွင် ဗျာဒိတ်ရ တမန်တော် ဖွားတော်မူခန်းကို မြင်ယောင်ကြားယောင် လာအောင် သရုပ်ဖော်သည်။ အံ့သြဖွယ်၊ ကြည်ညို ဖွယ်၊ ၀မ်းမြောက် ဂုဏ်ယူဖွယ်ဖော်ပြသည်။
တတိယခန်းတွင်မူ သယမ္မူရွှေဥာဏ်ရှင် တစ်ပါးတည်းရှိတော် မူကြောင်း ကျစ်ကျစ်လျစ်လျစ် ဖော်ပြသည်။ လေးနက်ပေါ်လွင်သည်။ လက်ခံလိုက်နာဖွယ် တင်ပြသည်။
ကျမ်းပြုသူ၏ ကာရန်ဖောက် ရေးဟန်ကို နိဒါန်းစကားမှ စတင်၍ လေ့လာနိုင်သည်။
“သြဘာမင်္ဂလာ၊ ထောမနာတင်စရာ၊ ချီးမွမ်း၍ မဆုံးနိုင်ပါသော (အလ်ဟမ်ဒိုလေလဒာ)နှုတ်ဝါစာတွင် (အာမြင်)ဆို၍၊ ဗိုလ်လူသတ္တ၀ါ (ဒွန္နယာ)တွင်၊ (ဘဏ္ဍာ)အများ၊ စံတင်အခြေ၊ ဥာဏ်ဘုရင် ကဝေတို့၊ မှန်မသွေ ချိန်စက်၍ ငြိမ်သက်စေရန်၊ လေးဘာသာတို့ ဗျာဒိတ်ကျမ်းဂန်၊ လမ်းအမှန်ကို ဧ၀ကံသိကြပါ လိမ့်မည်။ သို့ဖြစ်သည်မို့၊ နံ့သာဆီသင်းကြိုင်၊ သတင်းလှိုင်သည့်၊ မြိုင်ရွှေမြို့တွင်၊ မချို့သာစည်၊ ဘေးဆီးမကပ်၊ ဧကဗျည်း မှတ်သည်၊ ဈေးကြီးရပ်ဌာန(မအနာဝီ) (ဆိုင်ရစ်မြိရ်အလီ)၊ အတ်ကဘရ်(ခလီဖွာ)၊ ကျွန်တော်က ၎င်းညွှန်းဖော်ကာ(မအနီ) အဓိပ္ပာယ် ရေးသားသဖြင့် ထင်ရှားသိလွယ် က၀ိစွယ်တို၊ ငြိတွယ် မရှိ (ယာရဗဗာနာ) မြတ်စွာဇာတိ၊ တုမရှိ ၊ ပကတိတေဇာ ထွန်းတောက်ပါသော်၊ (အလဒာဟို တအာလာ)၏ ဗျာဒိတ်တော် ပဒေသာ၊ ဒေသနာကို နာယူပါက ပြည်လုံး ချမ်းသာ (အံဘေယာ) တမန်တို့(ကလမ်)နှုတ် ၀ါစာ၊ စံယူစရာ၊ ဥာဏ်နမူနာ။ အသုံးပြု ရှုစရာဖို့၊ မိုးချုန်းကာ ရွာချသကဲ့သို့၊ မဟာ ကရုဏာပုလဲ အာနီ၊ စီကုံးကာ ရတနာဘယက်၊ န၀ရတ်ယှက်ကဲ့သို့၊ (မအနီ) အနက် ဖော်၍ပမာ စာနိမိတ်ပြကာ ထုတ်လိုက်ပါသည်။ ဤစာအမည် ဘရှာရတ် အတ်ကဘရ် မဟာဗျာဒိတ်တော်၊ ဒုတိယ မောင်လွတ် အတ်ကဘရ်၊ မဟာဋိညာဉ် တမန် ဖွားတော် မူခန်း၊ တတိယတောင်ဟစ် အတ်ကဘရ် သယမ္မူ ရွှေဥာဏ်ရှင်တစ်ပါးတည်း အသီးအခြား ရှိတော်မူကြောင်း””
ဟူ၍ ဖြစ်ပါသည်။
ရှင်းလင်းလွယ်ကူ၍ နားဝင်ချိုသော ရေးဟန်ဖြစ်ပါသည်။ ကျစ်ကျစ် လျစ်လျစ်ရှိပါသည်။ ဖွားတော်မူခန်းတွင် ကျမ်းပြုသူက-
“၀ိညာဉ်တော် ကောင်းကင်တမန်သည် ဆွတ်ဆွတ်ဖြူ နုသော ငှက်သဏ္ဌာန်နှင့် ကောင်းကင်က မြေပြင်သို့ ဆင်း၍ မိခင်မာတာဘီဘီ (အမည်နာ) ထံသို့ ချဉ်းကပ်၍ နှုတ်တော်က အလွန်ချိုအေး မွတ်သိပ်သောအသံ၊ ဆလ၀တ် ဆလမ်နှင့် ပဋိညာဉ်တမန်တော် (အာခေရွတ် ဇမန်) ထင်ရှားတော်မူ လော။ တရားတော် နေမင်းစကြာ ထင်ရှားတော်မူလော။ မဟာကရုဏာတော် ထင်ရှားတော်မူလော။ ဟူ၍(ကေဒါ အရဗ်) လူမျိုးစကားနှင့် ဆုတောင်း မေတ္တာပို့သလျက် မိခင်ဝမ်းသို့ အတောင်နှင့် သပ်တော်မူ၏။ နှုတ်တော်က ဂုဏ်တော်ကို ရွတ်ဖတ်တော်မူ၏။ တစ်ဖန်ကောင်းကင် ဗိုလ်ခြေအရှင်၏ ပဋိညာဉ်တမန် ထင်ရှားတော်မူလော၊ သင်္ခါရအပေါင်းတို့ကို မွေးမြူဖန်တီးတော်မူသော သူ၏ပဋိညာဉ် တမန်ဖွားတော်မူ လော။ သခင်၏ ပဋိညာဉ်တမန်တော် ထင်ရှားတော်မူလော ဟု ဂုဏ်တော်ကို ချီးမွမ်း၍ အတောင်နှင့် သပ်တော်မူကြောင်း ကျမ်းစလာ၏””
ဟု ရေးဖွဲ့ပါသည်။
ခံ့ညားသောအကြောင်းအရာနှင့် ၊ လျက်များဆက်ကာ ဆက်ကာ သုံးပြီး ၀ါကျဖွဲ့ဟန်မှာ လိုက်ဖက်ပါသည်။ ထင်ရှားတော်မူလော၊ ထင်ရှားတော်မူလော ဟူသော အထပ်ထပ် ပန်ကြားဟန်၊ မွေးဖွားတော် မူလောဟူသော ပန်ကြားသံတို့ကို စာရှုသူတို့ ကြားယောင်လာစေပါသည်။
ပဋိညာဉ် မဟာတမန်တော်၏ ဖွားတော်မူခန်းကို မြင်ယောင်လာစေပါသည်။ ဖွားတော်မူခန်းတွင် ခံ့ညားပေါ်လွင်သော သရုပ်ဖော် အရေးအသားများနှင့် အတိပြီးသည်ဟု ဆိုနိုင်ပါသည်။ ကျမ်းပြုသူသည် –
ယာနဗီဆလံမွန်အလိုင်ကာ၊ ယာရဆွလ်ဆလန် မွန်အာလိုက်ကာ၊ အရဗီဖာရစီ မေတ္တာပို့ကို မူရင်းအတိုင်း ပြည့်ပြည့်စုံစုံ ရေးပြလိုက်ခြင်းသည် စာရှုသူတို့ကိုယ်တိုင် ပါဝင်ဆင်နွှဲ နေရသကဲ့သို့ ခံစားစေနိုင်ပါသည်။
ကျမ်းပြုသူသည် အရဗီမြန်မာနှစ်ဘာသာလုံး အကျွမ်းတ၀င် ရှိပါသည်။ မူရင်း ကျမ်းဂန်များကို လက်ရင်းထား၍ ဘာသာပြန် တင်ပြပုံများကို
“အင်နာ၊ အာအတွိုင်နာ၊ ကလ်ကောင်သရ်၊ ဖွဆွလေဒ၊ လေရဗေဗကာ ၀န်ဟရ်၊ အင်နာရှာနေ အကာ၊ ဟိုဝလ်အပဩတရ်။
ဧကန်အမှန် ငါထာဝရ ဘုရားသည်၊ အသင်အား ကောင်းချီးမင်္ဂလာ တိုးပွားခြင်း လက္ခဏာနှင့် ပြည့်စုံတော်မူသော ထာဝစဉ် အသက်စမ်းရေကို အသင်အား ပေးတော်မူ၏။ အသင်ကို မွေးမြူဖန်တီးတော်မူသော သခင်၊ ရွှေဥာဏ်ရှင်အား ဂါရ၀နှင့်တကွ စင်ကြယ်စွာ နမာဇ်ဖတ်၍ဘုရားဝတ်ပြုရမည်။ ၎င်းနောက် ကုရ်ဗာနီ(ယဇ်)ပူဇော်ရမည်။ ဧကန်အမှန် အသင့်အား ရန်ငြိုးဖွဲ့သောသူ အသင့်ရန်သူသည် အမျိုးအနွယ်ပြတ်၍ ပျက်စီးခြင်းသို့ ရောက်လတ္တံ့(၅၃)”
ဟု စူရာကောင်ဆရ် ဘာသာပြန်တွင်လည်းကောင်း။
“နွန် ၀လ်ကလာမေ၊ ၀မာယဆ်တရွန်၊ မာအန္နာ ဘေနေ့ မတေ၊ ရဗ္ဗေကာ၊ မ္မေကျနွန် ။
ဂုဏ်တော်အပေါင်းကို ရေးတော်မူသော မင်အိုးနှင့် မင်တံ သက်သေခံ၊ ၎င်း အထက်ဘ၀ဂ်္ဂရှိသော သင်ပုန်းကျောက်ဖျာ ကိုလည်းကောင်း၊ အသင်သည်ငါ၏ ကောင်းချီးမင်္ဂလာနှင့် ပြည့်စုံတော်မူသော ရတနာအပေါင်းတို့ကို အသင်အား ငါပေးတော်မူ၏။ အသင်နှင့်သာ ထိုက်တန်တော်မူ၏။ (၅၄) ”
တွင်လည်းကောင်း ကျမ်းပြုသူ၏ ဘာသာပြန်ရေးဟန်များကို လေ့လာနိုင်သည်။
ကျမ်းပြုသူ၏ ပရိသတ်သည် မြန်မာစာဖတ်ပရိသတ် ဖြစ်သည်။ ဖတ်သူနှင့် ဆီလျော်သော မြန်မာဆန်သော ရေးဟန်များကို –
“ရောင်ခြည်တစ်ထောင် ဆောင်တော်မူသော တရားတော် နေမင်း ထွန်းလင်း၍ (၂)”
ဟုလည်းကောင်း၊
“မကာမဟာဗောဓိဗိမာန်တော်သည် အလွန်စည်ကားခြင်း နှင့် ပြည့်စုံလေသည်ဖြစ်၍ (၂၀)”
ဟု လည်းကောင်း၊
“သောတာပန်ဆွာလေဟန်၊ သကဒါဂမ် ဆွဘေရန်၊ အနာဂမ်အာဗေဒန်၊ အရဟတ္တ အဆဟတ်၊ ဆွာဒေကန် သစ္စာတရားနှင့် ပြည့်စုံသောသူ၊ ဟာဆေလံ ဖိုလ်ဝင်သောသူ၊ ၀ိတက် ၀ိစာရ၊ ပီတိသုခ၊ ဧကဂဤတည်းဟူသော ဈာန် အင်္ဂါ ၅ ပါးနှင့် ယှဉ်သော သောတာပတ္တိမဂ်တရား၊ ဖိုလ်တရားတို့၏ မကိုဋ် သင်းကျစ်ဖြစ်တော်မူသော သူပေတည်းဟု ထာဝရဘုရားသခင် ရွှေဥာဏ်ရှင်ရဟင်သည် ကွရ်အံကလံ နှုတ်ကပတ် တော် ဆင်၍ ဟောစေတော်မူ၏။ (၅၅)”
ဟု လည်းကောင်း၊
“သုမင်္ဂလာနှုတ်ကပတ်တော်တရားကို သင်ကြား သောသူ တစ်ယောက်ကို မာရ်နတ်သား ဖျက်ဆီးဖို့ အလွန်ခက်ခဲ၏။ သီလစောင့်သော သူ တစ်ထောင်ကို ဖျက်ဆီးဖို့ အလွန်လွယ် ကြောင်း ကျမ်းစာလာ၏ (တေရ်မဇိကျမ်း) (၅၅)”
ဟုလည်းကောင်း၊
“ငါတို့ ကောင်းကင်တမန် မာလာယကာ နကခတ်တာရာ မီးလျှံပမာ ၀ရဇိန်ဘွဲ့ဖြူ လက်နက်ကိုင်ဎ စစ်မြေအရပ်မှာ စိုးကွပ် သော စစ်ဘုရင်များကဲ့သို့ ကင်းတို၊ ကင်းရှည်၊ အကပ်အခွာ ဗျူဟာစက္က၊ သေနင်္ဂါနှင် မဒုမဗျူဟာ၊ တပ်တာမြေ ကတုတ် တည်လုပ်သကဲ့သို့ ဗြဟ္မာအပေါင်းတို့ ခြံရံလျက် (၆၀)”
ဟု လည်းကောင်း ကျမ်းအနှံ့ လေ့လာနိုင်သည်။ အထူးသဖြင့် တောင်ဟစ်အကဘရ် ရူပအစိန္နေယျ၊ န္ဒဓိအစိန္တေယျ၊ ဥာဏ အစိန္နေယျ ဖွင့်ဆိုရှင်းလင်းရာ နောက်ဆုံး ကဏ္ဍ တစ်ခုလုံးသည် မြန်မာမှု ကျွမ်းပုံကို ဖော်ထုတ်သော အခန်းဟု ဆိုနိုင်သည်။ ကျမ်းဂန် စာပေလာ အသုံးအနှုန်းများကို လေ့လာပိုင်နိုင်ကြောင်း ပေါ်လွင်သည်။
ကျမ်းပြုသူသည် တင်ပြသော အကြောင်းအရာ၊ ရည်မှန်းသော ပရိသတ်နှင့်လျော်ညီသော ရေးဟန်ကို ရွေးချယ်ခဲ့သည်ဟု ဆိုနိုင်ပါ သတည်း။ ။
မှတ်ချက်- ပါမောက္ခ ဒေါက်တာအောင်ဇော် ရေးသားပြုစုသော တိုင်းရင်းမွတ်စလင် စာပြုစာဆို ပုဂ္ဂိုလ်ကျော်များ (၂) မှ ကူးယူဖော်ပြပါသည်။