ဇူလိုင် ၁၂၊ ၂၀၂၀
M-Media

-ဘောလီးဝုဒ်ရုပ်ရှင်လောကရဲ့ ဂန္တဝင်မင်းသားကြီးတစ်ဦးဖြစ်တဲ့ အမီသာ့ဘ် ဘချန်းဟာ ကိုရိုနာဗိုင်းရပ်စ် ကူးစက်ခံခဲ့ရတာ​ကြောင့် မနေ့မှာ ဆေးရုံတင်လိုက်ရပါတယ်။

မိမိမှာ ကိုရိုနာဗိုင်းရပ်စ် ကူးစက်နေပြီဆိုတာ ဆေးရုံက အတည်ပြုခဲ့ပြီး မိသားစုဝင်တွေကိုလည်း စစ်ဆေးထားကြောင်း၊ လွန်ခဲ့တဲ့ ၁၀ ရက်အတွင်း မိမိနဲ့ ထိတွေ့ဆက်ဆံခဲ့သူတွေအားလုံး ဗိုင်းရပ်စ်စစ်ဖို့ တိုက်တွန်းကြောင်း အသက် ၇၇ နှစ်အရွယ် အမီသာ့ဘ်က Twitter စာမျက်နှာမှာ ရေးသားခဲ့ပါတယ်။

အမီသာ့ဘ်နဲ့အတူ သားဖြစ်သူ အသက် ၄၄ နှစ်အရွယ် အဘီရှက် ဘချန်းလည်း ဗိုင်းရပ်စ်ကူးစက်နေပြီး မွမ်ဘိုင်းက ပုဂ္ဂလိကဆေးရုံတစ်ခုမှာ ၂ ဦးစလုံး ဆေးကုသမှု ခံယူနေပါတယ်။

အိန္ဒိယနိုင်ငံဟာ ကိုရိုနာဗိုင်းရပ်စ် ကူးစက်ပြန့်နှံမှုဒဏ်ကို အကြီးအကျယ်ခံစားနေရပြီး ကူးစက်သူ ၈ သိန်းကျော်၊ သေဆုံသူ ၂ သောင်းကျော် ရှိနေတာပါ။ ဗိုင်းရပ်စ်တိုက်ဖျက်ရေးလှုပ်ရှားမှုတွေမှာ အမီသာ့ဘ်ဟာ တက်တက်ကြွကြွ ပါဝင်လှုပ်ရှားနေသူလည်း ဖြစ်ပါတယ်။

ကိုရိုနာကန့်သတ်မိန့်ကြောင့် မတ်လကတည်းက ရိုက်ကူးမှုတွေ နားထားတဲ့ ဘောလီးဝုဒ် ရုပ်ရှင်လောကဟာ မကြာသေးခင်ကစလို့ ရိုက်ကူးမှု ပြန်လည်လုပ်ဆောင်လာပါတယ်။ ဒါပေမယ့် အသက် ၆၅ နှစ်ကျော်တဲ့ သရုပ်ဆောင်တွေကိုတော့ ရိုက်ကွင်းလာရောက်ခွင့် မပေးပါဘူး။

Ref: Aljazeera

ဇူလိုင် ၆၊ ၂၀၂၀
M-Media

-ကိုရိုနာဗိုင်းရပ်စ် ကူးစက်ပြန့်နှံ့မှုအန္တရာယ်ရှိနေတာကြောင့် ကက်ရှ်မီးယားဒေသမှာ ဘာသာတရားအားလုံးကို ဝတ်ပြုခွင့်ပိတ်ထားပေမယ့် ဟိန္ဒူတွေရဲ့ ဘာသာရေးဆိုင်ရာ လူစုလူဝေးလုပ်မှုကို အိန္ဒိယအစိုးရက ခွင့်ပြုပေးလိုက်ပါတယ်။

ကက်ရှ်မီးယားဟာ အစ္စလာမ်ဘာသာဝင်အများစုရှိရာ ဒေသဖြစ်ပါတယ်။ အရင်က ကိုယ်ပိုင်အုပ်ချုပ်ခွင့် ရထားပေမယ့် ဒီအုပ်ချုပ်ခွင့်ကို ပြီးခဲ့တဲ့နှစ်မှာ အိန္ဒိယအစိုးရက ရုပ်သိမ်းခဲ့ပြီး ဒေသခံတွေကို လှုပ်ရှားသွားလာခွင့် ကန့်သတ်ထားတာ ၁၁ လ ကျော်လာပြီ ဖြစ်ပါတယ်။

လုံခြုံရေးတပ်ဖွဲ့ဝင်တွေရဲ့ တရားလက်လွတ်သတ်ဖြတ်မှု၊ ဖမ်းဆီးမှု ညှင်းပမ်းနှိပ်စက်မှုတွေဟာ ဒီကာလမှာ အရင်ကထက် ဆိုးဝါးလာတယ်လို့ လေ့လာစောင့်ကြည့်သူတွေက ထောက်ပြထားပါတယ်။

ဇူလိုင်လ ၄ ရက်နေ့မှာ စတင်သက်ရောက်မယ့် အစိုးရရဲ့ အမိန့်တစ်ရပ်မှာ အစ္စလာမ်အပါအဝင် အခြားဘာသာအားလုံးရဲ့ ဘာသာရေးဆိုင်ရာ လုပ်ဆောင်မှုတွေ၊ လူစုလူဝေးလုပ်မှု​တွေကို ခွင့်မပြုပေမယ့် ကက်ရှ်မီးယားတောင်ပိုင်းက ဟိန္ဒူဘုရားကျောင်းတစ်ခုမှာ ဘုရားပွဲလုပ်ခွင့်ကို ခွင့်ပြုပေးခဲ့ပါတယ်။

ပုံမှန်အားဖြင့် ၄၂ ရက်ကြာမြင့်တဲ့ အဲဒီဘုရားပွဲကို လက်ရှိမှာ ၁၅ ရက်သာ ကျင်းပခွင့်ပေးထားပြီး တစ်နေ့ကို လူဦးရေ ၅၀၀ ဝင်ခွင့်ပေးမယ်လို့ ဆိုပါတယ်။ ဒီပွဲတော်ကို နိုင်ငံတစ်ဝှမ်းက ဟိန္ဒူဘာသာဝင်တွေ လာရောက်ကြမှာပါ။

အိန္ဒိယနိုင်ငံတစ်ဝှမ်းမှာ Covid-19 ကူးစက်မှု၊ သေဆုံးမှုဟာ လက်ရှိအချိန်အထိ မြင့်တက်နေပြီး အခုလို လူစုလူဝေး ပြုလုပ်ခွင့်ပေးတာကြောင့် ကိုဗစ်ကူးစက်မှု ထိန်းချုပ်လို့မရတဲ့အဆင့်အထိ ရောက်သွားမှာကို ဒေသခံတွေက စိုးရိမ်နေကြပါတယ်။

Ref: Anadolu Agency ‘