Tag: India

မတ် ၆၊ ၂၀၂၀
M-Media

-ကက်ရှ်မီးယားဒေသမှာ အဆက်အသွယ်တွေဖြတ်တောက်ပြီး ၇ လအကြာ ဗုဒ္ဓဟူးနေ့မှာတော့ အိန္ဒိယအာဏာပိုင်တွေဟာ အင်တာနက်လိုင်းတွေကို ပြန်ဖွင့်ပေးလိုက်ပါတယ်။

မတ်လ ၁၇ ရက်နေ့အထိ ၂ ပတ်သာ ဖွင့်ပေးမှာဖြစ်ပြီး မိုဘိုင်းဖုန်းတွေက အင်တာနက်မြန်နှုန်းကိုတော့ ကန့်သတ်ထားအုံးမယ်လို့ အိန္ဒိယအစိုးရရဲ့ ထုတ်ပြန်ချက်မှာ ဖော်ပြထားပါတယ်။ လိုင်းဆွဲတပ်ဆင်ထားတဲ့ အင်တာနက်လိုင်းတွေကိုလည်း မှတ်ပုံတင်ထားတဲ့သူတွေသာ သုံးလို့ရမှာ ဖြစ်ပါတယ်။

ကက်ရှ်မီးယားဒေသမှာ နှစ်ပေါင်း ၇၀ ကြာရှိလာခဲ့တဲ့ ကိုယ်ပိုင်အုပ်ချုပ်ခွင့်ကို ရုပ်သိမ်းပြီးတဲ့နောက် ပြီးခဲ့တဲ့နှစ် ဩဂုတ်လမှာ အိန္ဒိယအစိုးရဟာ အင်တာနက်အပါအဝင် ဆက်သွယ်ရေးလိုင်းတွေအားလုံးကို ဖြတ်တောက်ခဲ့တာပါ။ အိန္ဒိယဆန့်ကျင်ရေး ဆန္ဒပြမှုတွေ၊ ခွဲထွက်ရေးတောင်းဆိုနေတဲ့ သူပုန်တွေရဲ့ တိုက်ခိုက်မှုကို တားဆီးဟန့်တားဖို့ ဖြစ်တယ်လို့ ထုတ်ပြန်ခဲ့ပါတယ်။

ကက်ရှ်မီးယားမှာ အင်တာနက်ဖြတ်တောက်မှုဟာ ဒီမိုကရေစီနိုင်ငံတစ်ခုမှာ အရှည်ကြာဆုံး အင်တာနက်ဖြတ်တောက်မှု ဖြစ်ခဲ့ပါတယ်။ ဒေသ စက်မှုလက်မှုကုန်သည်ကြီးများအသင်းက ဒီလိုဖြတ်တောက်မှုကြောင့် အလုပ်အကိုင်ပေါင်း အနည်းဆုံး ၁ သိန်းခွဲလောက် ဆုံးရှုံးခဲ့ပြီး နည်းပညာကုမ္ပဏီတွေ အခြားဒေသကို ပြောင်းသွားတာကြောင့် ဒေသစီးပွားရေးမှာ ကြီးကြီးမားမား ထိခိုက်ခဲ့တယ်လို့ ပြောကြားခဲ့ပါတယ်။

အမေရိကန်နဲ့ ယူကေတို့အပါအဝင် ကမ္ဘာ့နိုင်ငံတွေကလည်း အိန္ဒိယရဲ့ ဒီလုပ်ဆောင်ချက်ကို ရှုတ်ချခဲ့ပါတယ်။ အိန္ဒိယတရားရုံးချုပ်က ဒီလို အင်တာနက်ဖြတ်တောက်မှုကို အမြဲတစေ လုပ်ဆောင်လို့မရဘူးလို့ သိပ်ကြာခင်ကပဲ ဆုံးဖြတ်ခဲ့ပါတယ်။

ကိုယ်ပိုင်အုပ်ချုပ်ခွင့် ရုပ်သိမ်းကာ ဆက်သွယ်ရေးလမ်းကြောင်းတွေအားလုံး ဖြတ်တောက်ပြီးတဲ့နောက် လုံခြုံရေးတပ်ဖွဲ့ဝင်တွေဟာ ကက်ရှ်မီးယားပြည်သူတွေအပေါ် ဖိနှပ်ညှင်းပမ်းမှုတွေ ကြီးကြီးမားမား ရှိခဲ့တယ်လို့ သတင်းတွေလည်း ထွက်ပေါ်ခဲ့ပါတယ်။

Ref: Aljazeera

ဖေဖော်ဝါရီ ၁၈၊ ၂၀၂၀
M-Media

-စစ်တပ်က အရာရှိ၊ အရာခံ ရာထူးတွေမှာ အမျိုးသမီးတွေဟာလည်း အမျိုသားတွေနဲ့တန်းတူ တာဝန်ထမ်းဆောင်ခွင့်ရှိတယ်လို့ အိန္ဒိယတရားရုံးချုပ်က မနေ့မှာ ဆုံးဖြတ်ချက်ချခဲ့ပြီး ဝန်ကြီးချုပ်မိုဒီအစိုးရရဲ့ လိင်ခွဲခြားမှု သဘောထားကို တရားဝင် ပယ်ချလိုက်တာလည်း ဖြစ်ပါတယ်။

အစိုးရအနေနဲ့ စစ်သမီးတွေကို အမြဲတမ်းတပ်ဖွဲ့ဝင်အဖြစ် လျှောက်ထားခွင့်ပေးဖို့၊ အခွင့်အလမ်းတွေ၊ အကျိုးခံစားခွင့်တွေ၊ ပင်စင်လစာ၊ ရာထူးတိုးမှု စတာတွေမှာ အမျိုးသားတွေနဲ့ တန်းတူအခွင့်အရေးပေးဖို့လည်း တရားရုံးချုပ်က အစိုးရကို အမိန့်ပေးခဲ့ပါတယ်။

လက်ရှိ အိန္ဒိယစစ်တပ်မှာ အမျိုးသမီးတွေကို ၁၄ နှစ်အထိသာ တာဝန်ထမ်းဆောင်နိုင်တဲ့ ရေတိုခန့်အပ်မှုမျိုးနဲ့ ခန့်ထားတာဖြစ်ပြီး စစ်တပ်ရဲ့ တရားရေးနဲ့ ပညာရေးနယ်ပယ်တွေမှာသာ အမြဲတမ်းတပ်ဖွဲ့ဝင်အဖြစ် ခန့်ထားတာ ဖြစ်ပါတယ်။

အစိုးရ၏ ခွဲခြားမှု

ဝန်ကြီးချုပ်မိုဒီ ဦးဆောင်တဲ့ အိန္ဒိယအစိုးရဟာ အမျိုသမီးတွေကို ဗိုလ်မှူးကြီး၊ ဗိုလ်မှူးချုပ် စတဲ့ ရာထူးတွေခန့်ထားမှုကို ဆန့်ကျင်ကြောင်း ပြီးခဲ့တဲ့တစ်ပတ်မှာ ပြောကြားခဲ့ပြီး စစ်သားတော်တော်များများ ကျေးလက်ဒေသတွေကနေ လာတဲ့အတွက် အမျိုးသမီးအရာရှိရဲ့ ကွပ်ကဲမှုကို နာခံဖို့ စိတ်ပိုင်းဆိုင်ရာအရ သင်ကြားခံရမှု မရှိခဲ့ဘူးလို့ ထုတ်ပြန်ခဲ့ပါတယ်။

အမျိုးသားနဲ့ အမျိုးသမီးအရာရှိတွေဟာ ရုပ်ပိုင်းဆိုင်ရာ ကွဲပြားမှုတွေ ရှိတဲ့အတွက် တန်းတူအခွင့်အရေးပေးလို့ မရဘူးလို့လည်း အိန္ဒိယအစိုးရက ဆိုပါတယ်။

တရားရုံးချုပ်ကတော့ အစိုးရရဲ့ ဒီအမြင်တွေဟာ စိတ်ပျက်စရာကောင်းပြီး၊ စစ်တပ်မှာ ကျား၊ မ တန်းတူညီမျှမှုရရှိရေး စိတ်ဓာတ်တွေကို ပြောင်းပေးဖို့လည်း အစိုးရကို တိုက်တွန်းခဲ့ပါတယ်။ အမျိုးသမီးစစ်သည်တွေကို တိုက်ပွဲတွေမှာ တာဝန်ပေးရေးကိစ္စကိုတော့ တရားရုံးချုပ်က ဆုံးဖြတ်ခဲ့ခြင်းမရှိဘဲ သက်ဆိုင်ရာ အထက်အရာရှိကသာ ဆုံးဖြတ်နိုင်တယ်လို့ ဆိုပါတယ်။

ကမ္ဘာ့အကြီးဆုံးစစ်တပ်တွေထဲက တစ်ခုဖြစ်တဲ့ အိန္ဒိယစစ်တပ်မှာ အမျိုးသမီးစစ်သည်တွေကို တိုက်ပွဲမှာ တာဝန်ပေးရေးကိစ္စကို နှစ်ပေါင်းအ‌တော်ကြာကတည်းက ‌‌ငြင်းခုံမှုတွေ ရှိခဲ့တာဖြစ်ပါတယ်။ ဖမ်းဆီးခံရတဲ့အချိန် အမျိုးသမီးစစ်သည်တွေရဲ့ အင်အားနည်းမှု၊ ရှေ့တန်းက အခြေအနေတွေကို ရင်ဆိုင်နိုင်မှု စတဲ့ကိစ္စတွေနဲ့ပတ်သက်ပြီး စိုးရိမ်မှုတွေ ရှိနေတာပါ။

အိန္ဒိယလေတပ်နဲ့ ရေတပ်တို့ကတော့ အမျိုးသမီးတွေစစ်သည်တွေကို အမြဲတမ်းတပ်ဖွဲ့ဝင်တွေအဖြစ် လက်ခံပြီး၊ တိုက်ပွဲဝင်နိုင်မယ့် ရာထူးတွေမှာပါ ခန့်အပ်ထားပါတယ်။

ကမ္ဘာ့နိုင်ငံတော်တော်များများမှာ အမျိုးသမီးတွေကို စစ်တပ်မှာ ဝင်ရောက်အမှုထမ်းခွင့်ပြုပေမယ့် အမေရိကန်၊ ဂျာမနီ၊ အစ္စရေးနဲ့ ဩစတေးလျတို့အပါအဝင် နိုင်ငံတစ်ချို့ကသာ အမျိုးသမီးတွေကို တိုက်ပွဲမှာ တာဝန်ပေးလေ့ရှိပါတယ်။

စစ်တပ်က ဆေးဖက်မဟုတ်တဲ့ နေရာတွေမှာ အိန္ဒိဟာ ၁၉၉၂ ခုနှစ်ကစပြီး အမျိုးသမီးတွေကို ခန့်အပ်တာဝန်ပေးခဲ့ပေမယ့် လက်ရှိ စစ်သည်အင်အား ၁ သန်းမှာ အမျိုးသမီးတပ်ဖွဲ့ဝင်အရေအတွက်က ၄ ရာခိုင်နှုန်းသာ ရှိပါတယ်။

Ref: Aljazeera