ဇန်နဝါရီ ၂၀၊ ၂၀၂၀
M-Media
-၂၀၁၉ ခုနှစ်အတွင်း ကမ္ဘာပေါ်က သန်းကြွယ်သူဌေး ၂ ထောင်ကျော်ရဲ့ ပိုင်ဆိုင်မှုဟာ ဆင်းရဲသား သန်း ၄၆၀၀ ကျော်ရဲ့ ပိုင်ဆိုင်မှုထက် များပြားနေပြီး၊ လုပ်ခမရတဲ့၊ လုပ်ခနည်းတဲ့ အမျိုးသမီးတွေ၊ မိန်းကလေးတွေရဲ့ လုပ်အားကလည်း ကမ္ဘာ့စီးပွားရေးမှာ နည်းပညာလုပ်ငန်းထက် ၃ ဆလောက် ပါဝင်နေတယ်လို့ Oxfam အဖွဲ့က ဒီကနေ့မှာ ထုတ်ပြန်လိုက်ပါတယ်။
Oxfam အဖွဲ့ဟာ ကင်ညာနိုင်ငံမြို့တော် နိုင်ရိုဘီမှာ အခြေစိုက်တဲ့ ပရဟိတအဖွဲ့တစ်ခုဖြစ်ပြီး ဆွစ်ဇာလန်နိုင်ငံ ဒါဗို့စ်မြို့မှာပြုလုပ်မယ့် ကမ္ဘာ့စီးပွားရေးဖိုရမ်မတိုင်ခင်Time to Care အမည်နဲ့ ဒီအစီရင်ခံစာကို ထုတ်ပြန်ခဲ့တာ ဖြစ်ပါတယ်။
ကမ္ဘာတစ်ဝှမ်း အမျိုးသမီးတွေရဲ့ စုစုပေါင်း အလုပ်လုပ်ချိန်ဟာ ၁၂.၅ ဘီလီယံနာရီ ရှိနေပေမယ့် လုပ်ခလစာ မရတာ၊ အသိအမှတ်ပြု မခံရတာတွေ ရှိတယ်လို့လည်း အစီရင်ခံစာမှာ ထည့်သွင်းဖော်ပြထားပါတယ်။ သူတို့ရဲ့ လုပ်အားဟာ တစ်နှစ်ကို ကန်ဒေါ်လာ ၁၀.၈ ထရီလီယံလောက် တန်ကြေးရှိပြီး၊ ကမ္ဘာ့စီးပွားရေးမှာ နည်းပညာလုပ်ငန်းရဲ့ ပါဝင်မှုတန်ဖိုးထက် ၃ ဆလောက် ပိုများနေတာ ဖြစ်ပါတယ်။
Oxfam Inida ရဲ့ စီအီးအိုဖြစ်သူ အီသာ့ဘ် ဘီဟာရ်က လခမရဘဲ လုပ်နေရတဲ့ အမျိုးသမီးတွေရဲ့ လုပ်အားတွေဟာ ကမ္ဘာ့စီးပွားရေးမှာ ပျောက်ကွယ်နေတဲ့ အင်ဂျင်တစ်ခု ဖြစ်တယ်ဆိုတာကို အလေးထားရမယ့်အချိန် ရောက်နေပြီး၊ ဒါကို ပြောင်းလဲဖို့ လိုအပ်တယ်လို့ ပြောကြားခဲ့ပါတယ်။
အိန္ဒိယမှာ အမျိုးသမီးတွေဟာ သောက်သုံးရေရဖို့ ၃ ကီလိုမီတာလောက် သွားခပ်ရတာ၊ ချက်ပြုတ်၊ လျှော်ဖွပ်ရတာ၊ ကလေးတွေကို ပြုစုပျိုးထောင်ရတာ၊ လုပ်ခအလွန်နည်းတဲ့ အလုပ်တွေကို လုပ်ကိုင်ရတဲ့အချိန်ဟာ တစ်နေ့ကို ၁၆ နာရီကနေ ၁၇ နာရီအထိ ရှိနေတယ်လို့လည်း ထောက်ပြခဲ့ပါတယ်။ ဒီအမျိုးသမီးတွေကို Buchu Devi လို့ ခေါ်ပါတယ်။
“Buchu Devi ဆိုတာ တစ်ယောက်တည်းကို ပြောတာမဟုတ်ပါဘူး။ အိန္ဒိယမှာနေတဲ့ ကျွန်တော်ဟာ ဒီအမျိုးသမီးတွေကို နေ့စဉ်တွေ့ရပြီး၊ ကမ္ဘာတစ်ဝှမ်းလုံးမှာလည်း ဒီလိုအမျိုးသမီးတွေ ရှိနေပါတယ်။ ဒါကို ပြောင်းလဲဖို့ လိုပါတယ်။”
Ref: Reuters
