Tag: India

စက်တင်ဘာ ၂၇၊ ၂၀၂၂
M-Media

-စာလုံးပေါင်းမှားတဲ့ ဒါလစ် ဇာတ်နိမ့်ကျောင်းသားတစ်ဦးကို ဆရာက ရိုက်နှက်သတ်ဖြတ်တဲ့ အဖြစ်အပျက်တစ်ခု ဖြစ်ပွားပြီးနောက်ပိုင်း အိန္ဒိယနိုင်ငံမှာ ဆန္ဒပြမှုတွေ ဖြစ်ပေါ်နေပါတယ်။

ဒီအဖြစ်အပျက်ဟာ နိုင်ငံမြောပ်ပိုင်း အူတာ ပရာဒက်ရှ်ပြည်နယ်မှာ ဖြစ်ပွားခဲ့တာပါ။

အသက် ၁၅ နှစ်အရွယ် နီခီလ်ဒိုရီဟာ အခုလအစောပိုင်းက ပြုလုပ်တဲ့ စာမေးပွဲမှာ စာလုံးပေါင်းတစ်လုံး မှားခဲ့ပြီး အဲဒီအတွက် အတန်းပိုင်ဆရာက တုတ်နဲ့ ရိုက်နှက် ကန်ကျောက်ခဲ့ပါတယ်။ အခင်းဖြစ်ချိန်မှာ ဒိုရီတစ်ယောက် သတိလစ်မေ့မြောသွားခဲ့ပြီး အဲဒီဒဏ်ရာနဲ့ပဲ အခုတစ်ပတ် တနင်္လာနေ့မှာ သေဆုံးသွားပါတယ်။

ကျူးလွန်သူဟာ လက်ရှိမှာ ထွက်ပြေးနေပြီး မကြာခင် ဖမ်းမိလိမ့်မယ်လို့ ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြပါတယ်။

မိသားစုက ဒီအဖြစ်အပျက်ဟာ ဇာတ်နိမ့်တွေအပေါ် မုန်းတီးမှုကို အခြေခံ ဖြစ်ပွားတဲ့ အမုန်းရာဇ၀တ်မှု ဖြစ်တယ်လို့ မှတ်ချက်ပေးပါတယ်။ အခင်းဖြစ်ပွားတဲ့ အော်ရိုင်ယာခရိုင်မှာ ဆန္ဒပြမှုတွေ ဖြစ်ပွားနေပြီး ကျူးလွန်သူကို အမြန်ဆုံး အရေးယူဖို့နဲ့ ဒါလစ်လူ့အဖွဲ့အစည်းကို ကာကွယ်ပေးဖို့ တောင်းဆိုနေကြပါတယ်။

အိန္ဒိယရဲ့ အခြေခံဥပဒေမှာ ဇာတ်ခွဲခြားမှုစနစ်ကို ပယ်ဖျက်ထားပေမယ့် မြေပြင်မှာတော့ ကျယ်ကျယ်ပြန့်ပြန့် ရှိနေပါတယ်။ ဇာတ်နိမ့်တွေအပေါ် ဇာတ်မြင့်တွေရဲ့ တိုက်ခိုက်မှုဟာ ဟိန္ဒူအမျိုးသားရေးပါတီ BJP အာဏာရတဲ့ ၂၀၁၄ ခုနှစ်ကတည်းက သိသိသာသာ မြင့်တက်လာခဲ့ပါတယ်။

Ref: Aljazeera

စက်တင်ဘာ ၁၅၊ ၂၀၂၂
M-Media

-အိန္ဒိယနိုင်ငံမြောက်ပိုင်း အူတာပရာဒက်ရှ်ပြည်နယ် လက်ခ်ဟင်ပူရ် ခရိုင်မှာ ဟိန္ဒူဇာတ်နိမ့် ညီအမနှစ်ဦး အဓမ္မကျင့်သတ်ဖြတ်ခံရမှူ ဖြစ်ပွားခဲ့ပြီး ရာဇ၀တ်ကောင်တွေအပေါ် အာဏာပိုင်တွေရဲ့ ကိုင်တွယ်မှုနဲ့ပတ်သက်ပြီး ၀ေဖန်မှုတွေလည်း မြင့်တက်လာပါတယ်။

ညီအမနှစ်နှစ်ဦးရဲ့ အလောင်းတွေကို သစ်ပင်တစ်ပင်မှာ တွဲလောင်းချည်ထားတာကို ဗုဒ္ဓဟူးနေ့မှာ ရွာသားတွေက တွေခဲ့ကြတာပါ။

ဒီကိစ္စနဲ့ပတ်သက်ပြီး သံသယရှိသူ ၆ ဦးကို ဖမ်းဆီးထားတယ်လို့ ရဲတပ်ဖွဲ့က ထုတ်ပြန်ပါတယ်။ အသတ်ခံရသူ ညီအစ်မနှစ်ဦးစလုံးဟာ အသက် ၁၈ နှစ်အောက်သာ ရှိပါသေးတယ်။

ဟိန္ဒူအမျိုးသားရေးပါတီ BJP အာဏာရခဲ့တဲ့ ၂၀၁၄ ခုနှစ်ကစပြီး ဒါလစ်ဇာနိမ့်တွေဟာ ဟိန္ဒူအစွန်းရောက်တွေရဲ့ တိုက်ခိုက်မှုကို ပိုမိုခံစားလာရပါတယ်။

၂၀၂၀ ခုနှစ်ကလည်း အူတာပရာဒက်ရှ်ပြည်နယ် ဟက်သရာခရိုင်မှာ အသက် ၁၉ နှစ်အရွယ် ဒါလစ်အမျိုးသမီးငယ်တစ်ဦး အုပ်စုဖွဲ့ မုဒိမ်းကျင့် သတ်ဖြတ်ခံခဲ့ရပြီး အစိုးရက ထိထိရောက်ရောက် ကိုင်တွယ်ဆောင်ရွက်မှု မရှိတဲ့အတွက် နိုင်ငံတစ်၀ှမ်း ဆန္ဒပြမှုတွေ အကြီးအကျယ် ဖြစ်ပွားခဲ့ပါတယ်။

အခုကိစ္စမှာ အသတ်ခံရသူတွေဟာ ကျူးလွန်သူတွေနဲ့ ရင်းနှီးတယ်လို့ ရဲတပ်ဖွဲ့က ထုတ်ပြန်ပါတယ်။ ကျန်ရစ်တဲ့ မိသားစု၀င်တွေက ရဲတပ်ဖွဲ့ရဲ့ ထုတ်ပြန်ချက်ဟာ မှားယွင်းပြီး ညီအစ်အမ နှစ်ဦးစလုံး ပြန်ပေးဆွဲ ခံခဲ့ရတာလို့ ပြောပါတယ်။

ကျူးလွန်သူတွေဟာ မိန်းကလေးငယ်နှစ်ယောက်ကို သကြားခင်းထဲ ခေါ်ဆောင်ကာ အဓမ္မပြုကျင့် သတ်ဖြတ်ခဲ့ပြီး အလောင်းကို ကိုယ့်ကိုယ် ကြိုးစွဲချတဲ့ပုံစံ သစ်ပင်မှာ ချည်ထားခဲ့တာ ဖြစ်ပါတယ်။

Ref: BBC

စက်တင်ဘာ ၃၊ ၂၀၂၂
M-Media

-INS Vikrant လို့ အမည်ပေးထားတဲ့ အိန္ဒိယရဲ့ ပထမဆုံး ပြည်တွင်းဖြစ် လေယာဥ်တင်သင်္ဘောရဲ့ တပ်တော်၀င်အခမ်းအနားကို မနေ့က ကျင်းပခဲ့ပါတယ်။

ဒေါ်လာ ၂.၅ ဘီလီယံ ကုန်ကျတဲ့ ဒီသင်္ဘောကို နိုင်ငံတောင်ပိုင်းက ကိုချင် သင်္ဘောကျင်းမှာ တည်ဆောက်တာဖြစ်ပါတယ်။ ဒီဇိုင်းဆွဲမှုနဲ့ တည်ဆောက်မှုကာလ စုစုပေါင်း ၁၈ နှစ် ကြာခဲ့ပါတယ်။

အိန္ဒိယဟာ စစ်ရေးအသုံးစားရိတ်မှာ ကမ္ဘာ့ တတိယမြောက် အများဆုံးနိုင်ငံပါ။ ရန်ဖက် ပါကစ္စတန်နဲ့ နယ်မြေအငြင်းပွားတဲ့ ပြဿနာကနေ ပြီးခဲ့တဲ့နှစ်အနည်းငယ်အတွင်း အင်ဒို-ပစိဖိတ်ဒေသမှာ အမေရိကန်၊ တရုတ်တို့နဲ့ ရေတပ်အင်အား ပခုံးချင်း ယှဥ်နိုင်ရေးကို ပိုပြီး အလေးပေးလာပါတယ်။

INS Vikrant ကို ရေချနိုင်မှုကြောင့် ဗျူဟာမြောက် စစ်သင်္ဘောတွေ အောင်မြင်စွာ တည်ဆောက်အသုံးပြုနိုင်တဲ့ လက်တစ်ဆုပ်စာ နိုင်ငံတွေထဲမှာ အိန္ဒိယနိုင်ငံလည်း ပါ၀င်လာတာ ဖြစ်ပါတယ်။

နည်းပညာနယ်ပယ်နဲ့ ကာကွယ်ရေးပစ္စည်း ထုတ်လုပ်မှုမှာ ကိုယ့်အားကိုယ်ကိုးနိုင်ရေး အိန္ဒိယရဲ့ ကြိုးပမ်းမှာ INS Vikrant လေယာဥ်တင်သင်္ဘောက သမိုင်းမှတ်တိုင်သစ်တစ်ခု စိုက်ထူလိုက်နိုင်တာဖြစ်တယ်လို့ တပ်တော်၀င်ပွဲ အခမ်းအနားမှာ ၀န်ကြီးချုပ် မိုဒီက ပြောကြားခဲ့ပါတယ်။

Ref: Washintong Post

ဇူလိုင် ၁၈၊ ၂၀၂၂
M-Media

-ပြန်ပေးဆွဲခံရတဲ့ပုံစံမျိုး ဇာတ်လမ်းဆင်ကာ မိဘတွေဆီက ငွေညှစ်ဖို့ ကြိုးစားတဲ့ အမေရိကန်အမျိုးသမီးတစ်ဦးကို အိန္ဒိယရဲတပ်ဖွဲ့က မြို့တော်ဒေလီမှာ ဖမ်းဆီးလိုက်ပါတယ်။

အသက် ၂၇ နှစ်အရွယ် အဲဒီအမျိုးသမီးဟာ မေလ ၃ ရက်နေ့က အိန္ဒိယနိုင်ငံကို ရောက်ရှိခဲ့ပြီး သုံးဖို့ငွေပြတ်သွားတာကြောင့် ဒီလိုကြံစည်တာလို့ ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

အမေရိကန်သံရုံးက အိန္ဒိအစိုးရထံ ဒီကိစ္စကို အကြောင်းကြားပြီးတဲ့နောက် အိန္ဒိယရဲတပ်ဖွဲ့ဟာ မိဘတွေထံပေးပို့တဲ့ အီးမေးလ်၊ အင်တာနက် ဖုန်းခေါ်ဆိုမှုတွေကို ခြေရာခံကာ ဒေလီမြို့ ဆင်ခြေဖုံးမှာ ဖမ်းဆီးနိုင်ခဲ့တာ ဖြစ်ပါတယ်။

ဒီဇာတ်လမ်းဆင်မှုမှာ အသက် ၃၁ နှစ်အရွယ် နိုက်ဂျီးရီးယားအမျိုးသားတစ်ဦးလည်း ပါ၀င်ပါတယ်။ သူတို့နှစ်ယောက်ဟာ အွန်လိုင်းကနေတွေ့ပြီး အိန္ဒိယရောက်တဲ့အခါ အတူနေထိုင်ကြတာဖြစ်ပါတယ်။

နှစ်ယောက်စလုံး နေထိုင်ခွင့်သက်တမ်းကျော်လွန်နေပြီး လိုအပ်တဲ့အရေးယူမှုတွေ ဆက်လက်လုပ်ဆောင်သွားမယ်လို့ ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

Ref: BBC