News @ M-Media

Tag: Indian Muslims

  • မွတ်စလင်လူငယ်အား ရိုက်သတ်ခဲ့သူများကို အိန္ဒိယတရားရုံးက ထောင် ၁၀ နှစ်ချ

    မွတ်စလင်လူငယ်အား ရိုက်သတ်ခဲ့သူများကို အိန္ဒိယတရားရုံးက ထောင် ၁၀ နှစ်ချ

    ဇူလိုင် ၆၊ ၂၀၂၃

    M-Media


    – လွန်ခဲ့တဲ့ ၄ နှစ်က မွတ်စလင်လူငယ် တစ်ဦးကို ၀ိုင်းရိုက်ခဲ့တဲ့ အမျိုးသား ၁၀ ဦးကို အိန္ဒိယတရားရုံးက ထောင်ဒဏ် ၁၀ နှစ်စီ ချမှတ်ခဲ့ပါတယ်။ 

    ၂၀၁၉ ခုနှစ် ဇွန်လ ၁၉ ရက်နေ့က နိုင်ငံအရှေ့ပိုင်း ဂျာ့ခ်ဟန်းပြည်နယ်မှာ ဖြစ်ပွားခဲ့တာပါ။ အသက် ၂၄ နှစ်အရွယ် တက်ဘ်ရက်ဇ် အန်ဆာရီကို ဆိုင်ကယ်ခိုးတယ်ဆိုပြီး ဟိန္ဒူလူအုပ်က ၀ိုင်းရိုက်ခဲ့တာ ဖြစ်ပါတယ်။ 

    အန်ဆာရီကို ဓာတ်တိုင်မှာ ကြိုးတုပ်ထားပြီး လူအုပ်က ၀ိုင်း၀န်း ရိုက်နှက်နေတဲ့ ဗီဒီယိုတစ်ခုလည်း အွန်လိုင်းမှာ ပျံ့နှံ့ခဲ့ပါတယ်။ လူအုပ်ဟာ အန်ဆာရီကို ဘာသာရေးအကြမ်းဖက်မှုလည်း ပြုလုပ်ခဲ့ပါတယ်။ 

    ဟိန္ဒူဘုရားရှိခိုးစာတွေကို အတင်းအဓမ္မ ဆိုခိုင်းခဲ့တာပါ။ လူအုပ်ဟာ တညလုံး အန်ဆာရီကို နှိပ်စက်ခဲ့ပါတယ်။ ရဲတပ်ဖွဲ့က နောက်တစ်နေ့မှ လာရောက်ဟန့်တားပြီး အန်ဆာရီကို ဖမ်းခေါ်သွားခဲ့ပါတယ်။ 

    အန်ဆာရီဟာ ဦးခေါင်းထိခိုက်မိကာ ၃ ရက်ကြာ ၀ေဒနာအပြင်းအထန် ခံစားခဲ့ရပြီး ဇွန်လ ၂၂ ရက်နေ့ ဆေးရုံမှာ သေဆုံးသွားခဲ့ပါတယ်။ 

    ဒီကိစ္စနဲ့ပတ်သက်ပြီး ၀ေဖန်မှုတွေ မြင့်တက်လာတာကြောင့် ဂျာ့ခ်ဟန်း ရဲတပ်ဖွဲ့ဟာ ကျူးလွန်သူတွေကို ဖမ်းဆီးတရားစွဲဆိုခဲ့ပါတယ်။ ပထမပိုင်းမှာ လူသေမှုနဲ့သာ စွဲချက်တင်ခဲ့ပြီး၊ ပြစ်တင်ခံရတဲ့အတွက် နောက်ပိုင်းမှ လူသတ်မှု ထပ်ပေါင်းထည့်ခဲ့တာပါ။ 

    ပြီးခဲ့တဲ့တစ်ပတ် တရားရုံးက စီရင်ချက်ချရာမှာ လူသတ်မှုအတွက် သက်သေမခိုင်လုံဆိုတဲ့အကြောင်းပြချက်ပေးပြီး လူသေမှုနဲ့သာ လူ ၁၀ ဦးကို ထောင်ဒဏ် ၁၀ နှစ်ချီ ချမှတ်ခဲ့ပါတယ်။ 

    Ref: BBC

  • ခတီဂျာဘီဘီ (သို့မဟုတ်) ကလေးငယ်တစ်သောင်းကို မဖိတ်မစင် မွေးပေးနိုင်ခဲ့သူ

    ခတီဂျာဘီဘီ (သို့မဟုတ်) ကလေးငယ်တစ်သောင်းကို မဖိတ်မစင် မွေးပေးနိုင်ခဲ့သူ

    ဇူလိုင် ၁၊ ၂၀၂၃

    M-Media 


    -အိန္ဒိယက အမျိုးသမီး သူနာပြုတစ်ဦးဟာ လူ့အဖွဲ့အစည်းအတွင်း စွမ်းစွမ်းတမံ အကျိုးပြုနိုင်ခဲ့မှုကြောင့် မကြာသေးခင်က အစိုးရရဲ့ ဂုဏ်ပြုတစ်ခုကို ရရှိခဲ့ပါတယ်။ 

    သူကတော့ နိုင်ငံတောင်ပိုင်း တမီလ်နာဒူးပြည်နယ်က ခတီဂျာ ဘီဘီပါ။ ၃၃ နှစ်တာ သူနာပြုကာလအတွင်း ကလေးငယ်ပေါင်း တစ်သောင်းကို အောင်မြင်စွာ မွေးဖွားပေးနိုင်ခဲ့ပါတယ်။ 

    “ကျွန်မမွေးဖွားပေးလိုက်တဲ့ ကလေးငယ်တစ်သောင်းလုံး ကျွန်မ ကြည့်ရှုစောင့်ရှောက်မှုကာလအတွင်း တစ်ဦးမှ သေဆုံးခဲ့ခြင်းမရှိပါဘူး။ ဒီအတွက် ဂုဏ်ယူမိပါတယ်” လို့ အသက် ၆၀ အရွယ် ခတီဂျာဘီဘီက ပြောပါတယ်။

    သူမဟာ မကြာသေးခင်ကပဲ ပင်စင်ယူလိုက်ပြီ ဖြစ်ပါတယ်။ 

    ပြည်နယ်ကျန်းမာရေး၀န်ကြီး ဆူဘရာမာနီယန်က ခတီဂျာဘီဘီ မွေးပေးခဲ့တဲ့ ကလေးငယ်တွေ တစ်ဦးမှ သေဆုံးခြင်းမရှိတဲ့ အောင်မြင်မှုအတွက် အစိုးရက ဂုဏ်ပြုခဲ့တယ်လို့ ပြောပါတယ်။ 

    အိန္ဒိယဟာ အရင်က ကမ္ဘာပေါ်မှာ မွေးကင်းစကလေးငယ် သေဆုံးမှု အများဆုံးတိုင်းပြည် ဖြစ်ပါတယ်။ လွန်ခဲ့တဲ့ နှစ် ၃၀ အတွင်း သေဆုံးမှုအရေအတွက်ဟာ သိသိသာသာ ကျဆင်းခဲ့ပြီး အခုဆိုရင် ကမ္ဘာပျမ်းမျှ သေဆုံးမှုပမာဏလောက်သာ ရှိပါတော့တယ်။ 

    ဒီအောင်မြင်မှုမှာ ခတီဂျာဘီဘီလို ကျွမ်းကျင် သူနာပြုတွေက အရေးပါတဲ့အခန်းကဏ္ဍမှာ ပါ၀င်ပါတယ်။ အိန္ဒိယဟာ ကလေးမွေးဖွားမှုမှာ သူနာပြုတွေ၊ အရပ်လက်သည်တွေကိုသာ အဓိက အားကိုးနေရတဲ့ တိုင်းပြည်တစ်ခု ဖြစ်ပါတယ်။ 

    ခတီဂျာဘီဘီရဲ့ သူနာပြုဘ၀ဟာ ၁၉၉၀ မှာ စတင်ပါတယ်။ 

    “အဲဒီတုန်းက ကျွန်မ ကိုယ်၀န် ၇ လ ရှိနေပြီ။ ကလေးမွေးပြီးတော့ ၂ လပဲနားပြီး အလုပ်ပြန်၀င်ပါတယ်။ ကလေးမွေးတဲ့အချိန်မှာ အမျိုးသမီးတွေ ဘယ်လောက် စိတ်သောကရောက်နေလဲဆိုတာ ကျွန်မ နားလည်တယ်။ ဒါ့ကြောင့် သူတို့ စိတ်အေးဖို့၊ သက်သောင့်သက်သာဖြစ်ဖို့ကို ကျွန်မ အမြဲတမ်း ဦးစားပေးပါတယ်”

    မိခင်ကို အားကျသူ 

    ခတီဂျာဘီဘီဟာ ပြည်နယ်မြို့တော် ချနိုင်းကနေ ၉၃ မိုင်၀ေးတဲ့ လူနေထူထပ်တဲ့ ရွာလေးတစ်ရွာမှာ ဆေးခန်းဖွင့်ထားပါတယ်။ သူ့ဆေးခန်းမှာ ရိုးရိုးမွေးလူနာပဲ လက်ခံပြီး ခွဲမွေးရမယ့်လူနာတွေကို ခရိုင်ဆေးရုံကို ပို့ပေးပါတယ်။

    သူနာပြုတစ်ဦးဖြစ်တဲ့ မိခင် ဇူလိုင်ခါဘီဘီကို အားကျပြီး မိခင်ခြေရာနင်းခဲ့တာလို့ ခတီဂျာဘီဘီက ပြောပါတယ်။ 

    “ငယ်ငယ်လေးကတည်းက ဆေးထိုးအပ်တွေဘာတွေနဲ့ ကျွန်မ ကစားတယ်။ ဆေးရုံအနံ့တွေဆိုလည်း အသားကျနေတော့တာ” 

    ခတီဂျာဘီဘီတို့ ငယ်စဥ်က အိန္ဒိယမှာ ကျန်းမာရေးစောင့်ရှောက်မှု အလွန်အားနည်းပါတယ်။ ၀ေးလံခေါင်းဖျားဒေသတွေမှာ ဆေးရုံတွေ၊ ဆရာ၀န်တွေ လုံလုံလောက်လောက်မရှိပါဘူး။ 

    “ကျွန်မ သူနာပြု စလုပ်တုန်းက ဆရာ၀န်တစ်ယောက်၊ သူနာပြုနှစ်ယောက်နဲ့ အကူ ၇ ယောက်ပဲရှိတယ်။ အစပိုင်းနှစ်တွေမှာ မအားရအောင် အလုပ်လုပ်ရတာ။ ကိုယ့်ကလေးကိုယ်တောင် မကြည့်အားဘူး။ မိသားစုတာ၀န်တွေ ကျွန်မ လစ်ဟင်းခဲ့ပါတယ်။ ဒါပေမယ့် တန်ဖိုးဖြတ်မရတဲ့ အတွေ့အကြုံတွေကို ကျွန်မ ရခဲ့တယ်” 

    ၁၉၉၀ မှာ အိန္ဒိယနိုင်ငံရဲ့ မွေးကင်းစကလေး သေဆုံးမှုဟာ တစ်သောင်းမှာ ၅၅၆ ဦး ရှိပါတယ်။ ရင်ခွင်ပိုက်ကလေးငယ် သေဆုံးမှုကတော့ တစ်ထောင်မှာ ၈၈ ဦးအထိ ရှိခဲ့ပါတယ်။ 

    လက်ရှိ အချက်အလက်တွေအရ ကလေးတစ်သောင်းမွေးရာမှာ သေဆုံးမှု ၉၇ ဦးသာ ရှိတော့ပြီး ရင်ခွင်ပိုက်ကလေးငယ် သေးဆုံးမှုက တစ်ထောင်မှာ ၈ ဦးသာ ရှိပါတော့တယ်။ 

    ကျန်းမာရေးစောင့်ရှောက်မှု အားကောင်းလာအောင်၊ အမျိုးသမီးတွေ ကျန်းမာရေးအသိ မြင့်မားလာအောင် လုပ်ဆောင်ပေးခဲ့တဲ့ ခေတ်အဆက်ဆက် အိန္ဒိယအစိုးရတွေကို ချီးကျူးတယ်လို့ ခတီဂျာဘီဘီက ပြောပါတယ်။ 

    သူမဟာ တစ်ရက်ကို ကလေးငယ်တစ်ဦး ဒါမှမဟုတ် ၂ ဦးလောက် ပုံမှန် မွေးပေးရပါတယ်။ ၂၀၀၀ ခုနှစ် မတ်လ ၈ ရက်နေ့က ထူးခြား အဖြစ်အပျက်တစ်ခုကို ခတီဂျာဘီဘီက မှတ်မိနေပါတယ်။

    “ဗိုက်ကြီးသည် ၂ ယောက်က မွေးဖို့ ကျွန်မကိုစောင့်နေတယ်။ သူတို့လည်း မွေးပြီးရော နောက်ထပ် ၆ ယောက်က မွေးဖို့ ဆေးခန်းကို ရောက်လာကြတယ်”

    အဲဒီအချိန်က ခတီဂျာဘီဘီမှာ အကူတစ်ယောက်သာ ရှိပါတယ်။ ကလေးငိုသံက ဖိအားတွေ၊ စိတ်ဖိစီးမှုတွေ ပြေပျောက်စေမယ့် အားဆေးပါ။ 

    “အိမ်ပြန်ဖို့လုပ်တော့ ကလေးငိုသံတွေကို ကျွန်မကြားလိုက်ရတယ်။ ရင်ထဲကို အေးသွားတာပဲ”

    ခတီဂျာဘီဘီရဲ့ ကလေးမွေးဖွားမှု သက်တမ်းတစ်လျှောက်မှာ နှစ်မွှာပူး အစုံ ၅၀၊ ၃ မွှာပူးတစ်စုံ မွေးပေးခဲ့ရပါတယ်။ 

    ယနေ့ခေတ်မှာ ချမ်းသာတဲ့သူတွေက ပုဂ္ဂလိကဆေးရုံတွေကို သွားကြပြီး ခွဲမွေးတဲ့သူတွေလည်း ပိုများလာတယ်လို့ သူမက ပြောပါတယ်။ 

    “မီးဖွားရင်း သေဆုံးမှုတော်တော်များများကို ကျွန်မမိခင်က ကြုံတွေ့ခဲ့ရပါတယ်။ ခွဲမွေးတာက လူ့အသက်တော်တော်များများကို ကင်တင်နိုင်ပါတယ်။ ကျွန်မ သူနာပြုစလုပ်တုန်းက ခွဲမွေးဖို့ဆိုရင် အမျိုးသမီးတွေ ကြောက်ကြတယ်။ အခုတော့ ရိုးရိုးမွေးတာကို ကြောက်တဲ့အတွက် ခွဲမွေးဖို့ ရွေးလာကြပါပြီ” 

    ပင်စင်ယူပြီးနောက် ရှေ့ဆက် ဘာလုပ်မယ်ဆိုတဲ့ အစီအစဥ် ခတီဂျာဘီဘီမှာ တိတိကျကျ မရှိသေးပါဘူး။ သူ့ရဲ့ ဘ၀ဟောင်းကို လွမ်းဆွတ် သတိရနေအုံးမယ်လို့ သူမက ပြောပါတယ်။ 

    “မွေးကင်းစကလေးတွေ စူးစူး၀ါး၀ါး အော်ငိုလိုက်တဲ့အသံကို ကြားချင်ပါသေးတယ်။ အမျိုးသမီးတွေဟာ မီးဖွားရင်း သေလောက်အောင် နာကျင်တဲ့ ၀ေဒနာကို ခံစားနေရတာတောင် မွေးလာတဲ့ကလေး ငိုသံကို ကြားလိုက်တာနဲ့ နာကျင်မှုတွေမေ့ပြီး ပြုံးလာကြတယ်။ ဒီိလိုမြင်ကွင်းမျိုးကို မြင်ရတဲ့ ပီတိမျိုးက စကားလုံးနဲ့ ဖော်ပြလို့မရဘူး။ ကျွန်မရဲ့ သူနာပြုသက်တမ်းတစ်လျှောက်လုံးဟာ ကြည်နူးစရာပါ”

    Ref: BBC 

  • အစွန်းရောက်များကြောင့် အိုးအိမ်စွန့်ခွာထွက်ပြေးနေရသည့် အိန္ဒိယ မွတ်စလင်များ

    အစွန်းရောက်များကြောင့် အိုးအိမ်စွန့်ခွာထွက်ပြေးနေရသည့် အိန္ဒိယ မွတ်စလင်များ

    ဇွန် ၁၄၊ ၂၀၂၃

    M-Media 

    -အိန္ဒိယမြောက်ပိုင်းက ရွာငယ်လေးတစ်ရွာမှာ ဒေသခံမွတ်စလင်တွေဟာ ဟိန္ဒူအစွန်းရောက်အဖွဲ့တွေရဲ့ ခြိမ်းခြောက်မှုကြောင့် အိုးအိမ်စွန့်ခွာ ထွက်ပြေးနေရပါတယ်။ 

    အူတာရက်ဟန်းပြည်နယ်က ပူရိုလာဆိုတဲ့ရွာမှာ ဖြစ်ပါတယ်။ မွတ်စလင်လူငယ်နှစ်ယောက်က ဟိန္ဒူအမျိုးသမီးငယ်တစ်ဦးကို ပြန်ပေးဆွဲဖို့ ကြိုးစားတယ်ဆိုတဲ့ မေလအတွင်းက စွပ်စွဲချက်တစ်ခုကို ဟိန္ဒူအစွန်းရောက်အဖွဲ့နှစ်ခုဖြစ်တဲ့ Vishwa Hindu Parishad နဲ့ Bajrang Dal တို့က အမြတ်ထုတ်လာတာပါ။ 

    ဇွန်လ ၁၅ ရက်နေ့မတိုင်ခင် ရွာကနေ အပြီးပြောင်းရွှေ့ဖို့ မွတ်စလင်တွေရဲ့ နေအိမ်တွေ၊ ဆိုင်တွေမှာ အစွန်းရောက်တွေက စာလိုက်ကပ် ခြိမ်းခြောက်ခဲ့ကြပါတယ်။ 

    ပြန်ပေးဆွဲဖို့ ကြိုးစားတယ်ဆိုတဲ့ လူငယ်နှစ်ဦးကို ရဲတပ်ဖွဲ့က ဖမ်းဆီးတရားစွဲဆိုထားပါတယ်။ ဟိန္ဒူအဖွဲ့တွေက ပြန်ပေးဆွဲမှုဟာ “အချစ်ဂျီဟတ်” ရဲ့ တစ်စိတ်တစ်ပိုင်းဖြစ်တယ်လို့ ဆိုပါတယ်။ 

    မွတ်စလင်တွေဟာ ဟိန္ဒူအမျိုးသမီးတွေကို လက်ထပ်ကာ ဘာသာပြောင်းခိုင်းပြီး ဟိန္ဒူဘာသာကွယ်ပျောက်အောင် လုပ်ဆောင်နေတယ်လို့ ဟိန္ဒူအစွန်းရောက်အဖွဲ့တွေက စွပ်စွဲပြီး ဒါကို “အချစ်ဂျီဟတ်” လို့ သူတို့ကိုယ်တိုင် အမည်ပေးထားတာ ဖြစ်ပါတယ်။ 

    အိန္ဒိယကိုအုပ်စိုးနေတဲ့ ဟိန္ဒူအမျိုးသားရေးပါတီ BJP အစိုးရ ကိုယ်တိုင်က နိုင်ငံအတွင်း မွတ်စလင်တွေထံမှာ “အချစ်ဂျီဟတ်” လို စီမံကိန်းမျိုး မရှိဘူးလို့ ၀န်ခံထားပါတယ်။ 

    ပူရိုလာမှာတော့ ဟိန္ဒူအစွန်းရောက်အဖွဲ့တွေက “အချစ်ဂျီဟတ်” ခေါင်းစဥ်ကို တွင်တွင်ကျယ်ကျယ်သုံးကာ မွတ်စလင်တွေကို မောင်းထုတ်ဖို့ ကြိုးပမ်းနေကြပါတယ်။ 

    မေလ ၂၉ ရက်နေ့မှာ ဒီအဖွဲ့တွေက ဆန္ဒပြမှု ပြုလုပ်ကာ မွတ်စလင်တွေကို ရွာကနေ နှင်ထုတ်ဖို့ အစိုးရကို လူသိရှင်ကြား တောင်းဆိုခဲ့ကြပါတယ်။ ဆန္ဒပြလူအုပ်ဟာ မွတ်စလင်တွေကို စော်ကားပြောဆိုမှုတွေလုပ်ကာ အိမ်တွေ၊ ဆိုင်တွေကိုလည်း ဖျက်ဆီးခဲ့ကြပါတယ်။ 

    “ကောင်လေးတွေကိုလည်း ဖမ်းထားပြီ။ ရဲကလည်း စုံစမ်းစစ်ဆေးနေပြီ။ ဒီလူတွေက ဘာတွေဖြစ်ချင်နေကြတာလဲ။ အိမ်တွေ၊ ဆိုင်တွေကနေ ကျွန်တော်တို့ကို ထွက်သွားစေချင်ကြတာလား။ ကျွန်တော်တို့ ဘယ်သွားရမှာလဲ။ ဒီမှာ မျိုးဆက်ပေါင်းများစွာ ကျွန်တော်တို့ နေခဲ့ကြတာပါ” လို့ အမည်မဖော်လိုတဲ့ မွတ်စလင်ကုန်သည်တစ်ဦးက ပြောကြားခဲ့ပါတယ်။ 

    ဇွန်လ ၁၅ ရက်နေ့မှာ ဟိန္ဒူအစွန်းရောက်အဖွဲ့တွေ အစည်းအ၀ေးတစ်ခု ကျင်းပဖို့ရှိနေပြီး ပူရိုလာရွာက မွတ်စလင်တစ်ချို့ကတော့ ရွာကနေ တိမ်းရှောင်နေကြပါတယ်။ 

    ပူရိုလာနဲ့ မ၀ေးတဲ့ ဘာရ်ကော့ရွာမှာလည်း ဒီလှုပ်ရှားမှု ကူးစက်သွားပြီး မွတ်စလင်တွေပိုင်တဲ့ ဆိုင်တစ်ချို့မှာ အလိုမရှိဆိုတဲ့ စာရွက်တွေ ကပ်ကာ ခြိမ်းခြောက်လာကြပါတယ်။ 

    အူတာရက်ဟန်းကို ဟိန္ဒူသီးသန့်ပြည်နယ်ဖြစ်လာရေး အစွန်းရောက်အဖွဲ့တွေရဲ့ လှုပ်ရှားမှုဟာ အရင်ကတည်းက ရှိခဲ့ပြီး မွတ်စလင်တွေနဲ့ ဆက်နွယ်တဲ့ ကိစ္စတွေကို အမြဲမပြတ် အမြတ်ထုတ်နေကြတာ ဖြစ်ပါတယ်။ 

    Ref: Aljazeera 

  • မွတ်စလင်မုန်းတီးရေးအစီအစဥ် ထုတ်လွှင့်မှုဖြင့် အိန္ဒိယ ထိပ်တန်းမီဒီယာတစ်ခု  ဒဏ်ရိုက်ခံရ

    မွတ်စလင်မုန်းတီးရေးအစီအစဥ် ထုတ်လွှင့်မှုဖြင့် အိန္ဒိယ ထိပ်တန်းမီဒီယာတစ်ခု ဒဏ်ရိုက်ခံရ

    မတ် ၂၊ ၂၀၂၃

    M-Media 


    -သတင်းမှားတွေ၊ တစ်ဖက်သက်ဖော်ပြထားတဲ့ အချက်အလက်တွေနဲ့ မွတ်စလင်မုန်းတီးရေးအစီအစဥ် ထုတ်လွှင့်ခဲ့တဲ့ မီဒီယာကုမ္ပဏီတစ်ချို့ကို အိန္ဒိယ ရုပ်သံစောင့်ကြည့်ရေးအဖွဲ့ NBDSA က ဒဏ်ရိုက်ခဲ့ပါတယ်။ 

    အရေးယူခံရတဲ့ မီဒီယာတွေထဲမှာ နာမည်ကြီး မီဒီယာကုမ္ပဏီ Zee News လည်း ပါ၀င်ပါတယ်။ 

    ဇူလိုင် ၁၁ ရက် ကမ္ဘာ့လူဦးရေနေ့အတွက် ဟိန္ဒူလက်ယာသမားတွေရဲ့ ဆွေးနွေးပွဲကို ထုတ်လွှင်ဖို့ ကြော်ငြာမှုအတွင်း အိန္ဒိယမှာ မွတ်စလင်တွေက ဟိန္ဒူတွေကို ၀ါးမြို့တော့မယ့် အခြေအနေမျိုး မြင်လာအောင် Zee News က ဖန်တီးခဲ့တာပါ။ 

    ၂၀၅၀ ရောက်ရင် အိန္ဒိယမှာရှိတဲ့ မွတ်စလင်လူဦးရေဟာ သန်းပေါင်း ၃၁၀ အထိ ရှိလာမယ်ဆိုတဲ့ Pew Report ရဲ့ ခန့်မှန်းတွက်ချက်မှုကို အသားပေးဖော်ပြခဲ့တာ ဖြစ်ပါတယ်။ 

    Pew Report မှာ အိန္ဒိယဟိန္ဒူလူဦးရေဟာ ၂၀၅၀ ရောက်ရင် သန်းပေါင်း ၁၃၀၀ အထိ တိုးပွားလာမယ်ဆိုတဲ့အချက် ပါ၀င်ပြီး Zee News က ဒီအချက်ကို ချန်ထားခဲ့တဲ့အတွက် မီဒီယာသမားတွေရဲ့ ဘက်မလိုက်ရေး၊ အရှိကို အရှိအတိုင်း ဖော်ပြရေး ကျင့်၀တ်ကို ချိုးဖောက်ခဲ့တယ်လို့ NBDSA အဖွဲ့က ထုတ်ပြန်ပါတယ်။ 

    Zee News က ဒီအတွက် NBDSA ထံ ကန့်ကွက်စာ တင်ထားပါတယ်။ 

    News18 India၊ Times Now နဲ့ အခြား မီဒီယာ ၇ ခုကိုလည်း မွတ်စလင်ဆန့်ကျင်ရေး အစီအစဥ်တွေ ထုတ်လွှင့်မှုအတွက် NBDSA က သတိပေးခဲ့ပါတယ်။ 

    ပူနေးမြို့မှာ ပြုလုပ်တဲ့ မွတ်စလင်အဖွဲ့အစည်းတစ်ခုရဲ့ ဆန္ဒပြမှုမှာ ပါကစ္စတန်ထောက်ခံရေးကြွေးကြော်သံ ဟစ်အော်ခဲ့တယ်လို့ Times Now က စက်တင်ဘာ ၂၄ ရက်နေ့ အစီအစဥ်တစ်ခုမှာ လိမ်လည်ဖော်ပြကာ ဟိန္ဒူလူထုကြားထဲ မွတ်စလင်မုန်းတီးရေးစိတ်ဓာတ်ကို သွင်းပေးခဲ့ပါတယ်။ တစ်ကယ်က မြေပြင်မှာ ဒီလိုအဖြစ်အပျက်မျိုး ဖြစ်ပွားခဲ့ခြင်း မရှိပါဘူး။  

    Times Now က သူတို့ဟာ မြေပြင်အထိ သတင်းသွားယူခဲ့တာမဟုတ်ဘဲ မီဒီယာတစ်ချို့က ဖော်ပြတာကို ကူးယူဖော်ပြခဲ့တာလို့ NBDSA ကို ပြန်လည်ချေပထားပါတယ်။ 

    NBDSA ကတော့ တစ်ဆင့်ပြန်လည်ဖော်ပြကြောင်းကို အသိပေးချက်ထည့်ဖို့လိုတယ်လို့ မှတ်ချက်ပေးခဲ့ပြီး အွန်လိုင်းမှာ လွှင်တင်ထားတဲ့ ဒီဗီဒီယိုတွေကို ဖြုတ်ချခိုင်းခဲ့ပါတယ်။ 

    News18 India မီဒီယာနဲ့ ပတ်သက်တာကတော့ အစီအစဥ်ကြေငြာသူ အေမန်ရှရ်မာဟာ ဇန်န၀ါရီ ၁၈ ရက်နေ့က အစီအစဥ်တစ်ခုမှာ မွတ်စလင်လူအဖွဲ့အစည်းကို စော်ကားပြောဆိုခဲ့တာ ဖြစ်ပါတယ်။ 

    အဲဒီအစီအစဥ်တစ်ခုလုံးကလည်း မွတ်စလင်လူ့အဖွဲ့အစည်းကို မကောင်းမြင်အောင် ဖော်ပြကာ ဟိန္ဒူတွေ မွတ်စလင်ကို မုန်းတီးလာအောင် မီးထိုးပေးတဲ့ အစီအစဥ်မျိုးဖြစ်တယ်လို့ NBDSA ရဲ့ ထုတ်ပြန်ချက်မှာ ဖော်ပြထားပါတယ်။ 

    Ref: Independent 

  • မွတ်စလင်အမျိုးသမီးများအား စော်ကားအရှက်ခွဲသူကို အိန္ဒိယက တရားစွဲမည်

    မွတ်စလင်အမျိုးသမီးများအား စော်ကားအရှက်ခွဲသူကို အိန္ဒိယက တရားစွဲမည်

    ဒီဇင်ဘာ ၁၄၊ ၂၀၂၂

    M-Media 


    -မွတ်စလင်အမျိုးသမီးတွေကို ရောင်းစရာတစ်ခုအဖြစ် အွန်လိုင်းတင်အရှက်ခွဲတဲ့ အမျိုးသားတစ်ဦးကို တရာစွဲဆိုသွားမယ်လို့ အိန္ဒိယရဲတပ်ဖွဲ့က သတင်းထုတ်ပြန်ပါတယ်။  

    အသက် ၂၅ နှစ်အရွယ် Aumkareshwar Thakur ဆိုသူဟာ ၂၀၂၁ ခုနှစ်က Sulli Deals ဆိုတဲ့ အက်ပလီကေးရှင်းတစ်ခုကို ဖန်တီးပြီး အိန္ဒိယမှာ ထင်ရှားတဲ့ မွတ်စလင်အမျိုးသမီးတွေရဲ့ ကိုယ်ရေးအချက်အလက်တွေကိုတင်ကာ ရောင်းချခဲ့တာ ဖြစ်ပါတယ်။ အမှန်တကယ်ရောင်းတာမျိုး မဟုတ်ဘဲ တမင် အရှက်ခွဲကာ နာမည်ပျက်အောင် လုပ်တာပါ။ 

    သူ့ကို ၂၀၂၂ ခုနှစ် ဇန်န၀ါရီမှာ ဖမ်းဆီးနိုင်ခဲ့ပေမယ့် မတ်လမှာ အာမခံနဲ့ ပြန်လွှတ်ပေးခဲ့ပါတယ်။ ရာဇ၀တ်မှုဥပဒေ၊ ဆက်သွယ်ရေးဥပဒေတွေနဲ့ စွဲချက်တင်ထားပြီး ပြီးခဲ့တဲ့တစ်ပတ်မှာ တရားစွဲဆိုဖို့ ခွင့်ပြုချက်ရခဲ့တာဖြစ်ပါတယ်။  

    အိန္ဒိယ အွန်လိုင်းသုံးစွဲသူတွေကြားမှာ မွတ်စလင်အမျိုးသမီးတွေကို စော်ကားအရှက်ခွဲမှုဟာ ပြီးခဲ့တဲ့နှစ်တွေအတွင်း သိသိသာသာ မြင့်တက်လာခဲ့ပါတယ်။ အထူးသဖြင့် တက်ကြွလှုပ်ရှားသူ၊ ထက်မြက်သူ မွတ်စလင်အမျိုးသမီးတွေကို ပစ်မှတ်ထားတာဖြစ်ပါတယ်။

    မွတ်စလင်အမျိုးသမီးတွေရဲ့ ပုံနဲ့ ကိုယ်ရေးအချက်အလက်ကိုတင်ကာ လေလံတင်ရောင်းတဲ့ နောက်ထပ် အက်ပလီကေးရှင်းတစ်ခုရှိပြီး Bulli Bai လို့ အမည်ပေးထားပါတယ်။ 

    Bulli Bai ကိုဖန်တီးသူဟာ အသက် ၂၀ အရွယ် Neeraj Bishnoi ဆိုသူဖြစ်ပြီး Thakur နဲ့ အတူ ဖမ်းဆီးခံခဲ့ရတာပါ။ Bishnoi ကို တရားစွဲထားလားဆိုတာ တိတိကျကျ မသိရပါဘူး။

    Ref: BBC