Tag: Indian Muslims

စက်တင်ဘာ ၃၀၊ ၂၀၂၀
M-Media

-အူတာပရာဒက်ရှ်ပြည်နယ် အယွဒ္ဒယမြို့က ဘာဘရီဗလီကို လွန်ခဲ့တဲ့ နှစ်ပေါင်း ၃၀ နီးပါးက ဟိန္ဒူလူအုပ်ရဲ့ ဖျက်ဆီးမှုမှာ ပူးပေါင်းပါဝင်တာ၊ သွေးထိုးလှုံ့ဆော်တာတွေ လုပ်ခဲ့တယ်လို့ စွပ်စွဲခံထားရသူ ၃၂ ဦးကို အိန္ဒိအထူးတရားရုံးက ဒီကနေ့မှာ တရားသေ လွှတ်​ပေးခဲ့ပါတယ်။

အခု လွတ်လာတဲ့သူတွေထဲမှာ ဝန်ကြီးချုပ် နရန်ဒရာမိုဒီ ကြည်ညိုတဲ့ ဒုတိယဝန်ကြီးချုပ်ဟောင်း အသက် ၉၂ နှစ်အရွယ် လာ ခရစ်ရှ်နာ အဒ်ဗာနီနဲ့အတူ အာဏာရ ဟိန္ဒူအမျိုးသားရေးပါတီ BJP က တာဝန်ရှိသူတစ်ချို့ ပါဝင်ပါတယ်။

အိန္ဒိယ ထိပ်တန်း စုံစမ်းစစ်ဆေးရေးအဖွဲ့ (CBI) က ဖွဲ့စည်းစစ်ဆေးတဲ့ အထူးတရားရုံးက ၁၉၉၂ ခုနှစ်မှာ ဖြစ်ခဲ့တဲ့ ဘာဘရီဗလီ ဖျက်ဆီးခံရမှုဟာ ကြိုတင် စီစဉ်ထားတာမျိုးမဟုတ်ဘဲ စွပ်စွဲခံရသူတွေအတွက် တင်ပြလာတဲ့ အထောက်အထားကလည်း မပြည့်စုံဘူးလို့ ဆုံးဖြတ်ခဲ့ပါတယ်။

ဗလီအဖြိုခံရမှုဟာ လူထုဆန့်ကျင်ရေး လှုပ်ရှားမှုကနေ ပေါ်ပေါက်လာတာမျိုးဖြစ်ပြီး အခုစွပ်စွဲခံထားရတဲ့ ခေါင်းဆောင်တွေက တားဆီးမှုတွေ လုပ်ခဲ့တယ်လို့လည်း တရားရုံးရဲ့ ဆုံးဖြတ်ချက်မှာ ဖော်ပြထားပါတယ်။

အိန္ဒိယမွတ်စလင် ရှေ့နေများအဖွဲ့က ရှေ့နေ ဇာဖာရ်ယဘ် ဂျီလာနီက တရားရုံးဟာ သက်သေအထောက်အထားအားလုံးကို လစ်လျှူရှုခဲ့ပြီး ဒီဆုံးဖြတ်ချက်အတွက် တရားရုံးချုပ်ကို အယူခံတင်သွားမယ်လို့ တုန့်ပြန်ပြောကြားခဲ့ပါတယ်။

၁၆ ရာစုက ဆောက်လုပ်ထားတဲ့ ဘာဘရီဗလီဟာ ရာမနတ်ဘုရား မွေးဖွားရာနေရာလို့ ဟိန္ဒူတွေက ၁၉ ရာစုအစောပိုင်းမှာ စတင်စွပ်စွဲခဲ့ကြပြီး ၁၉၄၉ ခုနှစ်မှာ ဟိန္ဒူတစ်ဦးက နတ်ဘုရားရုပ်တစ်ရုပ် ဗလီထဲကို သွားထားခဲ့ပြီးတဲ့နောက် ဗလီအပိတ်ခံခဲ့ရပါတယ်။

၁၉၉၂ ခုနှစ်မှာ ဟိန္ဒူလူအုပ်ဟာ ဘာဘရီဗလီကို ဖြိုချ ဖျက်ဆီးခဲ့ပါတယ်။ ဗလီနေရာ ရရှိရေးအတွက် ဟိန္ဒူအဖွဲ့နဲ့ မွတ်စလင်အဖွဲ့တို့ နှစ် ၇၀ ကြာ တရားရင်ဆိုင်မှုဟာ ပြီးခဲ့တဲ့နှစ် နိုဝင်ဘာလမှာ အဆုံးသတ်ခဲ့ပါတယ်။

အိန္ဒိယ တရားရုံးချုပ်က ဘာဘရီဗလီနေရာကို ဟိန္ဒူတွေထံ ပေးခဲ့ပြီး ဘာဘရီဗလီအစား နောက်ထပ်ထပ်ဗလီတစ်လုံး ဆောက်လုပ်ဖို့ အယွဒ္ဒယမြို့မှာ ၅ ဧကအကျယ်မြေ ပေးဖို့လည်း ဆုံးဖြတ်ခဲ့ပါတယ်။

Ref: Alajazeera

သြဂုတ် ၁၆၊ ၂၀၂၀
M-Media

-အိန္ဒိယက အာဏာရ ဟိန္ဒူအမျိုးသားရေး ပါတီ (BJP)အဖွဲ့၀င်တွေ၊ ဟိန္ဒူအမျိုးသားရေး အဖွဲ့တွေရဲ့ အမုန်းစကား ပြောဆိုမှုကို Facebook က ခွင့်ပြုခဲ့တယ်လို့ Wall Street Journal က သောကြာနေ့မှာ ဖော်ပြပါတယ်။

Facebook မှာ အမုန်းစကားတားဆီးရေးမူ၀ါဒ ရှိနေပေမယ့် အိန္ဒိယက Facebook ကုမ္ပဏီရဲ့ အမှုဆောင်အကြီးအကဲ အန်ခီ ဒက်စ်က BJP လွှတ်တော်အမတ် တီရာဂျာဆင်းနဲ့ အနည်းဆုံး ဟိန္ဒူအမျိုးသားရေး၀ါဒီနဲ့ အဖွဲ့ ၃ ခုလောက်ရဲ့ မွတ်စလင်ဆန့်ကျင်ရေး အမုန်းစကားတွေကို ဖျက်ဖို့ ငြင်းဆန်ခဲ့တယ်လို့ ၀န်ထမ်းဟောင်းတွေနဲ့ လက်ရှိ၀န်ထမ်းတွေက Wall Street ကို ပြောကြားခဲ့ပါတယ်။

ဆင်းဟာ နိုင်ငံတောင်ပိုင်း တီလန်ဂါနာပြည်နယ်က BJP လွှတ်တော်အမတ်ဖြစ်ပြီး မွတ်စလင်ဆန့်ကျင်ရေး အမုန်းစကားတွေကို အကြီးအကျယ် ရေးသား၀ါဒဖြန့်သူပါ။

မတ်လအတွင်း ဆင်းတင်ခဲ့တဲ့ ပို့စ်တွေဟာ အမုန်းစကားဟန့်တားရေး မူ၀ါဒတွေကို ချိုးဖောက်ကြောင်း Facebook ပို့စ် စောင့်ကြည့်သုံးသပ်ရေး၀န်ထမ်းတွေက တွေ့ရှိခဲ့ပေမယ့် အမှုဆောင် အန်ခီဒက်စ်က ဒီပို့စ်တွေကို ဖျက်ချဖို့ ခွင့်မပြုခဲ့ပါဘူး။

၀န်ကြီးချုပ်မိုဒီရဲ့ ပါတီက နိုင်ငံရေးသမားတွေရဲ့ ပို့စ်တွေကို ဖယ်ရှားတာမျိုးဟာ ကုမ္ပဏီရဲ့ စီးပွားရေးကို ထိခိုက်စေနိုင်တယ်လို့ ဒက်စ်က ပြောခဲ့ကြောင်း Wall Street ဂျာနယ်က ရေးပါတယ်။

Facebook ကုမ္ပဏီရဲ့ ပြောရေးဆိုခွင့်ရှိသူ အန်ဒီစတုန်းက ဆင်းကို အမုန်း၀ါဒီတစ်ဦး သတ်မှတ်လိုက်ရင် ဖြစ်လာမယ့် နိုင်ငံရေးအခြေအနေတွေကို ဒက်စ်က တင်ပြခဲ့တယ်လို့ ပြောကြားခဲ့ပါတယ်။

Wall Street ဂျာနယ်က မေးမြန်းမှု လုပ်ခဲ့ပြီးတဲ့နောက် ဆင်းရဲ့ ပို့စ်တစ်ချို့ကို ဖယ်ရှားခဲ့ပြီး၊ လူသိများသူတစ်ဦးဖြစ်ကြောင်း ပေးထားတဲ့ အပြာရောင် အမှန်ချစ်အမှတ်အသားကို ရုပ်သိမ်းခဲ့ကြောင်း၊ အကောင့် ဖယ်ရှားရမလားဆိုတဲ့ကိစ္စကိုတော့ စဥ်းစားနေကြောင်း အန်ဒီစတုန်းက ပြောပါတယ်။

အခြား BJP ပါတီ ခေါင်းဆောင် ၂ ဦးရဲ့ ပို့စ်တွေကိုလည်း Wall Street ဂျာနယ်ရဲ့ ချဥ်းကပ်မှုနောက်ပိုင်း Facebook က ဖယ်ရှားခဲ့ပါတယ်။

အိန္ဒိယနိုင်ငံမှာ BJP အာဏာရခဲ့တဲ့ ၂၀၁၄ ခုနှစ်နောက်ပိုင်း မွတ်စလင်တွေ၊ ခရစ်ယာန်တွေ၊ ဟိန္ဒူဇာတ်နိမ့်တွအပေါ် အမုန်း၀ါဒဖြန့်မှု အကြမ်းဖက် တိုက်ခိုက်မှုတွေ မြင့်တက်လာခဲ့တာပါ။

ကိုရိုနာဗိုင်းရပ်စ် ပြန့်နှံ့မှု နောက်ပိုင်းမှာလည်း မွတ်စလင်တွေဟာ ကိုရိနာဂျီဟတ် စီမံကိန်းနဲ့ ဗိုင်းရပ်စ်ကူးစက်အောင် လုပ်ဆောင်နေတယ်ဆိုတဲ့ ၀ါဒဖြန့်မှုတွေ ပေါ်ပေါက်လာပါတယ်။

Ref : Aljazeera

ဩဂုတ် ၁၅၊ ၂၀၂၀
M-Media

-အူတာပရာဒက်ရှ်ပြည်နယ် အယွဒ္ဒယမြို့မှာ ၁၉၉၂ ခုနှစ်က ဟိန္ဒူလူအုပ်ရဲ့ ဖျက်ဆီးမှုကို ခံခဲ့ရတဲ့ ဘာဘရီဗလီအစား ဆောက်လုပ်မယ့် ဗလီကို အမည်သစ်ပေးသွားမယ်လို့ ဂေါပကအဖွဲ့ တာဝန်ရှိသူတွေက ပြောကြားလိုက်ပါတယ်။

ဗလီသစ်ဆောက်လုပ်ရေးကို အဖွဲ့ဝင် ၁၅ ဦးပါ၀င်တဲ့ အိန္ဒိယ-အစ္စလာမ် ယဉ်ကျေးမှုဖောင်ဒေးရှင်း (IICF) က ကြီး ကြပ်ဆောင်ရွက်နေတာပါ။ ဗလီအမည်ပေးရေးမှာ တည်ရှိရာရွာကိုအစွဲပြုတဲ့ ‘ဒန်ဒီပူးရ် ဗလီ’ အမည်ဟာ ရေပန်းစားနေပြီး ‘ငြိမ်းချမ်းရေးဗလီ’ ‘ဆူဖီဗလီ’ ဆိုတဲ့ အမည်တွေလည်း လျာထားစာရင်းထဲမှာ ပါဝင်နေတယ်လို့ IICF ရဲ့ ပြောရေးဆိုခွင့်ရှိသူ အက်သာ ဟူစိန်က ပြောကြားခဲ့ပါတယ်။

အိန္ဒိယအစိုးရက ပေးထားတဲ့ မြေ ၅ ဧကမှာ ဆောက်လုပ်မယ့် ဒီဗလီသစ်မှာ ဆေးရုံတစ်ရုံ၊ စာသင်ကျောင်းတစ်ခုနဲ့ ဇရပ်တစ်ခုတို့ ပါဝင်မှာ ဖြစ်ပါတယ်။

အူတာပရာဒက်ရှ်ပြည်နယ် အယွဒ္ဒယမြို့မှာရှိတဲ့ ဘာဘရီဗလီကို မဂိုဘုရင်လက်ထက် ၁၅၂၈ ခုနှစ်က ဆောက်လုပ်ခဲ့တာပါ။ ဗလီတည်ရှိရာနေရာဟာ ရာမနတ်ဘုရားမွေးဖွားရာနေရာဖြစ်တယ်လို့ ဟိန္ဒူတွေက ၁၈ ရာစုမှာ စတင်စွပ်စွဲခဲ့ပြီး ၁၉၉၂ ခုနှစ်မှာ ဟိန္ဒူလူအုပ်က ဗလီကို ဖြိုဖျက်ခဲ့ပါတယ်။

ဘာဘရီဗလီအတွက် ဟိန္ဒူအဖွဲ့နဲ့ မွတ်စလင်အဖွဲ့တို့ တရားရင်ဆိုင်ခဲ့ရာမှာ ၂၀၁၉ ခုနှစ် နိုဝင်ဘာလမှာတော့ ဗလီကို ဟိန္ဒူလူ့အဖွဲ့အစည်းထံ ပေးအပ်ဖို့ အိန္ဒိယတရားရုံးချုပ်က အမိန့်ချမှတ်ခဲ့ပါတယ်။ မွတ်စလင်တွေအတွက် ဘာဘရီဗလီနေရာအစား အယွဒ္ဒယမြို့က အခြားနေရာတစ်ခုမှာ မြေ ၅ ဧကပေးအပ်ဖို့လည်း တရားရုံးဆုံးဖြတ်ချက်မှာ ပါဝင်ပါတယ်။

အက်သာဟူစိန်က အရင်က အငြင်းပွားခဲ့တဲ့ ကိစ္စကို အနာဂတ်အထိ မသယ်ဆောင်ချင်တာကြောင့် အသစ်ဆောက်မယ့် ဗလီကို ‘ဘာဘရီဗလီ’ လို အမည်မပေးဖို့ စီမံကိန်းစတင်ကတည်းက ဘုတ်အဖွဲ့က ဆုံးဖြတ်ခဲ့တာဖြစ်တယ်လို့ ထည့်သွင်းပြောကြားခဲ့ပါတယ်။

ဗလီသစ်ကို အိန္ဒိယ-အစ္စလာမ့် ဗိသုကာလက်ရာနဲ့ တည်ဆောက်သွားမှာဖြစ်ပြီး နိုင်ငံတစ်ဝှမ်း ဗိသုကာအဖွဲ့အစည်းတွေ တင်သွင်းတဲ့ ဒီဇိုင်းတွေထဲကနေ နောက်ဆုံး ဒီဇိုင်းတစ်ခုကို IICF က မ​ကြာခင်မှာ ကြေငြာဖို့ ရှိနေပါတယ်။

Ref: Hindustan Times

ဩဂုတ် ၁၃၊ ၂၀၂၀
M-Media

-အိန္ဒိယနိုင်ငံမြို့တော် နယူးဒေလီမှာ သတင်းယူနေတဲ့ ဂျာနယ်လစ် ၃ ဦးကို ဟိန္ဒူလူအုပ်က ဘာသာရေးအရ အကြမ်းဖက်တိုက်ခိုက်မှုတစ်ခု အင်္ဂါနေ့မှာ ဖြစ်ပွားခဲ့ပါတယ်။

Caravan မဂ္ဂဇင်းက ဂျာနယ်လစ် ရှာဟစ် တန်တရေးနဲ့ လုပ်ဖော်ကိုင်ဖက် ၂ ဦးတို့ဟာ နယူးဒေလီမြို့ ဆင်ခြေဖုံးမှာ သတင်းရိုက်ကူးနေစဉ် ဟိန္ဒူတစ်ချို့က လာရောက်မေးမြန်းခဲ့ကြတာပါ။ ရှာဟစ်ဟာ အစ္စလာမ်ဘာသာဝင်ဖြစ်မှန် သိသွားတဲ့အခါမှာတော့ ထိုးကြိတ်ရိုက်နှိက်တာတွေ လုပ်ခဲ့ပါတယ်။

ရှာဟစ်ရဲ့ လုပ်ဖော်ကိုင်ဖက် ဂျာနယ်လစ်အမျိုးသမီးတစ်ဦးက ထွက်ပြေးလွတ်မြောက်သွားခဲ့ပေမယ့် အခြားလုပ်ဖော်ကိုင်ဖက် ဆစ်ခ်လူမျိုး ပရာဂျစ်ဆင်းကတော့ တိုက်ခိုက်ခံခဲ့ရပါတယ်။ နောက်ပိုင်း လူ ၁၀၀ နီးပါးလောက်ရှိလာတဲ့ လူအုပ်ကြီးဟာ ရှာဟစ်တို့ ၃ ဦးကို ၁ နာရီခွဲကြာ ဖမ်းဆီးထားခဲ့ပြီး အနီးအနားက ရဲတပ်ဖွဲ့ဝင်တွေက လာရောက် ကင်တင်ခဲ့ရပါတယ်။

Caravan မဂ္ဂဇင်းက ရှာဟစ်တို့နဲ့ လိုက်ပါသွားတဲ့ ဂျာနယ်လစ်အမျိုးသမီးဟာ လိင်ပိုင်းဆိုင်ရာ စော်ကားမှု ခံခဲ့ရတယ်လို့ နောက်ပိုင်းမှာ ထုတ်ပြန်ပြောကြားခဲ့ပါတယ်။

ရဲတပ်ဖွဲ့က ထုတ်ပြန်တဲ့ကြေငြာချက်မှာ ဒီကိစ္စကို စုံစမ်းစစ်ဆေးနေပြီး ဥပဒေအရ အရေးယူဆောင်ရွက်သွားမယ်လို့ ဖော်ပြထားပါတယ်။

“ဂျာနယ်လစ်တစ်ယောက်ကိုတောင်မှ ဒီလိုလုပ်တယ်ဆိုရင် သာမန်လူတွေဆိုရင် ဘယ်လိုခံစားရမလဲဆိုတာ စဉ်းစားသာကြည့်ပါတော့။ ကျွန်တော် တော်တော်လေးကြောက်သွားပြီး အိန္ဒိယမွတ်စလင်တွေအပေါ်မှာရှိနေတဲ့ အန္တရာယ်ကို ကိုယ်တိုင်ကိုယ်ကျ ခံစားခဲ့ရပါတယ်။ ဒါပေမယ့် ကျွန်တော့်အလုပ်ကို ကျွန်တော် ဆက်လုပ်သွားမှာပါ။ ကျွန်တော့်ရဲ့တာဝန်ဟာ အမှန်တရားကို ဖော်ထုတ်ဖို့ ဖြစ်ပါတယ်” လို့ ရှာဟစ်က ပြောကြားခဲ့ပါတယ်။

ဒီတိုက်ခိုက်မှုနဲ့ပတ်သက်ပြီး လူ့အခွင့်အရေးအဖွဲ့တွေ၊ ဂျာနယ်လစ်တွေက ရှုတ်ချခဲ့ကြပါတယ်။

နယူးဒေလီမြို့မှာ ဖေဖော်ဝါရီလတုန်းကလည်း အစ္စလာမ်ဘာသာဝင်တွေအပေါ် ပစ်မှတ်ထားတဲ့ အကြမ်းဖက်တိုက်ခိုက်မှုတွေ ဖြစ်ပေါ်ခဲ့ပြီး အနည်းဆုံး ၅၀ ကျော်သေဆုံးကာ အစ္စလာမ်ဘာသာဝင်တွေရဲ့ ဗလီတွေ၊ နေအိမ်တွေ၊ ဆိုင်ခန်းတွေ မီးရှို့ဖျက်ဆီးခံခဲ့ရပါတယ်။

Ref : Aljazeera

(ဓာတ်ပုံ – ဖေဖော်ဝါရီလက အကြမ်းဖက်ဖျက်ဆီးခံခဲ့ရသည့် ဒေလီမှ ဗလီတစ်လုံး)