ဩဂုတ် ၁၂၊ ၂၀၂၀
M-Media
-အိန္ဒိယနိုင်ငံက ဟိန္ဒူဘုရားကျောင်းတစ်ခုကို ဒေါသထွက်နေတဲ့ လူအုပ်ရန်ကနေ မွတ်စလင်လူငယ်တွေက ကာကွယ်ပေးတဲ့သတင်းဟာ အိန္ဒိယနိုင်ငံက ဆိုရှယ်မီဒီယာတွေမှာ ရေပန်းစားနေပါတယ်။
နိုင်ငံတောင်ပိုင်း ကာရ်နာတာကာပြည်နယ် ဘန်ဂလောရ်မြို့မှာ လွှတ်တော်အမတ် ဆရီနီဗာဆာ မူရ်သီရဲ့တူ ဟိန္ဒူလူငယ်တစ်ဦးက တမန်တော်မုဟမ္မဒ်ကို စော်ကားတဲ့ပို့စ်တစ်ခု ဆိုရှယ်မီဒီယာမှာ လွှင့်တင်ပြီးတဲ့နောက် အင်္ဂါနေ့ညပိုင်းမှာ ဒေါသထွက်နေတဲ့ လူအုပ်ကြီး ပေါ်လာပြီး ဆန္ဒပြခဲ့ကြပါတယ်။
ဆန္ဒပြသူတွေကို ရဲတပ်ဖွဲ့က ပစ်ခတ်နှိမ်နှင်းခဲ့တာကြောင့် လူ ၃ ဦး သေဆုံးသွားတဲ့အခါ အခြေအနေက ပိုဆိုးသွားခဲ့ပြီး လွှတ်တော်အမတ် မူရ်သီရဲ့နေအိမ်လည်း မီးရှို့ဖျက်ဆီးခံခဲ့ရပါတယ်။
ဒေါသထွက်နေတဲ့ လူအုပ်ကြီးဟာ မြို့လယ်ကောင်က ဟာနုမန် ဟိန္ဒူဘုရားကျောင်းကို ဖျက်ဆီးတော့မယ်လို့ ကောလဟာလတွေ ထွက်ပေါ်လာခဲ့ပြီးတဲ့နောက် မွတ်စလင်လူငယ် ၁၀၀ လောက်က ဘုရားကျောင်းအပြင်ဘက်မှာ လူသား တံတိုင်းအဖြစ် လက်ချင်းချိတ် ကာကွယ်ပေးခဲ့ကြပါတယ်။
“လူငယ်တစ်ချို့ ဆိုင်ကယ်တွေနဲ့ ရောက်ချလာတယ်ဗျ။ ဘုရားကျောင်းကို ဖျက်ဆီးတော့မယ်လို့ ကျွန်တော်တို့ ထင်တာပေါ့။ အခြေအနေတွေ ပိုဆိုးသွားနိုင်တယ်ဆိုပြီး သူတို့ကိုတားလိုက်တယ်။ ဒေါသထွက်နေတဲ့လူအုပ်ကြီး နောက်ထပ်ရောက်လာမှာကို စိုးရိမ်တဲ့အတွက် လူကြီးတွေနဲ့ တိုင်ပင်ပြီး လူသားတံတိုင်းလုပ်ကာ ဘုရားကျောင်းကို ကာကွယ်ပေးခဲ့ပါတယ်။ ဘုရားကျောင်းမှာ ကျွန်တော်တို့ ည ၁ နာရီခွဲလောက်အထိ ရှိခဲ့ပါတယ်” လို့ ကာကွယ်မှုမှာ ပါဝင်ခဲ့တဲ့ ကုမ္ပဏီဝန်ထမ်း မိုဟာမက် ခါလစ်က ပြောကြားခဲ့ပါတယ်။
ဘန်ဂလောရ်ရဲတပ်ဖွဲ့က အခြေအနေတွေကို ထိန်းသိမ်းနိုင်ခဲ့ပြီး တမန်တော် မုဟမ္မဒ်ကို စော်ကားတဲ့ပို့စ် တင်တဲ့သူအပါအဝင် လူပေါင်း ၁၀၀ ကျော် ဖမ်းဆီးထားတယ်လို့ ထုတ်ပြန်ခဲ့ပါတယ်။
တမန်တော် မုဟမ္မဒ်ကို စော်ကားမှုနဲ့ပတ်သက်ပြီး ဥပဒေဘောင်အတွင်းကနေသာ ဖြေရှင်းကြဖို့၊ သွေးမဆူကြဖို့နဲ့ စိတ်ထိန်းကြဖို့ ဒေသတွင်းနဲ့ နိုင်ငံတစ်ဝှမ်းက မွတ်စလင်ခေါင်းဆောင်တွေ၊ အစ္စလာမ်ဘာသာရေးအဖွဲ့အစည်းတွေက သီးသီး ကြေငြာချက် ထုတ်ပြန်ခဲ့ကြပါတယ်။
Ref: Times of India
