ဧပြီ ၁၅၊ ၂၀၂၀
M-Media
-ကိုရိုနာဗိုင်းရပ်စ် ပြန့်နှံ့မှုကို ဦးတည်ပြီး အိန္ဒိယနိုင်ငံမှာ အစ္စလာမ်ဘာသာဝင်တွေအပေါ် တိုက်ခိုက်မှုတွေ ဖြစ်ပေါ်လာပါတယ်။
အိန္ဒိယနိုင်ငံမှာ ဧပြီလ ၁၅ ရက်နေ့ အထိ Covid-19 ကူးစက်ခံရသူ ၁၁၉၃၃ ဦး ရှိပြီး သေဆုံးသူက ၃၉၆ ဦး ရှိနေပါတယ်။ နိုင်ငံကို အစိုးရဟာ နိုင်ငံကို အခုလအစောပိုင်းကတည်းက တံခါးပိတ်ထားပြီး ရွေ့လျားသွားလာမှု ကန့်သတ်မိန့်လည်း ထုတ်ပြန်ထားပါတယ်။
ဟိန္ဒူအမျိုးသားရေးဝါဒီတွေဟာ ဗိုင်းရပ်စ်ကို မွတ်စလင်တွေက ဖြန့်နေတယ်ဆိုတဲ့ ဝါဒဖြန့်မှုတွေ ပြုလုပ်နေပြီး လူနည်းစု မွတ်စလင်တွေအပေါ် ပစ်မှတ်ထားတဲ့ တိုက်ခိုက်မှုတွေလည်း နိုင်ငံတစ်ဝှမ်းမှာ မြင့်တက်လာပါတယ်။
မတ်လအလယ်ပိုင်းက ဒေလီမြို့ ဆင်ခြေဖုံး နေရာမူဒင်အရပ်မှာ ပြုလုပ်ခဲ့တဲ့ အစ္စလာမ်သာသနာပြု သဘ်လီဂ်အဖွဲ့ရဲ့ အခမ်းအနားတစ်ခုကို ရည်ညွှန်းပြီး ဝါဒဖြန့်နေကြတာပါ။
အဲဒီအခမ်းအနားကို နိုင်ငံခြားသားတွေအပါအဝင် လူပေါင်း ၈၀၀၀ လောက် တက်ရောက်ခဲ့ပါတယ်။ တက်ရောက်ခဲ့သူတစ်ချို့မှာ နောက်ပိုင်း Covid-19 ရောဂါ တွေ့ခဲ့ရတာကြောင့် နိုင်ငံတစ်ဝှမ်း ပြည်နယ် ၁၅ ခုလောက်မှာ ဒီအခမ်းအနားကို တက်ရောက်ခဲ့သူတွေ၊ သူတို့နဲ့ ဆက်နွယ်ပတ်သက်သူ စုစုပေါင်း ၂၇၀၀၀ လောက် အစိုးရက သီးခြားခွဲထား စောင့်ကြည့်နေပါတယ်။
Covid-19 တားဆီးတိုက်ဖျက်ရေးအဖွဲ့ Response to Covid-19 က ပညာရှင်တွေက နိုင်ငံအတွင်း ဗိုင်းရပ်စ်ပြန့်နှံမှုဟာ သဘ်လီဂ်း သာသနာပြုအဖွဲ့ကြောင့် ဖြစ်တယ်ဆိုတဲ့ ပြစ်တင်ပြောဆိုမှုတွေ မမှန်ကန်ဘူးဆိုတာ စစ်ဆေးထားတဲ့ အချက်အလက်တွေက ပြသနေတယ်လို့ ပြီးခဲ့တဲ့တစ်ပတ်မှာ ပြောကြားခဲ့ပါတယ်။
အာဏာရ ဟိန္ဒူအမျိုးသားရေးပါတီ BJP က ခေါင်းဆောင်တွေ၊ နိုင်ငံရေးသမားတွေကတော့ သဘ်လီဂ်အဖွဲ့ဟာ ပြည်သူသန်းပေါင်းများစွာကို ရောဂါကူးစက်အောင် တမင်လုပ်ဆောင်နေတယ်လို့ စွပ်စွဲပြောဆိုခဲ့ပါတယ်။ မွတ်စလင်တွေဟာ ‘ကိုရိုနာအကြမ်းဖက်ဝါဒ’ ကို ပုံဖော်နေတာဖြစ်ကြောင်း၊ တဘ်လီဂ်အဖွဲ့ ခေါင်းဆောင်တွေကို ကြိုးပေးသတ်တာ၊ သေနတ်နဲ့ ပစ်သတ်တာတို့ လုပ်ရမှာဖြစ်ကြောင်းလှုံ့ဆော်တာတွေလည်း ရှိလာပါတယ်။
အိ္န္ဒိယ ဆိုရှယ်မီဒီယာတွေမှာလည်း #coronaJihad #CoronaTerrorism #CoronaBombsTablighi ခေါင်းစဉ်တွေနဲ့ အစ္စလာမ်ဘာသာဝင်တွေကို မုန်းတီးရေးဝါဒဖြန့်တာတွေ လုပ်ဆောင်လာကြပါတယ်။
ပုံချခံရ
ဒေလီ လူနည်းစုရေးရာ ကော်မရှင်က ဥက္ကဌဖြစ်သူ ဒေါက်တာ ဒါဖာရွလ် အစ္စလာမ်ခန်းက ကိုရိုနာဗိုင်းရပ်စ် တိုက်ဖျက်ရေး ကန့်သတ်မှုတွေကို ချိုးဖောက်ကာ အစိုးရအဖွဲ့တွေ၊ နိုင်ငံရေးပါတီတွေနဲ့ အခြား ဘာသာရေးအဖွဲ့အစည်းတွေက လူစုလူဝေး အကြီးအကျယ် လုပ်ခဲ့ပေမယ့် မွတ်စလင်တွေရဲ့ တဘ်လီဂ်အဖွဲ့သာ ပစ်မှတ်ထား ခံနေရတယ်လို့ ပြောကြားခဲ့ပါတယ်။
“မွတ်စလင်တွေကိုပဲ အားလုံးက ပစ်မှတ်ထားပြီး ရန်လုပ်နေကြတာပါ။ ပြီးခဲ့တဲ့ ရက်အနည်းငယ်ကဆိုရင် နိုင်ငံတစ်ဝှမ်းမှာ မွတ်စလင်တွေအပေါ် တိုက်ခိုက်မှုတွေ ဖြစ်တယ်ဆိုတာ ကျွန်တော်တို့ ကြားရတယ်။ မွတ်စလင်တွေကို သပိတမှောက်ဖို့ ဆော်ဩတာတွေ ရှိလာတယ်။ (ဟိန္ဒူအစွန်းရောက်) Hindutva အဖွဲ့တွေက မွတ်စလင်တွေကို အရှက်တကွဲ အကျိုးနည်းဖြစ်အောင် လုပ်လာတယ်။ ရဲတွေလည်း အတူတူပါပဲ”
BJP အမတ်တစ်ယောက်က တဘ်လီဂ်းအဖွဲ့ကို အစွန်းရောက်အဖွဲ့လို့ လူသိရှင်ကြားပြောကြားခဲ့တဲ့ ကာရ်နာတာကာပြည်နယ်မှာ ဧပြီလအစောပိုင်းက မွတ်စလင်တွေအပေါ် အကြမ်းဖက်တိုက်ခိုက်မှုတွေ ဖြစ်ပွားခဲ့ပါတယ်။
ရွေ့လျားသွားလာမှု ကန့်သတ်မိန့်ကြောင့် အတိဒုက္ခရောက်နေတဲ့ သူတွေကို ကူညီနေသူ စေတနာ့ဝန်ထမ်း မွတ်စလင်၇ ဦးဟာ ဧပြီလ ၄ ရက်နဲ့ ၆ ရက်နေ့တွေမှာ လူအယောက် ၂၀ လောက်ပါတဲ့ ဟိန္ဒူအစွန်းရောက်အုပ်စုရဲ့ တိုက်ခိုက်မှုကို ၂ကြိမ်တိုင်တိုင် ခံခဲ့ရပါတယ်။
ဒီကိစ္စမှာ ရဲတပ်ဖွဲ့က လူ ၂ ဦးကိုသာ ဖမ်းထားပါတယ်။
Covid-19 ကာလမှာ အကူအညီပေးရေးလုပ်ငန်းတွေ လုပ်ဆောင်နေတဲ့ NGO အဖွဲ့ Swaraj Abhiyan က အဖွဲ့ဝင် မာနိုဟာရ် အီလာဗာသီကလည်း ပြီးခဲ့တဲ့ သီတင်းပတ်အတွင်း သူတို့အဖွဲ့က မွတ်စလင် စေတနာ့ဝန်ထမ်းတွေ အကြိမ်ရေအများအပြား တိုက်ခိုက်ခံခဲ့ရတယ်လို့ ပြောကြားခဲ့ပါတယ်။
ပြည်နယ်မြို့တော် မန်ဂလောမှာ အခုတစ်ပတ်အတွင်း မွတ်စလင်တွေကို မောင်းထုတ်ရေး၊ မွတ်စလင်တွေနဲ့ အဆက်အဆံမလုပ်ရေး လှုံဆော်မှုတွေ ပေါ်ပေါက်လာပါတယ်။
မြို့တော်ဒေလီက ဆင်ခြေဖုံးတစ်ခုမှာတော့ မွတ်စလင်တွေဟာ တိုက်ခိုက်ခံရတဲ့အပြင် ဘာသာရေး အကြမ်းဖက်သိမ်းသွင်းမှုတွေပါ ခံနေရပါတယ်။
ဧပြီလ ၅ ရက်နေ့က တိုက်ခိုက်ခံခဲ့ရတဲ့ အသက် ၂၂ နှစ်အရွယ် အလီက တိုက်ခိုက်သူတွေဟာ သူ့ကို ကိုရိုနာဗိုင်းရပ်စ် ဖြန့်ဝေသူအဖြစ် စွပ်စွဲခဲ့ပြီး ‘ဘယ်သူဖြန့်ခိုင်းတာလဲ’ လို့ပါ မေးမြန်းခဲ့လို့ ဆိုပါတယ်။ အလီကို ရိုက်နှက်ပြီးတဲ့နောက် တိုက်ခိုက်သူတွေဟာ ဟိန္ဒူဘုရားကျောင်းထဲ တရွတ်တိုက်ခေါ်သွားကာ နတ်ဘုရားတွေကို အဓမ္မ ကန်တော့ခိုင်းခဲ့ပြီး အစ္စလာမ်သာသနာကို စွန့်လွှတ်ခိုင်းခဲ့ပါတယ်။
မိသားစုက နောက်ထပ် တိုက်ခိုက်မှုတွေဖြစ်မှာ ကြောက်ရွံ့နေပြီး ရဲကိုလည်း မတိုင်ရဲဘူးလို့ ဆိုပါတယ်။
“ရဲသွားတိုင်လိုက်ရင် ဟိန္ဒူတွေက ကျွန်တော်တို့ကို ဒီရပ်ကွက်ထဲမှာ မနေနိုင်အောင် ဒုက္ခပေးတော့မှာ” လို့ အမည်မဖော်လိုသူ မိသားစုဝင်တစ်ဦးက ပြောကြားခဲ့ပါတယ်။
ပြီးခဲ့တဲ့ မတ်လအတွင်းကလည်း ဒေလီမြို့ ဆင်ဖြေဖုံးက မွတ်စလင်ရပ်ကွက်တွေကို ဟိန္ဒူလူအုပ်က တိုက်ခိုက်ကာ ဗလီတွေ၊ နေအိမ်တွေနဲ့ မွတ်စလင်ပိုင် စီးပွားရေးလုပ်ငန်းတွေကို မီးရှို့ ဖျက်ဆီးခဲ့ကြပါတယ်။
Ref: The Guardian
