Tag: Iran

ဇူလိုင် ၆၊ ၂၀၂၁
M-Media

-မိမိတို့ရဲ့ ပြည်တွင်းဖြစ် ဒရုန်းသစ်ဟာ ကီလိုမီတာ ၇၀၀၀ အထိ ပျံနိုင်တယ်လို့ အီရန်က ထုတ်ပြောလိုက်ပြီး ဒါဟာ အီရန်ကထုတ်သမျှ ဒရုန်းတွေထဲမှာ အဝေးဆုံးအကွာအဝေးကို ပျံသန်းနိုင်တဲ့ဒရုန်း ဖြစ်လာပါတယ်။

ပြီးခဲ့တဲ့ဇွန်လမှာ အီရန်က Gaza လို့ခေါ်တဲ့ ပြည်တွင်းဖြစ် ဒရုန်းတစ်မျိုးကို ထုတ်ပြခဲ့ပြီး ကီလိုမီတာ ၇၀၀၀ ထောင်အထိ ပျံနိုင်တဲ့ ဒရုန်းသစ်လို့ ရည်ညွှန်းတာဟာ ဒီဒရုန်းကိုပြောတာလားဆိုတာ တိတိကျကျ မသိရပါဘူး။

အစ္စရေးရဲ့ ကျူးကျော်တိုက်ခိုက်ညှင်းပမ်းမှုဒဏ်ကို အမြဲလိုလိုခံနေရတဲ့ ပါလက်စတိုင်းပိုင် ဂါဇာကမ်းမြှောင်ရဲ့အမည်ကို မှည့်ခေါ်ထားတာဖြစ်ပါတယ်။

အီရန် တော်လှန်ရေးအစောင့်တပ်ဖွဲ့အကြီးအကဲ ဗိုလ်ချုပ် ဟူစိန် ဆာလာမီက မိမိတို့ထုတ်ထားတဲ့ ဒရုန်းသစ်ဟာ အီရန်၊ ဒါမှမဟုတ် ယီမင်၊ ဆီးရီးယားတို့ကနေ အစ္စရေးကို အသွားအပြန် ပျံသန်းလို့ရတယ်လို့ ထုတ်ဖော်ပြောဆိုထားပါတယ်။

အဲဒီဒရုန်းသစ်ရဲ့ မော်ဒယ်က Shahed 149 ဖြစ်ပြီး ဒုံးကျည် ၁၃ လုံး တပ်ဆင်လို့ရတယ်လို့ ဆာလာမီက ပြောပါတယ်။ ၂၀၁၁ ခုနှစ်မှာ ပစ်ချသိမ်းဆည်းနိုင်ခဲ့တဲ့ အမေရိကန်ရဲ့ ထောက်လှမ်းရေးဒရုန်း RQ-170 ကို မှီငြိမ်းပြီး ထုတ်လုပ်ထားတာပါ။

အီရတ်နဲ့ ဆီးရီးယားတို့က ရှီအာပြည်သူတွေစစ်ကိုလည်း အီရန်က ပြည်တွင်းဖြစ်ဒရုန်းတွေ ထောက်ပံ့ပေးထားပါတယ်။ ဇွန်လအစောပိုင်း အီရတ်မှာ အီရန်ကျောထောက်နောက်ခံပြု လက်နက်ကိုင်အဖွဲ့ Popular Mobilization Forces ​ရဲ့ စစ်ရေးပြအခမ်းအနားမှာ အီရန်ပြည်တွင်းထုတ် နောက်ဆုံးပေါ် ဒရုန်းတွေထဲက တစ်ခုဖြစ်တဲ့ Mohajer-6 ကို ထုတ်ပြခဲ့ပါတယ်။

Ref: Asia Times

ဇွန် ၂၃၊ ၂၀၂၁
M-Media

-မြို့တော် တီဟီရန်အနောက်ဖက် ကာရာဂျ်မြို့က နျူအဆောက်အဦးတစ်ခုကို ပစ်မှတ်ထားပြီး တိုက်ခိုက်ရန်ကြိုးပမ်းမှုကို ဖော်ထုတ်တားဆီးနိုင်ခဲ့တယ်လို့ အီရန်က ထုတ်ပြန်ပါတယ်။

အီရန်တော်လှန်ရေးအစောင့်တပ်ဖွဲ့ (IRGC) နဲ့ သက်ဆိုင်တဲ့ ဆိုရှယ်မီဒီယာတွေက ဒရုန်းတစ်စီးဟာ နျူနဲ့သက်ဆိုင်တဲ့ အဆောက်အဦးတစ်ခုကို တိုက်ခိုက်ဖို့ ကြိုးစားခဲ့တာဖြစ်ပြီး အသက်ဆုံးရှုံးတာ၊ အဆောက်အဦး ထိခိုက်ပျက်ဆီးတာတွေ မရှိဘူးလို့ ရေးသားဖော်ပြပါတယ်။

နိုင်ငံရဲ့ အရပ်ဖက်နျူစီမံကိန်းကို တိုက်ခိုက်ဖို့ ကြိုးပမ်းမှုလို့ အီရန်နိုင်ငံပိုင်သတင်းဌာနက ထုတ်ပြန်ခဲ့ပေမယ့် အသေးစိတ် မဖော်ပြခဲ့ပါဘူး။ အီရန်ရဲ့ နျူကလီးယား အဆောက်အဦးတွေ၊ သိပ္ပံပညာရှင်တွေကို အရင်က တိုက်ခိုက်ခံရမှုနောက်ပိုင်း လုံခြုံ​ရေးကို ပိုမိုတင်းကြပ်ထားတာကြောင့် အခုတစ်ခေါက်မှာ ထိခိုက်ပျက်ဆီးမှုမရှိဘူးလို့ ဆိုပါတယ်။

အီရန် နိုင်ငံတော်လုံခြုံရေးကောင်စီက ကြိုးကိုင်သူဘယ်သူလဲဆိုတာနဲ့ ဘာ့ကြောင့် တိုက်ခိုက်လဲဆိုတာ သိရဖို့အတွက် စုံစမ်းစစ်ဆေးမှုတွေ ပြုလုပ်နေတယ်လို့ သတင်းဌာနတွေကို ဖြေကြားခဲ့ပါတယ်။

ကာရာဂျ်မြို့က အဲဒီနျူအဆောက်အဦး ၁၉၇၄ ခုနှစ်က တည်ဆောက်ခဲ့တာဖြစ်ပြီး နျူနည်းပညာအသုံးပြုကာ မြေဆီ၊ ရေအရည်အသွေး၊ စိုက်ပျိုးရေး၊ မွေးမြူရေးကဏ္ဍ တိုးတက်အောင် ဆောင်ရွက်ဖို့ဖြစ်တယ်လို့ အီရန်က ထုတ်ပြန်ထားပါတယ်။

ပြီးခဲ့တဲ့ နှစ်အနည်းငယ်အတွင်း အီရန်ရဲ့ နျူစီမံကိန်းအဆောက်အဦးတွေ၊ သိပ္ပံပညာရှင်တွေ ပစ်မှတ်ထားတိုက်ခိုက်ခံခဲ့ရပြီး အစ္စရေးနဲ့ အမေရိကန် ပူးပေါင်းဆောင်ရွက်တာလို့ အီရန်က စွပ်စွဲထားပါတယ်။

အမေရိကန်နဲ့ မဟာမိတ်တွေက အီရန်ရဲ့ နျူစီမံကိန်းဟာ လက်နက်ထုတ်ဖို့ ရည်ရွယ်တာဖြစ်တယ်လို့ စွပ်စွဲထားပြီး အီရန်က ဒီစွပ်စွဲချက်ကို ငြင်းပါတယ်။

Ref: Aljazeera

ဇွန် ၂၁၊ ၂၀၂၁
M-Media

-ဆော်ဒီအာရေဗျနဲ့ ဆက်ဆံရေး ပြန်လည်တည်ဆောက်ဖို့မှာ ဘာအတားအဆီးမှ မရှိဘူးလို့ အီရန်သမ္မတသစ် အီဘရာဟင် ရိုင်စီက ပြောကြားလိုက်ပါတယ်။

ရိုင်စီဟာ ပြီးခဲ့တဲ့သောကြာနေ့ သမ္မတရွေးကောက်ပွဲမှာ တောင်ပြိုကမ်းပြို အနိုင်ရခဲ့တာပါ။ ဒီနေ့ ပထမဆုံး သတင်းစာရှင်းလင်းပွဲမှာတော့ ဒေသတွင်းရန်ဘက် ဆော်ဒီနဲ့ ဆက်ဆံရေးကိစ္စ အပါအဝင် သူ့ရဲ့ အစီအစဉ်တစ်ချို့ကို ထုတ်ပြောခဲ့ပါတယ်။

“သံရုံးတွေပြန်ဖွင့်ဖို့ အီရန်ဖက်က ဘာအတားအဆီးမှ မရှိသလို၊ ဆော်ဒီအာရေဗျနဲ့ ဆက်ဆံရေးပြန်တည်ဆောက်ဖို့လည်း အဟန့်အတား မရှိပါဘူး”

ဆော်ဒီက ရှီအာ ဘာသာရေးခေါင်းဆောင်တစ်ဦးကို ကွပ်မျက်လိုက်တဲ့ နောက်ဆက်တွဲအဖြစ် ၂၀၁၆ ခုနှစ် ဇန်နဝါရီလ တီဟီရန်က ဆော်ဒီသံရုံးကို ဆန္ဒပြသူတွေက တိုက်ခိုက်ခဲ့ပြီးနောက်ပိုင်း နှစ်နိုင်ငံဆက်ဆံရေး ပြတ်တောက်ခဲ့တာ ဖြစ်ပါတယ်။

ဒါပေမယ့် ပြီးခဲ့တဲ့လအနည်းငယ်အတွင်း အီရန်နဲ့ ဆော်ဒီတို့ဟာ ဆက်ဆံရေးပြန်လည်​တည်ဆောက်ဖို့အတွက် ဆွေးနွေးမှု ပြုလုပ်နေတယ်လို့ သတင်းတွေထွက်ခဲ့ပြီး နှစ်ဖက်စလုံးက အတည်ပြုခဲ့ပါတယ်။

သမ္မတထရမ့်လက်ထက်မှာ ပျ​က်ပြယ်လုနီးပါးဖြစ်ခဲ့တဲ့ ၂၀၁၅ နျူသဘောတူညီချက်ကို ပြန်လည်အသက်သွင်းဖို့ အီရန်နဲ့ အမေရိကန်တို့ ကြိုးစားနေကြတာပါ။

သမ္မတ ရိုင်စီက အီရန်ပြည်သူတွေရဲ့ အကျိုးစီးပွားအတွက် နိုင်ငံခြားရေးပေါ်လစီကို နျူသဘောတူညီချက်နဲ့ ကန့်သတ်မထားဘူးလို့ ပြောကြားခဲ့ပါတယ်။ ဒါ့အပြင် အီရန်ရဲ့ ဒုံးကျည်စီမံကိန်းကို ဆွေးနွေးညှိနှိုင်းမယ့်အထဲမှာ ထည့်သွင်းမထားဘူးလို့လည်း သူက ဆိုပါတယ်။

Ref: Press TV

ဇွန် ၁၉၊ ၂၀၂၁
M-Media

-မနေ့ကကျင်းပတဲ့ အီရန်သမ္မတရွေးကောက်ပွဲမှာ သဘောထားတင်းမာတဲ့ လက်ယာဝါဒီ အီဘရာဟင် ရိုင်စီ အနိုင်ရသွားပြီလို့ ကနဦး မဲရလဒ်တွေကို ကိုးကားပြီး အီရန် ပြည်တွင်း မီဒီယာတွေ ကဖော်ပြပါတယ်။

မဲပေါင်း ၂၈.၆ သန်း ရေတွက်ပြီးတဲ့အချိန်မှာ ရိုင်စီက ထောက်ခံမဲ ၁၇.၈ သန်းနဲ့ အပြတ်အသတ်အနိုင်ရထားကြောင်း အီရန်ဒုတိယပြည်ထဲရေးဝန်ကြီးက ပြောပါတယ်။

အလယ်အလတ်သမား လက်ရှိသမ္မတ ဟာဆန်ရူဟာနီက ပြည်သူတွေရဲ့ ရွေးချယ်မှုကို ဂုဏ်ပြုကြိုဆိုတယ်လို့ ပြောကြားခဲ့ပါတယ်။ ရူဟာနီဟာ ရိုင်စီကို လူချင်းတွေ့ပြီး ဂုဏ်ပြုခဲ့ပါတယ်။

ရိုင်စီရဲ့ ပြိုင်ဘက်တစ်ချို့ဟာ စနေနေ့မနက် အစောပိုင်းကတည်းက သူတို့ ရှုံးနိမ့်ကြောင်း အတည်ပြုပြောကြားခဲ့ကြတာပါ။

အီရန်ရဲ့ တရားရေးဌာနမှာ အချိန်အတော်ကြာ ကျင်လည်ခဲ့ပြီး ၂၀၁၉ ခုနှစ်က တရားရေးဌာန အကြီးအကဲဖြစ်လာတဲ့ ရိုင်စီဟာ အီရန်အဓိပတိ အယာတိုလာ အလီခါမေနီက သမ္မတအဖြစ် လျာထားထားသူ ဖြစ်ပါတယ်။

ရိုင်စီက အီရန်ပြည်သူတွေရဲ့ လူမှုဘ၀အပေါ် သက်ရောက်မှုရှိနေတဲ့ ပြဿနာအားလုံးကို ​ဖြေရှင်းဖို့ ကိုယ်စွမ်းဉာဏ်စွမ်းရှိသလောက် ဆောင်ရွက်သွားမယ်လို့ ပြောကြားခဲ့ပါတယ်။

ရွေးကောက်ပွဲမှာ ပြည်သူတွေရဲ့ ​ပါဝင်ခဲ့မှုကို အဓိပတိ ခါမေနီက ချီးကျူးခဲ့ပါတယ်။

Ref: Aljazeera

ဇွန် ၁၁၊ ၂၀၂၁
M-Media

-အရှေ့အလယ်ပိုင်းတစ်ဝှမ်းက စစ်ဖက်ပစ်မှတ်တွေကို ခြေရာခံစောင့်ကြည့်နိုင်မယ့် အဆင့်မြင့် ဂြိုဟ်တုတစ်လုံး အီရန်ကို ထောက်ပံ့ပေးဖို့ ရုရှားက ပြင်ဆင်နေပါတယ်။

Kanopus-V အလို့အမည်ရတဲ့ ဂြိုဟ်တုဖြစ်ပြီး ပုံရိပ်တွေကို ပြတ်သားစွာ ရိုက်ကူးနိုင်မယ့် အဆင့်မြင့်ကင်မရာတပ်ဆင်ထားကာ လာမယ့်လအနည်းငယ်အတွင်း ရုရှားက လွှတ်တင်မှာဖြစ်ပါတယ်။

ပါရှန်ပင်လယ်ကွေ့က ရေနံတွင်းတွေ၊ အစ္စရေးရဲ့ စစ်စခန်းတွေကနေ အီရတ်နိုင်ငံမှာရှိနေတဲ့ အမေရိကန် စစ်အခြေစိုက်စခန်းတွေအထိ စောင့်ကြည့်ခြေရာခံနိုင်လိမ့်မယ်လို့ အမေရိကန်အစိုးရ တာဝန်ရှိသူ နှစ်ဦးနဲ့ အရှေ့အလယ်ပိုင်းက သတင်းရင်းမြစ်တစ်ခုကို ကိုးကားပြီး ဝါရှင်တန်ပို့စ်သတင်းစာက ဖော်ပြပါတယ်။

အမေရိကန်နဲ့ အီရန်တို့ဟာ ထရမ့်လက်ထက်မှာ ပျက်လုနီးပါးဖြစ်ခဲ့တဲ့ ၂၀၁၅ ခုနှစ် နျူသဘောတူညီချက်ကို ပြန်လည်အသက်သွင်းရေး တစ်ဆင့်ခံဆွေးနွေးမှုတွေ ပြုလုပ်နေတာပါ။

အီရန်ဟာ Kanopus-V ဂြိုဟ်တု ရရှိဖို့အတွက် ၂၀၁၈ ခုနှစ်ကတည်းက ရုရှားနဲ့ ညှိနှိုင်းဆွေးနွေးလာတာဖြစ်ပါတယ်။ အီရန်ဟာ ၂၀၂၀ ခုနှစ် ဧပြီလမှာ နိုင်ငံရဲ့ ပထမဆုံး စစ်ဖက်ဆိုင်ရာဂြိုဟ်တုကို လွှတ်တင်နိုင်ခဲ့ပါတယ်။

Ref: Washington Post