ဧပြီ ၂၉၊ ၂၀၂၃
M-Media
– ကိုယ်ပိုင်အုပ်ချုပ်ခွင့်ရရှိရေးနဲ့ လွတ်မြောက်ရေး ကြိုးပမ်းမှုတွေရှိနေတဲ့ ကက်ရှ်မီးယားမှာ အိန္ဒိယအစိုးရက ဟိန္ဒူပြည်သူ့စစ်တွေကို လက်နက်တပ်ဆင်ပေးနေပါတယ်။
ကက်ရှ်မီးယားဟာ အစ္စလာမ်ဘာသာ၀င်အများစုရှိတဲ့ ဒေသဖြစ်ပြီး အိန္ဒိယနဲ့ ပါကစ္စတန်တို့က တစ်ခြမ်းစီ သိမ်းပိုက်ထားပါတယ်။ အိန္ဒိယက သိမ်းပိုက်ထားတဲ့ ကက်ရှ်မီးယားမှာ ၁၉၄၇ ခုနှစ်ကတည်းက စပြီး ခွဲထွက်ရေး လှုပ်ရှားမှုတွေ ရှိနေတာဖြစ်ပါတယ်။
ဟိန္ဒူအမျိုးသားရေးပါတီ BJP အာဏာရပြီးနောက်ပိုင်း ကက်ရှ်မီးယားပြည်သူတွေကို ဖိနှိပ်ချုပ်ခြယ်မှုတွေ ပိုမိုပြုလုပ်လာပြီး ၂၀၁၉ ခုနှစ်မှာ ကက်ရှ်မီးယားရဲ့ ကိုယ်ပိုင်အုပ်ချုပ်ခွင့်ကို ရုပ်သိမ်းခဲ့ပါတယ်။
အဲဒီနောက်ပိုင်း စစ်တပ်တွေ ပိိုမိုချထားကာ ကက်ရှ်မီးယားပြည်သူတွေလည်း ပိုမိုညှင်းပမ်း ခံလာရပါတယ်။ လက်ရှိ စစ်သား ၅ သိန်းကျော် ကက်ရှ်မီးယားမှာ ချထားပါတယ်။
ဟိန္ဒူပြည်သူ့စစ်အဖွဲ့
ခွဲထွက်ရေးလှုပ်ရှားသူတွေကို တုန့်ပြန်ရေးဆိုတဲ့ ခေါင်းစဥ်နဲ့ မိုဒီအစိုးရဟာ ဟိန္ဒူပြည်သူ့စစ်အဖွဲ့ကို ပြီးခဲ့တဲ့နှစ်က စတင်ဖွဲ့စည်းကာ လက်နက်တပ်ဆင်ပေးတာတွေပါ လုပ်လာပါတယ်။
“ကျေးရွာ ကာကွယ်ရေးအဖွဲ့” လို့ အမည်ပေးထားတဲ့ ဒီပြည်သူ့စစ်အဖွဲ့ဟာ အင်အား ၅ ထောင်လောက် ရှိနေပြီး ရိုင်ဖယ်တွေလည်း တပ်ဆင်ထားပါတယ်။ အိန္ဒိယစစ်တပ်က သူတို့ကို လေ့ကျင့်သင်ကြားပေးနေတာ ဖြစ်ပါတယ်။
ကက်ရှ်မီးယားဒေသခံ မွတ်စလင်တွေက ဟိန္ဒူပြည်သူ့စစ်အဖွဲ့ဟာ ဒေသတွင်းပြဿနာကို ပိုမိုဆိုးရွားသွားစေနိုင်တယ်လို့ ပြောပါတယ်။
“ဟိန္ဒူလူ့အဖွဲ့အစည်းတစ်ခုတည်းကို ကွက်ပြီး လက်နက်တွေ တပ်ဆင်ပေးတာက စိုးရိမ်စရာကောင်းပါတယ်။ လူငယ်တွေ လက်နက်တရမ်းရမ်းနဲ့ဆိုတော့ ဘယ်သူ့အတွက်မှ မကောင်းနိုင်ဘူး” လို့ ဒန်ဂရီမြို့မှာ နေထိုင်တဲ့ မွတ်စလင်တစ်ဦးက ပြောပါတယ်။
အိန္ဒိယစစ်တပ်ရဲ့ အရန်တပ်ဖွဲ့က တာ၀န်ရှိသူတစ်ဦးက သူတို့အဖွဲ့ဟာ ဟိန္ဒူပြည်သူ့စစ်အဖွဲ့နဲ့ ပုံမှန်အဆက်အသွယ်ထားရှိတယ်လို့ ပြောပါတယ်။ ခွဲထွက်ရေးလှုပ်ရှားသူတွေနဲ့ မမှားအောင် အရန်တပ်ဖွဲ့က ကင်းလှည့်တဲ့ သတင်းအချက်အလက်တွေကို ပြည်သူ့စစ်အဖွဲ့ကို ပေးပို့လေ့ရှိပါတယ်။
“ဟိန္ဒူပြည်သူ့စစ်အဖွဲ့ ဖွဲ့စည်းတာဟာ ကာကွယ်ရေးအတွက်ပါ။ တိုက်ခိုက်ရေးအတွက် မဟုတ်ပါဘူး” လို့ အိန္ဒိယ ပြန်ကြားရေး၀န်ကြီးဌာန တာ၀န်ရှိသူ ကန်ချန် ဂွတ်ပ်တာက ပြောပါတယ်။
အစုလိုက်အပြုံလိုက် သတ်ဖြတ်မှု
ကက်ရှ်မီးယားမှာ ဟိန္ဒူအစွန်းရောက်တွေက ဒေသခံမွတ်စလင်တွေကို အစုလိုက်အပြုံလိုက် သတ်ဖြတ်ခဲ့တဲ့ ဖြစ်ရပ်တစ်ခု သမိုင်းမှာ ရှိခဲ့ဖူးပါတယ်။
၁၉၄၇ ခုနှစ် အိန္ဒိယနဲ့ ပါကစ္စတန် ကွဲတဲ့အချိန်က ဖြစ်ပါတယ်။ အဲဒီနှစ် အောက်တိုဘာနဲ့ နို၀င်ဘာလမှာ ကက်ရှ်မီးယားရဲ့ ဂျာမူးဒေသမှာ မွတ်စလင် အနည်းဆုံး ၂ သောင်းကနေ တစ်သိန်းလောက်အထိ သတ်ဖြတ်ခံခဲ့ရပါတယ်။
ဂျာမူးက မွတ်စလင်ရွာပေါင်းများစွာ အမြတ်ဖြုတ်ခံခဲ့ရပြီး မွတ်စလင်အမျိုးသမီးတွေ အဓမ္မကျင့်ခံရတာ၊ မွတ်စလင်တွေပိုင်ဆိုင်တဲ့ ပစ္စည်းတွေ ဖျက်ဆီးလုယက်ခံရတာတွေလည်း ရှိခဲ့ပါတယ်။
ဒီသတ်ဖြတ်မှုမှာ ဟိန္ဒူအစွန်းရောက်အဖွဲ့ RSS က အဓိက ပါ၀င်ခဲ့ပါတယ်။ RSS ဟာ BJP ပါတီရဲ့ ၀ါဒရေးရာ မိခင်အဖွဲ့အစည်း ဖြစ်ပါတယ်။
Ref: AFP
