Tag: Islam in India

မေ ၁၇၊ ၂၀၂၂

M-Media 

-အိန္ဒိယမြောက်ပိုင်း အူတာပရာဒက်ရှ်ပြည်နယ် ဗာရာဏသီမြို့က ဗလီတစ်လုံးမှာ ဟိန္ဒူနတ်ဘုရားရုပ်တုတွေ တွေ့တယ်ဆိုတဲ့ သတင်းကြောင့် တရားရုံးက ဗလီကို ၀တ်ပြုခွင့် ပိတ်လိုက်ပါတယ်။ 

အပိတ်ခံလိုက်ရတဲ့ဗလီဟာ သမိုင်း၀င် ‘ဂျန်၀ါပီ’ ဗလီ ဖြစ်ပါတယ်။ ဒီဗလီဟာ ဟိန္ဒူဘုရားကျောင်းနေရာမှာ ဆောက်ထားတယ်တဲ့အတွက် ဗလီပရ၀ုဏ်ထဲမှာ ဘုရားရှိခိုးချင်တယ်လို့ ဟိန္ဒူအမျိုးသမီး ၅ ဦးက အခုလအစောပိုင်းမှာ တရားရုံးကို လျှောက်ထားခဲ့ပါတယ်။ 

ဒီအတွက် တရားရုံးက အဖွဲ့တစ်ခုဖွဲ့ကာ ရှာဖွေမှုတွေလုပ်ခဲ့ပြီး နတ်ဘုရား ရှီးဗားနဲ့ အခြား ဟိန္ဒူနတ်ဘုရားရုပ်တုတွေ တွေ့ရှိခဲ့တယ်လို့ အဲဒီအဖွဲ့က ထုတ်ပြန်ပါတယ်။ 

အိန္ဒိယကို အုပ်စိုးခဲ့တဲ့ မွတ်စလင်ဘုရင်တွေဟာ ဟိန္ဒူဘုရားကျောင်းတွေကိုဖျက်ဆီးကာ အဲဒီနေရာတွေမှာ ဗလီတွေ၊ အထိမ်းအမှတ်နေရာတွေ တည်ဆောက်ထားတယ်လို့ ဟိန္ဒူလက်ယာသမားတွေ အရင်ကတည်းက စွပ်စွဲခဲ့ကြတာ ဖြစ်ပါတယ်။ 

ဂျန်၀ါပီဗလီဟာ ဥတာပရာဒက်ရှ်ပြည်နယ်မှာရှိတဲ့ အကြီးဆုံး ဗလီ၀တ်ကျောင်းတော် ၃ ခုထဲက တစ်ခုလည်း ဖြစ်ပါတယ်။ ဟိန္ဒူအမျိုးသမီးတွေဖက်က လိုက်ပါဆောင်ရွက်ပေးနေတဲ့ ရှေ့နေက ဗလီထဲမှာ ဟိန္ဒူနတ်ဘုရားရုပ်ထုတွေ တွေ့တဲ့အတွက် မွတ်စလင်တွေ ဘုရား၀တ်ပြုမှုကို တရားရုံးက ပိတ်ပင်လိုက်တာဖြစ်ကြောင်း ပြောကြားခဲ့ပါတယ်။ 

ဗာရာဏသီမြို့ဟာ ၀န်ကြီးချုပ် မိုဒီရဲ့ မဲဆန္ဒနယ်ထဲမှာ ပါ၀င်တဲ့မြို့ ဖြစ်ပါတယ်။ မိုဒီရဲ့ အာဏာရ ဟိန္ဒူအမျိုးသားရေးပါတီ BJP ကို ထောက်ခံသူတွေဟာ တဂျ်မဟာလ် ဂူဗိမာန်အပါအ၀င် နိုင်ငံတစ်၀ှမ်းက မွတ်စလင်တွေရဲ့ အထိမ်းအမှတ်နေရာတွေ၊ သမိုင်း၀င်ဗလီတွေကို ဖြိုချတူးဖော်ပြီး ဟိန္ဒူနတ်ဘုရားတွေရှာဖို့ ဆော်သြနေတဲ့အချိန် ဗာရာဏသီမြို့က ဒီကိစ္စ ပေါ်ပေါက်လာတာဖြစ်ပါတယ်။ 

အယွဒ္ဒယမြို့က ဘာဘရီဗလီဟာ ဟိန္ဒူနတ်ဘုရား ရာမ မွေးဖွားရာနေရာလို့ စွပ်စွဲပြီး ၁၉၉၂ ခုနှစ်မှာ ဟိန္ဒူလူအုပ်က တိုက်ခိုက်ဖျက်ဆီးခဲ့ပါတယ်။ အဲဒီနောက်ဆက်တွဲ နိုင်ငံတစ်၀ှမ်းဖြစ်ပွားတဲ့ ဟိန္ဒူ-မွတ်စလင် အဓိကရုဏ်းမှာ မွတ်စလင်တွေ ထောင်နဲ့ချီ အသတ်ခံခဲ့ရပါတယ်။ 

၂၀၁၉ ခုနှစ်မှာတော့ အိန္ဒိယတရားရုံးချုပ်က ဘာဘရီဗလီနေရာမှာ ဟိန္ဒူဘုရားကျောင်းဆောက်ဖို့နဲ့ မွတ်စလင်တွေ ဗလီဆောက်နိုင်ရေး မြေနေရာတစ်ခုကို အစိုးရက သတ်မှတ်ပေးဖို့ ဆုံးဖြတ်ချက် ချမှတ်ခဲ့ပါတယ်။ 

Ref: Daily Sabah 

ဧပြီ ၁၈၊ ၂၀၂၂

M-Media 

– အိန္ဒိယနိုင်ငံမှာ ဟိန္ဒူဘာသာရေး စီတန်းလှည့်လည်ပွဲကနေ အခြေပြုတဲ့ ဟိန္ဒူ-မွတ်စလင် ဘာသာရေးအဓိကရုဏ်းဟာ မြို့တော် နယူးဒေလီအထိ ရောက်လာပါတယ်။ 

၀န်ကြီးချုပ်မိုဒီရဲ့ မွေးရပ်ပြည်နယ် ဂူဂျာရသ်၊ အာဏာရ ဟိန္ဒူအမျိုးသားရေးပါတီ BJP အုပ်စိုးတဲ့ နိုင်ငံအလယ်ပိုင်း မဒ်ယာ ပရာဒက်ရှ်တို့ အပါအ၀င် အနည်းဆုံး ပြည်နယ် ၃ ခုမှာ ဧပြီလ ၁၀ ရက်နေ့က စတင်ပြီး မွတ်စလင်တွေကို ပစ်မှတ်ထားတဲ့ တိုက်ခိုက်မှုတွေ လုပ်ဆောင်လာခဲ့ကြတာပါ။ လူသေဆုံးမှုတွေလည်း ရှိပါတယ်။

မဒ်ယာပရာဒက်ရှ်မှာ မွတ်စလင်တွေရဲ့ အိမ်တွေ၊ စီးပွားရေးလုပ်ငန်းတွေ အများအပြား ဖျက်ဆီးခံခဲ့ရပြီး ပြည်နယ်အစိုးရကတော့ မွတ်စလင်တွေစလို့ ဖြစ်တာဖြစ်ကြောင်း၊ မွတ်စလင်တွေအနေနဲ့ တရားမျှတမှုရဖို့ မမျှော်လင့်သင့်ကြောင်း လူသိရှင်ကြား ပြစ်တင်ပြောဆိုခဲ့ပါတယ်။

ဘုရားပွဲလှည့်တဲ့ ဟိန္ဒူလူအုပ်ဟာ မွတ်စလင်ရပ်ကွက်တွေ၊ ဗလီတွေနား သွားရောက်ကာ ဆဲဆိုရန်စတာတွေ၊ တိုက်ခိုက်တာတွေ လုပ်တဲ့ ဗီဒီယိုတွေ ဆိုရှယ်မီဒီယာမှာ ပြန့်နှံ့လာပါတယ်။ 

ဒီအဓိကရုဏ်းဟာ မြို့တော် နယူးဒေလီအထိ ကူးစက်လာပြီး မနေ့က ဒေလီမြို့ဆင်ခြေဖုံးက ဂျာဟန်ဂျီပူရီမြို့မှာ တိုက်ခိုက်မှုတွေ ဖြစ်ပွားခဲ့ပါတယ်။ 

ဟိန္ဒူဘုရားပွဲ Hanuman Jayanti လှည့်တာကနေ အစပြုတာဖြစ်ပြီး မွတ်စလင်ရပ်ကွက်က နေအိမ်နဲ့ ဆိုင်တစ်ချို့၊ ကားတွေ၊ ဆိုင်ကယ်တွေ ဖျက်ဆီးခံခဲ့ရပါတယ်။ 

ဒေလီရဲတပ်ဖွဲ့က ဒီကိစ္စနဲ့ပတ်သက်ပြီး အနည်းဆုံး လူ ၁၄ ဦးကို ဖမ်းဆီးထားတယ်လို့ ထုတ်ပြန်ပါတယ်။

ဂူဂျာရတ်နဲ့ မဒ်ယာပရာဒက်ရှ်ပြည်နယ်တွေမှာ အာဏာပိုင်တွေက မွတ်စလင်တစ်ချို့ကို အဓိကရုဏ်းမှာ ပါ၀င်သူတွေလို့ စွပ်စွဲကာ သူတို့ရဲ့ နေအိမ်တွေ၊ ဆိုင်တွေကို ဖြိုချဖျက်ဆီးခဲ့ကြပါတယ်။ 

အတိုက်အခံနိုင်ငံရေးသမားတွေက အာဏာရ ဟိန္ဒူအမျိုးသားရေးပါတီဟာ တင်းမာမှုတွေဖြစ်အောင် ပိုမိုမီးထိုးပေးနေတယ်လို့ ပြစ်တင်ပြောဆိုခဲ့ပါတယ်။

Ref: Aljazeera 

ဧပြီ ၇၊ ၂၀၂၂

M-Media 

-အိန္ဒိယနိုင်ငံတောင်ပိုင်း ကနာတာကာ ပြည်နယ်မှာ မွတ်စလင်တွေအပေါ် ဖိနှိပ်ဒုက္ခပေးရေး ကမ်ပိန်းတွေကို ဟိန္ဒူ ဘာသာရေးအဖွဲ့အစည်းတွေက တိုးမြှင့် လုပ်ဆောင်လာပါတယ်။ 

စာသင်ကျောင်းတွေမှာ မွတ်စလင်အမျိုးသမီးတွေ ပု၀ါဆောင်းမှုကို ပိတ်ပင်တဲ့ ပြီးခဲ့တဲ့နှစ် ဒီဇင်ဘာက စတင်ခဲ့တဲ့ ဒီလုပ်ရှားမှုတွေဟာ အခုအချိန်မှာတော့ ဟာလာလ် အစားအသောက် ပိတ်ပင်ရေး၊ ဗလီတွေမှာ စပီကာနဲ့ ၀တ်ပြုဖို့ နှိုးဆော်မှုကို ပိတ်ပင်ရေး၊ အသီးအနှံ စီးပွားရေးမှာ မွတ်စလင်လုပ်ငန်းရှင်တွေကို ဖယ်ရှားရေးအထိ ကျယ်ပြန့်လာပါတယ်။ 

ထင်ရှားတဲ့ ဟိန္ဒူဘာသရေးခေါင်းဆောင် ဆစ်ဒါလင်ဂါ ဆွာမီဂျီးက မွတ်စလင်တွေဟာ ပြည်နယ်အတွင်းက သရက်သီးစျေးကွက်ကို လွှမ်းမိုး ချုပ်ကိုင်ထားတယ်လို့ စွပ်စွဲခဲ့ပြီး ဟိန္ဒူတွေအနေနဲ့ ဘာသာတူလုပ်ငန်းရှင်တွေကိုသာ အားပေးဖို့ တိုက်တွန်းခဲ့ပါတယ်။ 

လက်ယာစွန်းရောက် ဟိန္ဒူဘာသာရေးအဖွဲ့ Hindu Janajagruti Samiti က တာ၀န်ရှိသူ ချန်ဒရူး မိုဂါက မွတ်စလင်တွေဟာ ‘တံတွေးထွေး ဂျီဟတ်’ ဆင်နွှဲနေတယ်လို့ စွပ်စွဲခဲ့ပါတယ်။ 

“အသီးအနှံလုပ်ငန်းကို မွတ်စလင်တွေက လက်၀ါးကြီး အုပ်ထားတယ်။ သူတို့ရောင်းတဲ့ ပေါင်မုန့်တွေ၊ အသီးတွေမှာ တံတွေးထွေးပြီးမှ ရောင်းတာကိုလည်း ကျွန်တော်တို့ တွေ့ရပါတယ်။ မွတ်စလင်တွေ လက်၀ါးကြီးအုပ်ထားတာကို ရပ်တန့်ရေး ကူညီဖို့၊ ဟိန္ဒူစျေးသည်တွေရာင်းတဲ့ သစ်သီးတွေကိုသာ ၀ယ်ယူဖို့ ဟိန္ဒူတွေကို ကျွန်တော် တိုက်တွန်းပါတယ်”

နောက်ထပ် ဟိန္ဒူဘာသာရေးခေါင်းဆောင်တစ်ဦးဖြစ်တဲ့ ပရာရှနက်သ် ဆမ်ဘာဂီကလည်း ဟိန္ဒူလယ်သမားတွေရဲ့လုပ်အားကို မွတ်စလင်လုပ်ငန်းရှင်တွေက ခေါင်းပုံဖြတ်နေတယ်လို့ ပြောကြားခဲ့ပါတယ်။ 

ကာနာတာကာပြည်နယ်ကို အုပ်စိုးနေတဲ့ အာဏာရ ဟိန္ဒူအမျိုးသားရေးပါတီ BJP အဖွဲ့၀င်တစ်ချို့နဲ့ ဟိန္ဒူလက်ယာစွန်းရောက်တွေဟာ ပြည်နယ်အတွင်းက ဟာလာလ် အသားလုပ်ငန်းကို သပိတ်မှောက်ဖို့ ပြီးခဲ့တဲ့သီတင်းပတ်ကစတင်ပြီး တိုက်တွန်းဆော်သြလာခဲ့ပါတယ်။ 

မွတ်စလင်တွေ ၀တ်ပြုဖို့ နှိုးဆော်တဲ့အခါမှာ လော်စပီကာအသုံးပြုမှုကို တားဆီးပိတ်ပင်ဖို့လည်း ဟိန္ဒူအဖွဲ့အစည်းတွေက ပြီးခဲ့တဲ့ရက်ပိုင်းမှာ ဆန္ဒထုတ်ဖော်မှုတွေ လုပ်ဆောင်ခဲ့ကြပါတယ်။ 

Ref: Times of India, India Today 

မတ် ၁၆၊ ၂၀၂၂

M-Media 

-အိန္ဒိယနိုင်ငံတောင်ပိုင်း ကာနာတာကာပြည်နယ်အစိုးရရဲ့ မွတ်စလင်ကျောင်းသူတွေ ပု၀ါမဆောင်းရအမိန့်ကို ပြည်နယ် တရားရုံးချုပ်က ထပ်မံအတည်ပြုလိုက်ပါတယ်။ 

ဒီအတည်ပြုချက်ကြောင့် တစ်ခြားပြည်နယ်တွေမှာပါ ဒီလိုအမိန့်တွေ ထုတ်ပြန်လာမယ့်အနေအထား ဖြစ်လာပါတယ်။ 

ကာနာတာကာ ပြည်နယ်အစိုးရဟာ ပြီးခဲ့တဲ့နှစ်နှောင်းပိုင်းက စာသင်ကျောင်းတွေမှာ ဘာသာရေးဆိုင်ရာ အ၀တ်အစားတွေ မ၀တ်ရဆိုတဲ့အမိန့် ထုတ်ပြန်ခဲ့ပြီး အခုနှစ်အစောပိုင်းမှာ စတင် ကျင့်သုံးခဲ့တာပါ။ 

မွတ်စလင်ကျောင်းသူတွေ ပု၀ါဆောင်းတာကို အဓိက ပစ်မှတ်ထားခဲ့ပြီး ဆရာတွေက ကျောင်းထဲ၀င်ခွင့်မပေးတာ၊ အိမ်ပြန်ခိုင်းတာတွေ ရှိခဲ့သလို၊ ဟိန္ဒူ လက်ယာစွန်းရောက်တွေကလည်း ပု၀ါဆောင်းထားတဲ့ မွတ်စလင်ကျောင်းသူတွေကို နှောက်ယှက်တာတွေ ရှိခဲ့ပါတယ်။ 

ဒီအမိန့်ဟာ အခြေခံဥပဒေက အာမခံပေးထားတဲ့ ဘာသာရေးလွတ်လပ်ခွင့်ကို ချိုးဖောက်တာဖြစ်တယ်လို့ မွတ်စလင်ကျောင်းသားတွေက ပြည်နယ်တရားရုံးချုပ်ကို တိုင်တန်းခဲ့တာပါ။ 

မနေ့က တရားရုံးချုပ်ရဲ့ အမိန့်မှာ ပု၀ါဆောင်းတာဟာ အစ္စလာမ်ဘာသာရဲ့ အဓိကကျင့်၀တ် မဟုတ်တာကို တွေ့ရတဲ့အတွက် ကျောင်းသူတွေ ပု၀ါမဆောင်းရဆိုတဲ့အမိန့်ကို ထပ်မံအတည်ပြုဖို့ ဆုံးဖြတ်ခဲ့ကြောင်း ဖော်ပြထားပါတယ်။ 

ဒီဆုံးဖြတ်ချက်နဲ့ပတ်သက်ပြီး တရားရုံးကိုလျှောက်ထားတဲ့ မွတ်စလင်ကျောင်းသားတွေဖက်က ထုတ်ပြန်တာမျိုး မရှိသေးပေမယ့် ပြည်ထောင်စု တရားရုံးချုပ်ကို အယူခံတင်ဖို့ ရှိနေပါတယ်။ 

ကာနာတာကာ ပြည်နယ်ဟာ အာဏာရ ဟိန္ဒူအမျိုးသားရေးပါတီ BJP ကြီးစိုးတဲ့ ဒေသဖြစ်ပြီး သူတို့ကြီးစိုးတဲ့ တစ်ခြားပြည်နယ်တွေမှာပါ လုပ်ဆောင်လာမှာကို မွတ်စလင်တွေက စိုးရိမ်နေကြပါတယ်။ 

Ref: The Guardian