ဒီဇင်ဘာ ၂၄၊ ၂၀၂၁
M-Media

-အိန္ဒိယနိုင်ငံမြောက်ပိုင်း အူတာရက်ဟန်ပြည်နယ်က တရားပွဲတစ်ခုမှာ မွတ်စလင်တွေကို သတ်ဖြတ်မောင်းထုတ်ဖို့ ဟိန္ဒူဘုန်းကြီးတွေက ဟောပြောခဲ့ကြပြီး ဒီအတွက် ဝေဖန်မှုတွေလည်း မြင့်တက်နေပါတယ်။

​ဟိန္ဒူဘာသာရေးဆိုင်ရာ အထွဋ်အမြတ်မြို့တစ်ခုဖြစ်တဲ့ ဟာရစ်ဒ်၀ါ (Haridwar) မှာ ဒီဇင်ဘာ ၁၇ ရက်နေ့က​နေ ၁၉ ရက်နေ့အထိ ပြုလုပ်တဲ့ တရားပွဲမှာ ဒီလိုလှုံ့ဆော်ခဲ့ကြတာပါ။ တရားပွဲဗီဒီယိုဟာ အခုတစ်ပတ် အစောပိုင်းကစပြီး ဆိုရှယ်မီဒီယာမှာ ပြန့်နှံ့လာပါတယ်။

ပြည်နယ်ရဲတပ်ဖွဲ့က ဒီကိစ္စကို ကြာသာပတေးနေ့ကမှ စတင် စုံစမ်းတာ ဖြစ်ပါတယ်။ တိုင်ကြားမယ့်သူ မရှိတဲ့အတွက် စစ်ဆေးမှုမလုပ်တာလို့ ရဲတပ်ဖွဲ့က ပြောပါတယ်။ အမှုမှတ်တမ်းမှာ ဝါဆင်ရစ်ဇ်ဗီဆိုတဲ့ လူတစ်ဦးကိုသာ ဖော်ပြထားပြီး ဖမ်းဆီးထားသူ မရှိပါဘူး။ ရစ်ဇ်ဗီဟာ အရင်က မွတ်စလင်ဖြစ်ပေမယ့် ဟိန္ဒူဘာသာကိုပြောင်းကာ ဂျီတန်ဒရာ နာရာယန် တယာဂျီလို့ နာမည်ပေးထားတယ်လို့ ဆိုပါတယ်။

ရဲတပ်ဖွဲ့ကတော့ တယာဂျီနဲ့ အခြားအမည်မသိသူတွေကို ‘ဘာသာမတူလူ့အဖွဲ့အစည်းတွေအကြား အမုန်းပွားအောင်လုပ်မှု’ နဲ့ ​အမှုဖွင့်ထားတယ်လို့ ပြောပါတယ်။

ဟောပြောပွဲဗီဒီယို ပြန့်နှံ့ပြီးတဲ့နောက် ဗီဒီယိုမှာပါဝင်တဲ့ ဟိန္ဒူဘုန်းကြီးတွေကို ဆိုရှယ်မီဒီယာ အသုံးပြုသူတွေက နာမည်နဲ့တကွ ဖော်ထုတ်ရေးသားနေကြတာပါ။ အဲဒီဘုန်းကြီးတွေဟာ အာဏာရ ဟိန္ဒူအမျိုးသားရေးပါတီ BJP တာဝန်ရှိသူတွေနဲ့ တပူးပူးတတွဲတွဲတွေ့ရသူတွေ ဖြစ်ပါတယ်။

မြန်မာမှာ လုပ်သလို လုပ်ရမယ်

ဟာရစ်ဒ်ဝါမြို့က တရားပွဲမှာ ပွဲစီစဉ်သူ ပရာဘိုဒါနန် ဂီရိက မြန်မာနိုင်ငံမှာမွတ်စလင်တွေကို သတ်ဖြတ်မောင်းထုတ်သလို အိန္ဒိယက မွတ်စလင်တွေကိုလည်း သတ်ဖြတ်မောင်းထုတ်ဖို့ အိန္ဒိယစစ်တပ်၊ နိုင်ငံရေးသမားတွေနဲ့ ဟိန္ဒူဘာသာဝင်တွေကို တိုက်တွန်းခဲ့ပါတယ်။ ဒါဟာ ရိုဟင်ဂျာတွေ သတ်ဖြတ်မောင်းထုတ်ခံရမှုကို ရည်ညွှန်းတာလည်း ဖြစ်ပါတယ်။

ပရာဘိုဒါနန် ဂီရိကို BJP ပါတီခေါင်းဆောင်ပိုင်းနဲ့အတူ အမြဲလိုလို တွေ့ရတတ်ပါတယ်။ ဂီရိကတော့ ရဲတပ်ဖွဲ့ရဲ့ စုံစမ်းစစ်ဆေးမှုကို မကြောက်ဘူးလို့ ပြောပါတယ်။

ဟိန္ဒူဘုန်းကြီးတစ်ပါးဖြစ်တဲ့ ရတီ နာဆင်ဂနန် ဆာရာဝက်တီက ဟိန္ဒူတွေ လက်နက်ကိုင်ပြီး မွတ်စလင်တွေကို တိုက်ထုတ်ကာ ဟိန္ဒူဘာသာကို ကာကွယ်ဖို့ ထည့်သွင်းဟောပြောခဲ့ပါတယ်။ ဆရာဝက်တီဟာ အရင်ကလည်း မွတ်စလင်တွေကို အကြမ်းဖက်ဖို့ တိုက်တွန်းဆော်ဩလေ့ရှိပါတယ်။

ဟာရစ်ဒ်ဝါမြို့ တရားပွဲမှာ ဟောပြောသူ တော်တော်များများဟာ မွတ်စလင်ဆန့်ကျင်ရေးတွေ ပြောခဲ့ကြတာပါ။ ဟောပြောပွဲတက်ခဲ့တဲ့ BJP ပါတီ ပြောရေးဆိုခွင့်ရှိသူဟောင်း အက်ရှ်ဝီနီ အူပက်ဒ်ယေက အဲဒီပွဲမှာ နာရီဝက်လောက်ပဲ နေခဲ့တယ်လို့ ပြောပါတယ်။

ဒေလီမြို့ မွတ်စလင်ဆန့်ကျင်ရေး ချီတက်မှုမှာ ပါဝင်တဲ့အတွက် အူပက်ဒ်ယေဟာ ဖမ်းဆီးခံရဖူးပါတယ်။

အိန္ဒိယက မွတ်စလင်၊ ခရစ်ယာန်နဲ့ အခြားလူနည်းစုတွေ တိုက်ခိုက်ခံရမှုဟာ ၂၀၁၄ ခုနှစ် BJP ပါတီ အာဏာရပြီးကတည်းက ပိုမို မြင့်တက်လာပါတယ်။

ရဲက လစ်လျူရှုထား

အိန္ဒိယရဲအရာရှိတစ်ဦးဖြစ်တဲ့ အာရွှတ်ကူးမားက တရားပွဲဗီဒီယိုဟာ လှုံ့ဆော်တဲ့ပြောကြားမှုတွေ ပါဝင်တဲ့အတွက် ဆိုရှယ်မီဒီယာမှာ မရှိသင့်ဘူးလို့ ​ပြောကြားခဲ့ပါတယ်။

တရားပွဲမှာ ဘယ်သူတွေပါဝင်ပြီး ဘာတွေပြောခဲ့လဲဆိုတာ အထောက်အထားအပြည့်အစုံရှိပေမယ့် ပါဝင်သူတွေကို အမှုမဖွင့်တာနဲ့ပတ်သက်ပြီး ဆိုရှယ်မီဒီယာမှာ ဝေဖန်ပြောဆိုမှုတွေလည်း ရှိနေပါတယ်။

Ref: BBC

အောက်တိုဘာ ၂၉၊ ၂၀၂၁
M-Media

-အိန္ဒိယနိုင်ငံ အရှေ့မြောက်ပိုင်း ထရီပူရာပြည်နယ်မှာ အစ္စလာမ်ဘာသာဝင်တွေအပေါ် ပစ်မှတ်ထားတဲ့ အကြမ်းဖက်တိုက်ခိုက်မှုတွေ အခုတစ်ပတ်အစောပိုင်းမှာ ဖြစ်ပွားခဲ့ပြီး ဗလီတွေ၊ မွတ်စလင်တွေရဲ့ စီးပွားရေးလုပ်ငန်းတွေ၊ နေအိမ်တွေ အများအပြား ဖျက်ဆီးခံခဲ့ရပါတယ်။

ဘင်္ဂလားဒေ့ရှ်မှာ လူနည်းစု ဟိန္ဒူတွေအပေါ် မွတ်စလင်တွေက တိုက်ခိုက်မှုကို ဆန့်ကျင်ကြောင်း အာဏာရဟိန္ဒူအမျိုးသားရေးပါတီ BJP နဲ့ အနီးကပ်ဆက်ဆံရေးရှိတဲ့ ဟိန္ဒူလက်ယာစွန်းအဖွဲ့ (VHP) က အင်္ဂါနေ့မှာ ဆန္ဒပြပြီးနောက်ပိုင်း မွတ်စလင်တွေကို တိုက်ခိုက်ခဲ့တာပါ။

ထရီပူရာပြည်နယ်ဟာ ဘင်္ဂလားဒေ့ရှ်နဲ့ ကပ်နေတဲ့ ဒေသတစ်ခုဖြစ်ပြီး နယ်စပ်မြို့ ပါနီဆာဂါမှာ အခုတစ်ပတ်အတွင်း မွတ်စလင်တွေအပေါ် ပစ်မှတ်ထားတဲ့ တိုက်ခိုက်မှု ၁၀ ခုထက်မနည်း ဖြစ်ပွားခဲ့ပါတယ်။

မွတ်စလင်တွေရဲ့ နေအိမ်တွေ၊ စီးပွားရေးလုပ်ငန်းတွေနဲ့ ဗလီတွေ ဖျက်ဆီးခံခဲ့ရပြီး တိုက်ခိုက်မှုတွေ ထပ်မဖြစ်အောင် ရဲတပ်ဖွဲ့က လုံခြုံရေး တင်းကြပ်ထားပါတယ်။ သေဆုံးဒဏ်ရာရမှု သတင်းတွေ ထွက်မလာသေးပါဘူး။

ပါနီဆာဂါမှာ အင်္ဂါနေ့က ပြုလုပ်တဲ့ ချီတက်ဆန္ဒပြမှုအတွင်း လူပေါင်း ၃၅၀၀ လောက် ပါဝင်ပြီး အဲဒီလူတွေက တိုက်ခိုက်ခဲ့ကြတာ ဖြစ်ပါတယ်။

​အခုလအစောပိုင်း ဘင်္ဂလားဒေ့ရှ်မှာ ဟိန္ဒူတွေကို မွတ်စလင်လူအုပ်က အကြမ်းဖက်တိုက်ခိုက်မှု ဖြစ်ပွားပြီးနောက်ပိုင်း ထရီပူရာမှာလည်း မွတ်စလင်တွေကို ပစ်မှတ်ထားတဲ့ တိုက်ခိုက်မှု ခပ်စိပ်စိပ် ဖြစ်လာတာပါ။ ဗလီတွေ၊ မွတ်စလင်ရပ်တွေကို လူအုပ်ကြီးက တိုက်ခိုက်မှုတွေ ရက်ဆက်လုပ်နေတယ်လို့ အိန္ဒိယ အစ္စလာမ် သာသနာ့ပညာရှင်များအဖွဲ့က ပြီးခဲ့တဲ့တစ်ပတ်မှာ ထုတ်ပြန်ခဲ့ပါတယ်။

ထရီပူရာရဲတပ်ဖွဲ့ကတော့ ပြည်နယ်အတွင်းက ဗလီဝတ်ကျောင်းတော်ပေါင်း ၁၅၀ ကျော်ကို လုံခြုံရေးပေးထားတယ်လို့ ထုတ်ပြန်ပါတယ်။ ထရီပူရာပြည်နယ်မှာ လူဦးရေ ၄.၂ သန်းရှိပြီး အစ္စလာမ်ဘာသာဝင်က ၉ ရာခိုင်နှုန်းအောက်သာ ရှိပါတယ်။

ဘင်္ဂလားဒေ့ရှ်မှာ အခုလအစောပိုင်းက ဟိန္ဒူတွေ တိုက်ခိုက်ခံရမှုဟာ ဟိန္ဒူဘုရားပွဲ Durga Puja စီတန်းလှည့်လည်မှုအတွင်း နတ်ဘုရားတစ်ပါးရဲ့ ခြေထောက်ကြားမှာ ကုရ်အာန်ကျမ်းစာ ညှပ်ထားတယ်ဆိုတဲ့ သတင်း ဆိုရှယ်မီဒီယာမှာ ပြန့်နှံ့ပြီးတဲ့နောက်ပိုင်း ဖြစ်ပွားခဲ့တာ ဖြစ်ပါတယ်။

ဘင်္ဂလားဒေ့ရှ် အာဏာရပါတီက ဒီတိုက်ခိုက်မှုတွေကို ရှုတ်ချခဲ့ပြီး လူနည်းစု ဟိန္ဒူတွေနဲ့ တစ်သားတည်းရှိတယ်လို့ ဆန္ဒထုတ်ဖော်ခဲ့ကြပါတယ်။

Ref : BBC

mmMyanmarNews

စက်တင်ဘာ ၃၊ ၂၀၂၁
M-Media

-အိန္ဒိယမှာ မွတ်စလင်တွေကို ဟိန္ဒူလူအုပ်က အရှက်တကွဲအကျိုးအနည်းအောင်လုပ်တာ၊ တိုက်ခိုက်လုယက် သတ်ဖြတ်တာ၊ လူမျိုးရေးခွဲခြားစော်ကားတာတွေဟာ ပုံမှန်လိုဖြစ်လာနေပြီး အစိုးရကလည်း ထိထိရောက်ရောက် အရေးယူမှု မလုပ်ဘူးလို့ လေ့လာစောင့်ကြည့်သူတွေက ပြောပါတယ်။

အိန္ဒိယရဲ့ သန်းတစ်ထောင်ကျော် လူဦးရေမှာ မွတ်စလင်လူဦးရေက သန်း ၂၀၀ လောက်သာ ရှိနေတာပါ။ အရင်ကတည်းက ဟိန္ဒူအစွန်းရောက်တွေဟာ မွတ်စလင်တွေအပေါ် ပစ်မှတ်ထား တိုက်ခိုက်တာတွေ ရှိခဲ့ပြီး ဟိန္ဒူအမျိုးသားရေးပါတီ BJP အာဏာရတဲ့ ၂၀၁၄ ခုနှစ် နောက်ပိုင်း ဒီတိုက်ခိုက်မှုတွေဟာ သိသိသာသာ မြင့်တက်လာခဲ့ပါတယ်။

အခုအချိန်မှာတော့ နိုင်ငံတစ်ဝှမ်းမှာ ဒီလိုတိုက်ခိုက်မှုတွေ နေ့စဉ်လို ဖြစ်ပျက်နေပါပြီ။

အူတာပရာဒက်ရှက် သားအဖ

ဩဂုတ်လအတွင်းက ​နိုင်ငံမြောက်ပိုင်း အူတာပရာဒက်ရှ်ပြည်နယ် ကန်ပူရ်မြို့မှာ မွတ်စလင်သားအဖနှစ်ဦးကို ဟိန္ဒူလူအုပ်က ဘာသာရေးအကြမ်းဖက်မှုလုပ်တဲ့ ဗီဒီယိုတစ်ခု အွန်လိုင်းမှာ ပြန့်နှံ့ခဲ့ပါတယ်။

အသက် ၄၅ နှစ်အရွယ် မွတ်စလင်သုံးဘီးသမားကို လူအုပ်စုက ဝိုင်းဝန်း ရိုက်နှက်ကန်ကျောက်ခဲ့သလို ဟိန္ဒူဘုရားစာကိုလည်း အဓမ္မ ရွတ်ဆိုခိုင်းခဲ့ပါတယ်။ အရိုက်ခံရသူနဲ့ သမီးငယ်တို့က လူအုပ်ကို အကြမ်းမဖက်ဖို့ ငိုယို တောင်းပန်ခဲ့ပေမယ့် မရခဲ့ပါဘူး။

နောက်ပိုင်းမှာ မွတ်စလင်သားအဖကို ရဲတပ်ဖွဲ့က ကယ်ထုတ်သွားပြီး လူ ၃ ဦးကို ဖမ်းဆီးခဲ့ပေမယ့် ရက်အနည်းငယ်အကြာမှာ အာမခံနဲ့ ပြန်လွှတ်ပေးခဲ့ပါတယ်။

ဒီအဖြစ်အပျက်ဖြစ်ပွားပြီး ရက်အနည်းငယ်အကြာမှာပဲ နိုင်ငံအလယ်ပိုင်း မဒ်ယာပရာဒက်ရှ်ပြည်နယ်က အင်ဒိုရီမြို့မှာ ကလေးလက်ကောက်လေးတွေရောင်းတဲ့ မွတ်စလင်စျေးသည် သက်စလင်း အလီကို ဟိန္ဒူလူအုပ်က လူမျိုးရေးခွဲခြားစော်ကားပြီး တိုက်ခိုက်လုယက်ခဲ့သလို၊ ဟိန္ဒူတွေနေတဲ့နေရာကို နောက်တစ်ကြိမ် စျေးလာမရောင်းဖို့လည်း သတိပေးခဲ့ပါတယ်။

ထောင်ချောက်ဆင်

အင်ဒိုရီမြို့ကအဖြစ်အပျက်မှာ ရောင်စုံလက်ကောက်သည် အလီကို လူမျိုးရေးခွဲခြား စော်ကားပြီး ငွေကြေး၊ ဖုန်းနဲ့ စာရွက်စာတမ်း ရိုက်နှက်လူယူသွားသူတွေကို ရဲတပ်ဖွဲ့က ဖမ်းဆီးတာမျိုး မလုပ်ခဲ့ပါဘူး။

အခင်းဖြစ်ပွားပြီးနောက်တစ်ရက်မှာ အလီကို ရဲတပ်ဖွဲ့က ဖမ်းဆီးခဲ့ပြီး သူ့ကို တိုက်ခိုက်သူတွေထဲက တစ်ယောက်ရဲ့ အသက် ၁၃ နှစ်အရွယ် သမီးငယ်ကို မဖွယ်မရာလုပ်တယ်ဆိုတဲ့ စွဲချက်နဲ့ ဖြစ်ပါတယ်။ မိသားစုနဲ့ ပတ်ဝန်းကျင်အသိုင်းအ၀ိုင်းက ဒီစွဲချက်ကို ငြင်းဆိုခဲ့ပြီး ကလေး ၅ ယောက်ဖခင် အလီမှာ ဒီလို အကျင့်မျိုး မရှိဘူးလို့ ပြောကြားခဲ့ပါတယ်။

မျက်မြင်သက်သေတွေက အလီဟာ မွတ်စလင်ဖြစ်နေတဲ့အတွက် ဟိန္ဒူလူအုပ်ရဲ့ တိုက်ခိုက်လုယက်ခြင်း ခံခဲ့ရတာဖြစ်ပြီး၊ မိန်းကလေးငယ်ကို မဖွယ်မရာလုပ်တယ်ဆိုတဲ့ စွဲချက်ဟာ ဂွင်ဆင်တာသာဖြစ်တယ်လို့ ဖွင့်ဟပြောကြားခဲ့ကြပါတယ်။

ဩဂုတ်လအတွင်းမှာ အိန္ဒိယနိုင်ငံတစ်ဝှမ်း မွတ်စလင်တွေအပေါ် ပစ်မှတ်ထားတိုက်ခိုက်မှုတွေ တော်တော်များများ ဖြစ်ပွားခဲ့ကာ အထက်က အဖြစ်အပျက်နှစ်ခုဟာ အွန်လိုင်းမှာ ဗီဒီယိုနဲ့တကွ ပြန့်နှံ့ခဲ့တာတွေ ဖြစ်ပါတယ်။

နိစ္စဒူ၀ ဖြစ်ပျက်နေ

ပြီးခဲ့တဲ့ ၃ နှစ်အတွင်း မွတ်စလင်တွေ တိုက်ခိုက်ခံရမှုကို စုံစမ်းကာ အချက်အလက်စုဆောင်းခဲ့တဲ့ ဂျာနယ်လစ် အလီရှန် ဂျာဖရီက ဒီလိုအကြမ်းဖက်မှုတွေဟာ နိစ္စဒူ၀ ကျယ်ကျယ်ပြန့်ပြန့် ဖြစ်ပေါ်ပြီး၊ ဒါမျိုး လုပ်ရမယ်ဆိုတဲ့အတွေးမျိုး လူ့အဖွဲ့အစည်းမှာ ဝင်နေပြီလို့ ပြောကြားခဲ့ပါတယ်။

ဒီလိုတိုက်ခိုက်တဲ့ဗီဒီယိုမျိုး တစ်နေ့ကို ၃၊ ၄ ခုလောက် ရရှိနေပြီး အချက်အလက် အတည်ပြုလို့ရတဲ့ ဗီဒီယိုတွေကိုသာ အွန်လိုင်းမှာ လွှင့်တင်အသိပေးတယ်လို့ ဂျာဖရီက ဆိုပါတယ်။

“ဒီလို လူမျိုးရေးအကြမ်းဖက်မှုတွေဟာ မနေ့တစ်နေ့ကမှ ဖြစ်လာတာ မဟုတ်ပါဘူး။ ဒါပေမယ့် အာဏာရှိတဲ့သူတွေရဲ့ ဗျူဟာကျကျ ဖန်တီးမှုတွေ၊ နိုင်ငံရေးလှုံ့ဆော်မှုတွေကြောင့် လတ်တလောကာလမှာ ပိုများလာတာတော့ အသေအချာပါပဲ။ မယုံကြည်မှုတွေက အရင်ကတည်းက ရှိခဲ့တယ်။ ဒါပေမယ့် ဘာသာကြီး၊ လူမျိုးကြီး အမျိုးသားရေးဝါဒက ဒီအက်ကြောင်းတွေကို ပိုပြီး ကြီးမားစေတာပါ” လို့ ဒေလီတက္ကသိုလ်မှာ နိုင်ငံရေးသိပ္ပံ သင်ကြားတဲ့ ပရော်ဖက်ဆာ တန်ဗီရ် အိုင်ဂျက်ဇ်က ပြောပါတယ်။

ဟိန္ဒူအမျိုးသားရေးပါတီ BJP က ဝန်ကြီးချုပ်မိုဒီရဲ့ ပထမသက်တမ်းမှာ အိန္ဒိယနိုင်ငံတစ်ဝှမ်း နွားချစ်သူအဖွဲ့အစည်းတွေ ပေါ်ပေါက်လာပြီး နွားပေါ်တယ်၊ အမဲသားရောင်းတယ်ဆိုတဲ့ ခေါင်းစဉ်အောက်မှာ မွတ်စလင်တွေနဲ့ ဟိန္ဒူဇာနိမ့်တွေကို ရိုက်နှက်သတ်ဖြတ်မှုတွေ အများအပြားဖြစ်ပွားခဲ့ပါတယ်။

BJP အစိုးရဟာ ဒီအဖြစ်အပျက်တွေကို ထိထိရောက်ရောက် အရေးမယူပါဘူး။

၂၀၁၉ ခုနှစ်မှာပြုလုပ်တဲ့ အမုန်းရာဇဝတ်မှု အချက်အလက်ကောက်ယူမှုအရ အရင် ၁၀ နှစ်အတွင်း ဖြစ်ပျက်ခဲ့တဲ့ အမုန်းရာဇဝတ်မှုတွေရဲ့ ၉၀ ရာခိုင်နှုန်းလောက်ဟာ မွတ်စလင်တွေအပေါ် ပစ်မှတ်ထားတိုက်ခိုက်တာမျိုး ဖြစ်တာကို တွေ့ခဲ့ရပါတယ်။

ကျူးလွန်သူအများစုဟာ အရေးယူခြင်းမခံရသလို BJP အစိုးရရဲ့ ပ,စားပေးခြင်းကိုပါ ခံခဲ့ရပါတယ်။

၂၀၁၉ ခုနှစ် ဝန်ကြီးချုပ်မိုဒီ ပြန်လည်ရွေးကောက်ခံရပြီးနောက်ပိုင်းမှာတော့ မွတ်စလင်တွေအပေါ် ဟိန္ဒူအစွန်းရောက်တွေရဲ့ အကြမ်းဖက်တိုက်ခိုက်မှုဟာ ပိုမိုကြီးမား ကျယ်ပြန့်လာခဲ့ပါတယ်။

မွတ်စလင်တွေ ကိုဗစ်ဖြန့်တယ်ဆိုတဲ့ စွပ်စွဲချက်နဲ့ တိုက်ခိုက်မှုတွေ ထပ်ဖြစ်လာသလို၊ ထင်ရှားကျော်ကြားတဲ့ မွတ်စလင်အမျိုးသမီးတွေကို အွန်လိုင်းမှာ လိင်ပိုင်းဆိုင်ရာ စော်ကားအရှက်ခွဲတာတွေလည်း ပေါ်လာပါတယ်။

မွတ်စလင်တွေကို အကြမ်းဖက်ဖို့ ဆန္ဒပြလှုံ့ဆော်မှုတွေ မြင့်တက်လာခဲ့ပြီး ပြီးခဲ့တဲ့လ BJP ခေါင်းဆောင်​ဟောင်းတစ်ဦး ဦးဆောင်တဲ့ ဆန္ဒပြပွဲမှာဆိုရင် မွတ်စလင်တွေကို သတ်ဖြတ်ဖို့အထိ ပေါ်ပေါ်ထင်ထင် တိုက်တွန်းဆော်ဩလာခဲ့ကြပါတယ်။

Ref: BBC