Tag: Lebanon

စက်တင်ဘာ ၂၈၊ ၂၀၂၄
M-Media

-လက်ဘနွန်အခြေစိုက် လက်နက်ကိုင်အဖွဲ့တစ်ခုဖြစ်တဲ့ ဟစ်ဇ်ဘိုလာရဲ့ ခေါင်းဆောင် ဟာဆန် နဆရက်လာ သေဆုံးပြီလို့ အစ္စရေးက ထုတ်ပြန်ပါတယ်။

စက်တင်ဘာ ၂၇ ရက်နေ့ ဘေရွတ်မြို့က လူနေအထပ်မြင့်တိုက်တစ်ခုကို အစ္စရေးက လေကြောင်းကနေ အကြီးအကျယ် တိုက်ခိုက်ဗုံးကြဲခဲ့တာပါ။ ဒီတိုက်ခိုက်မှုမှာ ဟစ်ဇ်ဘိုလာခေါင်းဆောင် သေဆုံးခဲ့တယ်လို့ ဆိုပါတယ်။

ဟစ်ဇ်ဘိုလာဖက်ကတော့ ဒီသတင်းနဲ့ပတ်သက်ပြီး ထုတ်ပြန်တာမျိုး မရှိသေးပါဘူး။

ပြီးခဲ့တဲ့နှစ် အောက်တိုဘာ ဂါဇာက အစ္စရေးရဲ့ တစ်ကျော့ပြန် လူသတ်ပွဲ စတင်ကတည်းက ဟစ်ဇ်ဘိုလာနဲ့ အစ္စရေးတို့အကြား အပြန်အလှန် တိုက်ခိုက်မှုတွေ ဖြစ်ခဲ့ပြီး ပြီးခဲ့တဲ့သီတင်းပတ်ကစလို့ အစ္စရေးဟာ မြို့တော်ဘေရွတ်ကိုပါ ကျူးကျော်တိုက်ခိုက်လာတာ ဖြစ်ပါတယ်။

လက်ဘနွန်က အစ္စရေးရဲ့ တိုက်ခိုက်မှုအတွင်း အနည်းဆုံး လူ ၇၀၀ ကျော် သေဆုံးထားပြီး အများစုက အမျိုးသမီးနဲ့ ကလေးငယ်တွေ ဖြစ်ပါတယ်။

Ref: Aljazeera

စက်တင်ဘာ ၂၄၊ ၂၀၂၄
M-Media

-အစ္စရေးဟာ တနင်္လာနေ့က လက်ဘနွန်နိုင်ငံတောင်ပိုင်းမှာ လေကြောင်းတိုက်ခိုက်မှုပေါင်း ၆၅၀ ကျော် ပြုလုပ်ခဲ့ပြီး လူပေါင်း ၄၉၂ ဦးထက်မနည်း သေဆုံးခဲ့ပါတယ်။

ဒဏ်ရာရရှိသူ ၁၆၄၅ ဦးရှိပြီး အစ္စရေးရန်ကြောင့် လက်ဘနွန်တောင်ပိုင်းနဲ့ အရှေ့ပိုင်းက ပြည်သူတွေဟာ အိုးအိမ်စွန့်ခွာ ထွက်ပြေးနေရပါတယ်။ အသတ်ခံရသူတွေထဲမှာ အနည်းဆုံး ကလေးငယ် ၂၄ ဦး ပါ၀င်ပါတယ်။

အစ္စရေးက တိုက်ခိုက်မှုတွေဟာ ဟစ်ဇ်ဘိုလာအဖွဲ့ကို ပစ်မှတ်ထားတယ်လို့ ပြောကြားခဲ့ပြီး နောက်ထပ် စစ်ဆင်ရေးတွေ ပြုလုပ်သွားမယ်လို့ ဆိုပါတယ်။ ဟစ်ဇ်ဘိုလာဖက်ကလည်း အစ္စရေးကို ဒုံးကျည်တွေနဲ့ လက်တုန့်ပြန် ပစ်ခတ်ခဲ့ပါတယ်။

အစ္စရေးရဲ့ အဓိကမဟာမိတ် အမေရိကန်က တင်းမာမှုတွေ လျှော့ချဖို့ တိုက်တွန်းခဲ့ပေမယ့် မဟာမိတ်ကို ကာကွယ်ဖို့ အဆင်သင့်ရှိတယ်လို့ ထုတ်ပြန်ပါတယ်။

အီဂျစ်နဲ့ တူရကီတို့က တိုက်ခိုက်မှုတွေကို ရှုတ်ချခဲ့ပြီး အစ္စရေးဟာ အရှေ့အလယ်ပိုင်းတစ်ခုလုံးကို စစ်ပွဲထဲ ဆွဲခေါ်နေတယ်လို့ ၀ေဖန်ခဲ့ပါတယ်။

Ref: Aljazeera

စက်တင်ဘာ ၂၀၊ ၂၀၂၄
M-Media

-လက်ဘနွန်နိုင်ငံ ဘေရွတ်မြို့တောင်ပိုင်းကို အစ္စရေးက လေကြောင်းကနေ တိုက်ခိုက်တာကြောင့် ကလေးငယ်တွေအပါအ၀င် လူ ၃ ဦးထက်မနည်း သေဆုံးတယ်လို့ သိရပါတယ်။

အစ္စရေးကတော့ ဟစ်ဇ်ဘိုလာ ထိပ်ပိုင်းခေါင်းဆောင်တစ်ယောက်ကို လေကြောင်းကနေ ပစ်မှတ်ထား တိုက်ခိုက်ခဲ့တယ်လို့ ထုတ်ပြန်ပါတယ်။ တိုက်ခိုက်တဲ့နေရာဟာ လူနေအိမ်ယာတွေ ဖြစ်ပါတယ်။

ဟစ်ဇ်ဘိုလာအဖွဲ့၀င်တွေရဲ့ pager နဲ့ စကားပြောစက်တွေကို အစ္စရေးက ပြီးခဲ့တဲ့နှစ်ရက်မှာ ဖောက်ခွဲခဲ့ပြီးနောက်ပိုင်း တင်းမာမှုတွေ မြင့်တက်လာတာပါ။ ဒီဖောက်ခွဲမှုမှာ အနည်းဆုံး လူ ၄၀ လောက် သေဆုံးခဲ့ပြီး ထောင်နဲ့ချီ ဒဏ်ရာရခဲ့ပါတယ်။

ဟစ်ဇ်ဘိုလာက အစ္စရေးရဲ့ ဖောက်ခွဲမှုကို တုန့်ပြန်တဲ့အနေနဲ့ အစ္စရေးမြောက်ပိုင်းကို စက်တင်ဘာ ၂၀ ရက်နေ့မှာ ဒုံးကျည် ၁၄၀ ကျော်နဲ့ ပစ်ခတ် တိုက်ခိုက်ခဲ့ပါတယ်။

Ref: Aljazeera

ဒီဇင်ဘာ ၁၂၊ ၂၀၂၂

M-Media 

-စနေနေ့က မော်ရိုကိုအသင်း ပေါ်တူဂီကိုနိုင်ကာ ကမ္ဘာ့ဖလား ဆီမီးဖိုင်နယ်ကို တက်ရောက်သွားမှုနဲ့အတူ လက်ဘနွန်က လက္ခဏာဆရာမတစ်ယောက် နာမည်ကြီးလာပါတယ်။ 

မော်ရိုကိုဟာ ကမ္ဘာ့ဖလားဆီမီးဖိုင်နယ်ကို ပထမဆုံးရောက်ရှိခဲ့တဲ့ အာဖရိကအသင်းအဖြစ် မှတ်တမ်း၀င်ခဲ့ပါတယ်။ 

လက်ဘနွန် ဗေဒင်ဆရာမ လိုက်လာ အဘ်ဒူလတစ််ဖ်ဟာ ဗုဒ္ဓဟူးနေ့က သူ့ရဲ့ Instagram မှာ ကမ္ဘာ့ဖလား ခန့်မှန်းချက်ဗီဒီယိုကို လွှင့်တင်ခဲ့ပြီး အဲဒီအထဲမှာ အာရပ်အသင်းတစ်ခု ဆီမီးဖိုင်နယ်တက်မယ်လို့ တွက်ချက် ပြောကြားခဲ့ပါတယ်။ 

ဒီဗီဒီယိုကို ဆိုရှယ်မီဒီယာသုံးစွဲသူတွေ အပြိုင်အဆိုင် မျှ၀ေခဲ့ကြပြီး စနေနေ့မှာတော့ ဒီခန့်မှန်းချက်ဟာ အမှန်တကယ် ဖြစ်လာပါတယ်။ 

မော်ရိုကိုဟာ အာဖရိကတိုက်က အာရပ်နွယ်ဖွားတွေရဲ့နိုင်ငံ ဖြစ်ပါတယ်။ 

ဆရာမလိုက်လာဟာ ကမ္ဘာ့ဖလား အုပ်စုပွဲစဥ် မစခင် ဆော်ဒီအာရေဗျက အာဂျင်တီးနားကို နိုင်လိမ့်မယ်လို့ တွက်ချက်ပြောကြားခဲ့ပါတယ်။

လိုက်လာရဲ့ အထင်ရှားဆုံးတွက်ချက်မှုက လက်ဘနွန်၀န်ကြီးချုပ် ရာဖစ် ဟာရီရီ လုပ်ကြံသတ်ဖြတ်ခံရမယ်ဆိုတဲ့ ပြောကြားချက်ပါ။ ဟာရီရီဟာ ၂၀၀၅ ခုနှစ် ဖေဖော်ရီလမှာ တကယ်ပဲ ကားဗုံးခွဲ လုပ်ကြံခံခဲ့ရပါတယ်။ 

ဆရာမလိုက်လာက သူမဟာ အနာဂတ်ကို ကြိုပြောတာမဟုတ်ဘဲ သူမတွက်ချက်ပြီး ထွက်ပေါ်လာတဲ့ ရလဒ်ကိုသာ ပြောကြားတာလို့ ဆိုပါတယ်။ 

မော်ရိုကိုအသင်းကမ္ဘာ့ဖလားရနိုင်မယ့် ဇာတာပါလားလို့ မေးမြန်းရာမှာတော့ ဖိုင်နယ်အတွက် သူမ တွက်ချက်မှာမဟုတ်ဘဲ မော်ရိုကိုအသင်း ဖလားရအောင် ဆန္ဒပြုတယ်လို့ ဖြေကြားခဲ့ပါတယ်။

အစ္စလာမ်ဘာသာမှာ ဗေဒင်ယတြာ လက္ခဏာကိန်းခန်းတွေကို သမ္မာဒိဌိမကျတဲ့အရာတွေအဖြစ် သတ်မှတ်ထားပြီး လေ့လာလိုက်စားခြင်းမပြုဖို့ တားမြစ်ထားပါတယ်။ 

လက်ဘနွန်အပါအ၀င် အာရပ်ကမ္ဘာမှာ လူများစုက အစ္စလာမ်ဘာသာ၀င်ဖြစ်ပေမယ့် အခြားဘာသာ၀င်တွေလည်း အများအပြား ရှိနေတာဖြစ်ပါတယ်။ 

Ref: Arab News

စက်တင်ဘာ ၁၆၊ ၂၀၂၂
M-Media

-လက်ဘနွန်နိုင်ငံမှာ ပြည်သူတွေက သူတို့အပ်ထားတဲ့ ငွေကြေးတွေကို ဘဏ်တွေမှာ လက်နက်ကိုင်ပြီး ခြိမ်းခြောက် ၀င်ထုတ်မှုတွေ ဖြစ်ပွားနေပါတယ်။

ဒီကနေ့ တစ်ရက်တည်းမှာပဲ ဘဏ် ၈ ခုမှာ ဒီလိုအဖြစ်အပျက်မျိုး ဖြစ်ပွားခဲ့ပါတယ်။ လက်ဘနွန်နိုင်ငံမှာ စီးပွားရေးအကြပ်အတည်းကြောင့် ဘဏ်တွေက ငွေကိုအကန့်အသတ်နဲ့သာ ထုတ်ပေးနေတာပါ။

နိုင်ငံခြားက၀င်လာတဲ့ ဒေါ်လာတွေကိုလည်း လက်ဘနွန်ငွေကြေးနဲ့ လဲပြီးမှာသာ ထုတ်ပေးဖို့ ဗဟိုဘဏ်က ညွှန်ကြားထားပါတယ်။ ဘဏ်ကပေးတဲ့ ငွေလဲနှုန်းဟာ အပြင်ကနှုန်းထက် အများကြီး နည်းပါတယ်။

အပ်ထားတဲ့ငွေတွေကို လက်နက်ကိုင်ပြီး ၀င်ထုတ်ရာမှာ တစ်ချို့တွေက သေနတ်အစစ်မဟုတ်ဘဲ အရုပ်သေနတ်တွေကို အသုံးပြုတာတွေလည်း ရှိပါတယ်။

နိုင်ငံတောင်ပိုင်း ဂါဇီဒေသမှာဆိုရင် အမျိုးသားတစ်ဦးက သူအပ်ထားတဲ့ ဒေါ်လာ ၁၉၂၀၀ ကို အရုပ်သေနတ်ကိုင်ကာ ထုတ်ယူခဲ့ပြီး ပိုက်ဆံရပြီးနောက်ပိုင်း ရဲတပ်ဖွဲ့ထံမှာ အဖမ်းခံခဲ့ပါတယ်။

လုံခြုံရေးဆိုင်ရာ စိုးရိမ်မှုတွေကြောင့် လက်ဘနွန်ဘဏ်တွေဟာ လာမယ့်တစ်ပတ်မှာ အနည်းဆုံး ၃ ရက်အထိ ပိတ်ထားဖို့ စီစဥ်နေပါတယ်။

Ref: Aljazeera