News @ M-Media

Tag: Lebanon

  • တယ်လီနောမြန်မာကို ဝယ်လိုက်သည့် M1 လုပ်ငန်းကိုတည်ထောင်သူ လက်ဘနွန်ဝန်ကြီးချုပ် ဖြစ်လာဖွယ်ရှိ

    တယ်လီနောမြန်မာကို ဝယ်လိုက်သည့် M1 လုပ်ငန်းကိုတည်ထောင်သူ လက်ဘနွန်ဝန်ကြီးချုပ် ဖြစ်လာဖွယ်ရှိ

    ဇူလိုင် ၂၇၊ ၂၀၂၁
    M-Media

    -တယ်လီနောမြန်မာကိုဝယ်ယူလိုက်တဲ့ လက်ဘနွန်စီးပွားရေးလုပ်ငန်း M1 Group ကို တည်ထောင်သူ နာဂျစ် မီကာတီဟာ လက်ဘနွန်နိုင်ငံရဲ့ ဝန်ကြီးချုပ် ဖြစ်လာဖွယ် ရှိနေပါတယ်။

    လက်ဘနွန်သမ္မတက မိခေးလ် အေအွန်က ဝန်ကြီးချုပ်ဟောင်း မီကာတီကို အစိုးရအဖွဲ့ ဖွဲ့စည်းဖို့အတွက် တနင်္လာနေ့က တာဝန်ပေးခဲ့တာပါ။ လက်ဘနွန်မှာ စီးပွားရေးပြဿနာနဲ့နွယ်ပြီး နိုင်ငံရေးမတည်မငြိမ်ဖြစ်နေတာ ၁ နှစ် ရှိသွားပြီ ဖြစ်ပါတယ်။

    သမ္မတဟာ ဝန်ကြီးချုပ်ဟောင်း စအဒ်ဟာရီရီကို အစိုးရဖွဲ့ဖို့ လွန်ခဲ့တဲ့ ၁ နှစ်အရင်က တာဝန်ပေးခဲ့ပါသေးတယ်။ သမ္မတနဲ့ ၁၈ ကြိမ်တွေ့ဆုံတင်ပြရာမှာ အစိုးရဖွဲ့ရေး သဘောတူညီချက် မရတဲ့အတွက် ဟာရီရီဟာ ပြီးခဲ့တဲ့ တစ်ပတ်မှာ ဝန်ကြီးချုပ်လောင်းရာထူးကနေ နှုတ်ထွက်သွားခဲ့ပြီး နာဂျစ်မီကာတီ ဦးဆောင်ကာ အစိုးရဖွဲ့စည်းဖို့ သဘောထားပေးခဲ့ပါတယ်။

    လက်ဘနွန်လွှတ်တော်အတွင်း ဆန္ဒကောက်ခံရာမှာလည်း လွှတ်တော်အမတ် အများစုက မီကာတီ ဦးဆောင်ပြီး အစိုးရဖွဲ့ဖို့ သဘောတူခဲ့ပါတယ်။

    ၂၀၀၅ ခုနှစ်မှာ အိမ်စောင့်ဝန်ကြီးချုပ်အဖြစ် လအနည်းငယ် တာဝန်ယူခဲ့ပြီး ၂၀၁၁ ခုနှစ်ကစလို့ နောက်ထပ် ၃ နှစ်အထိ ဝန်ကြီးချုပ်အဖြစ် ဆောင်ရွက်ခဲ့တဲ့ မီကာတီက မိမိဟာ မျက်လှည့်ဆရာလို ဟတ်ချလောင်းမလုပ်ပြနိုင်ပေမယ့် တိုင်းပြည်ရဲ့အခြေအနေကို လေ့လာသုံးသပ်ထားပြီး နိုင်ငံတကာရဲ့ အာမခံချက်တွေလည်း ရှိထားတယ်လို့ ပြောကြားခဲ့ပါတယ်။

    “ပြင်သစ်နိုင်ငံက အဆိုပြုတဲ့ နည်းလမ်းအတိုင်း သမ္မတရဲ့ ပူးပေါင်းဆောင်ရွက်မှုနဲ့ အစိုးရတစ်ရပ် ကျွန်တော်တို့ ဖွဲ့စည်းသွားပါမယ်”

    မီကာတီဟာ တယ်လီနော်မြန်မာကို ဝယ်ယူလိုက်တဲ့ M1 Group ကို တည်ထောင်သူ ညီအစ်ကို ၂ ဦးက တစ်ဦးလည်း ဖြစ်ပါတယ်။

    ဖေဖော်ဝါရီ ၁ ရက် စစ်တပ်က အာဏာသိမ်းပြီးနောက်ပိုင်း မြန်မာနိုင်ငံမှာ မတည်ငြိမ်ဖြစ်လာတာ၊ စစ်ကောင်စီရဲ့ ဆယ်သွယ်ရေးလုပ်ငန်းတွေအပေါ် ကန့်သတ်ချုပ်ချယ်လာတာတွေကြောင့် ဆက်လုပ်ဖို့ မဖြစ်နိုင်တော့အတွက် M1 Group ကို ကန်ဒေါ်လာ ၁၀၉ သန်းနဲ့ ‘တယ်လီနောမြန်မာ’ လုပ်ငန်းကို ရောင်းချလိုက်တယ်လို့ နော်ဝေအခြေစိုက် တယ်လီနောကုမ္ပဏီက အခုလအစောပိုင်းမှာ ထုတ်ပြန်ခဲ့ပါတယ်။

    M1 Group ဆိုတာ ဘာလဲ

    လက်ဘနွန်နိုင်ငံ ဘေရွတ်မြို့အခြေစိုက်တဲ့ M1 Group ကို ၁၉၈၀ ပြည့်နှစ်လောက်က တာဟာ မီကာတီနဲ့ နာဂျစ် မီကာတီ ညီအစ်ကိုနှစ်ဦးက တည်ထောင်ခဲ့တာပါ။ နာဂျစ် မီကာတီဟာ ၂၀၀၅ ခုနှစ်မှာ လက်ဘနွန်ဝန်ကြီးချုပ် ဖြစ်လာခဲ့ပါတယ်။

    ဆောက်လုပ်ရေးလုပ်ငန်းနဲ့ စတင်ခဲ့တဲ့ ဒီလုပ်ငန်းဟာ နောက်ပိုင်း တယ်လီဖုန်းဆက်သွယ်ရေးလုပ်ငန်းမှာပါချဲ့ထွင်လုပ်ကိုင်လာခဲ့ပြီး Investcom ဆိုတဲ့အမည်နဲ့ ကုမ္ပဏီထူထောင်ခဲ့ပါတယ်။

    Investcom ကို ၂၀၀၆ ခုနှစ်မှာ တောင်အာဖရိက စီးပွားရေးလုပ်ငန်း MTN က ဝယ်ယူခဲ့ပါတယ်။

    မီကာတီညီအစ်ကိုတွေဟာ ၂၀၀၇ ခုနှစ်မှာ M1 Group ဆိုတဲ့အမည်နဲ့ စီးပွားရေးလုပ်ငန်းစုကို ထူထောင်ခဲ့ပြီး MTN ရဲ့ ရှယ်ယာ ၁၀ ရာခိုင်နှုန်းကို ပိုင်ဆိုင်ထားသလို၊ ကမ္ဘာတစ်ဝှမ်း အိမ်ခြံမြေလုပ်ငန်း၊ ဖက်ရှင်လုပ်ငန်း၊ ငွေကြေးလုပ်ငန်း၊ ရင်းနှီးမြှုပ်နှံမှုနဲ့ အခြား စီးပွားရေးလုပ်ငန်းပေါင်းများစွာကို လုပ်ကိုင်နေပါတယ်။

    Ref: Aljazeera, The National News

  • လက်ဘနွန်က ပထမဆုံး ပြည်တွင်းဖြစ်လျှပ်စစ်ကားကို မိတ်ဆက်

    လက်ဘနွန်က ပထမဆုံး ပြည်တွင်းဖြစ်လျှပ်စစ်ကားကို မိတ်ဆက်

    ဧပြီ ၂၅၊ ၂၀၂၁
    M-Media

    -နိုင်ငံအတွင်းမှာ ပထမဆုံးထုတ်လုပ်တဲ့ လျှပ်စစ်ကားကို လက်ဘနွန်က ထုတ်ပြလိုက်ပါတယ်။

    Quds Rise လို့အမည်ပေးထားတဲ့ အဲဒီကား ထုတ်လုပ်ရေး စီမံကိန်းကို လက်ဘနွန်မှာမွေးဖွားတဲ့ ပါလက်စတိုင်း စီးပွးရေးသမား ဂျီဟတ် မိုဟာမက်က ဖော်ဆောင်တာပါ။

    မိုဟာမက်က ဒီကားကို အစကနေ အဆုံးအထိ ပြည်တွင်းမှာသာ ထုတ်လုပ်တာဖြစ်ပြီး လက်ဘနွန်ရဲ့ ပထမဆုံးကားထုတ်လုပ်မှုဖြစ်တယ်လို့ မနေ့က မိတ်ဆက်ပွဲအခမ်းအနားမှာ ပြောကြားခဲ့ပါတယ်။

    ကားရဲ့စျေးနှုန်းက အမေရိကန်ဒေါ်လာ ၃ သောင်းဖြစ်ပါတယ်။ အခုနှစ်ကုန်ပိုင်းရောက်ရင် အစီးရေ တစ်သောင်းလောက် ထုတ်လုပ်နိုင်ဖို့ ရည်ရွယ်ထားတယ်လို့ မိုဟာမက်က ထည့်သွင်းပြောဆိုခဲ့ပါတယ်။

    မိုဟာမက်ရဲ့ EV Electra ကုမ္ပဏီကို လွန်ခဲ့တဲ့ ၄ နှစ်က စတင်တည်ထောင်တာဖြစ်ပြီး ပါလက်စတိုင်းနဲ့ လက်ဘနွန်ပြည်သူ ၃၀၀ လောက်ကို အလုပ်ပေးထားနိုင်ပါတယ်။

    သူရဲ့ ရေရှည်ရည်ရွယ်ချက်ဟာ လျှပ်စစ်ကားနဲ့ လောင်စာ-လျှပ်စစ် ဖက်စပ်ကားတွေကို နိုင်ငံတကာစျေးကွက်မှာ ယှဉ်ပြိုင်နိုင်ရေးဖြစ်တယ်လို့ မိုဟာမက်က ဆိုပါတယ်။

    EV Electra ကုမ္ပဏီဟာ ဒီကားကို အားသွင်းနိုင်ဖို့အတွက် လက်ဘနွန်နိုင်ငံတစ်ဝှမ်း အားသွင်းစင်တာ ၁၀၀ လောက်ကို တည်ဆောက်သွားဖို့လည်း စီစဉ်နေပါတယ်။

    Ref: Aljazeera

  • ဘေရွတ်မြို့က ပေါက်ကွဲမှု အနုပညာ

    ဘေရွတ်မြို့က ပေါက်ကွဲမှု အနုပညာ

    အောက်တိုဘာ ၂၃၊ ၂၀၂၀
    M-Media

    -လက်ဘနွန်နိုင်ငံ မြို့တော်ဘေရွတ်မှာ လက်ရာမြောက်တဲ့ ရုပ်တုတစ်ခုပေါ်ထွက်လာပါတယ်။

    The Lady of the world လို့ အမည်ပေးထားတဲ့ အဲဒီရုပ်ထုကို ဩဂုတ်လ ၄ ရက်က ဖြစ်ပွားခဲ့တဲ့ ပေါက်ကွဲမှု အပျက်အဆီးတွေနဲ့ ဖန်တီထားတာပါ။ ပေါက်ကွဲမှုဖြစ်ပွားတဲ့ ညနေ ၆ နာရီ ၈ မိနစ်ကို ဖော်ညွှန်းတဲ့ နာရီဒိုင်ခွက်တစ်ခုကိုလည်း ရုပ်တုရဲ့ အောက်ခြေမှာ ထည့်သွင်းထားပါတယ်။

    ရုပ်တိုကိုဖန်တီးခဲ့တဲ့ အနုပညာရှင် ဟာယတ် နဇာရ်က ဘေရွတ်မှာ ဘာတွေဖြစ်ခဲ့လည်းဆိုတာနဲ့ ဘေရွတ်ပြည်သူတွေ ဘယ်လိုကျော်ဖြတ်ခဲ့ရလဲဆိုတာ နောက်မျိုးဆက်တွေ သိရှိလိုတဲ့ ရည်ရွယ်ချက်နဲ့ ဖန်တီးခဲ့တာလို့ ပြောကြားခဲ့ပါတယ်။

    သူမဟာ Phoenix၊ Saucepans Tree၊ Heart of revolution၊ Corona project စတဲ့ နာမည်ကျော် လက်ရာတွေကို ဖန်တီးထားသူလည်း ဖြစ်ပါတယ်။

    ဘေရွတ်ဆိပ်ကမ်း မီးလောင်မှုကနေ သိုလှောင်ထားတဲ့ အမိုနီယံနိုက်ထရိတ်တွေ ပေါက်ကွဲခဲ့တဲ့ ဒီအဖြစ်အပျက်ကြောင့် အနည်းဆုံး လူ ၂၀၃ ဦး သေဆုံးပြီး ၆၅၀၀​ ကျော် ဒဏ်ရာရခဲ့ပါတယ်။

    Ref: Aljazeera

  • တစ်လအရင်က ပေါက်ကွဲမှုဖြစ်ခဲ့သည့် ဘေရွတ်ဆိပ်ကမ်းတွင် မီးထပ်လောင်

    တစ်လအရင်က ပေါက်ကွဲမှုဖြစ်ခဲ့သည့် ဘေရွတ်ဆိပ်ကမ်းတွင် မီးထပ်လောင်

    စက်တင်ဘာ ၁၀၊ ၂၀၂၀
    M-Media

    -ဩဂုတ်လဆန်းပိုင်းက ပေါက်ကွဲမှုဖြစ်ခဲ့တဲ့ လက်ဘနွန်နိုင်ငံ ဘေရွတ်မြို့ဆိပ်ကမ်မှာ ဒီကနေ့ မီးထပ်လောင်ခဲ့ပြီး နှစ်ရက်အတွင်း နှစ်ကြိမ်မြောက် မီးလောင်တာလည်း ဖြစ်ပါတယ်။

    လက်ဘနွန်စစ်တပ်က ဒီကနေ့မနက်မီးဟာ ဆီနဲ့ တာယာတွေ သိုလှောင်ထားတဲ့ ကုန်လှောင်ရုံကနေ လောင်တာဖြစ်တယ်လို့ ထုတ်ပြန်ထားပါတယ်။ အင်္ဂါနေ့ကလည်း အသေးစားမီးလောင်မှု ဖြစ်ပွားခဲ့ပါသေးတယ်။

    ဩဂုတ်လ ၄ ရက်နေ့က ဖြစ်ပွားခဲ့တဲ့ ပေါက်ကွဲမှုကြောင့် လူ ၂၀၀ နီးပါး သေဆုံးခဲ့ပြီး ၆၅၀၀ ကျော်လောက် ဒဏ်ရာရခဲ့ပြီး သိန်းနဲ့ချီ အိုးမဲ့အိမ်မဲ့ ဖြစ်ခဲ့ပါတယ်။ ပေါက်ကွဲမှုဟာ ဆိပ်ကမ်းမှာ သိုလှောင်ထားတဲ့ အမိုနီယံနိုက်ထရိတ် ၃ ​ထောင်နီးပါးကြောင့် ဖြစ်တာလို့ လက်ဘနွန် အစိုးရက ထုတ်ပြန်ထားပါတယ်။

    အဲဒီဆိပ်ကမ်းမှာ ပေါက်ကွဲမှုကြောင့် ဖြစ်ပွားခဲ့တဲ့ အပျက်အဆီးတွေကို လက်ရှိအချိန်အထိ ရှင်းလင်းနေရတာ ဖြစ်ပါတယ်။

    Ref: Aljazeera

  • လက်ဘနွန်ပြည်သူ ထက်၀က်ကျော် စားနပ်ရိက္ခာ ပြဿနာ ရင်ဆိုင်ရမည်

    လက်ဘနွန်ပြည်သူ ထက်၀က်ကျော် စားနပ်ရိက္ခာ ပြဿနာ ရင်ဆိုင်ရမည်

    ဩဂုတ် ၃၁၊ ၂၀၂၀
    M-Media

    ပေါက်ကွဲမှုပ​ြီးနောက် လက်ဘနွန်ဆိပ်ကမ်း မြင်ကွင်း

    -​ဘေရွတ်ပေါက်ကွဲမှုနောက်ဆက်တွဲအဖြစ် အခုနှစ်ကုန်မှာ လက်ဘနွန်ပြည်သူတွေရဲ့ ထက်ဝက်လောက်ဟာ စားနပ်ရိက္ခာ ပြဿနာနဲ့ ကြုံတွေ့နိုင်တယ်လို့ ကုလသမဂ္ဂက သတိပေးလိုက်ပါတယ်။

    လက်ဘနွန်ဟာ အရင်ကတည်းက စီးပွားရေးပြဿနာကို ကြုံတွေ့နေရတာဖြစ်ပြီး ဩဂုတ် ၄ ရက်နေ့ ဘေရွတ်ဆိပ်ကမ်း ပေါက်ကွဲမှုနောက်ပိုင်း ဒီအခြေအနေက ပိုမိုဆိုးရွားလာခဲ့ပါတယ်။ ပေါက်ကွဲမှုကြောင့် အနည်းဆုံး ၁၈၈ ဦးသေဆုံးပြီး ထောင်နဲ့ချီ ဒဏ်ရာရကာ သိန်းနဲ့ချီ အိုးမဲ့အိမ်မဲ့ ဖြစ်ခဲ့ပါတယ်။ ဒါ့အပြင် မြို့တော်ဘေရွတ် တစ်စိတ်တစ်ပိုင်းလည်း လုံး၀ ပျက်ဆီးသွားခဲ့ပါတယ်။

    ကုလရဲ့ အာရှအနောက်ခြမ်း စီးပွားရေးနှင့် လူမှုရေးဆိုင်ရာ ကော်မှရှင် ESCWA က ဒီအခြေအနေအတိုင်း ဆက်သွားမယ်ဆိုရင် နှစ်ကုန်ပိုင်းမှာ ပြည်သူထက်ဝက်ကျော်လောက်ဟာ အခြေခံစားသောက်ကုန် ပြတ်လတ်မှုနဲ့ ကြုံတွေ့ရနိုင်တယ်လို့ မနေ့မှာ ပြောကြားခဲ့ပါတယ်။

    လက်ဘနွန်ဟာ ပြည်တွင်း ရိက္ခာလိုအပ်ချက်ရဲ့ ၈၅ ရာခိုင်နှုန်းကို နိုင်ငံခြားက တင်သွင်းရတာပါ။ အစိုးရဟာ အရင်ကတည်းက အကြွေးကိစ္စကို ရင်ဆိုင်နေရတာဖြစ်ပါတယ်။ ပြည်ပကတင်သွင်းတဲ့ စားနပ်ရိက္ခာတွေကို အဓိကသိုလှောင်ရာ ဘေရွတ်ဆိပ်ကမ်းပေါက်ကွဲမှုနောက်ပိုင်း ငွေတန်ဖိုးကျဆင်းလာသလို၊ ဆင်းရဲမွဲတေမှု ပမာဏလည်း မြင့်တက်လာပါတယ်။ ဒါ့အပြင် ကိုရိုနာကပ်ရောဂါကိုလည်း လက်ဘနွန်က ရင်ဆိုင်နေရပါတယ်။

    စားနပ်ရိက္ခာအကြပ်အတည်းကို တားဆီးဖို့အတွက် စားသောက်ကုန်စျေးနှုန်းကို အစိုးရက ထိန်းချုပ်ဖို့၊ လယ်ယာထွက်ကုန် ထုတ်လုပ်သူတွေကို စားသုံးသူတွေထံ တိုက်ရိုက်ရောင်းချခွင့်ပေးဖို့ ESCWA က လက်ဘနွန်အစိုးရကို တိုက်တွန်းခဲ့သလို၊ နိုင်ငံတကာအသိုင်းအဝိုင်းအနေနဲ့ လက်ဘနွန်မှာ စားနပ်ရိက္ခာ ဖူလှုံရေးအစီအစဉ်ကို တိုးချဲ့ဆောက်ရွက်ပေးဖို့ မေတ္တာရပ်ခံခဲ့ပါတယ်။

    Ref: Aljazeera