News @ M-Media

Tag: Liverpool

  • ပရီးမီးယားလိဂ်ချန်ပီယံ ဖြစ်ပြီးနောက် ​လီဗာပူးလ်နည်းပြ၏ ပူပူနွေးနွေး ရင်တွင်းစကား

    ပရီးမီးယားလိဂ်ချန်ပီယံ ဖြစ်ပြီးနောက် ​လီဗာပူးလ်နည်းပြ၏ ပူပူနွေးနွေး ရင်တွင်းစကား

    ဇွန် ၂၆၊ ၂၀၂၀
    M-Media

    -မနေ့က ပရီးမီးယားလိဂ်ပွဲစဉ် ၃၁ မှာ ချယ်ဆီးအသင်းက ဒုတိယနေရာက မန်စီးတီးကို ၂ ဂိုး ၁ ဂိုးနဲ့ အနိုင်ရခဲ့ပြီးတဲ့နောက် ဇယားထိပ်က လီဗာပူးလ်အသင်းဟာ ၇ ပွဲကျန် ၂၃ မှတ်အကွာနဲ့ ပရီးမီးယားလိဂ်ဖလားကို ဆွတ်ခူးသွားခဲ့ပါတယ်။

    ဒါဟာ နှစ်ပေါင်း ၃၀ အတွင်း လီဗာပူးလ်ရဲ့ ပထမဆုံး ပရီးမီးယားလိဂ်ဖလားဖြစ်ပါတယ်။ ချန်ပီယံဖြစ်ပြီးပြီးချင်းမှာပဲ Sky Sport သတင်းဌာနက လီဗာပူးလ်နည်းပြ ယာဂန်ကလော့ပ်ကို ဗီဒီယိုကနေတစ်ဆင့် အင်တာဗျူအတို လုပ်ခဲ့ပြီး ရင်တွင်းခံစားချက်ကို မေးခဲ့ပါတယ်။

    မေး – ခံစားချက်လေး ပြောပြနိုင်မလား

    ဖြေ – ပြောစရာစကားတောင်မရှိဘူးဗျ။ မယုံနိုင်လောက်စရာပါပဲ။ အသင်းနဲ့ ချန်ပီယံဖြစ်ပါ့မလားလို့ ကျွန်တော်ထင်ထားတာထက်တောင် ပိုပါတယ်။ဒီအောင်မြင်မှုဟာ ကျွန်တော့်ကစားသမားတွ ၂ နှစ် ၃ အရင်က ကြိုးပမ်းအားထုတ်မှုကနေ ပေါ်ထွက်လာတာပါ။ သူတို့ကို နည်းပြခွင့်ရတဲ့အတွက် ကျွန်တော် အရမ်းပျော်ပါတယ်။

    မေး – နှစ် ၃၀ လောက်စောင့်ရတော့ ပျော်တာအပြင် စိတ်သက်သာရာ ရသွားတာမျိုးလား

    ဖြေ – နှစ် ၃၀ လောက်တော့ ကျွန်တော်မစောင့်ရပါဘူး။ ဒီရောက်တာ ၄ နှစ်ခွဲရှိပြီ၊ ပြီးခဲ့တဲ့နှစ်တုန်းကမှစပြီး ဒီလိုအခွင့်အရေးမျိုးရခဲ့တယ်။ အခုနှစ်ကတော့ ဒုတိယမြောက်နှစ်ပေါ့။ အောင်မြင်မှုကောင်းတစ်ခုရတယ်။ စိတ်သက်သာရရတယ်လို့လည်း ပြောလို့ရတယ်။ ကြားထဲမှာ ၃ လလောက် အဆက်ပြတ်သွားပြီး ဘာတွေဆက်ဖြစ်မလဲ၊ အသင်းကရော ရာနှုန်းပြည့်ပြန်လာနိုင်မလားဆိုတာ ဘယ်သူမှ မသိကြဘူးလေ။

    မနေ့ကချယ်ဆီးနဲ့ မန်စီးတီးပွဲကတော့ ကစားတွေအတွက်ရော၊ ပရိတ်သတ်တွေအတွက်ပါ အရေးပါတယ်။ ဒီနေ့ကစားမယ့်ပွဲအတွက် အဆင်ပြေသွားတာပေါ့လေ။ အောင်မြင်မှုက ပရိတ်သတ်တွေအတွက်ပါပဲ။ အိမ်မှာပဲနေပါ။ မနေနိုင်ရင်လည်း အိမ်ရှေ့လောက်ပဲထွက်ပါ။ တရားလွန်အောင်ပွဲခံတာမျိုး မလုပ်ပါနဲ့။

    Ref: Sky Sport

  • တနင်္လာနေ့ ဘောလုံးသတင်းများ

    တနင်္လာနေ့ ဘောလုံးသတင်းများ

    မတ် ၂၊ ၂၀၂၀
    M-Media

    လတ်တလောသမိုင်းတွင် မန်စီးတီး၏ အောင်မြင်မှုကို မည်သူမျှ မယှဉ်နိုင်

    အင်္ဂလိပ်ဘောလုံးလောကရဲ့ လတ်တလောကာလမှာ မန်စီးတီးအသင်းရဲ့ အောင်မြင်မှုဟာ ပြိုင်ဘက်မရှိဘူးလို့ နည်းပြ ပက်ပ် ဂွါဒီယိုလာက ပြောကြားလိုက်ပါတယ်။ မန်စီးတီးဟား မနေ့က အက်စတွန်ဗီလာအသင်းကို ၂ ဂိုး ၁ ဂိုးနဲ့ အနိုင်ရကာ လိဂ်ဖလား Carabao Cup ကို ၃ နှစ်ဆက် ဆွတ်ခူးနိုင်ခဲ့တာပါ။ ဂွါဒီယိုလာဟာ မန်စီးတီးနဲ့ ပရီးမီးယားလိဂ် ၂ ကြိမ်၊ FA ဖလား တစ်ကြိမ်နဲ့ ကွန်မြူနတီဒိုင်း ၂ ကြိမ်ကိုလည်း ဆွတ်ခူးရရှိထားပါတယ်။ ဂွါဒီယိုလာက ပြီးခဲ့တဲ့ ၉ နှစ်အတွင်း ၈ နှစ်မှာ မိမိတို့ ဖလားရခဲ့ကြောင်း၊ ဥရောပဖလားကို ထည့်မတွက်ရင် ဒီကာလအတွင်း မိမိတို့လို ပြည်တွင်းအောင်မှုမျိုး ဘယ်အသင်းမှ မရဖူးကြောင်း၊ လီဗာပူးရဲ့ အအောင်မြင်ဆုံးအချိန် ၁၉၈၀ ပြည့်နှစ်တွေမှာ ဒီလိုမရှိခဲ့သလို၊ ဆာအဲလက်စ်ဖာဂူဆန်၊ မော်ရင်ဟို၊ အာဆင်ဝင်းဂါးတို့လည်း ဒီလို မရခဲ့ဖူးကြောင်း ပြောကြားခဲ့ပါတယ်။

    နောက်ခံလူလိုဗရန်ကို ကလော့ပ်က ကာကွယ်ပြောဆို

    ဝဒ်ဖို့အသင်းကို ရှုံးနိမ့်မှုမှာ နောက်ခံလူ လိုဗရန်ကို အပြစ်တင်တာဟာ မတရားဘူးလို့ လီဗာပူးလ်နည်းပြ ယာဂန်ကလော့ပ်က ပြောကြားလိုက်ပါတယ်။ စနေနေ့က ၃ ဂိုးပြတ်နဲ့ ဒီအရှုံးဟာ လီဗာပူးလ်အသင်းရဲ့ ၄၄ ပွဲဆက်တိုက် ရှုံးပွဲမရှိစံချိန် ကျိုးပျက်ရတဲ့ပွဲပါ။ ဒီအတွက် နောက်ခံအလယ်လူ လိုဗရန်ဟာ ဝေဖန်ခံခဲ့ရပြီး ကလော့ပ်ကတော့ အသင်းရှုံးနိမ့်မှုအတွက် တစ်ဦးတစ်ယောက်တည်းကို ပြစ်တင်လို့မရကြောင်း၊ မိမိတို့တစ်သင်းလုံး ကစားပုံမကောင်းခဲ့ကြောင်း၊ ဝက်ဖို့ဒ်အသင်းရဲ့ နောက်ခံလူ ၆ ယောက်ထားကစားပုံကလည်း မိမိတို့ကို အခက်တွေ့စေခဲ့ကြောင်း ထည့်သွင်းပြောဆိုခဲ့ပါတယ်။

    ဘာကာနိုင်သော်လည်း ဇီဒိန်း မပျော်နိုင်

    မနေ့က ဘာစီလိုနာအသင်းကို အနိုင်ရတာဟာ နှစ်မြို့ဖွယ်ရာအချိန်တစ်ခုဖြစ်တယ်လို့ ရီးယဲလ်နည်းပြ ဇီဒိန်းက ပြောကြားလိုက်ပါတယ်။ ရီးယဲလ်မက်ဒရစ်ဟာ ပြီးခဲ့တဲ့ လာလီဂါ ၂ ပွဲမှာ ၁ မှတ်သာ ရရှိထားပြီး၊ ပြီးခဲ့တဲ့တစ်ပတ် ချန်ပီယံလိဂ်မှာလည်း မန်စီးတီးကို ရှုံးနိမ့်ထားတာပါ။ မနေ့ကပွဲမှာတော့ ဗီနီစီယက်စ် ဂျူနီယာ၊ မာရီယာနိုတို့ရဲ့ ဂိုးတွေနဲ့ ဘာစီလိုနာကို အနိုင်ရခဲ့ပြီး ဘာစီလိုနာကို တစ်မှတ်ဖြတ်ကာ လာလီဂါကို ဦးဆောင်နိုင်ခဲ့ပါတယ်။ ဇီဒိန်းက ဒီ ၃ မှတ်ဟာ ဘာအပြောင်းအလဲမှမလုပ်ပေးနိုင်ကြောင်း ရှေ့ဆက်ရမယ့်ခရီးဟာ ရှည်လျားပြီး ပိုမိုခက်ခဲတဲ့ အခြေအနေတွေနဲ့ ကြုံတွေ့ရမှာဖြစ်ကြောင်း ထည့်သွင်းပြောကြားခဲ့ပါတယ်။

    Ref: Goal, BBC

  • သောကြာနေ့ ဘောလုံးသတင်းများ

    သောကြာနေ့ ဘောလုံးသတင်းများ

    ဖေဖော်ဝါရီ ၂၈၊ ၂၀၂၀
    M-Media

    လေ့ကျင့်ရေးကွင်းတွင် လက်ဆွဲနှုတ်ဆက်မှုကို နယူးကာဆယ်ပိတ်ပင်

    ကမ္ဘာတစ်ဝှမ်း လူပေါင်း ၈ သောင်းကျော်လောက်မှာ ကူးစက်နေတဲ့ ကိုရိုနာဗိုင်းရပ်စ်သစ်ကို ကြိုတင်ကာကွယ်တဲ့အနေနဲ့ နယူးကာဆယ်အသင်းက လေ့ကျင့်ရေးကွင်းမှာ အချင်းချင်း လက်ဆွဲနှုတ်ဆက်တာကို ပိတ်ပင်လိုက်ပါတယ်။ ယူကေမှာ ကူးစက်သူဦးရေဟာ သောကြာနေ့အထိ ၁၉ ဦး ရှိနေပါတယ်။ ဗိုင်းရပ်စ်မကူးစက်ဖို့ ကြိုတင်ကာကွယ်ရေးမှာ လက်ဆေးတာဟာ အရေးကြီးတယ်လို့ နိုင်ငံတကာ ကျန်းမာရေး ကျွမ်းကျင်သူတွေက သတိပေးထားတာပါ။ နယူးကာဆယ်နည်းပြ စတီဗ်ဘရုစ်က အသင်းဆရာဝန်ရဲ့ အကြံပေးမှုကြောင့် လေ့ကျင့်ကွင်းလာရင် အချင်းချင်း လက်ဆွဲနှုတ်ဆက်တဲ့ အလေ့အကျင့်ကို ရပ်ဆိုင်းလိုက်ကြောင်း၊ သတင်းတွေကို စောင့်ကြည့်နေပြီး ယူကေမှာ ဆိုးဆိုးဝါးဝါး မဖြစ်ဖို့ မျှော်လင့်ကြောင်း ပြောကြားခဲ့ပါတယ်။

    ပရီးမီးယားလိဂ်ချန်ပီယံဖြစ်လျှင် ဆုတံဆိပ်ရသည်ဆိုသည်ကို မာနေးမသိ

    ပရီးမီးယားလိဂ်မှာ ဗိုလ်စွဲရင် တစ်ဦးချင်း ဆုတံဆိပ်ရတယ်ဆိုတာ အရင်က မသိခဲ့ဘူးလို့ လီဗာပူးလ်အသင်းရဲ့ ဆီနီဂေါတိုက်စစ်မှူး ဆာဒီယိုမာနေးက ပြောကြားလိုက်ပါတယ်။ လီဗာပူးအသင်းဟာ ၁၁ ပွဲကစားဖို့ ကျန်ရှိနေချိန် ၂၂ မှတ်ဖြတ်ကာ အမှတ်ပေးဇယားကို ဦးဆောင်နေပြီး နောက်ထပ် ၄ ပွဲ အနိုင်ရရုံနဲ့ နှစ်ပေါင်း ၃၀ အတွင်း ပထမဆုံးအကြိမ် ချန်ပီယံဖြစ်လာမှာ ဖြစ်ပါတယ်။ မာနေးက‌ ပရီးမီးယားလိဂ်ချန်ပီယံဖြစ်ရင် ကစားသမားတစ်ဦးချင်း ဆုတံဆိပ်ရတယ်ဆိုတာ မနေ့ကမှ သိတာဖြစ်ပြီး တစ်ဦးချင်းဆုတံဆိပ်တွေကို သိပ်ပြီး ဦးစားမပေးကြောင်း၊ မိမိတို့အနေနဲ့ ပရီးမီးယားလိဂ်မှာ ဦးဆောင်နေနိုင်တာဟာ လွယ်လွယ်ကူကူနဲ့ ဖြစ်လာတာမဟုတ်ကြောင်း ထည့်သွင်းပြောကြားခဲ့ပါတယ်။

    အိပ်မက် အမှန်တကယ်ဖြစ်လာတဲ့ မန်ယူတိုက်စစ်မှူး

    ဖိအားတွေရှိနေပေမယ့် မန်ယူမှာ ပထမဆုံး ဂိုးသွင်းနိုင်တဲ့အတွက် ကျေနပ်မိတယ်လို့ နိုက်ဂျီးရီးယားတိုက်စစ်မှူး အီဂ်ဟာလိုက ပြောကြားလိုက်ပါတယ်။ ဆောင်းရာသီအပြောင်းအရွှေ့ နောက်ဆုံးနေ့မှ တရုတ်ကလပ် ရှန်ဟိုင်းရှင်ဟွာကနေ ရောက်ရှိလာတဲ့ အီဂ်ဟာလိုဟာ ဒီကနေ့မနက်က ဘရုဂျက်အသင်းကို ၅ ဂိုးပြတ်နဲ့ အနိုင်ရတဲ့ပွဲမှာ ပထမဆုံး ဂိုးသွင်းနိုင်ခဲ့တာပါ။ သူ့ကိုခေါ်ယူတဲ့အချိန် ဆိုရှယ်မီဒီယာမှာ Trend ဖြစ်ခဲ့သလို ဒီကနေ့မနက် ဂိုးသွင်းယူနိုင်ခဲ့ပြီးတဲ့နောက်မှာလည်း Trend ထပ်ဖြစ်ခဲ့ပါတယ်။ အီဂ်ဟာလိုက မိမိဟာ မန်ယူအသင်းကို ငယ်ငယ်ကတည်းက အားပေးခဲ့ပြီး ဒီလိုဂိုးသွင်းနိုင်ဖို့လည်း အိပ်မက်မက်ခဲ့တယ်လို့ ဆိုပါတယ်။

    Ref: BBC

  • အင်္ဂါနေ့ ဘောလုံးသတင်းများ

    အင်္ဂါနေ့ ဘောလုံးသတင်းများ

    ဇန်နဝါရီ ၂၈၊ ၂၀၂၀
    M-Media

    FA နိုင်ပွဲရသည့်အသင်းကို အာဆင်နယ်နည်းပြ ချီးကျူး

    FA ဖလား ဘုန်းမောက်နဲ့ပွဲကို အနိုင်ကစားခဲ့တဲ့ အသင်းရဲ့ စွမ်းဆောင်ရည်ကို အလွန်ကျေနပ်မိတယ်လို့ အာဆင်နယ်နည်းပြအာတီတာက ပြောကြားလိုက်ပါတယ်။ လူငယ်တွေကို ဦးစားပေးအသုံးပြုခဲ့တဲ့ အာဆင်နယ်အသင်းဟာ ၂ ဂိုး ၁ ဂိုးနဲ့ အနိုင်ရခဲ့ပြီး နောက်တစ်ဆင့်ကို တက်ရောက်နိုင်ခဲ့တာပါ။ အာတီတာက အသင်းဟာ တာဝန်ယူစိတ်အပြည့်နဲ့ သတ္တိရှိရှိ ကစားနိုင်ခဲ့တယ်လို့ ဆိုပါတယ်။

    ဆန်းချက် ခြစွမ်းပြန်ပြမည်ဟု ဆိုးလ်ရှားယုံကြည်နေ

    အသက် ၃၁ နှစ်အရွယ် ချီလီတိုက်စစ်မှူး အလက်ဆစ် ဆန်းချက်ဟာ လာမယ့်နွေရာသီအပြောင်းအရွှေ့မှာ မန်ယူကို ပြန်ရောက်လာပြီး ခြေစွမ်းကောင်းတွေ ပြန်လည်ပြသလိမ့်မယ်လို့ မန်ယူနည်းပြ ဆိုးလ်ရှားက ပြောကြားလိုက်ပါတယ်။ ၂၀၁၈ ခုနှစ် ဇန်နဝါရီက အာဆင်နယ်ကနေပြောင်းရွှေ့လာပြီးနောက်ပိုင်း ဆန်းချက်ဟာ မန်ယူအတွက် ၄၅ ပွဲကစားကာ ၅ ဂိုးသာ သွင်းယူနိုင်ခဲ့ပါတယ်။ အခုရာသီအစ အင်တာမီလန်ကို အငှားနဲ့ သွားရောက်ကစားခဲ့ပေမယ့် ဒဏ်ရာကြောင့် ၇ ပွဲသာကစားရပြီး ၁ ဂိုး သွင်းယူထားပါတယ်။ ကစားသမားသစ်တွေ ဝယ်ယူရေးမှာ ရုန်းကန်ရမှုတွေ ရှိနေတယ်လို့လည်း ဆိုးလ်ရှားက ဝန်ခံခဲ့ပါတယ်။

    ဒဏ်ရာကြောင့် ဆာဒီယိုမာနေး ၂ ပွဲနားရမည်

    လီဗာပူးလ်အသင်းတိုက်စစ်မှူး ဆာဒီယိုမာနေးဟာ ဝုလ်ဗ်အသင်းကို ၂ ဂိုး ၁ ဂိုးနဲ့ အနိုင်ရခဲ့တဲ့ပွဲမှာ ရရှိတဲ့ ကြွက်သား စုတ်ပြဲဒဏ်ရာကြောင့် လာမယ့် ဝက်စ်ဟမ်းနဲ့ ဆောက်သက်တမ်အသင်းပွဲစဉ်တွေကို လွဲချော်တော့မှာ ဖြစ်ပါတယ်။ ပရီးမီးယားလိဂ်မှာ ၁၅ ဂိုး သွင်းယူပေးထားတဲ့ မာနေးဟာ ဖလားရရှိရေး ကြိုးပမ်းနေတဲ့ လီဗာပူးလ်ရဲ့ အဓိကကစားသမားတစ်ဦးလည်း ဖြစ်ပါတယ်။ နည်းပြ ယာဂန်ကလော့ပ်ကတော့ မာနေးရဲ့ဒဏ်ရာဟာ မပြင်းထန်တဲ့အတွက် ကံကောင်းတယ်လို့ ပြောကြားခဲ့ပါတယ်။

    Ref: Goal, BBC

  • တနင်္လာနေ့ ဘောလုံးသတင်းများ

    တနင်္လာနေ့ ဘောလုံးသတင်းများ

    ဇန်နဝါရ ၂၇၊ ၂၀၂၀
    M-Media

    FA ဖလား ပြန်ကန်ပွဲကို လီဗာပူးလ် ကစားမည်မဟုတ်

    ဖေဖော်ဝါရီ ပထမအပတ်မှာ ကစားမယ့် FA ဖလား စတုတ္ထအဆင့် ပြန်ကန်ပွဲစဉ်အတွင်း Shrewsbury Town နဲ့ပွဲကို ကစားမှာမဟုတ်ဘူးလို့ လီဗာပူးလ်နည်းပြ ယာဂန်ကလော့ပ်က ပြောကြားလိုက်ပါတယ်။ ဒီကနေ့မနက်ကပွဲမှာ ၂ ဂိုးပြတ်နဲ့ ဦးဆောင်ခဲ့တဲ့လီဗာပူးလ်ဟာ နောက်ပိုင်းမှာ ချေပဂိုးတွေ ပေးခဲ့ရကာ သရေကျခဲ့တာပါ။ ပြန်ကန်ပွဲဟာ ပရီးမီးယားလိဂ် ဆောင်းရာသီနားရက်ကာလဖြစ်ပြီး အင်္ဂလန်ဘောလုံးအဖွဲ့ချုပ် FA က ကစားသမားတွေအတွက် နားရက်ကာလကို အလေးမထားပေမယ့် မိမိတို့က အလေးထားတယ်လို့ ကလော့ပ်က ဆိုပါတယ်။

    ပရိတ်သတ်တွေကြောင့် အက်စပန်ညိုကွင်း ပိတ်ခံရဖွယ်ရှိနေ

    စနေနေ့က ၁ ဂိုးစီသရေကျတဲ့ပွဲမှာ ပြိုင်ဘက် ဘီဘာလ်အို တိုက်စစ်မှူး အီနာဂီ ဝီလီယံကို အက်စပန်ညိုပရိတ်သတ်တွေက လူမျိုးရေးခွဲခြားမှုအတွက် အက်စပန်ညိုအသင်း ကွင်းတစ်စိတ်တစ်ပိုင်းပိတ်တဲ့ ပြစ်ဒဏ်မျိုးချမှတ်ဖို့ လာလီဂါပြိုင်ပွဲ ကျင်းပရေး တာဝန်ရှိသူတွေက စပိန်ဘောလုံးအဖွဲ့ချုပ်ကို တောင်းဆိုလိုက်ပါတယ်။ ဘောလုံးအဖွဲ့ချုပ်က ဒီကိစ္စကို ဗုဒ္ဓဟူးနေ့မှာ ဆွေးနွေးဖို့ ရှိနေပါတယ်။ လာလီဂါတာဝန်ရှိသူတွေက ဒီအဖြစ်အပျက်မှာ ပါဝင်တဲ့ ပရိတ်သတ်တွေကို စုံစမ်းဖော်ထုတ်ကာ အမုန်းရာဇဝတ်မှုနဲ့ တရားစွဲဆိုဖို့လည်း လုပ်ဆောင်နေပါတယ်။

    ဆော်ဒီက နယူးကာဆယ်အသင်းကို ဝယ်ယူရန် နီးစပ်လာ

    ဆော်ဒီအာရေဗျရဲ့ နိုင်ငံပိုင် ရန်ပုံငွေအဖွဲ့ PIF က ပရီးမီးယားလိဂ်ကလပ် နယူးကာဆယ်အသင်းကို ပေါင် သန်း ၃၄၀ နဲ့ဝယ်ယူဖို့အတွက် ပြီးခဲ့တဲ့လအနည်းက ပြုလုပ်လာခဲ့တဲ့ ဆွေးနွေးမှုဟာ တိုးတက်မှု ရနေပါတယ်။ အသင်းကို ဗြိတိန် ဘီလီယံနာ မိုက် အက်ရှ်လေက ၂၀၀၇ ခုနှစ်ကတည်းက ပိုင်ဆိုင်ခဲ့တာပါ။ ဆော်ဒီအိမ်ရှေ့မင်းသား မိုဟာမက် ဘင် ဆလ်မန်ဟာ ပရီးမီးယားလိဂ်ဘောလုံးကလပ်အသင်း တစ်ခုခုကို ဝယ်ယူဖို့ စိတ်အားထက်သန်နေတာဖြစ်ပါတယ်။ ယူအေအီးကို အုပ်စိုးသူမိသားစုထဲက တစ်ဦးဖြစ်တဲ့ ဘီလီယံနာ ရှိခ်ခါလစ်ဟာ ပြီးခဲ့တဲ့နှစ်က နယူးကာဆယ်အသင်းကို ဝယ်ယူဖို့ နီးစပ်ခဲ့ပေမယ့် နောက်ပိုင်းမှာ သဘောတူညီချက် ပျက်ပြယ်ခဲ့ပါတယ်။

    Ref: BBC