Tag: M-Media Knowledge

ဖေဖော်ဝါရီ ၁၀ ၊ ၂၀၁၆
M-Media
အေးထွန်း ရှာဖွေတင်ဆက်သည်

Great Bustard (Otis tarda) ငှက်ဖိုတွေ၊  သူတို့မှာ ကြင်ဖော်တွေ အရမ်းများတယ်။ ဆိုတော့ လိင်မှ တစ်ဆင့် ကူးစက်တဲ့ ရောဂါတွေ ခံစားရဖို့ အခွင့်အလမ်း များနေသယောင် ။

ဒါပေမဲ့ သူတို့ဟာ ဒီအခြေအနေကို ရှောင်ရှားနိုင်စွမ်းရှိတယ်။

မိတ်လိုက်ရာသီရောက်ပြီဆို ဒီငှက်ဖိုတွေဟာ Blister beetles (Meloidae) ပိုးကောင်တွေကို အဆမတန်စားပစ်တယ်။

ထူးခြားတာက အဲဒီပိုးကောင်တွေမှာ Cantharidin ဆိုတဲ့ အဆိပ်ဓာတုဗေဒ ဒြပ်ပေါင်းပါဝင်နေတယ်။

ဒီဒြပ်ပေါင်းဟာ ငှက်ဖိုတွေရဲ့ အူအတွင်းမှာ ကပ်ခိုနေတဲ့ တုတ်ကောင်၊ သန်ကောင်တွေကို သေစေ နိုင်စွမ်းရှိရုံမက လိင်မှတစ်ဆင့် ကူးစက်တဲ့ ရောဂါတွေကို ဖြစ်ပွါးစေတဲ့ အစာအိမ်နဲ့အူလမ်းကြောင်းက  ဘက်တီးရီးယားတွေကိုပါ သတ်ပစ်နိုင်စွမ်းရှိနေတယ်။

ငှက်မတွေကလဲ မိတ်မလိုက်ခင် အရင် ငှက်ဖိုရဲ့ စအို/လိင်ပေါက်/ဆီးပေါက် (Cloaca) ကို သေချာစစ်ဆေးတယ်။ သန့်စင်ဖြူဖွေးမူဟာ ရောဂါကင်းစင်မူ လက္ခဏာဖြစ်ပြီး ၊ ဒီလိုမှသာ ငှက်မတွေဟာ လက်ခံတယ်။

(Polygamous male bustards eat poisonous beetles to rid themselves of STDs. By Seriously Science | November 3, 2014)

ဒီငှက်ဖိုတွေ အနေနဲ့ သူတို့ မိတ်မလိုက်ခင်မှာ အင်းဆက်တွေထဲကမှ Cantharidin အဆိပ်ဓာတုဗေဒ ဒြပ်ပေါင်းပါဝင်နေတဲ့ Blister beetle ပိုးကောင်တွေကို စားပြီး လိင်မှတစ်ဆင့် ကူးစက်တဲ့ ရောဂါတွေကို ရှောင်ရှားပစ်ဖို့ ဘယ်လိုများသိပါသလဲ၊

ငှက်မတွေကကော မိတ်မလိုက်ခင်အရင် ငှက်ဖိုတွေမှာ ရောဂါကင်း/မကင်း စစ်ဆေးရမယ်ဆိုတာတဲ့ အသိ ဘယ်လိုများ ရှိနေကြပါလိမ့်။

M-Media Knowledge ကဏ္ဍမှ အပတ်စဉ် ဗုဒ်ဓဟူးနေ့ တိုင်း တင်ဆက်ပါမည်။

ဇန်နဝါရီ ၂၇ ၊ ၂၀၁၆
M-Media
အေးထွန်း ရှာဖွေတင်ဆက်သည်

လင်းနို့တွေဟာ ကြိမ်နှုန်းမြင့် ပဲ့တင်သံတွေအသုံးပြုပြီး အတားအဆီးတွေကို ရှောင်တယ်။ ပျံသန်းနေတဲ့ အင်းဆက်တွေကိုစားတယ် ။

Noctuids ပိုးဖလံတွေဟာ လင်းနို့တွေရဲ့ကြိမ်နှုန်းမြင့်သံကို ကြားနိုင်စွမ်းရှိတဲ့ အတွက် လင်းနို့တွေရဲ့ ရန်ကို ရှောင်ရှားနိုင်စွမ်းရှိကြတယ်။

ဒီပိုးဖလံတွေရဲ့ နားအတွင်းမှာ ကပ်ပါးကမျဉ်းကောင် (Dicrocheles phalaerwdectes Ear Mites) တွေ နေထိုင် စားသောက်နေတယ်။ ဆိုတော့ ဒီကပ်ပါးကောင်တွေဟာ ပိုးဖလံတွေရဲ့ နားကို ပျက်စီးစေတယ်။

ဒီဖြစ်စဉ်မှာ ထူးခြားမူတစ်ခုကို အမေရိကန် Massachusetts ပြည်နယ် ၊ Medford မြို့တော်၊ Tufts University မှ သုတေသန ပညာရှင် K.D. Roeder နဲ့ The City University of New York and The American Museum of Natural History မှ Asher . E. Treat တို့ဟာ တွေ့ရှိခဲ့တယ်။

အဲဒါ ဘာလဲဆိုတော့ ဒီကပ်ပါးကောင်တွေဟာ ပိုးဖလံတွေရဲ့ နားတစ်ဖက်ထဲမှာသာလျှင် ကပ်တွယ်ပြီး နေထိုင် စားသောက်ကြတယ်ဆိုတာပဲ၊

ဘာလို့လဲ ၊ ဘာလို့ ပိုးဖလံကောင်တွေရဲ့ နား၂ဖက်လုံးမှာ ဝင်ရောက်ကပ်တွယ် မစားသောက်ကြတာလဲ။

ဟုတ်ကဲ့၊ တကယ်လို့ သူတို့သာ ပိုးဖလံတွေရဲ့ နား၂ဖက်လုံးထဲ ဝင်ရောက်ကပ်တွယ် နေထိုင် စားသောက် ကြမယ်ဆိုရင် ပိုးဖလံတွေရဲ့ နား၂ဖက်လုံးဟာ အကြားအာရုံ ချို့တဲ့ သွားမှာ ဖြစ်ပြီး လင်းနို့တွေရဲ့ ရန်ကို မရှောင်ရှားနိုင်တော့ပါဘူး။ အကျိုးဆက်အနေနဲ့ ကပ်တွယ်နေထိုင်တဲ့ သူတို့ပါ လင်းနို့ရဲ့ အစာဖြစ်သွားမှာပါ။

ဒါကြောင့် ဒီကမျဉ်းကပ်ပါးကောင်တွေဟာ ပိုးဖလံတွေရဲ့ နားတစ်ဖက်ထဲမှာသာလျှင် ဝင်ရောက် နေထိုင် စားသောက်ကြတာ ဖြစ်ပါတယ်။

ဆိုတော့ကာ ပိုးဖလံတွေရဲ့ ကျန်နားတစ်ဖက်ဟာ လင်းနို့သံကို ဆက်လက်ထောက်လှမ်း ရှောင်ရှားနိုင်စွမ်း ရှိနေပါတယ်။

ကိုယ်ပါ  လင်းနို့အစားမခံရအောင်၊ ရှဥ့်လဲလျှောက်သာ ၊ ပျားလဲစွဲသာ အခြေအနေရှိနေအောင် ကြံဆောင်နိုင်တဲ့ ဉာဏ်စွမ်းရဲ့ မူလဘူတ ပိုင်ရှင်ဟာ အဲဒီ ပိုးဖလံတွေရဲ့ နားအတွင်းက ကမျဉ်းကပ်ပါးကောင် ( Mites ) တွေ ဖြစ်နိုင်ပါရဲ့လား။

(Readings in Behavior By William G. Van der Kloot, Charles Walcott and Benjamin Dane , Pg 188)

M-Media Knowledge ကဏ္ဍမှ အပတ်စဉ် ဗုဒ်ဓဟူးနေ့ တိုင်း တင်ဆက်ပါမည်။

ဇန်နဝါရီ ၂၀ ၊ ၂၀၁၆
M-Media
အေးထွန်း ရှာဖွေတင်ဆက်သည်

ငှက်တွေဟာ သူတို့အသိုက်ကိုဆောက်ရာမှာ ကြုံရာအရွက်တွေကို သုံးပြီး ပြီးစလွယ်ဆောက်လုပ်ကြတာ မဟုတ်ပါဘူး။

သူတို့ရဲ့ အရွက်ရွေးချယ်မူဟာ သူတို့ရဲ့ ဆေးပညာ ဗဟုသုတကို မီးမောင်းထိုးပြနေပါတယ်။

ဥပမာအားဖြင့် အိန္ဒိယမှာ စာကလေး (House Sparrows) တွေဟာ အသိုက်ဟောင်းကို မွန်းမံရာမှာ အခြားအပင် အရွက်တွေကို လစ်လျှူရှုပြီး တမာရွက်တွေကို ရွေးချယ် အသုံးပြုလေ့ ရှိကြတယ်။

ဘာလို့လဲဆိုရင် တမာရွက်တွေမှာ ပါဝင်တဲ့ Azadirachtin ဓာတုဗေဒ ကွန်ပေါင်းဟာ ထူးရှယ် အင်းဆက်သတ် စွမ်းရည်ရှိပြီး ၊ နောက်ထပ် ဓာတုဗေဒကွန်ပေါင်း တစ်ခုဖြစ်တဲ့ Beta-Sitosterol မှာလဲ အင်းဆက်တွေကို မောင်းထုတ်နိုင်တဲ့ အစွမ်းရှိရုံမက သွေးစုပ်ကပ်ပါးကောင်တွေ ဥ မဥနိုင်အောင် ဟန့်တားနိုင်စွမ်း ရှိနေတယ်လေ။

ကလ်ကတ္တားမြို့တော်မှာ လူတွေ ငှက်ဖျားရောဂါဖြစ်နေတုံး စာကလေးတွေရဲ့ အပြုအမူကို သတိပြုမိခဲ့တဲ့ ဇီဝဗေဒပညာရှင် Sudhim Senegupta ဟာ အံ့အားသင့်ခဲ့ရတယ်။
အဲဒီအချိန်ကာလမှာ စာကလေးတွေဟာ သူတို့အသိုက်တွေဆီ Krishnachura ပင်တွေဆီက ကွိုင်းနိုင်း (ကွီနိုင်) (Quinine , C_(20 ) H_(24 ) N_(2 ) O_(2 ) ) ကြွယ်ဝတဲ့ အရွက်တွေကို ရွေးချယ်ယူလာကြပါတယ်။

ကွီနိုင် ကွန်ပေါင်းမှာ ငှက်ဖျားတိုက်ဖျက်ရေး စွမ်းရည်ရှိတယ်ဆိုတာ ကျွန်တော်တို့ အသိ။

ဆိုတော့ ဇီဝဗေဒပညာရှင် Sudhim Senegupta က စာကလေးတွေဟာ ငှက်ဖျားရောဂါကို ကြံ့ကြံ့ခံနိုင်ဖို့ ဒီ ကွီနိုင်ကြွယ်ဝတဲ့ အရွက်တွေကို အသိုက်ဆီယူလာတာ ဖြစ်ရမယ်လို့ ကောက်ချက်ချခဲ့ပါတယ်။

( Wild Health: Lessons in Natural Wellness from the Animal Kingdom By Cindy Engel , Pg 124 – 125)

M-Media Knowledge ကဏ္ဍမှ အပတ်စဉ် ဗုဒ်ဓဟူးနေ့ တိုင်း တင်ဆက်ပါမည်။