ဖေဖော်၀ါရီ ၂၆၊ ၂၀၂၄
M-Media
-နိုင်ငံခြား အလုပ်သမားထက် ပြည်တွင်း လုပ်သားများကိုသာ ဦးစားပေး ခန့်ထားလိုပေမယ့် လုပ်သားရင်းမြစ် လုံလုံလောက်လောက် မရှိဘူးလို့ မလေးရှား ကုန်ထုတ်လုပ်ငန်းရှင်များအသင်း FMM က ပြောပါတယ်။
“အလုပ်အကိုင်အခွင့်အလမ်းရှိရင် နိုင်ငံသားတွေကိုသာ အဓိကဦစားပေး ခေါ်ပါတယ်။ ရှေ့ဆက်လည်း ဒီအတိုင်းသွားမှာပါ။ အလုပ်ခန့်ထားတဲ့ မူ၀ါဒတွေ အမြဲပြောင်းလဲနေတာ၊ အလုပ်ခန့်ထားမှုနဲ့ပတ်သက်တဲ့ နိုင်ငံတကာ စံချိန်စံညွန်းတွေ မြင့်လာတာကြောင့် နိုင်ငံခြားအလုပ်သမားတွေ ခေါ်ရတာ မလွယ်သလို၊ ကုန်ကျစားရိတ်လည်း များပါတယ်” လို့ FMM အကြီးအကဲ တန်ဆရီ ဆိုသီယန်လိုင်က ပြောပါတယ်။
မလေးရှားပြည်တွင်းမှာ လုပ်သားရင်းမြစ် ရှားပါးမှုကိုလည်းသူက ထောက်ပြခဲ့ပါတယ်။
“လုံလောက်တဲ့ ပြည်တွင်းလုပ်သားအင်အားကို ကုမ္ပဏီတွေက မရကြဘူး။ အထူးသဖြင့် အထွေထွေလုပ်သားကဏ္ဍမှာ ဖြစ်ပါတယ်။ နိုင်ငံသားတွေက ဒီလိုအလုပ်မျိုးတွေကို မလုပ်ချင်ကြဘူး”
ကျွမ်းကျင်မှုမရှိတဲ့ အလုပ်သမားတွေအပေါ် မှီခိုနေရမှုကို လျှော့ချဖို့အတွက် ကုန်ထုတ်လုပ်ငန်းရှင်တွေဟာ ဉာဏ်ရည်တုနဲ့ အဆင့်မြင့်နည်းပညာတွေ ပိုမိုအသုံးပြုဖို့ စဥ်စားနေတယ်လို့လည်း လိုင်က ထည့်သွင်းပြောဆိုခဲ့ပါတယ်။
မလေးရှားမှာ ငွေကြေးဖောင်းပွမှု မြင့်တက်တာ၊ ကုန်စျေးနှုန်းကြီးမြင့်တာ၊ အလုပ်အကိုင်ရှားပါးလာတွေနဲ့ ပတ်သက်ပြီး အစိုးရနဲ့ လုပ်ငန်းရှင်တွေအပေါ် နိုင်ငံသားတွေက ၀ေဖန်မှု မြင့်တက်နေတာ ဖြစ်ပါတယ်။
အိန္ဒိယကုန်သည်ကြီးများအသင်း တာ၀န်ရှိသူတစ်ဦးဖြစ်တဲ့ နီဗက်စ် ရာဂါဗန်က ကြမ်းတမ်းအန္တရာယ်ရှိပြီး နိုင်ငံသားတွေ မလုပ်ချင်တဲ့ အလုပ်မျိုးအတွက် နိုင်ငံခြားသားအလုပ်သမားတွေကို အားထားနေတယ်လို့ ပြောပါတယ်။
စိုက်ပျိုးရေး၊ ၀န်ဆောင်မှုနဲ့ ဆောက်လုပ်ရေးလုပ်ငန်းတွေကို ကဏ္ဍမျိုးမှာ ဉာဏ်ရည်တုနည်းပညာ အပြည့်အ၀ အစားမထိုးနိုင်တာကိုလည်း သူက ထောက်ပြပါတယ်။
“ဒီလုပ်ငန်းတွေမှာ နိုင်ငံခြားအလုပ်သမားတွေနဲ့ ကြားကန်ရမှာပါ”
ဒီကဏ္ဍတွေအတွက် စွမ်းဆောင်ရည်မြှင့်သင်တန်းတွေ ပေးနေပေမယ့်လည်း နိုင်ငံသားတွေက စိတ်၀င်စားမှုနည်းပါးတယ်လို့ ရာဂါဗန်က ထည့်သွင်းပြောဆိုခဲ့ပါတယ်။
Ref: The Star
