Tag: Myanmar Military

ဩဂုတ် ၁၁၊ ၂၀၂၁
M-Media

-နိုင်ငံတကာအသိုင်းအ၀ိုင်းက အရေးယူမှု မရှိတာကြောင့် မြန်မာစစ်အာဏာရှင်တွေဟာ အသိအမှတ်ပြုမှုရဖို့ တိုးမြင့်လုပ်ဆောင်လာတယ်လို့ မြန်မာနိုင်ငံဆိုင်ရာ ကုလအထူးကိုယ်စားလှယ် ခရစ္စတင်း ရှာရ်နာ ဘာဂီနာက မနေ့က သတင်းစာရှင်းလင်းပွဲမှာ ပြောကြားလိုက်ပါတယ်။

ဖေဖော်ဝါရီ ၁ ရက်နေ့ အာဏာသိမ်းပြီးတဲ့နောက် စစ်ကောင်စီပုံစံနဲ့ တိုင်းပြည်ကို အုပ်စိုးခဲ့တဲ့ စစ်အာဏာရှင် ဗိုလ်ချုပ်မှူးကြီး မင်းအောင်လှိုင်ဟာ ဩဂုတ်လ ၁ ရက်နေ့မှာတော့ အိမ်စောင့်အစိုးရ ဝန်ကြီးချုပ်အဖြစ် အသွင်ပြောင်းခဲ့ပါတယ်။

ဘာဂီနာက ၂၀၂၀ နိုဝင်ဘာရွေးကောက်ပွဲကို ဖျက်သိမ်းတာ၊ အိမ်စောင့်အစိုးရ ဖွဲ့စည်းတာတွေဟာ အာဏာကို ပိုမိုခိုင်မြဲအောင် လုပ်ဆောင်မှုဖြစ်တယ်လို့ ရှုမြင်ကြောင်း သတင်းထောက်တွေကို ပြောကြားခဲ့ပါတယ်။

၂၀၂၀ ရွေးကောက်ပွဲမှာ အနိုင်ရခဲ့တဲ့ NLD ပါတီကို အဓမ္မ ဖျက်သိမ်းလာနိုင်တယ်ဆိုတဲ့ စိုးရိမ်မှုတွေရှိကြောင်း သူမက ထပ်ပြောပါတယ်။

“နိုင်ငံတကာအသိုင်းအ၀ိုင်းက အရေးယူမှု မရှိတာကြောင့် စစ်အာဏာရှင်က တရားဝင်မှုရအောင် ပိုမိုကြိုးစားလာတာပါ။ ကုလက ဒီအစိုးရကို အသိအမှတ်မပြုဘူးလို့ ကျွန်မ ရှင်းရှင်းလင်းလင်း ပြောပါရစေ။ အဖွဲ့ဝင်နိုင်ငံတွေကတော့ ကိုယ့်သဘောနဲ့ ကိုယ်ပါပဲ”

အဖွဲ့ဝင်နိုင်ငံတွေက တစ်စုံတစ်ရာ ဆုံးဖြတ်ချက်ချတာမျိုး မလုပ်သ၍ ဦးကျော်မိုးထွန်းကို ကုလသမဂ္ဂဆိုင်ရာ မြန်မာနိုင်ငံ သံအမတ်အဖြစ် ဆက်လက် အသိအမှတ်ပြုသွားမယ်လို့လည်း ဘာဂီနာက ထည့်သွင်းပြောဆိုခဲ့ပါတယ်။ ဦးကျော်မိုးထွန်းကို လုပ်ကြံမယ့်အစီအစဉ်ကို သူမက ရှုတ်ချခဲ့ပါတယ်။

လွတ်လပ်ခွင့် မရှိတော့

စစ်ကောင်စီတပ်တွေက အကြမ်းဖက်တာ၊ ကိုဗစ်ကပ်ရောဂါ ပြန့်နှံ့နေတာတွေကြောင့် မြန်မာနိုင်ငံက အခြေအနေဟာ အလွန်အမင်း ခက်ခဲဆိုးရွားနေပြီး အခွင့်အရေးတွေလည်း ချိုးဖောက်ခံနေရတယ်လို့ ဘာဂီနာက ထည့်သွင်းပြောဆိုခဲ့ပါတယ်။

“လွတ်လပ်စွာ ပြောဆိုခွင့် မရှိတော့ပါဘူး။ စာနယ်ဇင်းလွတ်လပ်ခွင့်အပေါ် တိုက်ခိုက်မှုတွေ ရှိနေတဲ့အတွက် အလွန် စိုးရိမ်ပူပန်မိပါတယ်။ စစ်တပ်နဲ့ ဆွေးနွေးမှုတိုင်းမှာ မီဒီယာသမားတွေ အပါအဝင် နိုင်ငံရေးအကျဉ်းသားတွေ လွှတ်ပေးဖို့ အမြဲတမ်း ကျွန်မ တိုက်တွန်းပြောဆိုပါတယ်”

ဆွေးနွေးမှုလုပ်နေ

ဘာဂီနာက သူမဟာ မြန်မာစစ်ခေါင်းဆောင်တွေ၊ တိုင်းရင်းသားလက်နက်ကိုင်အဖွဲ့တွေ၊ NUG အဖွဲ့ဝင်တွေအပါအ၀င် မြန်မာ့နိုင်ငံရေးနယ်ပယ်က သက်ဆိုင်သူတွေ၊ NLD နဲ့ အခြားနိုင်ငံရေးပါတီက ကိုယ်စားလှယ်တွေနဲ့ ဆွေးနွေးကာ ငြိမ်းချမ်းစွာအဖြေရှာရေး လုပ်ဆောင်နေတယ်လို့ ထည့်သွင်းပြောဆိုခဲ့ပါတယ်။

“ငြိမ်းချမ်းစွာ ဆွေးနွေးအဖြေရှာရေးအပေါ် တိုင်ရင်းသားလက်နက်ကိုင်အဖွဲ့တွေက တော်တော်လေး အပြုသဘောဆောင်တဲ့ပုံစံနဲ့ ရှုမြင်ပါတယ်။ ဒီအယူအဆကို NUG ကလည်း စိတ်ဝင်စားတယ်။ ဒါပေမယ့် ဒီလိုဆွေးနွေးမှုကိုစဖို့ ကြိုတင်တောင်းဆိုချက်တွေ ရှိမှာကတော့ သေချာပါတယ်”

ဇူလိုင်လ ၁၆ ရက်နေ့က အာဏာသိမ်းစစ်တပ်ရဲ့ ဒုတိယစစ်ခေါင်းဆောင် ဒုတိယဗိုလ်ချုပ်မှူးကြီး စိုးဝင်းနဲ့ အချိန်အတော်ကြာ ဆွေးနွေးခဲ့ပြီး မိမိရဲ့ ပြောဆိုချက်တွေကို လက်ခံခဲ့ပေမယ့် တိကျတဲ့ အဖြေမျိုး မပေးခဲ့ကြောင်း၊ အာဆီယံ အထူးကိုယ်စားလှယ် ခန့်အပ်မှုကနေ အားလုံးပါဝင်တဲ့ ဆွေးနွေးညှိနှိုင်းမှု ပေါ်ပေါက်လာမယ်လို့ မိမိတို့မျှော်လင့်ပြီး ဒီလိုမှမဟုတ်ရင် ပြည်တွင်းစစ်လမ်းကြောင်းကို ပိုမိုရောက်ရှိသွားမယ်လို့ သတိပေးခဲ့ကြောင်း ဘာဂီနာက သတင်းစာရှင်းလင်းပွဲမှာ ထပ်လောင်းပြောကြားခဲ့ပါတယ်။

Ref: UN News

ဩဂုတ် ၁၀၊ ၂၀၂၁
M-Media

-ကုသမဂ္ဂ မြန်မာသံအမတ် ဦးကျော်မိုးထွန်းကို လုပ်ကြံဖို့ ကြံစည်တဲ့ကိစ္စမှာ ထိုင်းနိုင်ငံက လက်နက်ပွဲစား ပါဝင်မှုနဲ့ပတ်သက်ပြီး စုံစမ်းစစ်ဆေးပေးဖို့ အဆင်သင့်ရှိတယ်လို့ ထိုင်းရဲတပ်ဖွဲ့က ပြောပါတယ်။

မြန်မာစစ်အာဏာရှင်အသိုင်းအ၀ိုင်းနဲ့ နီးစပ်ပြီး နယူးယောက်မြို့မှာ နေထိုင်တဲ့ မြန်မာလူငယ်နှစ်ဦးဟာ ဦးကျော်မိုးထွန်းကို ထိခိုက်အောင် ဒါမှမဟုတ် သေဆုံးအောင် ပြုလုပ်ဖို့ ကြံစည်နေတယ်ဆိုတဲ့ စွဲချက်နဲ့ အမေရိကန်အာဏာပိုင်တွေက ပြီးခဲ့တဲ့တစ်ပတ်မှာ ဖမ်းဆီးခဲ့ပါတယ်။ မြန်မာစစ်တပ်ကို လက်နက်ရောင်းနေတဲ့ ထိုင်းနိုင်ငံက လက်နက်ပွဲစားတစ်ဦးက ဒီလူငယ်နှစ်ဦး ဆက်သွယ်ပြီး ဒီလို ကြံစည်ခိုင်းတာပါ။

ထိုင်းရဲတပ်ဖွဲ့ရဲ့ ဒုတိယပြောရေးဆိုခွင့်ရှိသူ Kissana Phathanacharoen က လက်ရှိအချိန်အထိ အမေရိကန်က မိမိတို့ကို ဆက်သွယ်လာခြင်းမရှိသေးဘဲ အကူအညီတောင်းခံလာရင်တော့ စုံစမ်းစစ်ဆေးပေးဖို့ အဆင်သင့်ရှိတယ်လို့ မနေ့က သတင်းစာရှင်းလင်းပွဲမှာ ပြောကြားခဲ့ပါတယ်။

မြန်မာအာဏာသိမ်းစစ်ကောင်စီက ဒီကိစ္စဟာ အမေရိကန်နိုင်ငံအတွင်းမှာဖြစ်တဲ့ ကိစ္စသာဖြစ်ပြီး မိမိတို့နဲ့ ဘာမှ မသက်ဆိုင်ဘူးလို့ နိုင်ငံပိုင်မီဒီယာကနေတစ်ဆင့် မနေ့က ထုတ်ပြန်ခဲ့ပါတယ်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းမှုကို မထောက်ခံဘဲ ပြည်သူနဲ့ တစ်သားတည်းရှိမယ်လို့ ဦးကျော်မိုးထွန်းက ဖေဖော်ဝါရီလအတွင်း ကုလသမဂ္ဂ အစည်းအဝေးမှာ ပြောကြားခဲ့ပြီးတဲ့နောက် စစ်ကောင်စီက သူ့ကို ရာထူးက ဖယ်ရှားလိုက်တာပါ။ ဒါပေမယ့် ဦးကျော်မိုးထွန်းဟာ ရာထူးကနေ မဆင်းပေးဘဲ ကုလသမဂ္ဂကလည်း သူ့ကိုသာ တရားဝင် မြန်မာသံအမတ်အဖြစ် လက်ခံထားပါတယ်။

Ref : Bangkok Post

ဩဂုတ် ၈၊ ၂၀၂၁
M-Media

-ကုလသမဂ္ဂ မြန်မာသံအမတ် ဦးကျော်မိုးထွန်းကို တိုက်ခိုက်ဖို့ ကြံစည်မှုဟာ အာဏာရှင်တွေရဲ့ စက်ဆုပ်ဖွယ် အမူအကျင့်ကို ထင်ဟင်နေတာဖြစ်တယ်လို့ ကုလသမဂ္ဂဆိုင်ရာ အမေရိကန်သံအမတ်က မနေ့မှာ ပြောကြားလိုက်ပါတယ်။

ထိုင်းနိုင်ငံက မြန်မာလက်နက်ပွဲစား၊ နယူးယောက်မြို့က စစ်တပ်နဲ့နွယ်တဲ့ မြန်မာနိုင်ငံသား လူငယ်နှစ်ဦး စုစုပေါင်း ၃ ဦး ပူးပေါင်းပြီး ဦးကျော်မိုးထွန်းကို တိုက်ခိုက်လုပ်ကြံဖို စီစဉ်မှုကို အမေရိကန်အာဏာပိုင်တွေက အခုတစ်ပတ်အစောပိုင်းမှာ ဖော်ထုတ်ခဲ့ပါတယ်။

လက်ရှိမှာ ဦးကျော်မိုးထွန်းကို အမေရိကန် ထောက်လှမ်းရေးအဖွဲ့ FBI နဲ့ ဒေသခံ ရဲတပ်ဖွဲ့တို့က ၂၄ နာရီ လုံခြုံရေး ပေးထားပါတယ်။

ကုလသမဂ္ဂဆိုင်ရာ အမေရိကန်သံအမတ် လင်ဒါသောမတ်စ် ဂရင်းဖီးလ်က ဒီကြံစည်မှုဟာ ကမ္ဘာတစ်ဝှမ်းက အာဏာရှင်တွေ၊ အာဏာရှင်ထောက်ခံသူတွေက သူတို့ကို ဆန့်ကျင်ပြီး အမှန်တရားကို ပြောကြားတဲ့ ဂျာနယ်လစ်တွေ၊ တက်ကြွလှုပ်ရှားသူတွေ၊ အတိုက်အခံတွေကို နှိပ်ကွပ်ဖို့ကြိုးပမ်းတဲ့ စက်ဆုပ်ဖွယ်ရာ အမူအကျင့်နဲ့ ကိုက်ညီနေတယ်လို့ မနေ့က ပြောကြားခဲ့ပါတယ်။

ဦးကျော်မိုးထွန်းဟာ စစ်တပ်ကအာဏာသိမ်းမှုကို ဆန့်ကျင်ပြီး ပြည်သူ့ဖက်မှာ ရပ်တည်မှာဖြစ်ကြောင်း ကုလသမဂ္ဂ အစည်းအဝေးမှာ ပြောကြားခဲ့ပြီးတဲ့နောက် ဖေဖော်ဝါရီလ ၂၇ ရက်နေ့မှာ စစ်ကောင်စီက သူ့ကို မြန်မာသံအမတ်အဖြစ်ကနေ ဖြုတ်လိုက်တာပါ။

ဒါပေမယ့် သူကတော့ ရာထူးကနေ မဆင်းပေးဘဲ ကုလသမဂ္ဂကလည်း ဦးကျော်မိုးထွန်းကိုသာ မြန်မာသံအမတ်အဖြစ် ဆက်လက်အသိအမှတ်ပြုလက်ခံထားပါတယ်။

Ref: VOA

ဩဂုတ် ၇၊ ၂၀၂၁
M-Media

-မြန်မာစစ်တပ်ကို လက်နက်ရောင်းနေတဲ့ ထိုင်းလက်နက်ပွဲစားနဲ့ပေါင်းပြီး ကုလဆိုင်ရာ မြန်မာသံအမတ် ဦးကျော်မိုးထွန်းကို လုပ်ကြံဖို့ကြံစည်တဲ့ မြန်မာနိုင်ငံသား နှစ်ဦးကို ဖမ်းဆီးထားကြောင်း အမေရိကန်က မနေ့မှာ ထုတ်ပြန်ပါတယ်။

အသက် ၂၈ နှစ်အရွယ် ဖြိုးဟိန်းထွဋ်နဲ့ အသက် ၂၀ အရွယ် ရဲဟိန်းဇော်တို့ဖြစ်ပြီး နယူးယောက်မြို့မှာ နေထိုင်ကြသူတွေပါ။

နယူးယောက် တောင်ပိုင်းခရိုင်တရားရုံးက အစိုးရရှေ့နေ အော်ဒရီ စထရာအက်စ်ရဲ့ သောကြာနေ့ ထုတ်ပြန်ချက်မှာ ဒီအမျိုးသားနှစ်ဦးဟာ မြန်မာစစ်တပ်ကို လက်နက်ရောင်းနေတဲ့ ထိုင်းနိုင်ငံက လက်နက်ပွဲစားနဲ့ပေါင်းပြီး သံအမတ် ဦးကျော်မိုးထွန်းကို အပြင်းအထန် ထိခိုက်နာကျင်အောင်၊ ဒါမှမဟုတ် သေဆုံးအောင် ပြုလုပ်ဖို့ စီစဉ်ခဲ့ကြတယ်လို့ ဖော်ပြထားပါတယ်။

ဦးကျော်မိုးထွန်းက ဒီကိစ္စကို အင်္ဂါနေ့မှာ သိရှိခဲ့ပြီးတဲ့နောက် အမေရိကန်အစိုးရနဲ့ ဥပဒေစိုးမိုးရေးအဖွဲ့တွေကို သတင်းပို့တိုင်ကြားခဲ့တယ်လို့ ပြောပါတယ်။ လက်ရှိမှာတော့ အမေရိကန်စုံစမ်းစစ်ဆေးရေးဗျူရို FBI နဲ့ နယူးယောက်ရဲတပ်ဖွဲ့က ဦးကျော်မိုးထွန်းကို ၂၄ နာရီ လုံခြုံရေးပေးထားပါတယ်။

ဖြိုးဟိန်းထွဋ်က ထိုင်းလက်နက်ပွဲစားတစ်ဦးဟာ သူ့ကို Facebook နဲ့ FaceTime ကနေ ဆက်သွယ်လာပြီး ဦးကျော်မိုးထွန်းကို ရာထူးကနေဆင်းပေးရေး ဖိအားပေးဖို့ ကြိုးပမ်းရာမှာ ကြေးစားတွေငှားပြီး တိုက်ခိုက်ပေးဖို့ ပြောဆိုခဲ့တယ်လို့ FBI ကို ထွက်ဆိုခဲ့ကြောင်း တရားစွဲဆိုမှုမှတ်တမ်းမှာ ဖော်ပြထားပါတယ်။

ဒီလိုခြိမ်းခြောက်ပေမယ့် ဦးကျော်မိုးထွန်းက ရာထူးကနေ မဆင်းပေးဘူးဆိုရင် ကြေးစားတွေက ဦးကျော်မိုးထွန်းကားတာယာကို တစ်ခုခုဖြစ်အောင်လုပ်ထားကာ ကားမောင်းတဲ့အချိန် မတော်တဆဖြစ်တဲ့ပုံစံမျိုး လုပ်ကြံဖို့အတွက် ထိုင်းလက်နက်ပွဲစားက ပြောခဲ့ပါတယ်။

လုပ်ကြံဖို့အစီအစဉ်အတွက် ကြိုတင်စရံငွေအဖြစ် အမေရိကန်ဒေါ်လာ ၄ ထောင်ကို ရဲဟိန်းဇော်က ဖြိုးဟိန်းထွဋ်ကို လွှဲပေးခဲ့ပြီး၊ နောက်ထပ် ဒေါ်လာ တစ်ထောင်ပေးမယ်လို့ ဖုန်းနဲ့ ပြောဆိုခဲ့ကြောင်း တရားစွဲဆိုမှု မှတ်တမ်းမှာ ထည့်သွင်းဖော်ပြထားပါတယ်။ ဖြိုးဟိန်းထွဋ်နဲ့ ​ရဲဟိန်းဇော်တို့ရဲ့ ဖုန်းပြောဆိုမှုမှတ်တမ်းကိုလည်း အမေရိကန်ရဲတပ်ဖွဲ့က ရရှိထားပါတယ်။

မြန်မာသံအဖွဲ့ရဲ့ စေတနာ့ဝန်ထမ်း လုံခြုံရေးအစောင့်တစ်ဦးကို ဖြိုးဟိန်းထွဋ်က ချဉ်းကပ်စည်းရုံးရာကနေ ဒီအစီအစဉ်ပေါက်ကြားခဲ့တာပါ။ ဒီလိုစီစဉ်မှုတွေဟာ ဇူလိုင်လကနေ ဩဂုတ်လ ၅ အတွင်း ဖြစ်ပွားခဲ့တာဖြစ်ပြီး လုပ်ကြံမှုကိုတော့ ဦးကျော်မိုးထွန်းနေထိုင်တဲ့ နယူးယောက်မြို့ ဝက်စ်ချက်စတာကောင်တီမှာ ပြုလုပ်ဖို့ စီစဉ်ထားတာပါ။

နယးယောက်ရဲတပ်ဖွဲ့ ကော်မရှင်နာ ဒါမော့ရှီယာရဲ့ ထုတ်ပြန်ချက်မှာ ဒီလိုစီစဉ်သူတွေကို တိုက်ခိုက်မှုမပြုလုပ်ခင် တရားဥပေဒအတိုင်း စီရင်နိုင်ဖို့ မိမိတို့ရဲဌာန၊ နယူးယောက်တောင်ပိုင်းခရိုင် တရားရေးဌာနတို့က မနားမနေကြိုးပမ်းဆောင်ရွက်ခဲ့တယ်လို့ ဖော်ပြထားပါတယ်။

ဖြိုးဟိန်းထွဋ်နဲ့ ရဲဟိန်းဇော်တို့ဟာ နိုင်ငံခြားတာဝန်ရှိသူတစ်ဦးကို အပြင်းအထန်နာကျင်အောင် တိုက်ခိုက်ဖို့ ကြံစည်မှုစွဲချက်နဲ့ တရားစွဲဆိုခံထားရပြီး ပြစ်မှုထင်ရှားရင် အမြင့်ဆုံး ထောင်ဒဏ် ၅ နှစ်အထိ ကျခံရမှာ ဖြစ်ပါတယ်။

ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက် ပြုလုပ်တဲ့ ကုလသမဂ္ဂ အစည်းအဝေးတစ်ခုမှာ ဦးကျော်မိုးထွန်းက ပြည်သူ့ဖက်ကရပ်တည်ကြောင်း ပြောကြားခဲ့တဲ့အတွက် စစ်ကောင်စီဟာ ဖေဖော်ဝါရီ ၂၇ ရက်နေ့မှာ ဦးကျော်မိုးထွန်းကို ဖြုတ်ခဲ့ပါတယ်။ ဒါပေမယ့် ရာထူးကနေဆင်းပေးဖို့ ဦးကျော်မိုးထွန်းက ငြင်းဆိုခဲ့ပြီး ကုလသမဂ္ဂကလည်း သူ့ကိုသာ မြန်မာသံအမတ်အဖြစ် ဆက်လက်အသိအမှတ်ပြုထားပါတယ်။

ဒီလိုလုပ်ကြံဖို့ကြိုးစားမှု နောက်ကွယ်မှာ မြန်မာစစ်အာဏာရှင်တွေ ပါဝင်ပတ်သက်နေတယ်ထင်လားလို့ မေးမြန်းရာမှာတော့ ဒီအစီအစဉ်ကို ဘယ်သူဘယ်၀ါက လုပ်တယ်ဆိုတာမျိုး မစွပ်စွဲလိုကြောင်း၊ မိမိအနေနဲ့ လုပ်ငန်းတာဝန်တွေကို ဆက်လက်ထမ်းဆောင်သွားမှာဖြစ်ကြောင်း ဦးကျော်မိုးထွန်းက CNN သတင်းဌာနကို ပြောကြားခဲ့ပါတယ်။

“ဖြစ်လာတာတွေက တကယ့်ကို စိတ်ပျက်စရာပါ။ ဒါပေမယ့် ကျွန်တော့်ရဲ့ နေ့စဉ်အလုပ်ကိုတော့ ထိခိုက်မှာမဟုတ်ပါဘူး။ လုပ်စရာရှိတာကို ဆက်လုပ်သွားမှာဖြစ်ပြီး တိုင်းပြည်အတွက်၊ ပြည်သူအတွက် ကျွန်တော် လုပ်ဆောင်နေတာတွေကို ဒီအဖြစ်အပျက်က အဟန့်အတား ဖြစ်စေမှာ မဟုတ်ပါဘူး”

မိမိကို ထောက်ခံအားပေးမှု၊ ကူညီမှု၊ ဒီကိစ္စအပေါ်မှာ ပရော်ဖက်ရှင်နယ်ပီသစွာ တုန့်ပြန်ဆောင်ရွက်မှုအတွက် အမေရိကန်အစိုးရနဲ့ ဥပဒေစိုးမိုးရေး အေဂျင်စီတွေကို ကျေးဇူးတင်တယ်လို့လည်း ဦးကျော်မိုးထွန်းက ထည့်သွင်းပြောဆိုခဲ့ပါတယ်။

“ကျွန်တော့်ရဲ့အသက်ကို သူတို့ကယ်တင်ပြီး၊ ကျွန်တော့်ဆီလာမယ့်အန္တရာယ်ကို တားဆီးပေးခဲ့တာပါ”

Ref : CNN