ဩဂုတ် ၁၇၊ ၂၀၂၁
M-Media
-စစ်တပ်က အာဏာသိမ်းပြီးနောက်ပိုင်း ဖြစ်လာတဲ့ မြန်မာ့နိုင်ငံရေးအပေါ် အယုံအကြည်မရှိတော့တာကြောင့် မိမိတို့လုပ်ကိုင်နေတဲ့ သတ္ထုတွင်းလုပ်ငန်းကို ရောင်းချတော့မယ်လို့ ဩဇီသတ္တုတွင်းလုပ်ငန်း Myanmar Metals က ပြောကြားလိုက်ပါတယ်။
Myanmar Metals ဟာ ပြည်တွင်းကုမ္ပဏီတွေဖြစ်တဲ့ EAP Global Mining၊ Win Myint Mo Industries တို့နဲ့ပေါင်းပြီး ရှမ်းပြည်နယ်အမြောက်ပိုင်း နမ္မတူမြို့က ဘော်တွင်း သတ္ထုတူးဖော်ရေး စီမံကိန်းကို လုပ်ဆောင်နေတာပါ။
အခုတော့ သူတို့ပိုင်ဆိုင်တဲ့ ရှယ်ယာ ၅၁ ရာခိုင်နှုန်းကို ရောင်းချပြီး မြန်မာနိုင်ငံက ထွက်ခွာတော့မှာ ဖြစ်ပါတယ်။ တရုတ်နိုင်ငံက သူဌေးတစ်ဦးပိုင်ဆိုင်တဲ့ Yintai Gold ကုမ္ပဏီဟာ လုပ်ငန်းတစ်ခုလုံးကို ကန်ဒေါ်လာ ၆၇ သန်းနဲ့ ဝယ်ယူဖို့ ကမ်းလှမ်းထားပါတယ်။ Myanmar Metals ရဲ့ အရင်တန်ဖိုးဟာ ကန်ဒေါ်လာ ၁၃၃ သန်းဖြစ်ပြီး တရုတ်ကုမ္ပဏီက တစ်ဝက်စျေးလောက်ပဲ ပေးတာပါ။
Myanmar Metals ဟာ ဩစတေးလျ စတော့အိတ်ချိန်းမှာ မှတ်ပုံတင်ထားတဲ့ လုပ်ငန်းတစ်ခုဖြစ်ပြီး ဖေဖော်ဝါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်းမှာတော့ အိတ်ချိန်းကနေ ဖယ်ရှားခံခဲ့ရပါတယ်။ ရွှေတူးဖော်ရေးလုပ်ငန်းနှစ်ခုမှာ ထပ်မံရင်းနှီးမြှုပ်နှံဖို့ Myanmar Metals က စီစဉ်ထားပေမယ့် အာဏာသိမ်းမှုကြောင့် ဒီအစီအစဉ်ကို ဖျက်သိမ်းခဲ့ပါတယ်။
ကုမ္ပဏီ စီအီးအို ဂျွန်လမ့်ဘ်က အခုလို ရောင်းလိုက်တာဟာ ရှယ်ယာရှင်တွေအတွက် ငွေပြန်ပေါ်အောင်ဖြစ်ပြီး၊ မြန်မာ့နိုင်ငံရေးအပေါ် ယုံကြည်မှုကျဆင်းလာတာကြောင့်၊ ရင်းနှီးမြှုပ်နှံသူတွေ ဝင်လာဖို့မရှိတော့ကြောင်း လေ့လာဆန်းစစ်မှုမှာ တွေ့ခဲ့ရတယ်လို့ ပြောကြားခဲ့ပါတယ်။
ငွေ၊ ခဲနဲ့ သွပ်တို့ထွက်တဲ့ ဘော်တွင်းသတ္ထုတွင်းဟာ ဗြိတိသျှကိုလိုနီလက်ထက်က ဗြိတိသျှရဲ့ အကြီးဆုံး သတ္ထုတွင်းလုပ်ငန်းတစ်ခုအဖြစ် နာမည်ကျော်ခဲ့ပြီး၊ အမေရိကန် သမ္မတဟောင်း ဟာဗာတ်ဟူဗာ လုပ်ကိုင်တဲ့ ၂၀ ရာစုတုန်းကလည်း ကမ္ဘာပေါ်မှာ အကောင်းဆုံး သတ္ထုတွင်းအဖြစ် မှတ်ယူခံခဲ့ရပါတယ်။
Ref: Financial Review
