မတ် ၂၆၊ ၂၀၂၁
M-Media
-ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက် မြန်မာနိုင်ငံမှာ ဖြစ်ပေါ်နေတဲ့အခြေအနေကို နိုင်ငံတကာအသိုင်းအဝိုင်းက တုန့်ပြန်တဲ့ ပုံစံနဲ့ ခြေလှမ်းဟာ လိုအပ်တာထက် အားနည်းနေတယ်လို့ မြန်မာနိုင်ငံရဲ့ လူ့အခွင့်အရေးဆိုင်ရာ ကုလသမဂ္ဂ အထူးကိုယ်စားလှယ် သောမတ်စ် အန်ဒရူးက ပြောကြားလိုက်ပါတယ်။
“မြန်မာနိုင်ငံက အခြေအနေဟာ ဆိုးရွားနေပြီး ပိတ်ဆို့နှိမ်နှင်းခံနေရသူတွေဖက်ကို နိုင်ငံတကာက ကူညီပံ့ပိုးမှု ထိထိရောက်ရောက် မြန်မြန်ဆန်ဆန် မလုပ်ပေးဘူးဆိုရင် ဒီထက်ပိုပြီး ဆိုးရွားသွားဖို့ ရှိနေပါတယ်။ နိုင်ငံတကာအသိုင်းအဝိုင်းက စည်းစည်းလုံးလုံးနဲ့ ထိထိရောက်ရောက် တုန့်ပြန်ရမယ်လို့ ကုလသမဂ္ဂ အထွေထွေအတွင်းရေးမှူးချုပ် အန်တိုနီယို ဂူတာရက်စ်ရဲ့ တိုက်တွန်းဆော်ဩမှုကို အလေးထားဖို့ အရေးကြီးနေပါပြီ”
ကုလသမဂ္ဂ အဖွဲ့ဝင်နိုင်ငံတွေက စစ်ခေါင်းဆောင်တွေအပေါ် ပြုလုပ်နေတဲ့ ပိတ်ဆို့မှုတွေဟာ သူတို့ရဲ့ တရားမဝင်လုပ်ငန်းတွေကနေ ရရှိနေတဲ့ အကျိုးအမြတ်အပေါ် ထိခိုက်မှုရှိမှာမဟုတ်ကြောင်း သောမတ်စ် အန်ဒရူးက ပြောကြားခဲ့ပြီး သံတမန်ရေးရာ ဝေဖန်ရှုတ်ချတာမျိုးအပါအဝင် ထိရောက်တဲ့ တုန့်ပြန်မှုမျိုးနဲ့ ပိတ်ဆို့မှုတွေကို အစားထိုးသင့်ပြီလို့လည်း အကြံပြုခဲ့ပါတယ်။
မြန်မာနိုင်ငံက လက်ရှိအခြေအနေဟာ ပိုမိုဆိုးရွားကာ ပြည်သူလူထုရဲ့အသက်တွေ ပိုမိုဆုံးရှုံးလာနိုင်တယ်ဆိုတဲ့ သတင်းတွေကို လက်ခံရရှိနေတယ်လို့ သူက သတိပေးပါတယ်။ ဒါ့အပြင် အရေးပေါ် ထိပ်သီးအစည်းအဝေး ခေါ်ယူဖို့လည်း တောင်းဆိုခဲ့ပါတယ်။
“မြန်မာနိုင်ငံရဲ့ အိမ်နီးချင်းတွေ၊ ဒေသတွင်း ဩဇာကြီးတဲ့နိုင်ငံတွေ အရေးပေါ် ထိပ်သီးအစည်းအဝေး ကျင်းပတာအပါအဝင် သံတမန်နည်းလမ်းနဲ့ ဖြေရှင်းရေးကို အာရုံစိုက် မလုပ်ဆောင်ဘူးဆိုရင်တော့ စစ်ကောင်စီက သတ်ဖြတ်မှုတွေ၊ ဖမ်းဆီးနှိပ်စက်မှုတွေ ပိုမိုလုပ်ဆောင်လာပြီး မြန်မာနိုင်ငံက လူ့အခွင့်အရေး အခြေအနေတွေ ပိုမို ဆိုးရွားလာမှာကို ကျွန်တော် စိုးရိမ်မိပါတယ်”
Ref: UN News
