Tag: MyanmarCoup2021

ဒီဇင်ဘာ ၃၁၊ ၂၀၂၃

M-Media 

• 

• 

• 

-မြန်မာစစ်တပ်က နှစ်ပေါင်းများစွာ စိုးမိုးလာခဲ့တဲ့ လေပိုင်နက်ကို တိုင်းရင်းသား လက်နက်ကိုင်တွေနဲ့ တော်လှန်ရေးအဖွဲ့တွေက တစ်ဖြည်းဖြည်း ချဲ့ထွင်စိုးမိုးလာနေပါတယ်။ 

“စစ်ကောင်စီစခန်းက ကျွန်တော်တိုနဲ့ ၄ ကီလိုမီတာပဲ၀ေးတယ်။ ကျွန်တော်တို့ တိုက်ခိုက်နိုင်တဲ့ အကွာအ၀ေးပါ” လို့ မန္တလေး ပြည်သူ့ကာကွယ်ရေးတပ်ဖွဲ့ရဲ့ ဒရုန်းယူနစ်ခေါင်းဆောင် ကိုစိုးသူရဇော်က ပြောပါတယ်။ 

သူတို့အဖွဲ့ဟာ Bomber VIII လို့ အမည်ပေးထားတဲ့ ဒရုန်း ၃ ခုမှာ ၆ ကီလိုဂရမ်လေးတဲ့ ဗုံးတွေကိုတပ်ဆင်ကာ အနီးအနားက စစ်ကောင်စီစခန်းကို တိုက်ခိုက်ခဲ့ကြပါတယ်။ 

ဒရုန်း ၃ စီးမှာ ၂ စီးက ပစ်မှတ်ကို ထိမှန်အောင် ပစ်ခတ်နိုင်ခဲ့ပြီး၊ ကျန်တစ်စီးက ချခဲ့တဲ့ဗုံးဟာ စနက်တံမပွင့်တာကြောင့် မပေါက်ကွဲခဲ့ပါဘူး။ 

တိုက်ခိုက်မှုမှာ ပါ၀င်တဲ့ ဒရုန်း ၃ စီးစလုံး အထိအခိုက်မရှိ စခန်းပြန်ရောက်လာခဲ့ပါတယ်။ 

တရုတ်၊ ရုရှားထုတ် တိုက်လေယာဥ်တွေနဲ့ ၀ေဟင်ကို နှစ်ပေါင်းများစွာ စိုးမိုးလာခဲ့တဲ့ မြန်မာစစ်တပ်ဟာ လက်ရှိအချိန်မှာတော့ တိုင်းရင်းသား လက်နက်ကိုင်တွေ၊ လွတ်မြောက်ရေးအဖွဲ့တွေရဲ့ လေကြောင်းအန်တုမှုကို သိသိသာသာ ခံလာခဲ့ရပြီ ဖြစ်ပါတယ်။ 

သူတို့အဖွဲ့ရဲ့ ဒရုန်းစစ်ဆင်ရေးဟာ ‘ဂျန်ဇီး’ မျိုးဆက်ရဲ့ တီထွင်ကြံဆမှုကနေ ပေါက်ဖွားလာခဲ့တာလို့ ကိုစိုးသူရဇော်က ပြောပါတယ်။ 

အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကလည်း ရန်ဖက်တွေရဲ့ ဒရုန်းစစ်ဆင်ရေးကြောင့် အထိနာတယ်ဆိုတာကို ၀န်ခံပြောကြားခဲ့ပါတယ်။ 

အောက်ဘာလကုန်ပိုင်းက ရှမ်းပြည်နယ်မှာ စတင်ခဲ့တဲ့ တိုင်းရင်းသား မဟာမိတ်အဖွဲ့ရဲ့ စစ်ဆင်ရေးမှာ ဒရုန်းနဲ့ ဗုံးအလုံးပေါင်း ၂၅၀၀၀ လောက်ပစ်ချ တိုက်ခိုက်ခဲ့ပါတယ်။ 

ဒီစစ်ဆင်ရေးကြောင့် စစ်ကောင်စီဟာ တပ်စခန်းရာချီ စွန့်လွှတ်ခဲ့ရပြီး ထိပ်တန်းတပ်မှူးတွေ သေဆုံးတဲ့အထိ ဖြစ်ခဲ့ပါတယ်။

သူတို့အသုံးပြုတဲ့ ဒရုန်းတွေရဲ့ သွားနိုင်စွမ်းဟာ အကန့်အသတ်ရှိတဲ့အတွက် တိုက်ခိုက်မှုလုပ်ရတာ အန္တရာယ်မကင်းဘူးလို့ ကိုစိုးသူရဇော်က ပြောပါတယ်။ 

“ကျွန်တော်တို့က အန္တရာယ်ဇုန်ထဲမှာ လှုပ်ရှားရတာ။ အချိန်မရွေးစစ်ကောင်စီရဲ့ တိုက်ခိုက်မှုကို ခံရနိုင်ပါတယ်”

တီထွင်ကြံဆ နည်းလမ်းရ

တိုင်းရင်းသားလက်နက်ကိုင်တွေနဲ့ လွတ်မြောက်ရေးအဖွဲ့တွေဟာ ၀ေဟင်မှာ စစ်ကောင်စီနဲ့ အပြိုင်ကြဲနိုင်ဖို့အတွက် ကိုယ်ထူကိုယ်ထ ကြိုးစားခဲ့ရတာဖြစ်ပါတယ်။ 

မန္တလေး ပြည်သူ့ကာကွယ်ရေးတပ်ဖွဲ့ရဲ့ ဒရုန်းယူနစ်ကို အင်ဂျင်နီယာကျောင်းသား ၂ ဦးနဲ့ စတင်ခဲ့ရတာလို့ ကိုစိုးသူရဇော်က ပြောပါတယ်။ 

လက်ရှိမှာတော့ အဖွဲ့အ၀င် ၅၀ ကျော် ရှိလာပါပြီ။ 

ဒရုန်းမှာတပ်မယ့် ဗုံး နမူနာပုံစံတွေထုတ်ဖို့ 3D ပရင်တာတွေကို အသုံးပြုပြီး၊ စမ်းသပ်ပျံသမ်းမှုတွေ အကြိမ်ကြိမ် ပြုလုပ်ခဲ့ရပါတယ်။ စနက်တံ အလုပ် လုပ်၊ မလုပ်ကိုလည်း သစ်ပင်တွေပေါ်ကနေ ပစ်ချ စမ်းသပ်ခဲ့ရပါသေးတယ်။ 

မန္တလေး ဒရုန်းတပ်ဖွဲ့မှာ အမျိုးသမီးတွေက ၃ ပုံ ၁ ပုံ ပါ၀င်ပါတယ်။ 

“တစ်ချို့ဒေသတွေကို ကျွန်မတို့ စိုးမိုးထားနိုင်တယ်။ ဆက်လက် ကြိုးစားသွားမှာပါ” လို့ ၂၀၂၁ ခုနှစ် ဖေဖော်၀ါရီ ၁ ရက် အာဏာသိမ်းမှုအပြီး လက်နက်ကိုင်လမ်းစဥ်ကိုရွေးခဲ့တဲ့ အသက် ၁၈ နှစ်အရွယ် မမိုးမိုးက ပြောပါတယ်။ 

ပြီးခဲ့တဲ့ သီတင်းပတ်တွေက ရှမ်းပြည်နယ်မှာ ဖြစ်ပွားခဲ့တဲ့ တိုင်းရင်းသားမဟာမိတ်အဖွဲ့တွေရဲ့ စစ်ဆင်ရေးအတွက် မိမိတို့ဒရုန်းအဖွဲ့ ပါ၀င်လှုပ်ရှားခဲ့တယ်လို့လည်း ကိုစိုးသူရဇော်က ပြောပါတယ်။ 

အင်အားကြီးတဲ့ တိုင်းရင်းသားမဟာမိတ်အဖွဲ့ကို ဒရုန်းတိုက်ခိုက်မှုနဲ့ပတ်သက်လို့ သင်ကြားမှုတွေ ပြုလုပ်ပေးခဲ့သလို၊ ပူးပေါင်းပါ၀င် တိုက်ခိုက်ခဲ့တယ်လို့လည်း သူက ဆိုပါတယ်။ 

ဒရုန်းတစ်ခေတ် 

နမ့်ဆမ်မြို့ စစ်တပ် တပ်စွဲထားတဲ့ လက်ဖက်ခြောက်စက်ရုံကို အခုလအစောပိုင်းက သိမ်းပိုက်မှုမှာ ဒရုန်းလက်နက်ကို သုံးခဲ့တယ်လို့ TNLA က ပြောပါတယ်။ 

လက်ရှိမှာတော့ လက်ဖက်ခြောက်စက်ရုံနဲ့ နမ့်ဆမ်မြို့ကိုပါ TNLA က သိမ်းပိုက်ထားနိုင်ပါပြီ။

လူမျိုးစုလွတ်မြောက်ရေး နှစ်ပေါင်းများစွာ လှုပ်ရှားခဲ့ကြတဲ့ တိုင်းရင်းသားလက်နက်ကိုင်အဖွဲ့တွေဟာ ၂၀၂၁ ခုနှစ် ဖေဖော်၀ါရီ နောက်ပိုင်း အားကောင်းလာကြတဲ့ လူငယ် လွတ်မြောက်ရေးအဖွဲ့တွေကို လေ့ကျင့်သင်ကြား ကူညီပေးခဲ့ကြပါတယ်။ 

“လွတ်မြောက်ရေးစတုန်းက လက်လုပ်သေနတ်တွေကို ကျွန်တော်တို့ သုံးခဲ့ကြရတယ်။ အခုတော့ ဒရုန်းတစ်ခေတ်ဖြစ်လာပါပြီ” လို့ TNLA ပြောရေးဆိုခွင့်ရှိသူ တာအိုက်ကျော်က ပြောကြားခဲ့ပါတယ်။ 

Ref: AFP

စက်တင်ဘာ ၁၆၊ ၂၀၂၃

M-Media

-စစ်ကောင်စီက တရုတ်အွန်လိုင်းငွေလိမ်ဂိုဏ်းတွေကို ဖမ်းဆီးပြီး တရုတ်နိုင်ငံဖက် လွှဲပြောင်းပေးလိုက်တာဟာ နှစ်ဖက်ဆက်ဆံရေး ပိုမိုနီးကပ်လာတာကို ဖော်ပြနေတယ်လို့ ကျွမ်းကျင်သူတွေက သုံးသပ်ပါတယ်။ 

မြန်မာနိုင်ငံမြောက်ပိုင်း လက်နက်ကိုင်တွေကြီးစိုးတဲ့ ဒေသတွေမှာ တရုတ် အွန်လိုင်းငွေလိမ်ဂိုဏ်းတွေ အခြေစိုက်ထားတယ်ဆိုတဲ့ သတင်း ထွက်နေတာ ကြာပါပြီ။ 

အရှေ့တောင်အာရှနဲ့ အာရှတစ်၀ိုက်က လူတွေကို လူကုန်ကူးကာ ဒီလုပ်ငန်းတွေမှာ အဓမ္မခိုင်းစေတဲ့ သတင်းတွေကိုလည်း ဒေသတွင်း မီဒီယာတွေက ကျယ်ကျယ်ပြန့်ပြန့် ဖော်ပြခဲ့ကြပါတယ်။ 

ပြီးခဲ့တဲ့တစ်ပတ်မှာ အွန်လိုင်းငွေလိမ်ဂိုဏ်း၀င် တရုတ်နိုင်ငံသား ၂၆၉ ဦးကို စစ်ကောင်စီက ဖမ်းဆီးကာ တရုတ်နိုင်ငံဖက် လွှဲပေးခဲ့သလို၊ နောက်ထပ် ငွေလိမ်သမား ၁၂၀၀ ကျော်ကိုလည်း ပြီးခဲ့တဲ့ သောကြာနေ့မှာ မြန်မာဖက်က တရုတ်ကို လွှဲပြောင်းပေးခဲ့ပါတယ်။ 

Curtin တက္ကသိုလ် နိုင်ငံတကာစီးပွားရေးဌာနက လက်ထောက်ပါမောက္ခဖြစ်တဲ့ ဒေါ်ထွေးထွေးသိန်းက ဒီရလဒ်ကိုကြည့်ရင် တရုတ်နဲ့ စစ်ကောင်စီအကြား ပူးပေါင်းဆောင်ရွက်မှုကို မြင်နိုင်တယ်လို့ ပြောပါတယ်။ 

“မြန်မာနိုင်ငံက စစ်အစိုးရနဲ့ တရုတ်တို့အကြား နီးကပ်ခိုင်မာတဲ့ ဆက်ဆံရေး ရှိနေတယ်ဆိုတာကို ဒါက ပြသနေတာပါ။ မိတ်ဆွေနည်းနေတဲ့ စစ်အစိုးရမှာ ဒီလို ဆောင်ရွက်မှုတွေက ဆက်ဆံရေးကောင်းမွန်ဖို့၊ ဒေသတွင်း ရပ်တည်မှု အားကောင်းဖို့ အခွင့်အလမ်းတစ်ခုလို့လည်း ပြောလို့ရပါတယ်”

S. Rajaratnam School of International Studies အဖွဲ့က တရုတ်ရေးရာဌာန လက်ထောက် ပရော်ဖက်ဆာ ဘင်ယာမင် ဟိုက ဆိုက်ဘာရာဇ၀တ်မှုကို တရုတ်က နှိမ်နှင်းဖို့ ကြိုးစားရာမှာ မြန်မာစစ်ကောင်စီရဲ့ ပူးပေါင်းဆောင်ရွက်မှုက အရေးပါတဲ့ အခန်းကဏ္ဍကနေ ပါ၀င်တယ်လို့ ပြောပါတယ်။ 

“နိုင်ငံတကာမှာ စစ်ကောင်စီက မိတ်ကောင်းဆွေကောင်း သိပ်မရှိဘူး။ ဒါကြောင့် တရုတ်ကို မှီခိုရုံကလွဲပြီး သူတို့မှာ ရွေးချယ်စရာ မရှိပါဘူး”

မြန်မာ၊ ကမ္ဘောဒီးယားနဲ့ လာအိုတို့က တရုတ် အွန်လိုင်း ငွေလိမ်ဂိုဏ်းတွေမှာ တရုတ်နိုင်ငံသား အများအပြား လူကုန်ကူး နှိပ်စက်ခံရပြီးနောက်ပိုင်း တရုတ်အစိုးရက ဒီလုပ်ငန်းတွေကို နှိမ်နှင်းဖို့ ကြိုးပမ်းလာတာ ဖြစ်ပါတယ်။ 

တရုတ်ဟာ မြန်မာနိုင်ငံဆိုင်ရာ အထူးကိုယ်စားလှယ်သစ်ဖြစ် ဒန်ရှီကျွမ်းကို ပြီးခဲ့တဲ့နှစ်မှာ ခန့်အပ်ခဲ့ပါတယ်။ 

တာ၀န်ယူပြီးနောက်ပိုင်း ရှီကျွမ်းဟာ စစ်ကောင်စီကိုယ်စားလှယ်တွေ၊ မြန်မာနိုင်ငံက လက်နက်ကိုင်အဖွဲ့ ခေါင်းဆောင်တွေနဲ့ တွေ့ဆုံကာ အွန်လိုင်ငွေလိမ်ဂိုဏ်းတွေကို နှိမ်နှင်းဖို့ ဖိဖိစီးစီး ဆောင်ရွက်ခဲ့ပြီး အခုလို ရလဒ်မျိုး ထွက်ပေါ်လာတာ ဖြစ်ပါတယ်။  

Ref : South China Morning Post 

စက်တင်ဘာ ၉၊ ၂၀၂၃

M-Media 

-စစ်ကောင်စီက ကျင်းပမယ့် အာဆီယံ လေတပ်အကြီးအကဲများ အစည်းအ၀ေးကို တက်ရောက်မှာ မဟုတ်ဘူးလို့ အဖွဲ့၀င်နိုင်ငံအချို့က AFP သတင်းဌာနကို ပြောပါတယ်။ 

ဒီအစည်းအ၀ေးကို နှစ်စဥ် ပုံမှန်ကျင်းပတာဖြစ်ပြီး ကာကွယ်ရေး၊ အစွန်းရောက်၀ါဒ တိုက်ဖျက်ရေးနဲ့ ဘေးအန္တရာယ် တားဆီးကာကွယ်ရေး အကြောင်းတွေကို အဓိက ဆွေးနွေးကြတာဖြစ်ပါတယ်။ 

အခုနှစ်အစည်းအ၀ေးကို မြန်မာနိုင်ငံက ဦးစီးကျင်းပရမှာဖြစ်ပြီး စက်တင်ဘာ ဒုတိယပတ်အတွင်း ပြုလုပ်ဖို့ ရှိနေပါတယ်။ 

မြန်မာစစ်တပ်က လူထုအပေါ် အကြမ်းဖက်တိုက်ခိုက်မှုတွေကို ရှုတ်ချတဲ့အနေနဲ့ ဒီအစည်းအ၀ေးကို တက်ရောက်မှာမဟုတ်ဘူးလို့ မလေးရှား၊ ဖိလစ်ပိုင်နဲ့ အင်ဒိုနီးရှား တာ၀န်ရှိသူတွေက ပြောပါတယ်။

မလေးရှား လေတပ်အကြီးအကဲက လုံး၀တက်ရောက်မှာမဟုတ်ဘဲ၊ ဖိလစ်ပိုင်က ဗီဒီယိုမက်ဆေ့သာ ပေးပို့မယ်လို့ ဆိုပါတယ်။ 

အင်ဒိုနီးရှားက လေတပ်အကြီးအကဲအပါအ၀င် ဘယ်သူ့ကိုမှ စေလွှတ်မှာမဟုတ်ဘူးလို့ AFP သတင်းဌာနကို ပြောကြားခဲ့ပါတယ်။ 

အခုတစ်ပတ်အတွင်း ပြုလုပ်တဲ့ အာဆီယံ နိုင်ငံခြားရေး၀န်ကြီးများ အစည်းအ၀ေးမှာ မြန်မာစစ်တပ်က အရပ်သားတွေအပေါ် တိုက်ခိုက်မှုတွေ၊ အာဆီယံက အဆိုပြုထားတဲ့ ငြိမ်းချမ်းရေး လုပ်ငန်းစဥ်ကို လစ်လျူရှုမှုတွေအကြောင်း ဆွေးနွေးခဲ့ကြပါတယ်။ 

လွန်ခဲ့တဲ့ ၂ နှစ်ကျော်က ရရှိခဲ့တဲ့ ဘုံသဘောတူညီချက် ၅ ချက်နဲ့ ပတ်သက်ပြီး ဘာတိုးတက်မှုမှ မရှိဘူးလို့ အင်ဒိုနီးရှား နိုင်ငံခြားရေး၀န်ကြီး ရတ္တနို မာဆူဒီက ဒီအစည်းအ၀ေးမှာ ပြောကြားခဲ့ပါတယ်။

Ref: AFP