Tag: MyanmarCoup2021

စက်တင်ဘာ ၅၊ ၂၀၂၃

M-Media 

-မြန်မာနိုင်ငံ ငြိမ်းချမ်းအောင် ဆောင်ရွက်မယ့် အာဆီယံရဲ့ အစီအစဥ်ကို စစ်ခေါင်းဆောင်တွေက တားဆီး ဟန့်တားမှုတွေ လုပ်နေတဲ့အတွက် ပြင်းပြင်းထန်ထန် တုန့်ပြန်ဆောင်ရွက်ဖို့ မလေးရှားက တိုက်တွန်းလိုက်ပါတယ်။ 

အင်ဒိုနီးရှားနိုင်ငံ ဂျကာတာမြို့မှာ ဒီကနေ့ စတင်ပြုလုပ်မယ့် အာဆီယံ နိုင်ငံခြားရေး၀န်ကြီးများ နှစ်ပတ်လည် အစည်းအ၀ေးကို တက်ရောက်လာတဲ့ မလေးရှား နိုင်ငံခြားရေး၀န်ကြီးက ပွင့်ပွင့်လင်းလင်း ၀ေဖန်လိုက်တာ ဖြစ်ပါတယ်။

“စစ်ကောင်စီကို ထိရောက်ပြင်းထန်တဲ့ အရေးယူမှု မလုပ်ရင် ဒါမျိုးတွေက ဆက်ဖြစ်နေမှာပဲဆိုတဲ့ အမြင်မျိုး မလေးရှားနဲ့ အခြား အဖွဲ့၀င်နိုင်ငံတွေက ရှုမြင်နေကြပါပြီ” လို့ မလေးရှား နိုင်ငံခြားရေး၀န်ကြီး ဇမ်ဘရီ အဘ်ဒူလ် ကာဒရ်က သတင်းထောက်တွေကို ပြောကြားခဲ့ပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း ဒီကိစ္စကို ဖြေရှင်းဖို့အတွက် အာဆီယံက ဘုံသဘောတူညီချက် ၅ ရပ်နဲ့ ဆောင်ရွက်ဖို့ စီစဥ်ခဲ့ပေမယ့် မအောင်မြင်ပါဘူး။ 

ဘုံသဘောတူညီချက် ၅ ရပ်ကို အကောင်အထည်မဖော်နိုင်အောင် မြန်မာစစ်ခေါင်းဆောင်တွေက ပိတ်ဆို့ ဟန့်တားထားတယ်လို့ ဇမ်ဘရီက ပြောပါတယ်။ 

အာဆီယံနိုင်ငံခြားရေး၀န်ကြီးများ အစည်းအ၀ေးမှာ မြန်မာကိစ္စ၊ တောင်တရုတ်ပင်လယ်က တရုတ်ရဲ့ ပိုင်နက်ခိုးယူမှုကိစ္စတွေကို အဓိက ဆွေးနွေးကြမှာပါ။ 

အမေရိကန်၊ တရုတ်နဲ့ ဂျပန်နိုင်ငံက ထိပ်တန်းခေါင်းဆောင်တစ်ချို့နဲ့လည်း အာဆီယံ နိုင်ငံခြားရေး၀န်ကြီးတွေက တွေ့ဆုံဖို့ ရှိနေပါတယ်။ 

Ref: Reuters 

သြဂုတ် ၂၈၊ ၂၀၂၃

M-Media 

-လူ့အခွင့်အရေး ချိုးဖောက်မှု အကြီးအကျယ် ပြုလုပ်နေတဲ့ မြန်မာစစ်တပ်ကို တရားမ၀င်နည်းလမ်းနဲ့ ရေအောက်ရေဒါ(ဆိုနာ) ရောင်းချခဲ့ကြောင်း စင်ကာပူနိုင်ငံသား နှစ်ဦးက သြဂုတ်လ ၂၅ ရက်နေ့ တရားရုံးမှာ ၀န်ခံထွက်ဆိုလိုက်ပါတယ်။ 

စင်ကာပူ အခြေစိုက် Hydronav Services ကုမ္ပဏီက အသက် ၅၇ နှစ်အရွယ် အရောင်းမန်နေဂျာ ပိုတာ အဂက်စ် ကန့်ဂျာနာနဲ့ အသက် ၇၀ အရွယ် ဒါရိုက်တာ ၀ူ အွန် ချွန်းတို့ ဖြစ်ပါတယ်။ 

သူတို့နှစ်ဦးဟာ ဆိုနာကိရိယာကို နော်၀ေကုမ္ပဏီ Kongsberg Maritime ကနေ လိမ်လည်၀ယ်ယူခဲ့ပြီး၊ စင်ကာပူရဲ့ ကန့်သတ်ကုန်ပစ္စည်းများ ထိန်းချုပ်ရေး ဥပဒေကို ချိုးဖောက်ကာ မြန်မာစစ်တပ်ထံ ရောင်းချခဲ့တာ ဖြစ်ပါတယ်။ 

အဲဒီဆိုနာဟာ မူရင်းစျေး ကန်ဒေါ်လာ ၇၅ သန်း တန်ဖိုးရှိပြီး  အင်ဒိုနီးရှားကုမ္ပဏီတစ်ခုက မှာယူတဲ့ပုံစံမျိုး ၀ယ်ယူခဲ့တာပါ။ 

၂၀၁၈ ခုနှစ် ဇူလိုင်လ ၁၇ ရက်နေ့မှာ စင်ကာပူကို ပစ္စည်းရောက်လာခဲ့ပြီး၊ ဇူလိုင် ၂၀ ရက်နေ့မှာတော့ မြန်မာစစ်တပ်ကို လွှဲပြောင်း ပေးအပ်ခဲ့ပါတယ်။ 

မြန်မာစစ်တပ်ကို ရောင်းချတဲ့စျေးနှုန်းက ဒေါ်လာ ၁၅၈ သန်း ဖြစ်ပါတယ်။ 

Hydronav ရဲ့ ဒီရောင်းချမှုကို စင်ကာပူ အကောက်ခွန်ဌာနက သဲလွန်စရကာ စုံစမ်းစစ်ဆေးခဲ့ပြီး ကန့်ဂျာနာနဲ့ ၀ူအွန်ချွန်းတို့ကို တားမြစ်ကုန်ပစ္စည်းများ ထိန်းချုပ်ရေးဥပဒေ၊ လိမ်လည်မှု ဥပဒေတွေနဲ့ တရားစွဲဆိုခဲ့ပါတယ်။  

ရောင်းချလိုက်တဲ့ ဆိုနာကိရိယာဟာ စစ်ဖက်နဲ့ အရပ်ဖက် နှစ်ခုစလုံးမှာ အသုံးပြုနိုင်ပြီး မြန်မာရေတပ်က စစ်ဖက်မှာ အသုံးပြုနေတဲ့ အထောက်အထား တိတိကျကျ မရှိသေးတာကြောင့် ဒဏ်ငွေနဲ့သာ အမှုကို အဆုံးသတ်ဖို့ တရားပြိုင်ရှေ့နေတွေက တောင်းဆိုထားပါတယ်။ 

ဒီအမှုကို လာမယ့် စက်တင်ဘာလမှာ အပြီးသတ်အမိန့်ချမှတ်မှာ ဖြစ်ပါတယ်။ 

Ref: The Star 

သြဂုတ် ၂၇၊ ၂၀၂၃

M-Media

-မြန်မာအာဏာသိမ်းစစ်ကောင်စီက သံအမတ်ကို တိုင်းပြည်က နှင်ထုတ်မှုကို တီမောလက်စ်တေက ရှုတ်ချလိုက်ပါတယ်။ 

တီမောလက်စ်တေ တာ၀န်ရှိသူတွေဟာ မြန်မာနိုင်ငံမှာ စစ်အာဏာသိမ်းမှုနဲ့ ပြည်သူလူထုအပေါ် ဖိနှိပ်ညှင်းပမ်းမှုတွေကို ပြင်းပြင်းထန်ထန် ၀ေဖန်ခဲ့ကြတာပါ။ 

ဒါ့အပြင် အမျိုးသားညီညွတ်ရေးအစိုးရနဲ့ ထိတွေ့ဆက်ဆံမှုတွေလည်း  ပြုလုပ်ထားပါတယ်။

မြန်မာစစ်ကောင်စီရဲ့ နိုင်ငံခြားရေး၀န်ကြီးဌာနက တီမောလက်စ်တေအစိုးရရဲ့ လုပ်ရပ်တွေဟာ တာ၀န်ယူမှုကင်းမဲ့တယ်လို့ ၀ေဖန်ခဲ့ပြီး သံအမတ်ကိုလည်း စက်တင်ဘာ ၁ ရက်နေ့ နောက်ဆုံးထားကာ တိုင်းပြည်ကနေ ထွက်ခွာဖို့ ညွှန်ကြားထားကြောင်း ပြည်တွင်းမီဒီယာတွေက ဖော်ပြပါတယ်။ 

တီမောလက်စ်တေကတော့ စစ်ကောင်စီရဲ့ ဒီလုပ်ရပ်ကို ရှုတ်ချကြောင်း မနေ့က ထုတ်ပြန်ခဲ့ပါတယ်။

မြန်မာနိုင်ငံမှာ ဒီမိုကရေစီ ပြန်လည်ထွန်းကားလာရေး နည်းလမ်းပေါင်းစုံနဲ့ ကြိုးပမ်းဖို့ အရေးကြီးကြောင်းလည်း ထုတ်ပြန်ချက်မှာ ရေးသားထားပါတယ်။ 

စစ်ကောင်စီကိုတော့ လူ့အခွင့်အရေးကို လေးစားဖို့၊ ငြိမ်းချမ်းပြီး အပြုသဘောဆောင်တဲ့ အဖြေတစ်ခုရှာဖို့ တီမောလက်စ်တေက ထည့်သွင်း တိုက်တွန်းခဲ့ပါတယ်။

Ref: Reuters 

သြဂုတ် ၁၉၊ ၂၀၂၃

M-Media 

-ဗြိတိန်နိုင်ငံဆိုင်ရာ မြန်မာသံအမတ်ဟောင်း ဦးကျော်စွာမင်းဟာ လန်ဒန်မှာ ပိုင်နက်ကျူးလွန်မှုနဲ့ စုံစမ်းစစ်ဆေးခံနေရတယ်လို့ သိရပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း လန်ဒန်မှာပြုလုပ်တဲ့ မြန်မာနိုင်ငံသားတွေရဲ့ အာဏာသိမ်းမှုဆန့်ကျင်တဲ့ ဆန္ဒပြပွဲမှာ ဦးကျော်စွာမင်းတစ်ယောက် မျက်နှာ ၀င်ပြခဲ့တာပါ။ 

အဲဒီအတွက် စစ်ကောင်စီက ဒေါသထွက်ကာ သံအမတ်သစ်တစ်ဦး ချက်ခြင်း စေလွှတ်ခဲ့ပါတယ်။ 

လက်ရှိအချိန်မှာ ဦးကျော်စွာမင်းဟာ လန်ဒန်က မြန်မာသံရုံးထဲ ၀င်ရောက်လို့ မရတော့ပေမယ့် သံအမတ်နေအိမ်မှာ ဆက်လက်နေထိုင်နေပြီး ထွက်ခွာပေးဖို့ ငြင်းဆိုနေပါတယ်။ 

ဥပဒေအရ သံအမတ်အိမ်ဟာ မြန်မာနိုင်ငံရဲ့ တရား၀င်ပိုင်ဆိုင်မှုဖြစ်ပြီး စစ်ကောင်စီက ဦးကျော်စွာမင်းကို မောင်းထုတ်ဖို့ ဗြိတိန်အစိုးရကို ဖိအားပေးထားပါတယ်။ 

သြဂုတ်လ ၁၅ ရက်နေ့မှာ လန်ဒန်ရဲတပ်ဖွဲ့က ဦးကျော်စွာမင်းကို ပိုင်နက်ကျူးလွန်မှုကိစ္စအတွက် မေးမြန်းမှု ပြုလုပ်ခဲ့ပါတယ်။ လက်ရှိအချိန်မှာ တရားစွဲမှုတော့ မလုပ်သေးပါဘူး။ 

ဦးကျော်စွာမင်းရဲ့ ရှေ့နေကတော့ သူ့ရဲ့အမှုသည်ဟာ ဒီမိုကရေစီအစိုးရက ခန့်အပ်တဲ့ သံအမတ် ရောက်လာမှ ဒီနေအိမ်ကို ပြန်အပ်မယ်လို့ ပြောဆိုကြောင်း ထုတ်ပြန်ထားပါတယ်။ 

ဗြိတိန်ရဲ့ အခုလိုလုပ်ဆောင်မှုကို အံ့အားသင့်မိတယ်လို့ Myanmar Accountability Project အဖွဲ့က တာ၀န်ရှိသူ ခရစ် ဂန်းနက်စ်က ပြောပါတယ်။ 

“စစ်အာဏာသိမ်းမှုကို ဆန့်ကျင်ပြီး၊ မြန်မာဗိုလ်ချုပ်တွေကို စီးပွားရေး ပိတ်ဆို့မှုတွေ ပြုလုပ်ထားတဲ့ ဗြိတိန်အစိုးရက တရားမ၀င် စစ်အာဏာရှင်ရဲ့ ဒီလုပ်ရပ်ကို ခွင့်ပြုတယ်ဆိုတာဟာ မယုံနိုင်စရာပါပဲ” 

ဗြိတိန်ဖက်ကတော့ အခုကိစ္စအတွက် တိတိကျကျ ထုတ်ပြန်မှု မလုပ်သေးပါဘူး။ 

Ref: The Star

သြဂုတ် ၁၈၊ ၂၀၂၃

M-Media 

-လိုအပ်နေသူတွေကို နိုင်ငံတကာက အကူအညီပေးရာမှာ တားမြစ်ဟန့်တားခြင်းမပြုဖို့ ကုလ လူသားချင်း စာနာထောက်ထားမှုဆိုင်ရာအဖွဲ့ ဒုတိယအကြီးအကဲ မာတင် ဂရစ်ဖစ်က မြန်မာအာဏာသိမ်းစစ်ခေါင်းဆောင်ကို တိုက်တွန်းခဲ့ပါတယ်။ 

ဂရစ်ဖစ်ဟာ ပြီးခဲ့တဲ့ ရက်ပိုင်းအတွင်း မြန်မာနိုင်ငံကို ၃ ရက်ကြာ လာရောက်ခဲ့ပြီး အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့ပါ တွေ့ဆုံခဲ့ပါတယ်။ 

မြန်မာလူဦးရေရဲ့ ၃ ပုံ ၁ ပုံဖြစ်တဲ့ လူပေါင်း ၁၈ သန်းလောက် အကူအညီတွေ လိုအပ်နေတယ်လို့ ဂရစ်ဖစ်က ပြောပါတယ်။ 

“တစ်ခုပြီးတစ်ခု ဖြစ်နေတဲ့ ပြဿနာတွေကြောင့် မြန်မာနိုင်ငံ လူဦးရေရဲ့ ၃ ပုံ ၁ ပုံလောက်ဟာ လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေပါတယ်။ သူတို့ရဲ့ ခေါင်းဆောင်တွေနဲ့ နိုင်ငံတကာ အသိုင်းအ၀ိုင်းဆီကနေ အကူအညီတွေပိုရဖို့ သူတို့ မျှော်လင့်နေကြပါတယ်” 

၂၀၂၁ ခုနှစ် စစ်တပ်က အာဏာသိမ်းပြီး ဖြစ်ပေါ်လာတဲ့ မတည်မငြိမ်မှုတွေကြောင့် နိုင်ငံအတွင်း အကူအညီလိုအပ်သူ အရေအတွက်ဟာ ၅ ဆ မြင့်တက်လာတယ်လို့ ကုလရဲ့ မှတ်တမ်းတွေက ဆိုပါတယ်။ 

အာဏာသိမ်းစစ်ကောင်စီက နိုင်ငံတကာ အကူအညီတွေကို တားဆီးပိတ်ပင်တာ၊ လုပ်ငန်းဆောင်ရွက်ဖို့ ခက်ခဲအောင်လုပ်ထားတာတွေရှိပြီး ဒါတွေကို ရပ်တန့်ဖို့နဲ့ အကူအညီပေးခွင့် ပိုမိုခွင့်ပြုဖို့ စစ်ခေါင်းဆောင်နဲ့ တွေ့ဆုံစဥ်မှာ ပြောကြားခဲ့ကြောင်း ဂရစ်ဖစ်က ပြောပါတယ်။ 

နိုင်ငံတကာအကူအညီပေးရေးအဖွဲ့အစည်းတွေမှာ ရန်ပုံငွေ နည်းပါးမှုနဲ့ ကြုံတွေ့နေရပြီး ဒီအတွက် အလှူငွေ ပိုမိုထည့်၀င်ကြဖို့လည်း ကမ္ဘာ့နိုင်ငံတွေကို သူက ထည့်သွင်းတိုက်တွန်းခဲ့ပါတယ်။ 

Ref: Reuters