Tag: north korea

ဧပြီ ၁၆၊ ၂၀၁၇
M-Media

– အမေရိကန်နှင့် တင်းမာမှုများ မြင့်တက်နေသော်လည်း မြောက်ကိုရီးယားမှာ ယနေ့မနက် အစောပိုင်းတွင် ဒုံးကျည်တစ်ခုကို စမ်းသပ်ပစ်လွှတ်ခဲ့ပြီး ချက်ခြင်းဆိုသလို ပေါက်ကွဲခဲ့သည်ဟု သိရသည်။

နိုင်ငံကို တည်ထောင်သူ ကင်အီဆွန်၏ မွေးနေ့အထိမ်းအမှတ်အဖြစ် မြို့တော်ပြုံးယမ်တွင် ကြီးမားသည့် စစ်ရေးပြအခမ်းအနားတစ်ခု ပြုလုပ်ပြီး တစ်ရက်အကြာတွင် ယခုကဲ့သို့ စမ်းသပ်မှု ပေါ်ထွက်လာခြင်းဖြစ်သည်။

တောင်ကိုရီးယားနှင့် အမေရိကန်တာဝန်ရှိသူများကမူ နိုင်ငံအရှေ့ပိုင်း ကမ်းရိုးတမ်းတွင် ပြုလုပ်ခဲ့သည့် အဆိုပါ ဒုံးကျည်ပစ်လွှတ်မှုမှာ မအောင်မြင်ဟု ယုံကြည်ရကြောင်း ပြောကြားခဲ့သည်။

အမေရိကန်၏ ပစိဖိတ်စစ်ဌာနချုပ်ကလည်း တနင်္ဂနွေနေ့မနက်ပိုင်းက မြောက်ကိုရီးယားမှ ပစ်လွှတ်သည့် ဒုံးကျည်ကို မိမိတို့က သိရှိ ခြေရာခံမိခဲ့ကြောင်း၊ ပစ်လွှတ်ပြီး ချက်ခြင်းဆိုသလိုပင် ပေါက်ကွဲခဲ့ကြောင်း၊ ဒုံးကျည်အမျိုးအစားကို ဆန်းစစ်နေဆဲဖြစ်ကြောင်း ပြောရေးဆိုခွင့်ရှိသူ ရေတပ် တပ်မှူး ဒေ့ဗ် ဘန်ဟမ်က ပြောကြားခဲ့သည်။

လတ်တလောတွင် မြောက်ကိုရီးယားဘက်မှ မည်သည့် တုန့်ပြန်မှုမှ မပြုလုပ်သေးပေ။

ဧပြီ ၁၃၊ ၂၀၁၇
M-Media

– မြောက်ကိုရီးယားနိုင်ငံမှာ Punggye-ri နျူကလီးယားစခန်းတွင် ၎င်းတို့၏ ၆ ကြိမ်မြောက် နျူကလီးယားစမ်းသပ်မှု ပြုလုပ်ရန်အတွက် အဆင်သင့်ဖြစ်နေပြီဟု မြောက်ကိုရီးယား စောင့်ကြည့်အဖွဲ့ 38 North က ပြောကြားလိုက်သည်။

ဂျပန်ဝန်ကြီးချုပ် ရှင်ဇိုအာဘေးက မြောက်ကိုရီးယားမှာ ဆာရင်း အဆိပ်ဓာတ်ငွေ့ပါသည့် ဒုံးကျည်များ ပစ်လွှတ်နိုင်စွမ်းရှိသည်ဟု ယနေ့တွင် ပြောကြားခဲ့ပြီးနောက် 38 North က ယခုကဲ့သို့ ကြေငြာခဲ့ခြင်းဖြစ်ပြီး လွန်ခဲ့သည့် ၆ ပတ်အတွင်း ဆောင်ရွက်မှုများကို ကြည့်ခြင်းအားဖြင့် စမ်းသပ်မှုအတွက် နောက်ဆုံးပြင်ဆင်မှု ပြုလုပ်နေသည်ကို ညွှန်ပြနေသည်ဟု အဖွဲ့မှ လေ့လာဆန်းစစ်သူ ဂျိုးဆက်ပ် ဘာရ်မူဒက်ဇ်က ဆိုသည်။

စီးပွားရေးသုံး ဂြိုဟ်တုတစ်ခုမှ ဖမ်းယူရရှိသည့် ဓာတ်ပုံအရ အဆိုပါ နျူကလီးယားစခန်းတွင် ယခင်စမ်းသပ်မှုများ မပြုလုပ်ခင်အရင် အခြေအနေနှင့် တူညီသော ပုံစံမျိုးကို တွေ့ရှိရသည်။

ဘာရ်မူဒက်ဇ်နှင့် ၎င်းတို့အဖွဲ့မှာ ၂၀၁၆ ခုနှစ် စက်တင်ဘာလက ပြုလုပ်ခဲ့သည့် မြောက်ကိုရီးယား၏ နောက်ဆုံး နျူစမ်းသပ်မှုကိုလည်း မှန်ကန်အောင် ခန့်မှန်းနိုင်ခဲ့သည်။

မြောက်ကိုရီးယားမှာ Punggye-ri စခန်းတွင် စက်ကိရိယာအသစ်များ ပို့ဆောင်ခြင်း၊ ထိန်းချုပ်ရေးစင်တာတွင် လှုပ်ရှားမှုများရှိနေခြင်း၊ မြေအောက်ရှိ နျူစမ်းသပ်မည့်နေရာသို့ ရေများဖြည့်သွင်းခြင်းကဲ့သို့ လုပ်ငန်းများ တိုးမြှင့်ဆောင်ရွက်နေသည်ဟု ဘရ်မူဒက်ဇ်တို့အဖွဲ့က ဖေဖော်ဝါရီလကတည်းက သတိပေးခဲ့သည်။

မြောက်ကိုရီးယားမှာ ဧပြီလ ၁၅ ရက်နေ့တွင် တိုင်းပြည်ကိုတည်ထောင်သူ ကင်အီဆွန်၏ ၁၀၅ ကြိမ်မြောက် မွေးနေ့အခမ်းအနားကို ပြုလုပ်ရန်ရှိနေပြီး ထိုနေ့တွင် နျူစမ်းသပ်မှု ပြုလုပ်မည်ဟုလည်း သတင်းများ ကျယ်ကျယ်ပြန့်ပြန့် ထွက်ပေါ်နေသည်။

အမေရိကန်သမ္မတ ဒေါ်နယ်ထရမ့်က မြောက်ကိုရီးယားပြဿနာကို အမေရိကန်တစ်ဦးတည်း တုန့်ပြန်နိုင်သည်ဟု မကြာသေးမီက ပြောကြားထားပြီး ၎င်းတို့၏ တိုက်ရေယာဉ်အုပ်စုကိုလည်း ကိုရီးယားကျွန်းဆွယ်အနီးသို့ ပြီးခဲ့သည့်ရက်ပိုင်းအတွင်း ပို့ဆောင်ခဲ့သည်။

Ref: CNN