Tag: north korea

မေ ၂၊ ၂၀၂၀
M-Media

-လူမြင်ကွင်းကနေ ရက်ပေါင်းအတော်ကြာ ပျောက်နေတဲ့အတွက် သေဆုံးသွားပြီလို့ သတင်းထွက်နေတဲ့ မြောက်ကိုရီးယားခေါင်းဆောင် ကင်ဂျုံအွန်ဟာ ဒီကနေ့မှာ လူမြင်ကွင်း ပြန်ထွက်လာပါတယ်။

မြောက်ကိုရီးယား နိုင်ငံပိုင်သတင်းဌာန KCNA က ထုတ်လွှင့်တဲ့ သတင်းမှာ ကင်ဂျုံအွန်ဟာ ညီမဖြစ်သူ ကင်ယိုဂျွန်နဲ့အတူ မြို့တော်ပြုံယမ်းအနီး ဆွန်ချွန်ဒေသက ဘိလပ်မြေစက်ရုံ ဖွင့်ပွဲအခမ်းအနား တက်ရောက်ခဲ့တာကို တွေ့ရပါတယ်။ ကင်ဟာ စက်ရုံကို ဖဲကြိုးဖြတ် ဖွင့်လှစ်ပေးခဲ့သလို လူအုပ်ကြီးရဲ့ ချီးကျူးဩဘာပေးမှုကိုလည်း ရရှိခဲ့တယ်လို့ KCNA က ဖော်ပြခဲ့ပါတယ်။

မြောက်ကိုရီးယားနိုင်ငံကို တည်ထောင်သူ ကင်အီဆွန်ရဲ့ မွေးနေ့နှစ်ပတ်လည်အခမ်းအနားဖြစ်တဲ့ ဧပြီလ ၁၅ ရက်နေ့ကစလို့ ကင်ဂျုံအွန်ကို လူမြင်ကွင်းမှာ မတွေ့ရတော့တာပါ။ ကင်ဟာ နှလုံးသွေးကြော ခွဲစိပ်ကုသမှု ခံယူနေရပြီး သေဆုံးပြီ ဆိုတဲ့သတင်းတွေလည်း ထွက်ခဲ့ပါတယ်။

နိုင်ငံပိုင်သတင်းဌာနကတော့ ကင်ဟာ လူမြင်ကွင်းကို မထွက်ပေမယ့် နေ့စဉ်တာဝန်တွေကို ဆက်လက်ဆောင်ရွက်နေတယ်လို့ ဖော်ပြခဲ့ပါတယ်။

တောင်ကိုရီးယားအစိုးရကလည်း ကင်ဂျုံအွန် လူမြင်ကွင်းကနေ ပျောက်ကွယ်နေတဲ့ ကာလအတွင်း မြောက်ကိုရီးယားဘက်မှာ ထူးခြားတဲ့အခြေအနေမျိုး မတွေ့ရဘူးလို့ အခုတစ်ပတ်အစောပိုင်းမှာ ထုတ်ပြန်ခဲ့ပါတယ်။

Ref: Aljazeera

ဧပြီ ၂၇၊ ၂၀၂၀
M-Media

-မြောက်ကိုရီးယားခေါင်းဆောင် ကင်ဂျုံအွန် သေဆုံးပြီဆိုတဲ့ သတင်းတွေဟာ မဟုတ်မှန်ဘဲ ကျန်းကျန်းမာမာနဲ့ အသက်ရှင်လျက် ရှိနေတယ်လို့ တောင်ကိုရီးယားအစိုးရက ပြောကြားလိုက်ပါတယ်။

ဧပြီလ ၁၅ ရက်နေ့ တိုင်းပြည်ရဲ့ အဓိက အခမ်းအနားတစ်ခုမှာ ကင် မပါဝင်ခဲ့ဘဲ အဲဒီနောက်ပိုင်းမှာလည်း အများပြည်သူရှေ့ကို ထွက်မလာတော့တဲ့နောက် ဘယ်ရောက်နေလဲဆိုတဲ့ မေးခွန်းတွေ ပေါ်ထွက်လာတာပါ။

ကင်ဂျုံအွန်ဟာ နှလုံးသွေးကြော ခွဲစိပ်ဖို့၊ ကိုရိုနာဗိုင်းရပ်စ်နဲ့ မထိတွေ့နိုင်ရေး သီးခြားနေထိုင်ဖို့ ရှိနေပြီး၊ ဝွန်ဆန်မြို့က အပန်းဖြေစခန်းတစ်ခု ဆောက်လုပ်နေတဲ့ အလုပ်သမားတွေကို ကျေးဇူးတင်ကြောင်း ပြောကြားခဲ့တယ်လို့ မြောက်ကိုရီးယားနိုင်ငံပိုင်သတင်းဌာနက ပြီးခဲ့တဲ့တစ်ပတ်မှာ ဖော်ပြခဲ့ပါတယ်။

ကင်ဂျုံအွန်တစ်ယောက် ကျန်းမာရေးဆိုးရွားနေပြီး တရုတ်က ဆေးအဖွဲ့တစ်ခု စေလွှတ်ပေးခဲ့ရတယ်ဆိုတဲ့သတင်းတွေ ထွက်လာသလို၊ သေဆုံးသွားပြီဆိုတဲ့ သတင်းတွေလည်း ထွက်နေပါတယ်။

မနေ့က တံခါးပိတ်ပြုလုပ်တဲ့ တောင်ကိုရီးယားအစိုးရအဖွဲ့အစည်းဝေးမှာ ကိုရီးယား ပြန်လည်ပေါင်းစည်းရေးဝန်ကြီး ကင်ယုံချိုက မိမိတို့မှာ ထောက်လှမ်းနိုင်တဲ့ စွမ်းဆောင်ရည်ရှိပြီး မြောက်ကိုရီးယားမှာ ထူးခြားတဲ့ အဖြစ်အပျက်မျိုး မရှိဘူးလို့ ပြောကြားခဲ့ပါတယ်။

တောင်ကိုရီးယားသမ္မတ သမ္မတ မွန်ဂျယ်အင်ရဲ့ နိုင်ငံခြားရေးဆိုင်ရာ အကြံပေး မွန်ချွန်အင်ကလည်း ကင်ဂျုံအွန် ကျန်းကျန်းမာမာရှိတယ်လို့ အမေရိကန်မှာ သတင်းထောက်တွေကို ပြောကြားခဲ့ပါတယ်။

“ကျွန်တော်တို့အစိုးရရဲ့ ရပ်တည်ချက်က ခိုင်မာပါတယ်။ ကင်ဂျုံအွန် ကျန်းကျန်းမာမာနဲ့ သက်ရှိထင်ရှားရှိတယ်။ ဧပြီလ ၁၃ ရက်နေ့ကနေစပြီး ဝွန်ဆန်မြို့မှာ သူ နေထိုင်နေပါတယ်။ သံသယဖြစ်စရာ လှုပ်ရှားမှုတွေ အခုအချိန်အထိ ဘာမှ မတွေ့သေးပါဘူး”

ဝါရှင်တန်အခြေစိုက် မြောက်ကိုရီးယား စောင့်ကြည့်ရေးအဖွဲ့ 38 North က ဂြိုဟ်တုပုံရိပ်တွေအရ အပန်းဖြေမြို့ ဝွန်ဆန်က အထူးရထားဘူတာမှာ ရထားတစ်စီးကို တွေ့ရပြီး ကင်ဂျုံအွန်စီးတဲ့ရထား ဖြစ်နိုင်တယ်လို့ မနေ့က ဖော်ပြခဲ့ပါတယ်။ ဒါပေမယ့် ဒါကို သတင်းဌာနတွေက သီးခြား အတည်ပြုနိုင်ခြင်း မရှိပါဘူး။

Ref: Aljazeera

ဇန်နဝါရီ ၁၊ ၂၀၂၀
M-Media

-နိုင်ငံရဲ့ နျူကလီးယားအစီအစဉ်ကို ဆက်လက်လုပ်ဆောင်သွားမှာဖြစ်ပြီး သိပ်မကြာခင်မှာ မဟာဗျူဟာမြောက် လက်နက်သစ်တစ်ခုကို ထုတ်ပြသွားမယ်လို့ မြောက်ကိုရီးယားက ဒီကနေ့မှာ ကြေငြာလိုက်ပါတယ်။

အာဏာရ အလုပ်သမားပါတီ ပေါ်လစီချမှတ်ရေးကော်မတီရဲ့ ၄ ရက်ကြာအစည်းအဝေးမှာ မြောက်ကိုရီးယားခေါင်းဆောင် ကင်ဂျုံအွန်က အခုလို ပြောကြားလိုက်တာပါ။

အမေရိကန်ဟာ တောင်ကိုရီးယားနဲ့ ပူးတွဲစစ်ရေးလေ့ကျင့်မှုတွေ လုပ်ဆောင်တာ၊ နောက်ဆုံးပေါ်လက်နက်တွေချထားတာ၊ ပိတ်ဆို့မှုတွေ လုပ်ဆောင်တာလို ဂိုဏ်းစတားဆန်ဆန် ‌လုပ်ရပ်တွေကို လုပ်ဆောင်ပြီး နျူကင်းစင်းရေး ဆွေးနွေးပွဲ ၂၀၁၉ ခုနှစ်မကုန်ခင်မှာ ပြန်စဖို့ မိမိရဲ့ အကြိမ်ကြိမ် တောင်းဆိုမှုကို မတုန့်ပြန်ခဲ့ဘူးလို့လည်း ဆိုပါတယ်။

နိုင်ငံကာကွယ်ရေးအတွက် နျူစီမံကိန်းကို ဆက်လက်လုပ်ဆောင်သွားမယ်လို့ ကင်က အခိုင်အမာပြောကြားခဲ့ပေမယ့် ဆွေးနွေးပွဲလမ်းဖွင့်ထားပြီး အမေရိကန်ရဲ့ အပြုအမူပေါ်မှာ မူတည်တယ်လို့လည် ထည့်သွင်းပြောဆိုခဲ့ပါတယ်။

“မဟာဗျူဟာမြောက် လက်နက်တစ်ခုကို သိပ်မကြာခင်အနာဂတ်မှာ မြောက်ကိုရီးယားက ပိုင်ဆိုင်လာတာကို ကမ္ဘာကြီးက တွေ့ရတော့မှာပါ။ အမေရိကန်ရဲ့ နျူခြိမ်းခြောက်မှုကို တားဆီးကာ တိုင်းပြည်ရဲ့ ရေရှည်လုံခြုံရေးကို အာမခံပေးနိုင်မယ့် နျူကာကွယ်ရေးစွမ်းအားအပေါ်မှာ အခိုင်အမာ ဆက်လက်ရပ်တည်သွားမှာပါ”

အမေရိကန်သမ္မတ ဒေါ်နယ်ထရမ့်က ကင်ဟာ နျူကင်းစင်ရေးစာချုပ်ကို လက်မှတ်ထိုးထားသူဖြစ်ပြီး စကားတည်သူတစ်ယောက်ဖြစ်မယ်လို့ ယူဆကြောင်း မြောက်ကိုရီးယားရဲ့ ကြေငြာမှုအပြီး နာရီပိုင်းအကြာမှာ ပြောကြားခဲ့ပါတယ်။

ထရမ့်နဲ့ ကင်ဂျုံအွန်တို့ဟာ ပြီးခဲ့တဲ့ ၂ နှစ်အတွင်း ၃ ကြိမ်တွေ့ဆုံခဲ့ပြီး ကိုရီးယားကျွန်းဆွယ် နျူကင်းစင်ရေး ဆွေးနွေးခဲ့ကြပေမယ့် ထိရောက်တဲ့ အကောင်အထည်ဖော်မှုမျိုးကို မလုပ်ဆောင်နိုင်ခဲ့ပါဘူး။

အမေရိကန်နိုင်ငံခြားရေးဝန်ကြီး မိုက်ပွမ်ပီယိုက မြောက်ကိုရီးယားအနေနဲ့ ပဋိပက္ခတွေ၊ စစ်ပွဲတွေထက် ငြိမ်းချမ်းရေးနဲ့ သာယာ၀ပြောရေးလမ်းကြောင်း ရွေးချယ်မယ်လို့ မျှော်လင့်ကြောင်း ပြောကြားခဲ့ပါတယ်။

Ref: Aljazeera