Tag: north korea

ဇွန် ၂၈၊ ၂၀၂၁
M-Media

-​ခေါင်းဆောင်ကြီး ကင်ဂျုံအွန် ဝိတ်ကျသွားတာကို မြင်ရတဲ့အတွက် ပြည်သူတွေက စိုးရိမ်နေကြတယ်လို့ မြောက်ကိုရီးယား နိုင်ငံပိုင်မီဒီယာ KRT က ဖော်ပြပါတယ်။

အသက် ၃၇ နှစ်အရွယ်ရှိတဲ့ ကင်ဂျုံအွန်ဟာ ဇွန်လက အခမ်းအနားတစ်ခုတက်ရောက်စဉ် အရင်ကထက် ခန္ဓာကိုယ်အလေးချိန် သိသိသာသာ ကျဆင်းသွားတာကို တွေ့ခဲ့ရတာပါ။

အစိုးရဝါဒဖြန့်မီဒီယာဖြစ်တဲ့ KRT က ဒီအတွက် ပြည်သူတွေက ဝမ်းနည်းစိုးရိမ်နေကြတယ်လို့ ပြီးခဲ့တဲ့တစ်ပတ်မှာ ထုတ်လွှင့်ခဲ့ပါတယ်။

“လေးစားရတဲ့ အတွင်းရေးမှူးကြီး ပိန်သွားတာကို မြင်ရတာ ကျွန်တော်တို့ပြည်သူတွေရဲ့ နှလုံးသားကို နာကျင်ခံစားရစေပါတယ်။ လူတိုင်းလူတိုင်း မျက်ရည်ဖြိုင်ဖြိုင်ကျရပါတယ်” လို့ KRT က အင်တာဗျူးလုပ်တဲ့ အမျိုးသားတစ်ဦးက ပြောကြားခဲ့ပါတယ်။

အာဏာရ အလုပ်သမားပါတီ WPK ရဲ့ အစည်းအဝေး တက်ပြီးတဲ့နောက် ကင်ဂျုံအွန်နဲ့ ပါတီတာဝန်ရှိသူတွေ စတိတ်ရှိုးတက်ရောက်တာကို မြို့တော်ပြုံယမ်းကလူတွေ လမ်းပေါ်မှာ ပိတ်ကားနဲ့ ကြည့်နေစဉ်အတွင်း အင်တာဗျူးတဲ့ပုံစံမျိုး PKT က ထုတ်လွှင့်ခဲ့တာ ဖြစ်ပါတယ်။

ကင်ဂျုံအွန် ဘာ့ကြောင့် ပိန်သွားရတယ်ဆိုတာကိုတော့ PKT က ထည့်သွင်း မဖော်ပြပါဘူး။

မြောက်ကိုရီးယားခေါင်းဆောင်ရဲ့ ကျန်းမာရေးနဲ့ပတ်သက်ပြီး ကောလဟာလတွေ အရင်က ထွက်ဖူးပါတယ်။

ပြီးခဲ့တဲ့နှစ် ဧပြီလ ၁၅ ရက် မြောက်ကိုရီးယားကိုတည်ထောင်သူ ကင်အီဆွန်ရဲ့ မွေးနေ့အခမ်းအနားမှာ ကင်ဂျုံအွန် မတက်ရောက်တဲ့အတွက် သေဆုံးသွားပြီဆိုတဲ့ ကောလဟာလတွေ ထွက်ဖူးပါတယ်။

၂၀၁၄ ခုနှစ် လူမြင်ကွင်းက အချိန်အတော်ကြာ ပျောက်သွားချိန်မှာ နိုင်ငံပိုင်သတင်းဌာနက ကင်ဂျုံအွန်ဟာ နေထိုင်မကောင်းဖြစ်နေတယ်လို့ ဖော်ပြခဲ့ပါတယ်။

Ref: Reuters

ဇွန် ၁၈၊ ၂၀၂၁
M-Media

-အမေရိကန်နဲ့ ထိပ်တိုက်တွေ့ဖို့ ဒါမှမဟုတ် ဆွေးနွေးဖို့ ရာနှုန်းပြည့် ပြင်ဆင်ထားမယ်လို့ မြောက်ကိုရီးယားခေါင်းဆောင် ကင်ဂျုံအွန်က ပြောကြားလိုက်ပါတယ်။

ဒါဟာ သမ္မတသစ် ဂျိုးဘိုင်ဒန် တက်လာပြီးနောက်ပိုင်း မြောက်ကိုရီးယားရဲ့ ပထမဆုံး အမေရိကန်ကို ရည်ညွှန်းပြောဆိုမှုဖြစ်ပါတယ်။

သမ္မတဟောင်း ထရမ့်လက်ထက်က ကင်ဂျုံအွန်နဲ့ ၂ ကြိမ်တွေ့ဆုံကာ ကိုရီးယားကျွန်းဆွယ် နျူကင်းရှင်းရေး ဆွေးနွေးခဲ့ပေမယ့် ထင်သာမြင်သာတဲ့ အောင်မြင်မှုမျိုး မရခဲ့ပါဘူး။

ဒီနေ့ မြို့တော်ပြုံယမ်းမှာ အစိုးရထိပ်တန်းခေါင်းဆောင်တွေနဲ့ တွေ့ဆုံစဉ် နိုင်ငံရဲ့ ဂုဏ်သိက္ခာနဲ့ အကျိုးစီးပွား၊ ငြိမ်းချမ်းတဲ့ အသိုင်းအ၀ိုင်း၊ လုံခြုံရေးတို့ကို ကာကွယ်ဖို့အတွက် ရာနှုန်းပြည့် ပြင်ဆင်ထားဖို့ လိုအပ်တယ်လို့ ကင်ဂျုံအွန်က ပြောကြားခဲ့ပါတယ်။

ကိုရီးယားကျွန်းဆွယ်ကို တည်တည်ငြိမ်ငြိမ်နဲ့ ထိန်းချုပ်ထားဖို့အတွက် မိမိတို့ဟာ သတိဝိရိယရှိရှိ တုန့်ပြန်ဆောင်ရွက်သွားမယ်လို့လည်း သူက ဆိုပါတယ်။

ကင်ဂျုံအွန်ဟာ ပြီးခဲ့တဲ့ ရက်အနည်းငယ်ကလည်း တိုင်းပြည်မှာ စားနပ်ရိက္ခာပြတ်လပ်မှု ဖြစ်နေတာကို ဝန်ခံခဲ့ပြီး အလွန်အမင်း စိုးရိမ်မိတယ်လို့ ပြောကြားခဲ့ပါတယ်။

အမေရိကန်သမ္မတ ဂျိုးဘိုင်ဒန်က မြောက်ကိုရီးယားအနေနဲ့ နျူနဲ့ ဒုံးကျည်စီမံကိန်းကို ရပ်တန့်ပြီး စားပွဲ၀ိုင်းကိုပြန်လာဖို့ ပြီးခဲ့တဲ့တစ်ပတ် G7 အစည်းအဝေးမှာ ပြောကြားခဲ့ပါတယ်။

Ref: BBC

ဇွန် ၇၊ ၂၀၂၁
M-Media

-နိုင်ငံခြားရုပ်ရှင်ကြည့်သူတွေ၊ နိုင်ငံခြား အဝတ်အစား သုံးစွဲသူတွေနဲ့ နိုင်ငံခြားဗန်းစကား အသုံးပြုသူတွေကို ပြင်းပြင်းထန်ထန်အပြစ်ပေးမယ့် ဥပဒေတစ်ခုကို မြောက်ကိုရီးယားမှာ မကြာသေးမီကပဲ ပြဌာန်းလိုက်ပါတယ်။

မြောက်ကိုရီးယား အာဏာရှင်အဆက်ဆက်ဟာ ပြည်တွင်းမှာ နိုင်ငံခြားဩဇာလွှမ်းမိုးမှု မရှိအောင် တင်းတင်းကြပ်ကြပ် ပြုလုပ်ထားပြီး နိုင်ငံခြားက ဆံပင်ပုံစံညှပ်တာ၊ နိုင်ငံခြားရုပ်ရှင် ကြည့်တာ၊ နိုင်ငံကခြားကလာတဲ့ အသုံးအဆောင် သုံးစွဲတာတွေကိုတောင် ရာဇဝတ်မှုအဖြစ် သတ်မှတ်ထားတာပါ။

မြောက်ကိုရီးယားပြည်သူတွေဟာ ​အင်တာနက်၊ ဆိုရှယ်မီဒီယာတွေ သုံးခွင့်မရှိသလို နိုင်ငံပိုင်မီဒီယာတွေကလည်း အာဏာရှင်အတွက် ဝါဒဖြန့်သက်သက်သာ ဖြစ်ပါတယ်။

တောင်ကိုရီးယား အွန်လိုင်းသတင်းဌာန Daily NK က ရရှိခဲ့တဲ့ မြောက်ကိုရီးယားရဲ့ ဥပဒေအသစ်မှာ တောင်ကိုရီးယား၊ အမေရိကန်နဲ့ ဂျပန်ဇာတ်ကားတွေလို နိုင်ငံခြားဇာတ်လမ်းတွဲတွေ အမြောက်အများ လက်ဝယ်ပိုင်ဆိုင်ရင် အမြင့်ဆုံး သေဒဏ်အထိ၊ ကြည့်ရှုတဲ့သူတွေကို အမြင့်ဆုံး ထောင်ဒဏ် ၁၅ နှစ်အထိ ချမှတ်ဖို့ ပြဌာန်းထားပါတယ်။

မြောက်ကိုရီးယားခေါင်းဆောင် ကင်ဂျုံအွန်ဟာ မကြာသေးခင်က နိုင်ငံပိုင်မီဒီယာကို စာတစ်စောင်ပေးပို့ခဲ့ပြီး လူငယ်တွေမှာ ဆိုရှယ်လစ်ဆန့်ကျင်တဲ့ အယူအဆတွေ မဝင်ရောက်ရေး တားဆီးနှိပ်ကွပ်ဖို့ မြောက်ကိုရီးယား လူငယ်အဖွဲ့အစည်းကို တိုက်တွန်းခဲ့ပါတယ်။ နိုင်ငံခြားဘာသာစကား၊ ဆံပင်ပုံစံနဲ့ အဝတ်အစားတွေဟာ ‘အန္တရာယ်ရှိတဲ့ အဆိပ်အတောက်တွေ’ ဖြစ်တယ်လို့ အဲဒီစာမှာ ဖော်ပြထားပါတယ်။

ဒီတားမြစ်မှုကို အလုပ်သမားက ချိုးဖောက်ရင် စက်ရုံအကြီးအကဲ၊ သားသမီးက ချိုးဖောက်ရင် မိဘကို အပြစ်ပေးမှာဖြစ်သလို၊ မိသားစု၊ ပတ်ဝန်းကျင်နဲ့ လူ့အဖွဲ့အစည်းကလူတွေ အပြန်အလှန် တင်းတင်းကြပ်ကြပ် ထိန်းကြောင်းဖို့ ဥပဒေမှာ ပြဌာန်းထားတယ်လို့ Daily NK အယ်ဒီတာချုပ် လီဆန်ယွန်က ဘီဘီစီသတင်းဌာနကို ပြောကြားခဲ့ပါတယ်။

မြောက်ကိုရီးယားမှာ နိုင်ငံခြားပစ္စည်း သုံးစွဲသူတွေ၊ နိုင်ငံခြားဇာတ်ကားကြည့်သူတွေကို အရင်က အရေးယူအပြစ်ပေးတာမျိုး ရှိခဲ့ပါတယ်။

ဇာတ်ကား လက်ဝယ်ထားသူတွေကို လူအများရှေ့မှာ သတ်ဖြတ်ပြတာ၊ အလုပ်ကြမ်းစခန်းပို့တာ၊ ကြည့်ရှုသူတွေကို ထောင်သွင်းအကျဉ်းချတာ၊ ကေပေါ့ဆံပင်ပုံစံထားပြီး၊ ဘောင်းဘီ ခြေသလုံးအထိ လိပ်တင်ဝတ်တဲ့ လူငယ်တွေကို ပြုပြင်ထိန်းသိမ်းရေးသင်တန်းကျောင်းပို့တာတွေ လုပ်လေ့ရှိပါတယ်။

ဒါပေမယ့် အခု ဥပဒေအသစ်အရ သေဒဏ်၊ နှစ်ရှည်ထောင်ဒဏ်အထိ ချမှတ်ခံရမှာ ဖြစ်ပါတယ်။

မြောက်ကိုရီးယားမှာ နိုင်ငံခြားအသုံးအဆောင်တွေ၊ ဇာတ်ကားတွေဟာ တရုတ်ကနေတစ်ဆင့် မှောင်ခိုဝင်နေတာ ဖြစ်ပါတယ်။

Ref: BBC

ဇန်နဝါရီ ၆၊ ၂၀၂၁
M-Media

-ပြီးခဲ့တဲ့ ၅ နှစ်အတွင်း မူဝါဒအမှားတွေကြောင့် စီးပွားရေး ကျဆင်းဆုတ်ယုတ်မှု ကြုံတွေ့ခဲ့ရတယ်လို့ မြောက်ကိုရီးယားခေါင်းဆောင် ကင်ဂျုံအွန်က မကြုံစဖူး ဝန်ခံလိုက်ပြီး ရည်မှန်းချက်အသစ်တွေ ချမှတ်အကောင်အထည်ဖော်သွားမယ်လို့ ဆိုပါတယ်။

အာဏာရ မြောက်ကိုရီးယား အလုပ်သမားပါတီရဲ့ ညီလာခံကို ဒီကနေ့မနက်ပိုင်းက မြို့တော် ပြုံးယမ်မှာ စတင်ကျင်းပခဲ့ပြီး နိုင်ငံတစ်ဝှမ်းက ပါတီကိုယ်စားလှယ်တွေနဲ့ လေ့လာစောင့်ကြည့်သူ ထောင်ချီ တက်ရောက်ခဲ့ပါတယ်။

နောက်ဆုံး ပါတီညီလာခံကို ၂၀၁၆ ခုနှစ်မှာ ကျင်းပခဲ့ပြီး၊ နောက် ၅ နှစ်အတွက် စီးပွားရေးနဲ့ နိုင်ငံခြားရေး မူဝါဒတွေကို ချမှတ်မယ့် ဒီညီလာခံကို ကမ္ဘာတစ်ဝှမ်းက အနီးကပ် စောင့်ကြည့်နေကြပါတယ်။

အဖွင့်မိန်းခွန်းမှာ ဥက္ကဌ ကင်ဂျုံအွန်က ပြီးခဲ့တဲ့ ၅ နှစ်အတွင်း တိုင်းပြည်ကို အင်အားတောင့်တင်းအောင်၊ ကမ္ဘာ့အလယ်မှာ ဂုဏ်သိက္ခာရှိအောင် လုပ်ဆောင်နိုင်ခဲ့တယ်လို့ ပြောကြားခဲ့ပါတယ်။ အမေရိကန် ကုန်းမကြီးအထိ ပစ်ခတ်နိုင်တဲ့ တိုက်ချင်းပစ်ဒုံးကျည် အောင်မြင်စွာ စမ်းသပ်နိုင်တာကို ရည်ညွှန်းပြောဆိုခဲ့တာပါ။

ဒါပေမယ့် ၂၀၁၆ ခုနှစ်က ချမှတ်ခဲ့တဲ့ စီးပွားရေး မူ၀ဒါတွေကနော နယ်ပယ်အားလုံးနီးပါးမှာ မအောင်မြင်ခဲ့ဘဲ၊ ဒါမျိုး လုံး၀ ထပ်မဖြစ်အောင် ဆောင်ရွက်သွားမှာဖြစ်ကြောင်း၊ လက်ရှိ ညီလာခံမှာ နောက် ၅ နှစ်အတွက် စီးပွားရေး တိုးတက်မယ့် အစီအမံတွေ ချမှတ်သွားမှာဖြစ်ကြောင်း ကင်က ထည့်သွင်းပြောဆိုခဲ့ပါတယ်။

အလုပ်သမားပါတီညီလာခံဟာ မြောက်ကိုရီးယားရဲ့ နိုင်ငံတော်မူဝါဒ ချမှတ်ရာ အစည်းအဝေးမျိုး ဖြစ်ပေမယ့် ဆုံးဖြတ်ချက်တိုင်းကို ကင်ဂျုံအွန်နဲ့ သူ့အတွင်းစည်းကလူတွေသာ ချမှတ်တာ ဖြစ်ပါတယ်။ ဒီညီလာခံမှာ နိုင်ငံတော်မူဝါဒကို ကြေငြာမှာဖြစ်ပြီး ထိပ်တန်းရာထူးတွေအတွက် အယုံကြည်ရဆုံးသူ​တွေကို ကင်က ခန့်အပ်မှာ ဖြစ်ပါတယ်။

ချွတ်ခြုံကျနေတဲ့ မြောက်ကိုရီးယားစီးပွားရေးဟာ ကိုဗစ်ကပ်ရောဂါနဲ့ ပြီးခဲ့တဲ့နှစ် နွေရာသီက သဘာ၀ဘေးအန္တရာယ်ကြောင့် ပိုဆိုးလာနေတာ ဖြစ်ပါတယ်။ အခုလနှောင်းပိုင်းမှာ အမေရိကန်သမ္မတသစ် ဂျိုးဘိုင်ဒန် အာဏာရယူမယ့်ကိစ္စကလည်း ကင်အတွက် စိုးရိမ်စရာကိစ္စတစ်ခု ဖြစ်နေတယ်လို့ ကျွမ်းကျင်သူတွေက သုံးသပ်ပါတယ်။

ဂျိုးဘိုင်ဒန်ဟာ ထရမ့်လို နှစ်ဖက်ခေါင်းဆောင်တွေ တွေ့ဆုံဆွေးနွေးတာမျိုးထက် ပိတ်ဆို့မှုတွေထပ်လုပ်ကာ မြောက်ကိုရီးယားကို ဖိအားပေးမယ်လို့ သုံးသပ်မှုတွေ ရှိနေပါတယ်။

Ref: CNA