Tag: Palestine

ဇူလိုင် ၂၃၊ ၂၀၂၄
M-Media

-ပါလက်စတိုင်း လွတ်မြောက်ရေး ကြိုးပမ်းနေတဲ့ အဖွဲ့နှစ်ခုဖြစ်တဲ့ ဖာတာနဲ့ ဟားမက်စ်တို့ဟာ အမျိုးသားညီညွတ်ရေးဆိုင်ရာ သဘောတူညီချက်တစ်ရပ်ကို ဇူလိုင်လ ၂၃ ရက်နေ့မှာ လက်မှတ်ရေးထိုးနိုင်ခဲ့ပါတယ်။

အစ္စရေးရဲ့ အကြမ်းဖက်တိုက်ခိုက်မှုတွေ ရပ်တန့်သွားတဲ့အခါ ဂါဇာကမ်းမြှောင်ကို ပါလက်စတိုင်းတွေသာ စိုးမိုးအုပ်ချုပ်နိုင်ရေးအတွက် ဖြစ်ပါတယ်။

ဒီသဘောတူညီချက်ရဖို့အတွက် တရုတ်နိုင်ငံက ကြား၀င်ညှိနှိုင်းပေးခဲ့တာဖြစ်ပြီး ဘေဂျင်းမှာ ၃ ရက်ကြာ ခေါင်းချင်းဆိုင် ဆွေးနွေးခဲ့ကြတာပါ။ ဟားမက်စ်နဲ့ ဖာတာအပြင် အခြားပါလက်စတိုင်း လွတ်မြောရေးအဖွဲ့ ၁၂ ခုကလည်း လက်မှတ်ရေးထိုးခဲ့ကြပါတယ်။

“အမျိုးသားညီညွတ်ရေးအတွက် ကျွန်တော်တို့ ဒီကနေ့ လက်မှတ်ရေးထိုးခဲ့ကြတယ်။ ဒီခရီးလမ်းရဲ့ အဆုံးဟာ အမျိုးသားညီညွတ်ရေးမှာ အဆုံးသတ်ဖို့ဖြစ်တယ်ဆိုတာ ကျွန်တော်တို့ ပြောလိုပါတယ်” လို့ ဟားမက်စ် အကြီးတန်းခေါင်းဆောင် မူဆာ အဘူ မာဇူက်က ပြောပါတယ်။

သဘောတူညီချက်မှာ အချက် ၄ ချက်ပါ၀င်ပါတယ်။ ကြားဖြတ် အမျိုးသားညီညွတ်ရေးအစိုးရ ဖွဲ့စည်းရေး၊ အနာဂတ် ရွေးကောက်ပွဲတွေ မတိုင်ခင် ညီညွတ်တဲ့ ပါလက်စတိုင်း ခေါင်းဆောင်မှုတစ်ခု ပေါ်ပေါက်လာရေး၊ ပါလက်စတိုင်း အမျိုးသားကောင်စီ ဖွဲ့စည်းနိုင်ရေးအတွက် လွတ်လပ်တဲ့ ရွေးကောက်ပွဲတစ်ရပ် ကျင်းပဖို့နဲ့ အစ္စရေးရဲ့ လက်ရှိတိုက်ခိုက်မှုတွေကို ဆန့်ကျင်ကြောင်း တညီတညွတ်တည်း ကြေငြာချက် ထုတ်ပြန်ရေးတို့ ဖြစ်ပါတယ်။

ဖာတာနဲ့ ဟားမက်စ်တို့ဟာ ပါလက်စတိုင်း လွတ်မြောက်ရေး ကြိုးပမ်းနေတဲ့ အဖွဲ့အစည်းတွေထဲမှာ အကြီးဆုံး အဖွဲ့နှစ်ခု ဖြစ်ပါတယ်။ ၂၀၀၆ ခုနှစ်မှာ သဘောထားကွဲလွဲကာ ဖာတာက ဂျော်ဒန်မြစ် အနောက်ဖက်ကမ်းက ပါလက်စတိုင်းပိုင်နက်တွေ၊ ဟားမက်စ်က ဂါဇာကမ်းမြှောင်တို့ကို သီးခြားစီ ထိန်းချုပ်ခဲ့ပါတယ်။

ဟားမက်စ်က ပါလက်စတိုင်းလွတ်မြောက်ရေးအတွက် လက်နက်ကိုင် တိုင်ပွဲ၀င်ရမယ်ဆိုတဲ့ သဘောထားမျိုးရှိပြီး၊ ဖာတာက အစ္စရေးနဲ့ ဆွေးနွေးညှိနှိုင်းရမယ်ဆိုတဲ့ သဘောထားရှိပါတယ်။ ဒီအဖွဲ့နှစ်ခုအကြား အရင်က ရင်ကြားစေ့ရေး ဆွေးနွေးခဲ့ကြပေမယ့် မအောင်မြင်ခဲ့ပါဘူး။

“ကျွန်တော်တို့ သမိုင်းတစ်ကွေ့ကို ရောက်နေပြီ။ ကျွန်တော်တို့ ပြည်သူတွေလည်း လွတ်မြောက်ရေးအတွက် ထကြွနိုးကြားလာကြပါပြီ” လို့ အဘူ မာဇူက်က ပြောပါတယ်။

၂၀၂၃ ခုနှစ် အောက်တိုဘာ ၇ ရက်နေ့ကစတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲဟာ ပါလက်စတိုင်းအဖွဲ့တွေ ပေါင်းစည်းဖို့ တွန်းအားတစ်ခု ဖြစ်ခဲ့ပါတယ်။ ၉ လကျော်အတွင်း ပါလက်စတိုင်းပြည်သူ ၃၉၀၉၀ ဦးကို အစ္စရေးက သတ်ဖြတ်ထားပြီး အများစုက အမျိုးသမီးတွေနဲ့ ကလေးငယ်တွေ ဖြစ်ပါတယ်။
Ref: Aljazeera

ဇူလိုင် ၂၁၊ ၂၀၂၄
M-Media

-ဇူလိုင်လ ၂၀ ရက်နေ့အတွင်း ဂါဇာကမ်းမြှောင်မှာ အစ္စရေးရဲ့ အကြမ်းဖက် တိုက်ခိုက်သတ်ဖြတ်မှုကြောင့် သေဆုံးခဲ့တဲ့ ပါလက်စတိုင်းပြည်သူ ၆၄ ဦး ရှိပါတယ်။

ဒါ့ကြောင့် ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ ပါလက်စတိုင်းအရေအတွက်ဟာ ၃၈၉၈၃ ဦး ရှိလာပြီ ဖြစ်ပါတယ်။

မနေ့က တစ်ရက်အတွင်း အစ္စရေးရဲ့ လက်ချက်ကြောင့် ဒဏ်ရာရသူ အရေအတွက်ဟာ ၁၀၅ ဦး ရှိပါတယ်။

ဂျာနယ်လစ် ၁၆၂ ဦး

ဇူလိုင် ၂၁ ရက်နေ့ မနက်မှာတော့ ပါလက်စတိုင်းဂျာနယ်လစ် မူစတာအင် မဟ်မူးဒ် ဂါရဘ်ကို အစ္စရေးက သတ်ဖြတ်ခဲ့ပါတယ်။

၉ လကျော်အတွင်း ဂါဇာမှာ အစ္စရေးက သတ်ဖြတ်ထားတဲ့ ဂျာနယ်လစ်အရေအတွက်ဟာ ၁၆၂ ဦးအထိ ရှိလာပြီလို့ ဂါဇာအစိုးရ သတင်းထုတ်ပြန်ရေးအဖွဲ့က ပြောပါတယ်။

ဂါရဘ်ဟာ ပါလက်စတိုင်းက မီဒီယာလုပ်ငန်း အများအပြားမှာ နှစ်ပေါင်းများစွာ အလုပ်လုပ်ခဲ့သူ ဖြစ်ပါတယ်။

Ref: Aljazeera

ဇူလိုင် ၁၉၊ ၂၀၂၄
M-Media

-အစ္စရေးရဲ့ တယ်အဗီးမြို့မှာ ဇူလိုင် ၁၉ ရက်နေ့ မနက်အစောပိုင်းက ဒရုန်းနဲ့ တိုက်ခိုက်ခံရမှုတစ်ခု ဖြစ်ပွားခဲ့ပြီး အနည်းဆုံး လူ ၁ ဦး သေဆုံးခဲ့ပါတယ်။

ယီမင်လက်နက်ကိုင်အဖွဲ့ ဟူသီက ဒီတိုက်ခိုက်မှုကို သူတို့လုပ်တာဖြစ်ပြီး ဂါဇာမှာ အစ္စရေးရဲ့ အကြမ်းဖက်မှုတွေကို တုန့်ပြန်တာဖြစ်တယ်လို့ ထုတ်ပြန်ပါတယ်။

ကမ္ဘာတစ်၀ှမ်းက ချီးကျူးပြောဆိုကြတဲ့ အစ္စရေးရဲ့ လေကြောင်းရန်ကာကွယ်ရေးစနစ်ဟာ ဟူသီဒရုန်း ၀င်ရောက်လာတာကို သိရှိခဲ့ခြင်း မရှိပါဘူး။

ဟူသီရဲ့ နိုင်ငံရေးပေါ်လစ်ဗျူရိုအဖွဲ့၀င် ဟမ်ဇာ အလ်-အာဆတ်က ဒီတိုက်ခိုက်မှုဟာ အစ္စရေးက မြို့ကြီးတွေကို ပစ်မှတ်ထားမယ့် စစ်ဆင်ရေးသစ်ရဲ့အစ ဖြစ်တယ်လို့ ပြောကြားခဲ့ပါတယ်။ ဒီမဟာဗျူဟာမြောက် စစ်ဆင်ရေးသစ်မှာ လက်ဘနွန်၊ အီရတ်နဲ့ သိမ်းပိုက်ခံ ပါလက်စတိုင်းနယ်မြေတွေက လက်နက်ကိုင်အဖွဲ့တွေလည်း ပူးပေါင်းပါ၀င်သွားမယ်လို့ အလ်-အာဆတ်က ပြောပါတယ်။

တိုက်ခိုက်မှုမှာ အသုံးပြုတဲ့ဒရုန်းဟာ အီရန်ထုတ်ဒရုန်းဖြစ်ပြီး ဒီအတွက် လက်တုန့်ပြန်သွားမယ်လို့ အစ္စရေးဖက်က ထုတ်ပြန်ခဲ့ပါတယ်။

ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူ အရေအတွက်ဟာ ၃၉၀၀၀ နီးပါး ရှိလာပြီဖြစ်ပြီး အများစုဟာ အမျိုးသမီးတွေနဲ့ ကလေးငယ်တွေ ဖြစ်ပါတယ်။

Ref: Aljazeera

ဇူလိုင် ၁၈၊ ၂၀၂၄
M-Media

-အစ္စရေးရဲ့ အကြမ်းဖက်သတ်ဖြတ်မှုဒဏ်ကို ခံစားနေရတဲ့ ပါလက်စတိုင်းပြည်သူတွေထံ ယူကရိန်းက ဂျုံမှုန့်တန်ချိန် တစ်ထောင်ကို ပေးပို့ လှူဒါန်းလိုက်ပါတယ်။

ဆင်းရဲတဲ့နိုင်ငံတွေနဲ့ ဒေသတွေကို လယ်ယာထွက်ကုန်ပစ္စည်း ထောက်ပံ့ကူညီရေး ယူကရိန်းသမ္မတ ဇယ်လင်စကီးရဲ့ စီမံကိန်း တစ်စိတ်တစ်ပိုင်းလည်း ဖြစ်ပါတယ်။

ယူကရိန်းဟာ ပါလက်စတိုင်းကို ဂျုံမှုန့်ထောက်ပံ့မှု ၃ ကြိမ် ပြုလုပ်သွားမှာဖြစ်ပြီး ပါလက်စတိုင်းမိသားစု တစ်သိန်းကျော် တစ်လစာ ဖူလှုံလိမ့်မယ်လို့ ယူကရိန်းနိုင်ငံခြားရေး၀န်ကြီးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

ပါလက်စတိုင်းတွေဟာ အစ္စရေးရဲ့ ကျူးကျော်နယ်မြေလု၊ အကြမ်းဖက်မှုကို ခံနေရသလိုပဲ ယူကရိန်းဟာလည်း ရုရှားရဲ့ ကျူးကျော်တိုက်ခိုက်မှုကို နှစ်နဲ့ချီ ခံစားနေရတာ ဖြစ်ပါတယ်။

Ref: Aljazeera

ဇူလိုင် ၁၇၊ ၂၀၂၄
M-Media

-နိုင်ငံတကာခုံသမာဓိရုံး ICJ က အကြမ်းဖက်သတ်ဖြတ်မှုတွေ ရပ်ဖို့ အမိန့်ထုတ်ပြန်ပြီး နောက်ပိုင်း အစ္စရေးရဲ့ ပါလက်စတိုင်းပြည်သူတွေကို သတ်ဖြတ်မှုနှုန်းဟာ တစ်လကို ၂၅၀၀ အထိ ရှိလာပါတယ်။

ပါလက်စတိုင်းတွေကို လူမျိုးတုန်း သတ်ဖြတ်ခံရမှုကနေ ကာကွယ်ပေးရမှာဖြစ်ပြီး၊ လူမျိုးတုန်းသတ်ဖြတ်မှုမြောက်တဲ့ လုပ်ရပ်တွေကို အစ္စရေးက ရှောင်ကျဥ်ဖို့ ICJ က ဇန်န၀ါရီ ၂၆ ရက်နေ့မှာ ဆုံးဖြတ်ချက် ချခဲ့ပါတယ်။

အဲဒီနောက်ပိုင်းက အခုအချိန်အထိ ဂါဇာမှာ အစ္စရေးရဲ့ သတ်ဖြတ်မှုဟာ စုစုပေါင်း ၁၂၆၃၀ ဦး ရှိခဲ့ပြီး ဒါဟာ တစ်လကို ၂၅၀၀ ကျော်နှုန်း သတ်ဖြတ်တာ ဖြစ်ပါတယ်။ ပြီးခဲ့တဲ့နှစ် အောက်တိုဘာ ၇ ရက်နေ့က ၂၀၂၄ ခုနှစ် ဇန်န၀ါရီ ၁၆ နေ့အထိ ဂါဇာမှာ အစ္စရေးရဲ့ သတ်ဖြတ်မှုကို ခံရသူအရေအတွက်ဟာ ၂၆၀၈၃ ဦး ရှိပါတယ်။

Ref: Aljazeera