News @ M-Media

Tag: Palestine

  • ဂါဇာရှိ မြေပြင်သတင်းများကို အဆက်မပြတ်ဖော်ပြနေသည့် အလ်ဂျာဇီးရားသတင်းဌာနကို အစ္စရေးက ပိတ်သိမ်း

    မေ ၆၊ ၂၀၂၄

    M-Media


    -ပါလက်စတိုင်းတွေ ငြှမ်းပမ်းနှိပ်စက် သတ်ဖြတ်ခံနေရမှုကို အချက်အလက်တွေနဲ့ ဖော်ပြပေးနေတဲ့ အလ်ဂျာဇီးရားသတင်းဌာနကို အစ္စရေးက ပိတ်သိမ်းလိုက်ပါတယ်။ 

    အလ်ဂျာဇီးရားသတင်းဌာနဟာ ဂါဇာမှာ မြေပြင်အထိ သတင်းသွားယူ ဖော်ပြနေတဲ့ လက်တစ်ဆုပ်စာ သတင်းဌာနတွေထဲက တစ်ခုဖြစ်ပါတယ်။ 

    BBC နဲ့ CNN တို့ အပါအ၀င် အခြား နိုင်ငံတကာ သတင်းဌာနေတွေဟာ ပါလက်စတိုင်းသတင်းတွေကို အစ္စရေးထံကနေတစ်ဆင့်သာ ဖော်ပြနေကြရတာ ဖြစ်ပါတယ်။ 

    သတင်းဌာနတွေကို ပိတ်သိမ်းနိုင်မယ့် ဥပဒေတစ်ခုကို အစ္စရေးက ပြီးခဲ့တဲ့လမှာ ပြဌာန်းအတည်ပြုခဲ့ပါတယ်။ 

    အလ်ဂျာဇီးရား သတင်းဌာနက အစ္စရေးရဲ့ အခုလုပ်ရပ်ဟာ သတင်းစီးဆင်းခွင့်ကို ပိတ်ပင်တာဖြစ်ပြီး လူ့အခွင့်အရေးချိုးဖောက်မှုဖြစ်တယ်လို့ ရှုတ်ချခဲ့ပါတယ်။ 

    ပြီးခဲ့တဲ့နှစ် အောက်တိုဘာလက စတင်တဲ့ အစ္စရေးရဲ့ ဂါဇာတစ်ကျော့ပြန်လူသတ်ပွဲမှာ ပါလက်စတိုင်းပြည်သူတွေ အကြမ်းဖက်သတ်ဖြတ်ခံရမှု၊ အစ္စရေးရဲ့ လိမ်လည်သတင်းထုတ်ပြန်ချက်တွေ၊ သတင်းသမားတွေ၊ အကူအညီပေးရေး၀န်ထမ်းကို အစ္စရေးက သတ်ဖြတ်မှုတွေကို အလ်ဂျာဇီးရားသတင်းဌာနက အချက်အလက်အတိအကျနဲ့ ဖော်ထုတ်တင်ပြနေတာ ဖြစ်ပါတယ်။ 

    အစ္စရေးအစိုးရဟာ အလ်ဂျာဇီးရား သတင်းဌာနရဲ့ ရုံးခန်းကို ၀င်ရောက်စီးနင်းကာ ပစ္စည်းတွေကို သိမ်းယူခဲ့ပါတယ်။ 

    ရှုတ်ချ

    နိုင်ငံတကာ ဂျာနယ်လစ်များအသင်းကလည်း အစ္စရေးက သတင်းဌာနတွေအပေါ် ဖိနှိပ်မှုကို ရှုတ်ချပြောဆိုခဲ့ပါတယ်။ 

    “မီဒီယာတွေ၊ ရုပ်သံဌာနတွေကို ပိတ်ပစ်တာဟာ အာဏာရှင်တွေရဲ့ လုပ်ရပ်ပါ။ ဒီမိုကရေစီနိုင်ငံလို့ ကျွေးကြော်နေတဲ့ အစ္စရေးက နိုင်ငံတကာမှာ ဂုဏ်သိက္ခာရှိပြီး၊ သမိုင်းကြောင်းကောင်းတဲ့ သတင်းဌာနတစ်ခုကို ပိတ်ပစ်တာဟာ ယုတ်ပဲ့လွန်းပါတယ်”လို့ နိုင်ငံတကာ ဂျာနယ်လစ်များအသင်းရဲ့ တွဲဖက်အတွင်းရေးမှူး တင်ဒေါ်ဆန်က ပြောပါတယ်။ 

    Ref: Aljazeera

  • ဂါဇာအကြမ်းဖက်မှုကြောင့် တူရကီက အစ္စရေးနှင့် ကုန်သွယ်ရေး အဆက်အသွယ်ဖြတ်

    ဂါဇာအကြမ်းဖက်မှုကြောင့် တူရကီက အစ္စရေးနှင့် ကုန်သွယ်ရေး အဆက်အသွယ်ဖြတ်

    မေ ၃၊ ၂၀၂၄

    M-Media 


    (ဓာတ်ပုံ- အစ္စရေးလက်ချက်ကြောင့် အတိဒုက္ခရောက်နေကြသည့် ပါလက်စတိုင်း ကလေးငယ်များ)

    -ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးက တိုက်ခိုက်မှုတွေ မရပ်မချင်း ကုန်သွယ်ရေးရပ်ဆိုင်းသွားမယ်လို့ တူရကီက ထုတ်ပြန်ကြေငြာပါတယ်။ 

    ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက အစ္စရေးရဲ့ တစ်ကျော့ပြန် လူသတ်ပွဲမှာ အသတ်ခံရသူ အရေအတွက်ဟာ ၃၅၀၀၀ နီးပါး ရှိလာပါပြီ။

    တိုက်ခိုက်ဖျက်ဆီးမှုတွေကြောင့် အိုးအိမ်စွန့်ခွာထွက်ပြေးရတဲ့ ပါလက်စတိုင်းပြည်သူ ၂ သန်းကျော်ကို နိုင်ငံတကာက ပေးပို့တဲ့ အထောက်အပံ့တွေကိုလည်း မရအောင် အစ္စရေးက တားဆီးဟန့်တားမှုတွေ ပြုလုပ်နေပါတယ်။ 

    ဂါဇာမှာ အစ္စရေးက အပြည့်အ၀ အပစ်ရပ်ပြီး လူသားချင်း စာနာထောက်ထားမှုဆိုင်ရာ အကူအညီတွေကို ၀င်ခွင့်ပြုတဲ့အချိန်အထိ နှစ်နိုင်ငံကုန်သွယ်ရေးကို ရပ်ဆိုင်းထားမယ်လို့ တူရကီ ကုန်သွယ်ရေး၀န်ကြီး အိုမာရ် ဘိုလတ်က ပြောပါတယ်။ 

    ၂၀၂၃ ခုနှစ် စာရင်းတွေအရ တူရကီနဲ့ အစ္စရေးတို့အကြား ကုန်သွယ်ရေးတန်ဖိုးဟာ တစ်နှစ်ကို ကန်ဒေါ်လာ ၆ ဒဿမ ၈ ဘီလီယံဖိုး ရှိပါတယ်။ 

    သွင်းကုန်၊ ပို့ကုန်အားလုံးကို ရပ်ဆိုင်းလိုက်တာဖြစ်ပြီး ဒါဟာ ဂါဇာမှာ အစ္စရေးရဲ့ စက်ဆုပ်ဖွယ် အပြုအမူတွေကို တုန့်ပြန်တာလို့လည်း ဘိုလတ်က ထည့်သွင်းပြောဆိုခဲ့ပါတယ်။ 

    ဂါဇာက အတိဒုက္ခရောက်နေသူတွေကို လေကြောင်းကနေ အကူအညီတွေ ချပေးရေးမှာ တူရကီပါ၀င်ဖို့ အစ္စရေးက ခွင့်မပြုခဲ့တာကြောင့် ပြီးခဲ့တဲ့လကစပြီး တူရကီက ကုန်သွယ်ရေးဆိုင်ရာ ကန့်သတ်မှုတွေ လုပ်ခဲ့တာ ဖြစ်ပါတယ်။ 

    Ref: Reuters

  • အစ္စရေးနှင့် သံတမန်အဆက်အသွယ်ဖြတ်မည်ဟု ကိုလံဘီယာ ကြေငြာ

    အစ္စရေးနှင့် သံတမန်အဆက်အသွယ်ဖြတ်မည်ဟု ကိုလံဘီယာ ကြေငြာ

    မေ ၂၊ ၂၀၂၄
    M-Media

    (ဓာတ်ပုံ – ကိုလံဘီယာ သမ္မတ ဂူစတာဗို ပက်ထရို(မိုက်ကိုင်ထားသူ))

    -ဂါဇာမှာ အစ္စရေးရဲ့ လူမျိုးတုန်းသတ်ဖြတ်မှု လုပ်ရပ်တွေကြောင့် အစ္စရေးနဲ့ သံအဆက်အသွယ် ဖြတ်တောက်တော့မယ်လို့ ကိုလံဘီယာ သမ္မတ ဂူစတာဗို ပက်ထရိုက မေလ ၁ ရက်နေ့မှာ ကြေငြာလိုက်ပါတယ်။

    “လူမျိုးတုန်းသတ်ဖြတ်တဲ့ အစိုးရနဲ့ သမ္မတရှိနေတဲ့ အစ္စရေးနဲ့ မနက်ဖြန်ကစပြီး သံတမန်အဆက်အသွယ် ဖြတ်တော့မယ်ဆိုတာ အပြောင်းအလဲလိုလားတဲ့ အစိုးရ၊ ပြည်သူ့သမ္မတ ကျွန်တော့်အနေနဲ့ အားလုံးရဲ့အရှေ့မှာ ကြေငြာလိုပါတယ်” လို့ မေလ ၁ ရက်နေ့ ဘိုဂိုတာမြို့က အလုပ်သမားနေ့မိန့်ခွန်းမှာ ပက်ထရိုက ပြောကြားခဲ့ပါတယ်။

    ၂၀၂၂ ခုနှစ်မှာ အာဏာရလာတဲ့ ပက်ထရိုဟာ ပြီးခဲ့တဲ့နှစ် အောက်တိုဘာလ ဂါဇာမှာ အစ္စရေးရဲ့ တစ်ကျော့ပြန်လူသတ်ပွဲ စတင်ကတည်းက အစ္စရေးကို ပြင်းပြင်းထန်ထန် ကန့်ကွက်လာတာ ဖြစ်ပါတယ်။

    လူသတ်ပွဲစပြီး သိပ်မကြာခင် ဂါဇာကလူတွေဟာ ‘လူ့တိရစ္ဆာန်တွေ’ လို့ ပြောကြားခဲ့တဲ့ အစ္စရေး ကာကွယ်ရေး၀န်ကြီး ယိုအဗ် ဂါလန့်ရဲ့စကားကို ကြားပြီး ပက်ထရိုက ‘နာဇီတွေက ဂျူးတွေကိုပြောတဲ့စကားမျိုး’ ဖြစ်တယ်လို့ ၀ေဖန်ခဲ့တဲ့အတွက် အစ္စရေးက ဒေါသထွက်ပြီး ကိုလံဘီယာထံ လက်နက်ရောင်းချမှုကို ရပ်ဆိုင်းခဲ့ပါတယ်။

    ဂါဇာက အစ္စရေးရဲ့ တိုက်ခိုက်သတ်ဖြတ်မှုတွေဟာ လူမျိုးတုန်းသတ်ဖြတ်မှုဖြစ်တယ်လို့ ပက်ထရိုက နို၀င်ဘာလမှာ ထပ်မံ ရှုတ်ချခဲ့ပါတယ်။

    ဖေဖော်၀ါရီလမှာတော့ ကိုလံဘီယာဟာ အစ္စရေးထံကနေ လက်နက်၀ယ်ယူမှု ရပ်ဆိုင်းကြောင်း ပက်ထရိုက ကြေငြာခဲ့ပြီး ကုလရဲ့အကူအညီ လာယူတဲ့ ပါလက်စတိုင်းတွေအပေါ် အစ္စရေးက ပစ်ခတ်သတ်ဖြတ်မှုကို တုန့်ပြန်တာလို့ ပြောပါတယ်။

    ဒီလုပ်ရပ်ဟာ ဟစ်တလာရဲ့ ‘ဂျူးတွေ အစုလိုက်အပြုံလိုက်သတ်ဖြတ်မှု’ မှု ပုံစံအတိုင်း လုပ်ဆောင်တာလို့လည်း ပက်ထရိုက ၀ေဖန်ခဲ့ပါတယ်။

    ၇ လနီးပါးရှိလာပြီဖြစ်တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲအတွင်း ပါလက်စတိုင်းပြည်သူ ၃၅၀၀၀ နီးပါး အသတ်ခံထားရပါတယ်။ အများစုဟာ အမျိုးသမီးနဲ့ ကလေးငယ်တွေ ဖြစ်ပါတယ်။

    အစ္စရေးက ဆေးရုံတွေကို ၀င်စီးပြီး လူနာတွေ၊ သက်ကြီးရွယ်အိုတွေကို အစုလိုက်အပြုံလိုက် သတ်ဖြတ်မှုမြှုပ်နှံထားတဲ့ နေရာတွေကိုလည်း ပြီးခဲ့တဲ့ သီတင်းပတ်အနည်းငယ်အတွင်းမှာ တွေ့လာရပါတယ်။

    Ref: Aljazeera

  • ICC ၏ဖမ်းဆီးမှု မခံရရေး ကူညီပေးရန် နေတန်ယာဟုက ဘိုင်ဒန်ထံ အကူအညီလှမ်းတောင်း

    ICC ၏ဖမ်းဆီးမှု မခံရရေး ကူညီပေးရန် နေတန်ယာဟုက ဘိုင်ဒန်ထံ အကူအညီလှမ်းတောင်း

    ဧပြီ ၃၀၊ ၂၀၂၄

    M-Media 


    -နိုင်ငံတကာ ရာဇ၀တ်ခုံရုံး ICC က အစ္စရေးအာဏာပိုင်တွေအပေါ် ဖမ်း၀ရမ်းမထုတ်ရေး ကူညီပေးဖို့ အမေရိကန်သမ္မတ ဂျိုးဘိုင်ဒန်ထံ အစ္စရေး၀န်ကြီးချုပ် နေတန်ယာဟုက ဖုန်းဆက် အကူအညီတောင်းခဲ့တယ်လို့ သိရပါတယ်။ 

    ဧပြီလ ၂၈ ရက်နေ့က ဒီလို ဖုန်းဆက် အကူအညီတောင်းခဲ့တာလို့ အမည်မဖော်လိုတဲ့ အစ္စရေးအစိုးရ တာ၀န်ရှိသူနှစ်ဦးက ပြောပါတယ်။ 

    ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အပြစ်မဲ့အရပ်သားတွေ သောင်းချီ အသတ်ခံရတဲ့ ကိစ္စအတွက် အစ္စရေးအာဏာပိုင်တွေဟာ နိုင်ငံတကာ တရားရေးစနစ်ကို ရင်ဆိုင်ရတော့မယ်လို့ ပြောဆိမှုတွေ ကျယ်ကျယ်ပြန့်ပြန့် ပေါ်ထွက်လာတဲ့အချိန် နေတန်ယာဟုက ဘိုင်ဒန်ထံ အကူအညီတောင်းခံမှု ပေါ်ပေါက်လာတာ ဖြစ်ပါတယ်။ 

    အစ္စရေးက ၀င်ရောက်စီးနင်းတိုက်ခိုက်ပြီး အစုလိုက်ပြုံလိုက် လူသတ်မှုတွေ ကျူးလွန်ခဲ့တဲ့ ဂါဇာက အကြီးဆုံး ဆေးရုံနှစ်ခုက ၀န်ထမ်းတွေရဲ့ ထွက်ဆိုချက်တွေကို ICC တာ၀န်ရှိသူတွေက သုံးသပ် စစ်ဆေးနေတယ်လို့ ရိုက်တာသတင်းဌာနက ပြီးခဲ့တဲ့ရက်ပိုင်းမှာ ဖော်ပြခဲ့ပါတယ်။

    ဂါဇာက ဒုတိယအကြီးဆုံး ဆေးရုံဖြစ်တဲ့ အလ်နာဆာရ် ဆေးရုံ၀င်းထဲမှာ အစ္စရေးက သတ်ဖြတ်မြှုပ်နှံထားတဲ့ နေရာတွေကို တူးဖော်ရာမှာ အနည်းဆုံး အလောင်း ၃၀၀ ကျော်တွေ့ခဲ့ပါတယ်။

    အသတ်ခံရသူ အများစုဟာ အမျိုးသမီးတွေ၊ သက်ကြီးရွယ်အိုတွေနဲ့ လူနာတွေဖြစ်တယ်လို့ မျက်မြင်သက်သေတွေက ထွက်ဆိုထားပါတယ်။ 

    Ref: Aljazeera

  • ဂါဇာတွင် အစ္စရေး၏ ဖျက်ဆီးထားမှုကို ရှင်းလင်းရန်ပင် ၁၄ နှစ်ကြာမည်

    ဂါဇာတွင် အစ္စရေး၏ ဖျက်ဆီးထားမှုကို ရှင်းလင်းရန်ပင် ၁၄ နှစ်ကြာမည်


    ဧပြီ ၃၀၊ ၂၀၂၄

    M-Media 


    -၆ လကျော်ကြာ ဂါဇာကို အစ္စရေးက တစ်ကျော့ပြန် တိုက်ခိုက်ဖျက်ဆီးမှုမှာ အပျက်အဆီးတွေဟာ တန်ချိန် ၃၇ ဒဿမ ၅ သန်း ရှိလာပြီလို့ ကုလသမဂ္ဂ အေဂျင်စီတွေက ထုတ်ပြန်ပါတယ်။

    လူနေအိမ်ယာတွေ အပါအ၀င် ဂါဇာက အခြေခံအဆောက်အဦးတွေရဲ့ ၈၀ ရာခိုင်နှုန်းလောက်ကို အစ္စရေးက တိုက်ခိုက်ဖျက်ဆီးထားတာပါ။ 

    ဒီအပျက်အဆီးတွေကို ရှင်းလင်းဖို့တင် ၁၄ နှစ်အချိန်ယူရမယ်လို့ ကျွမ်းကျင်သူတွေက ပြောပါတယ်။ 

    ဂါဇာမှာ အစ္စရေးက အသုံးပြုတဲ့ ဒုံးကျည်တွေနဲ့ ဗုံးတွေရဲ့ အနည်းဆုံး ၁၀ ရာခိုင်နှုန်းလောက်ဟာ မပေါက်ကွဲသေးဘဲ အပျက်အဆီးတွေကြားမှာ ရှိနေပါတယ်။ 

    ပြီးခဲ့တဲ့နှစ် အောက်တိုဘာ ၇ ရက်နေ့ကတည်းက စတင်တဲ့ အစ္စရေးရဲ့ ဂါဇာတစ်ကျော့ပြန် လူသတ်ပွဲအတွင်း အသတ်ခံရသူ အရေအတွက်ဟာ ၃၅၀၀၀ နီးပါး ရှိလာပြီဖြစ်ပါတယ်။ 

    Ref: Aljazeera