Tag: Palestine

မေ ၁၄၊ ၂၀၂၄

M-Media 

-ပြီးခဲ့တဲ့နှစ် အောက်တိုဘာလ ၇ ရက်နေ့က စတင်ခဲ့တဲ့ အစ္စရေးရဲ့ ဂါဇာတစ်ကျော့ပြန်လူသတ်ပွဲအတွင်း ကုလနဲ့ အကူအညီပေးရေးအဖွဲ့တွေကို ပစ်မှတ်ထားတိုက်ခိုက်မှု အနည်းဆုံး ၈ ကြိမ်အထိ ရှိခဲ့တယ်လို့ သိရပါတယ်။ 

လူ့အခွင့်အရေးစောင့်ကြည့်အဖွဲ့ (HRW) ရဲ့ မေလ ၁၃ ရက်နေ့က ထုတ်ပြန်တဲ့ အစီရင်ခံစာမှာ ဒီတိုက်ခိုက်မှုတွေရဲ့ အသေးစိတ်အချက်အလက်တွေကို ဖော်ပြထားပါတယ်။ 

အကူအညီပေးရေးအဖွဲ့တွေရဲ့ အဆောက်အဦးတွေ၊ အကူအညီပေးရေး ယာဥ်တန်းတွေကို အစ္စရေးက ပစ်မှတ်ထား တိုက်ခိုက်ခဲ့တာဖြစ်ပါတယ်။ 

တိုက်ခိုက်မှု ၈ ခုစလုံးမှာ တိုက်ခိုက်ခံရတဲ့ အကူအညီပေးရေးအဖွဲ့တွေဟာ သူတို့ရဲ့ လှုပ်ရှားမှု အသေးစိတ်ကို အစ္စရေးထံ ပေးပို့အကြောင်းကြားထားပြီးသားဖြစ်တယ်ဆိုတာ တွေ့ရကြောင်း HRW က ပြောပါတယ်။ 

ကုလနဲ့ အကူအညီပေးရေးအဖွဲ့တွေကို အကြမ်းဖက်တိုက်ခိုက်တာဟာ နိုင်ငံတကာဥပဒေအရ  စစ်ရာဇ၀တ်မှုဖြစ်ပါတယ်။ 

အစ္စရေးရဲ့ အကြမ်းဖက်တိုက်ခိုက်မှု ၈ ခုအတွင်း အကူအညီပေးရေး၀န်ထမ်း အနည်းဆုံး ၃၁ ဦး သေဆုံး၊ ဒဏ်ရာရရှိခဲ့ပါတယ်။ 

ကြိုတင်သတိပေးခြင်းမရှိဘဲ တမင်ပစ်မှတ်ထား တိုက်ခိုက်တာဖြစ်ပြီး အမေရိကန်လုပ် F-16 တိုက်လေယာဥ်တွေ၊ ဗြိတိန်လုပ် စစ်လက်နက်ပစ္စည်းတွေ အသုံးပြုခဲ့တာကို တွေ့ရကြောင်းလည်း HRW ရဲ့ အစီရင်ခံစာမှာ ထည့်သွင်းဖော်ပြထားပါတယ်။ 

“အကူအညီပေးရေး၀န်ထမ်းတွေ သေဆုံးတဲ့ ဒီလိုတိုက်ခိုက်မှုတွေ အကြိမ်ကြိမ်ဖြစ်ပွားနေတယ်ဆိုတာ အစ္စရေးရဲ့ မဟာမိတ်တွေက လက်ခံဖို့လိုပြီး ဒါကို ရပ်တန့်အောင် လုပ်ပေးရပါမယ်”လို့ HRW က တာ၀န်ရှိသူ ဘဲလ်ကစ် ၀ီလီက ပြောကြားခဲ့ပါတယ်။

Ref: Aljazeera 

မေ ၁၃၊ ၂၀၂၄

M-Media 

-ပြီးခဲ့တဲ့နှစ် အောက်တိုဘာလက စတင်တဲ့ ဂါဇာက တစ်ကျော့ပြန် လူသတ်ပွဲမှာ အစ္စရေးဟာ ကမ်းမြှောင်တစ်ခုလုံးက အခြေခံအဆောက်အဦး ၈၅ ရာခိုင်နှုန်းကျော်ကို တိုက်ခိုက်ဖျက်ဆီးထားပါတယ်။

ဖျက်ဆီးခံရတဲ့ အထဲမှာ မူလတန်း၊ အလယ်တန်း၊ အထက်တန်းကျောင်းတွေ၊ တက္ကသိုလ်တွေ၊ ကုလနဲ့ အကူအညီပေးရေးအဖွဲ့တွေရဲ့ ပရဟိတကျောင်းတွေလို့ ပညာရေးအဆောက်အဦးတွေ ပါ၀င်ပါတယ်။ 

ပညာရေးအဆောက်အဦးတွေကို ပစ်မှတ်ထားတိုက်ခိုက်ဖျက်ဆီးမှုဟာ နိုင်ငံတကာ ဥပဒေအရ စစ်ရာဇ၀တ်မှုမြောက်ပါတယ်။ အစ္စရေးကတော့ အမေရိကန်နဲ့ အနောက်နိုင်ငံတွေရဲ့ ကျောထောက်နောက်ခံနဲ့အတူ ၁၉၄၀ ပြည့်နှစ်တွေ ကတည်းက ပါလက်စတိုင်းဒေသမှာ စစ်ရာဇ၀တ်မှုပေါင်းများစွာကို ကျူးလွန်လာခဲ့တာ ဖြစ်ပါတယ်။ 

ဓာတ်ပုံတွေကတော့ အစ္စရေးက ဖျက်ဆီးထားတဲ့ ဂါဇာက နာမည်ကျော် တက္ကသိုလ်တွေ ဖြစ်ပါတယ်။ 

Ref: Aljazeera

မေ ၁၂၊ ၂၀၂၄

M-Media

-ပြီးခဲ့တဲ့နှစ် အောက်တိုဘာ ၇ ရက်နေ့က စတင်ခဲ့တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲအတွင်း အသတ်ခံရသူ အရေအတွက်ဟာ ၃၅၀၃၄ ဦး ရှိလာခဲ့ပြီ ဖြစ်ပါတယ်။ 

အသတ်ခံရသူတွေထဲမှာ ကလေးငယ် ၁၅၀၀၀ ပါ၀င်ပြီး ဒဏ်ရာရသူအရေအတွက်က ၇၈၇၅၅ ဦး ရှိနေပါတယ်။ အစ္စရေးက တိုက်ခိုက်ဖျက်ဆီးခဲ့တဲ့ အပျက်အဆီးတွေကြားထဲ ပိတ်မိပျောက်ဆုံးနေသူ အရေအတွက်က ၈၀၀၀ ကျော် ရှိနေပါတယ်။ 

ဂါဇာမှာ အစ္စရေးက အစုလိုက်အပြုံလိုက် သတ်ဖြတ်မြှုပ်နှံထားတဲ့ နေရာအများအပြားကိုလည်း တွေ့ရှိထားပါတယ်။ 

လက်ရှိမှာ ပါလက်စတိုင်းပြည်သူ တစ်သန်းကျော်ခိုလှုံနေတဲ့ ဂါဇာတောင်ဘက်စွန်း ရာဖာမြို့က ဒုက္ခသည်စခန်းတွေကို အစ္စရေးက အကြမ်းဖက် တိုက်ခိုက်ဖျက်ဆီးနေပြီး သေဆုံးဒဏ်ရာရသူအရေအတွက်ကလည်း ပိုမို တိုးလာပါတယ်။

ဂါဇာကမ်းမြှောင်တစ်ခုလုံးက လူနေအိမ်ယာတွေ၊ ဆေးရုံ၊ ကျောင်း စတဲ့ အခြေခံအဆောက်အဦး ၈၅ ရာခိုင်နှုန်းကျော်ကိုလည်း အစ္စရေးက ဖျက်ဆီးထားပါတယ်။  

Ref: Aljazeera 

မေ ၁၀၊ ၂၀၂၄

M-Media 

-အစ္စရေးက ကျူးကျော်သိမ်းပိုက် ထိန်းချုပ်ထားတဲ့ ပါလက်စတိုင်းပိုင် အရှေ့ဂျေရုစလင်က ကုလအကူအညီပေးရေးအဖွဲ့ UNRWA ရဲ့ ရုံးချုပ်ကို ဂျူးအစွန်းရောက်တွေက မေလ ၉ ရက်နေ့မှာ မီးရှို့ဖျက်ဆီးခဲ့ပါတယ်။ 

ရုံးချုပ်ကို အစွန်းရောက်တွေက ၂ ကြိမ်တိုင်တိုင် မီးရှို့ခဲ့တယ်လို့ UNRWA ကော်မရှင်နာမင်းကြီး ဖိလစ် လာဇာရီနီက ပြောပါတယ်။ တိုက်ခိုက်ခံရချိန်မှာ UNRWA နဲ့ အခြား ကုလအေဂျင်စီက ၀န်ထမ်းတွေ အဆောက်အဦးထဲမှာ ရှိနေပါတယ်။ 

သေနတ်ကိုင်ဆောင်ထားသူတွေပါ၀င်တဲ့ ဂျူးလူအုပ်ဟာ “ကုလသမဂ္ဂကို မီးရှို့ဖျက်ဆီးပစ်” ဆိုပြီး ကျွေးကြော်ကာ တိုက်ခိုက်ခဲ့ကြတယ်လို့ လာဇာရီနီရဲ့ ဆိုရှယ်မီဒီယာပို့စ်မှာ ထည့်သွင်းရေးသားထားပါတယ်။

ဒီတိုက်ခိုက်မှုကြောင့် ရုံးကို ယာယီ ပိတ်ထားလိုက်ရပြီး အကူအညီပေးမှုတွေကိုလည်း ရပ်ဆိုင်းထားရပါတယ်။ 

နာဇီရန်ကြောင့် ဥရောပကနေ ၀င်ရောက်လာတဲ့ ဂျူးလူမျိုးတွေ လက်နက်ကိုင်ကာ ပါလက်စတိုင်းတွေကို သတ်ဖြတ်မောင်းထုတ် နယ်မြေသိမ်းပိုက်ပြီး အစ္စရေးနိုင်ငံ ထူထောင်ခဲ့တဲ့ ၁၉၄၈ ခုနှစ်ကတည်းက UNRWA ဟာ ပါလက်စတိုင်းဒုက္ခသည်တွေကို ကူညီလာခဲ့တာဖြစ်ပါတယ်။ 

ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ UNRWA အပါအ၀င် ပါလက်စတိုင်းတွေကို ကူညီပေးနေတဲ့ နိုင်ငံတကာ အကူအညီပေးရေး အဖွဲ့အစည်းတွေကို အစ္စရေးက နည်းမျိုးစုံနဲ့ နှောက်ယှက် တိုက်ခိုက်နေတာ ဖြစ်ပါတယ်။ 

Ref: News UN