Tag: Palestine

မတ် ၁၂၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင် မြောက်ပိုင်းက ဂါဇာစီးတီးမှာ ကုလရဲ့အကူအညီ လာယူသူတွေ သတ်ဖြတ်ခံရမှု မတ်လ ၁၂ ရက်နေ့က ထပ်မံဖြစ်ပွားခဲ့ပါတယ်။ 

ဂါဇာစီးတီးမြို့လယ်က ကူ၀ိတ်အ၀ိုင်းမှာ ကုလရဲ့ထရပ်ကားအနီး အကူအညီလာယူသူတွေကို အစ္စရေးစစ်တပ်က ပစ်ခတ်သတ်ဖြတ်ခဲ့တာပါ။  

အနည်းဆုံး လူ ၇ ဦး သေဆုံးပြီး ၂၀ ကျော် ဒဏ်ရာရခဲ့တယ်လို့ ပါလက်စတိုင်းသတင်းဌာန Wafa က ဖော်ပြပါတယ်။

စားနပ်ရိက္ခာရှားပါးမှုကြောင့် ကုလရဲ့ အကူအညီ လာယူသူတွေကို အစ္စရေးက တိုက်ခိုက်သတ်ဖြတ်မှုဟာ ဖေဖော်၀ါရီလ အစောပိုင်းကတည်းက စတင်ဖြစ်ပွားခဲ့တာပါ။ 

ဖေဖော်၀ါရီ ၂၉ ရက်နေ့ ဂါဇာမြောက်ပိုင်းက တိုက်ခိုက်မှုဟာ အဆိုးဆုံးဖြစ်ပြီး လူ ၁၀၀ ကျော် သေဆုံးခဲ့ပါတယ်။ ဒီလုပ်ရပ်အတွက် ကမ္ဘာ့အသိုင်းအ၀ိုင်းက အစ္စရေးက ရှုတ်ချပြောဆိုခဲ့ပါတယ်။

မတ်လ ၄ ရက်နေ့မှာလည်း ဂါဇာစီးတီးက ကူ၀ိတ်အ၀ိုင်းမှာ ဒီဖြစ်ရပ်မျိုး ထပ်မံဖြစ်ပွားခဲ့ပြီး ဒါဇင်နဲ့ချီ အသတ်ခံခဲ့ရပါတယ်။  

Ref: Aljazeera 

မတ် ၁၂၊ ၂၀၂၄

M-Media 

-အစ္စလာမ်ဘာသာ၀င်တွေရဲ့ ရမ်ဇာန်ဥပုသ်လ ပထမနေ့မှာပဲ အစ္စရေးဟာ ဂျေရုစလင်က အလ်အက္ကဆွာဗလီ၀တ်ကျောင်းတော်မှာ နှောက်ယှက်တိုက်ခိုက်မှုတွေ တိုးမြှင့်ပြုလုပ်လာပါတယ်။ 

ရမ်ဇာန်လ ပထမနေ့ သာရာ၀ီအထူး၀တ်ပြုဆုတောင်းပွဲအတွက် အလ်အက္ကဆွာဗလီ၀တ်ကျောင်းထဲ လာရောက်တဲ့ ပါလက်စတိုင်းတွေကို အစ္စရေးက ရိုက်နှက်တာ၊ မောင်းထုတ်တာတွေ ပြုလုပ်ခဲ့တာပါ။ 

အွန်လိုင်းပေါ်ရောက်ရှိလာတဲ့ ဗီဒီယိုတစ်ခုမှာ အစ္စရေးစစ်တပ်ဟာ ဂျေရုစလင်မြို့ဟောင်းက အလ်အက္ကဆွာဗလီကို သွားရောက်ရာလမ်းမှာ ပါလက်စတိုင်းတွေကို ရိုက်နှက်နေတာကို တွေ့ရပါတယ်။ 

ဗလီဆီသွားရာလမ်းမှာ စစ်ဆေးရေးဂိတ် အမြောက်အများထားရှိကာ အသက် ၄၀ အောက် ပါလက်စတိုင်းတွေကို ဗလီထဲ၀င်ခွင့်မပေးဘဲ မောင်းထုတ်ပါတယ်။ 

ယူကေကကန့်ကွက်

ဒီလိုကန့်သတ်နှောက်ယှက်မှုတွေ လုပ်တာကို ကန့်ကွက်ကြောင်း ယူကေက ကြေငြာချက်ထုတ်ပါတယ်။ 

အရှေ့အလယ်ပိုင်း၊ မြောက်အာဖရိကနဲ့ ကုလဆိုင်ရာ ယူကေတာ၀န်ရှိသူ တာရစ်အဟ်မဒ်က ရမ်ဇာန်ဥပုသ်လအတွင်း ဂျေရုစလင်က မြင့်မြတ်ရာ နေရာတွေကို အဟန့်အတားမရှိ ၀င်ခွင့်ပေးဖို့ ဆိုရှယ်မီဒီယာမှာ ရေးသားခဲ့ပါတယ်။ 

“ရမ်ဇာန်လမှာ အလ်အက္ကဆွာဗလီ၀တ်ကျောင်းအတွင်း ၀င်ရောက်ခွင့် ကန့်သတ်တာဟာ မွတ်စလင်တွေရဲ့ ၀တ်ပြုခွင့်ကို ပိတ်ပင်တာဖြစ်ပြီး၊ တင်းမာမှုတွေကို ပိုမိုကြီးထွားအောင် လုပ်ဆောင်တာလည်း ဖြစ်ပါတယ်”

ပြီးခဲ့တဲ့နှစ် အောက်တိုဘာ ၇ ရက်နေ့ကတည်းက စတင်တဲ့ ဂါဇာက အစ္စရေးရဲ့ လူသတ်ပွဲကို ရမ်ဇာဥပုသ်လမှာ ရပ်နားဖို့ ကမ္ဘာတစ်၀ှမ်းက တောင်းဆိုခဲ့ပေမယ့်လည်း အစ္စရေးက တိုက်ခိုက်သတ်ဖြတ်မှုတွေ ဆက်လက်လုပ်ဆောင်နေပါတယ်။ 

ဂါဇာမှာ အစ္စရေးရဲ့ သတ်ဖြတ်မှုကို ခံရသူ ပါလက်စတိုင်းအရေအတွက်ဟာ ၅ လအတွင်း ၃၁၀၀၀ ကျော် ရှိလာပြီ ဖြစ်ပါတယ်။ 

Ref: Aljazeera 

မတ် ၁၁၊ ၂၀၂၄

M-Media 

-ပါလက်စတိုင်းနိုင်ငံ ဂါဇာကမ်းမြှောင်က ထင်ရှားတဲ့  ဘောလုံးသမား မိုဟာမက် ဘာရက်ဟာ မတ်လ ၁၁ ရက်နေ့မနက်က ခန်ယူနစ်မြို့မှာ သတ်ဖြတ်ခံလိုက်ရပါတယ်။ 

ဘာရက်ရဲ့နေအိမ်ကို အစ္စရေးက ဒုံးကျည်နဲ့ ပစ်ခတ်တိုက်ခဲ့တာပါ။ တိုက်စစ်မှုးဘာရက်ဟာ ဂါဇာပရီးမီးယားလိဂ်အသင်း Ahly Gaza က အဓိက ကစားသမားဖြစ်ပြီး၊ ပါလက်စတိုင်းလက်ရွေးစင်အသင်းအတွက် ကစားပေးထားသူလည်း ဖြစ်ပါတယ်။ 

ကစားသမား သက်တမ်းတစ်လျှောက် ၁၁၄ ဂိုးသွင်းထားပြီး ဂါဇာဘောလုံးသမိုင်းမှာ ဂိုးအများဆုံးသွင်းထားနိုင်တဲ့ ကစားသမားတွေထဲက တစ်ဦး ဖြစ်ပါတယ်။ 

ဘာရက်ဟာ ခန်ယူနစ်လူငယ်အသင်း Khan Younis Youth Club က အသင်းခေါင်းဆောင်နဲ့ ဂန္တ၀င်ကစားသမား ဖြစ်ပါတယ်။ ဂါဇာ၊ အနောက်ဖက်ကမ်းနဲ့ ဂျော်ဒန်တို့က အသင်းတော်တော်များများမှာလည်း ကစားဖူးပါတယ်။ 

“ပါလက်စတိုင်းဘောလုံးအသင်းရဲ့ ကွင်းတွင်း၊ ကွင်းပြင်မှာ အရေးပါသူတစ်ယောက်ကို ဆုံးရှုံးလိုက်ရတာပါ။ သူနဲ့ ပြိုင်ဘက်အဖြစ် ကျွန်တော် တွေ့ဖူးတယ်။ သူက မြန်တယ်၊ ခေါင်းသုံးကစားတယ်။ ထိပ်တန်းဂိုးသွင်းရှင်လည်း ဖြစ်ပါတယ်။ ကွင်းပြင်ပမှာ သူဟာ ကြင်နာသနားတတ်ပြီး၊ ဖော်လည်း ဖော်ရွေပါတယ်။ အသင်းသားအားလုံးက သူ့ကို ချစ်ကြတယ်” 

“အရမ်းစိတ်ဆိုးတယ်ဗျာ။ သူက ဂန္တ၀င်ကစားသမားတစ်ဦးပါ။ စစ်ပွဲတွေအတွင်း ဂါဇာက အားကစားကဏ္ဍလည်း ဆိုးဆိုးရွားရွား ဖျက်ဆီးခံရပါတယ်။ ကျွန်တော်တို့ ဘယ်လောက်အထိ ဆုံးရှုံးရအုံးမလဲ။ ဂါဇာက အားကစားအသိုင်းအ၀ိုင်းဟာ ပြိုကျပျက်ဆီးနေပါပြီ”လို့ Khadamat al-Maghazi အသင်း နောက်ခံလူ ခါလစ် အဘူ ဟာဘဲလ်က ပြောကြားခဲ့ပါတယ်။ 

အစ္စရေးဟာ ပါလက်စတိုင်းလူမျိုးစုရဲ့ အားကစား၊ စာပေ၊ အနုပညာ၊ ယဥ်ကျေးမှု စသဖြင့် နယ်ပယ်တိုင်းကို တိုက်ခိုက်ဖျက်ဆီးနေတာ ဖြစ်ပါတယ်။ 

Ref: Aljazeera 

မတ် ၈၊ ၂၀၂၄

M-Media

-မတ်လ ၈ ရက်နေ့မှာ ကျရောက်တဲ့ ကမ္ဘာ့အမျိုးသမီးများနေ့ကို ကမ္ဘာတစ်၀ှမ်း ဆင်နွှဲနေကြပေမယ့် ဂါဇာကမ်းမြှောင်က ပါလက်စတိုင်းအမျိုးသမီးတွေကတော့ အစ္စရေးရဲ့ အကြမ်းဖက် သတ်ဖြတ်မှုကို နေ့စဥ် ခံနေရပါတယ်။ 

ပြီးခဲ့တဲ့နှစ် အောက်တိုဘာ ၇ ရက်နေ့က စတင်တဲ့ အစ္စရေးရဲ့ ဂါဇာ တစ်ကျော့ပြန်လူသတ်ပွဲမှာ အသတ်ခံရတဲ့ ပါလက်စတိုင်းအရေအတွက်ဟာ ၃၁၀၀၀ နီးပါး ရှိလာပြီဖြစ်ပါတယ်။ 

ဒီအထဲမှာ အသတ်ခံရတဲ့ အမျိုးသမီးအရေအတွက်က အနည်းဆုံး ၉၀၀၀ လောက်ရှိပြီး ဒါဟာ တစ်ရက်ကို ပျမ်းမျှ ၆၃ ဦး အသတ်ခံနေရတာ ဖြစ်ပါတယ်။ အဲဒီအထဲမှာ ပျမ်းမျှ ၃၇ ဦးက မိခင်တွေ ဖြစ်ပါတယ်။ 

အစ္စရေးရဲ့ တိုက်ခိုက်မှုကြောင့် ပြိုကျပျက်ဆီးနေတဲ့ အဆောက်အဦးတွေအောက် ပိတ်မိပျောက်ဆုံးနေသူ အရေအတွက်ဟာ ထောင်သောင်းချီရှိပြီး အဲဒီအထဲမှာလည်း အမျိုးသမီးအများအပြား ပါ၀င်ပါတယ်။ 

ပြီးခဲ့တဲ့ ၂၄ နာရီအတွင်း အစ္စရေးဟာ ဂါဇာမှာ ပါလက်စတိုင်းပြည်သူ ၇၈ ဦး သတ်ဖြတ်ခဲ့ပြီး ဒဏ်ရာရသူ ၁၀၄ ဦး ရှိပါတယ်။ 

Ref: Aljazeera

မတ် ၂၊ ၂၀၂၄

M-Media

-ပြီးခဲ့တဲ့နှစ် အောက်တိုဘာ ၇ ရက်နေ့က စတင်ခဲ့တဲ့ ဂါဇာက အစ္စရေးရဲ့ တစ်ကျော့ပြန်လူသတ်ပွဲမှာ အသတ်ခံရသူအရေအတွက်ဟာ ၃၀၃၂၀ ဦး ရှိလာပြီ ဖြစ်ပါတယ်။

မတ်လ ၁ ရက်နေ့ ဂါဇာတောင်ပိုင်းက ဒုက္ခသည်စခန်းတွေမှာ အစ္စရေးရဲ့ တိုက်ခိုက်သတ်ဖြတ်မှုကိုခံရသူ ၉၂ ဦးရှိပြီး ၁၅၆ ဦး ဒဏ်ရာရခဲ့ပါတယ်။ 

၅ လနီးပါး အစ္စရေးရဲ့ အကြမ်းဖက်မှုအတွင်း ဂါဇာမှာ ဒဏ်ရာရသူအရေအတွက်က ၇၁၅၃၃ ဦးရှိပြီး၊ အဆောက်အဦးတွေကြားမှာ ပိတ်မိပျောက်ဆုံးနေသူ တစ်သောင်းနီးပါး ရှိပါတယ်။ 

ဂါဇာကမ်းမြှောင်က အဆောက်အဦးတွေရဲ့ ၈၅ ရာခိုင်နှုန်းကိုလည်း အစ္စရေးက ဖျက်ဆီးထားပါတယ်။ 

အစုလိုက်အပြုံလိုက် သတ်ဖြတ်မှု

—————-

အာဖရိကသမဂ္ဂ အကြီးအကဲ မူဆာ ဖာကီ မဟ်မတ်က အစ္စရေးဟာ ပါလက်စတိုင်းတွေကို အစုလိုက်အပြုံလိုက် သတ်ဖြတ်နေပြီး နိုင်ငံတကာအသိုင်းအ၀ိုင်းက စုံစမ်းစစ်ဆေးမှုတွေလုပ်ဖို့ တိုက်တွန်းခဲ့ပါတယ်။ 

ကုလရဲ့ အကူအညီ သွားယူသူတွေကို အစ္စရေးက ပစ်မှတ်ထား တိုက်ခိုက်တဲ့ ရာဇ၀တ်မှုကို မဟ်မတ်က အဓိက ထောက်ပြခဲ့ပါတယ်။ 

ဖေဖော်၀ါရီ ၂၉ ရက်နေ့ ဂါဇာမြောက်ပိုင်းမှာ အစ္စရေးရဲ့ ဒီအကြမ်းဖက်မှုကြောင့် အကူအညီလာယူသူ ၁၁၅ ဦး သေဆုံးကာ အနည်းဆုံး ၇၅၀ လောက် ဒဏ်ရာရရှိခဲ့ပါတယ်။ 

“အစ္စရေးတပ်ဖွဲ့တွေရဲ့ လက်ချက်ကြောင့် လူသားချင်းစာနာထောက်ထားမှုဆိုင်ရာ အကူအညီလာယူသူ ၁၀၀ ကျော် သေဆုံးဒဏ်ရာရတဲ့ တိုက်ခိုက်မှုကို အာဖရိကသမဂ္ဂကော်မရှင် အကြီးအကဲ မူဆာ ဖာကီ မဟ်မတ်က ပြင်းပြင်းထန်ထန် ရှုတ်ချပါတယ်” လို့ သမဂ္ဂရဲ့ ဆိုရှယ်မီဒီယာမှာ ဖော်ပြခဲ့ပါတယ်။

Ref: Aljazeera