ဖေဖော်၀ါရီ ၁၈၊ ၂၀၂၄
M-Media
-အစ္စရေးစစ်တပ်ရဲ့ သီတင်းပတ်ချီ ပိတ်ဆို့ဖြတ်တောက်မှုနဲ့ ၀င်ရောက်တိုက်ခိုက်မှုတွေကြောင့် ဂါဇာတောင်ပိုင်း ခန်ယူနစ်မြို့မှာရှိတဲ့ Nasser ဆေးရုံ လည်ပတ်မှု လုံး၀ရပ်ဆိုင်းသွားပြီလို့ ပါလက်စတိုင်း ကျန်းမာရေး အာဏာပိုင်တွေက ထုတ်ပြန်ပါတယ်။
Nasser ဆေးရုံဟာ ဂါဇာကမ်းမြှောင်က ဒုတိယအကြီးဆုံး ဆေးရုံလည်း ဖြစ်ပါတယ်။
“ဆေးရုံထဲမှာ လူနာတွေကို စောင့်ရှောက်ကုသဖို့ ၀န်ထမ်း ၄ ဦးသာ ကျန်ပါတော့တယ်” လို့ ဆေးရုံ ပြောရေးဆိုခွင့်ရှိသူ အက်ရှ်ရက်ဖ် အလ်-ကွဒ်ရာက ပြောပါတယ်။
ကမ္ဘာ့ကျန်းမာရေးအဖွဲ့ WHO ကလည်း အစ္စရေးတပ်ဖွဲ့တွေဟာ ကျန်းမာရေး၀န်ထမ်းတွေကို ဆေးရုံထဲ ၀င်ခွင့်မပေးဘူးလို့ ပြောပါတယ်။
“မိတ်ဖက်အဖွဲ့တွေနဲ့အတူ ဆေးရုံ၀န်းထဲ၀င်ကာ လောင်စာဆီ ပေးနိုင်ခဲ့ပေမယ့် လူနာတွေရဲ့အခြေအနေတွေနဲ့ အဓိကဆေး၀ါး လိုအပ်ချက်တွေကို ကြည့်ရှုစစ်ဆေးဖို့အတွက် WHO အဖွဲ့ဟာ ဆေးရုံအဆောက်အဦးထဲ ၀င်ခွင့်မရခဲ့ပါဘူး” လို့ အဖွဲ့အကြီးအကဲ Tedros Adhanom Ghebreyesus က ဆိုရှယ်မီဒီယာမှာ ရေးသားခဲ့ပါတယ်။
ဆေးရုံထဲမှာ လူနာ ၂၀၀ လောက်ရှိပြီး အဲဒီအထဲက အနည်းဆုံး ၂၀ ဟာ အခြားဆေးရုံတွေကို ရွှေ့ပြောင်းကုသဖို့ လိုအပ်နေသူတွေ ဖြစ်တယ်လို့လည်း Tedros က ပြောပါတယ်။
“ရွှေ့ပြောင်းကုသခွင့်ဟာ လူနာတိုင်းရဲ့ အခွင့်အရေး ဖြစ်ပါတယ်။ နှောက်နှေးကြန့်ကြာနေတာမျိုးဟာ လူနာအသက်ဆုံးသည်အထိ ဖြစ်စေနိုင်ပါတယ်။ ဆေးရုံထဲ၀င်ပြီး လူနာတွေကို ကုသခွင့် ပေးရမှာ ဖြစ်ပါတယ်”
Nasser ဆေးရုံကို အစ္စရေးက သီတင်းများစွာ ပိတ်ဆို့ တိုက်ခိုက်ခဲ့ပြီး၊ ပြီးခဲ့တဲ့ရက်ပိုင်းက စတင်ကာ ဆေးရုံထဲအထိ ၀င်ရောက်အကြမ်းဖက်ခဲ့ပါတယ်။ အစ္စရေးလက်ချက်ကြောင့် ဆေးရုံမှာ လျှပ်စစ်နဲ့ အောက်ဆီဂျက်ပြတ်တောက်ပြီး သေဆုံးရတဲ့လူနာဟာ ၃ ရက်အတွင်း ၅ ဦးအထိ ရှိလာပြီဖြစ်ပါတယ်။
ပြီးခဲ့တဲ့ ၂၄ နာရီအတွင်း ဂါဇာမှာ ပါလက်စတိုင်းပြည်သူ ၁၂၇ ဦးကို အစ္စရေးက သတ်ဖြတ်ခဲ့ပြီး၊ အောက်တိုဘာ ၇ ရက်နေ့နောက်ပိုင်း ဂါဇာမှာ အသတ်ခံရသူဦးရေဟာ ၂၈၉၈၅ ဦး ရှိလာပြီဖြစ်ပါတယ်။
Ref: Aljazeera
