Tag: Palestine

ဇန်န၀ါရီ ၆၊ ၂၀၂၃

M-Media 

-ပါလက်စတိုင်းပြည်သူတွေအပေါ် အစ္စရေးရဲ့ အကြမ်းဖက် တိုက်ခိုက်သတ်ဖြတ်မှုတွေနဲ့ ပတ်သက်ပြီး အရေးယူပေးဖို့ တောင်အာဖရိကနိုင်ငံက နိုင်ငံတကာ ခုံသမာဓိရုံး (ICJ) ထံ တင်ပြ တိုင်ကြားလိုက်ပါတယ်။ 

ပြီးခဲ့တဲ့တစ်ပတ်က တင်သွင်းတဲ့ တိုင်ကြားစာမှာ “အစ္စရေးရဲ့ လုပ်ရပ်တွေဟာ ပါလက်စတိုင်းတွေရဲ့ အမျိုးသား အမှတ်လက္ခဏာ၊ လူမျိုးရေးဖြစ်တည်မှုရဲ့ အရေးပါတဲ့ အစိတ်အပိုင်းတွေကို ဖျက်ဆီးဖို့ ရည်ရွယ်တာဖြစ်ပြီး၊ လူမျိုးတုန်းသတ်ဖြတ်မှုရဲ့ ၀ိသေသလက္ခဏာ ဖြစ်တယ်” လို့ ဖော်ပြထားပါတယ်။ 

“ဂါဇာမှာ ပါလက်စတိုင်းတွေကို သတ်ဖြတ်တာ၊ ရုပ်ပိုင်းဆိုင်ရာနဲ့ စိတ်ပိုင်းဆိုင်ရာ ပြင်းပြင်းထန်ထန် ထိခိုက်စေတာ၊ ရုပ်ပိုင်းဆိုင်ရာ ပျက်ဆီးစေဖို့ ရည်ရွယ်ပြီး ဘ၀ရပ်တည်မှု လိုအပ်ချက်တွေကို ဖျက်လိုဖျက်ဆီးလုပ်တာတွေ ပါ၀င်ပါတယ်”

အောက်တိုဘာ ၇ ရက်နေ့နောက်ပိုင်း ဂါဇာမှာ အစ္စရေးက လုပ်ဆောင်တဲ့ အကြမ်းဖက်လူသတ်ပွဲမှာ အသတ်ခံရသူ ပါလက်စတိုင်းအရေအတွက် ၂၃၀၀၀ နီးပါး ရှိလာပြီဖြစ်ပါတယ်။ 

ပါလက်စတိုင်းပိုင်နက် နောက်တစ်ခုဖြစ်တဲ့ အနောက်ဖက်ကမ်းမှာလည်း အစ္စရေးနဲ့ ဂျူးအစွန်းရောက်တွေရဲ့ လက်ချက်ကြောင့် သေဆုံးရသူ ပါလက်စတိုင်းအရေအတွက်ဟာ အောက်တိုဘာ ၇ ရက်နေ့နောက်ပိုင်း ၃၀၀ ကျော်လာပါပြီ။ 

ပါလက်စတိုင်းပိုင်နက်တွေမှာ အစ္စရေးရဲ့ လုပ်ရပ်တွေဟာ အရင် တောင်အာဖရိကမှာ လူဖြူတွေကြီးစိုးစဥ် လုပ်ဆောင်ခဲ့တဲ့ ခွဲခြားဖိနှိပ် ညှင်းပမ်းမှုမျိုးဖြစ်တယ်လို့ တောင်အာဖရိက သမ္မတ ဆိုင်ရီလ် ရာမာဖိုဆာက ပြောပါတယ်။ 

အစ္စရေးရဲ့ ဂါဇာလူသတ်ပွဲဟာ ကုလရဲ့ လူမျိုးတုန်းသတ်ဖြတ်မှု တိုက်ဖျက်ရေး သဘောတူညီချက်ကို ချိုးဖောက်နေတယ်လို့ တောင်အာဖရိကရဲ့ တိုင်ကြားစာမှာ ထည့်သွင်းဖော်ပြထားပါတယ်။ 

“ဂါဇာကမ်းမြှောင်က အစ္စရေးရဲ့ လက်ရှိတိုက်ခိုက်မှုတွေမှာ အရပ်သားတွေကိုအပေါ် အင်အားသုံးတာ၊ ဌာနေတွေကို အဓမ္မ မောင်းထုတ်တာတွေကြောင့် ပါလက်စတိုင်းပြည်သူတွေ ခံစားနေရတဲ့ ဒုက္ခတွေအတွက် တောင်အာဖရိကက အလွန်အမင်း စိုးရိမ်မိပါတယ်” လို့ တောင်အာဖရိက နိုင်ငံတကာ ဆက်ဆံရေးနဲ့ ပူးပေါင်းဆောင်ရွက်ရေးအဖွဲ့က ထုတ်ပြန်တဲ့ ကြေငြာချက်မှာ ဖော်ပြထားပါတယ်။ 

“လုံး၀အပစ်ရပ်ရေးကို ချက်ခြင်းဆောင်ရွက်ဖို့၊ ပါလက်စတိုင်းကို ရန်လိုသိမ်းပိုက်နေမှုကြောင့် ပေါ်ပေါက်လာတဲ့ တိုက်ခိုက်မှုတွေ အဆုံးသတ်စေမယ့် ဆွေးနွေးပွဲတွေ ဆောင်ရွက်ဖို့ တောင်အာဖရိကက ဆက်လက် တိုက်တွန်းလိုက်ပါတယ်”

တောင်အာဖရိကရဲ့ ဒီတိုင်ကြားမှုနဲ့ ပတ်သက်ပြီး ပူးပေါင်းဆောင်ရွက်နေတယ်လို့ ပါလက်စတိုင်း အာဏာပိုင်အဖွဲ့က ထုတ်ပြန်ပါတယ်။ 

Ref: Aljazeera 

ဒီဇင်ဘာ ၅၊ ၂၀၂၃

M-Media 

-အခုတစ်ပတ်အစောပိုင်း ဘေရွတ်မြို့မှာ အစ္စရေးက ပြုလုပ်ခဲ့တဲ့ တိုက်ခိုက်မှုနဲ့ ပတ်သက်ပြီး လက်ဘနွန်နိုင်ငံက ကုလ လုံခြုံရေးကောင်စီကို တိုင်ကြားလိုက်ပါတယ်။ 

အစ္စရေး လေယာဥ်တွေက လက်ဘနွန်လေပိုင်နက်ကို ကျူးကျော်၀င်ရောက်ကာ ဒုံးကျည် ၆ လုံးနဲ့ ဘေရွတ်မြို့က လူနေအိမ်ကို တိုက်ခိုက်ခဲ့တာလို့ တိုင်ကြားစာမှာ ဖော်ပြပါတယ်။

ဒီတိုက်ခိုက်မှုအတွင်း ပါလက်စတိုင်းလွတ်မြောက်ရေးအဖွဲ့ ဟားမက်စ်ရဲ့ ဒုတိယခေါင်းဆောင် အပါအ၀င် အနည်းဆုံး ၇ ဦး သေဆုံးခဲ့ပါတယ်။ 

လက်ဘနွန်လေပိုင်နက်ကို အစ္စရေးက ကျူးကျော်၀င်ရောက်ပြီး ဆီးရီးယားကို တိုက်ခိုက်နေတာကိုလည်း တိုင်ကြားစာမှာ ထည့်သွင်းဖော်ပြထားပါတယ်။ 

ဒုတိယကမ္ဘာစစ်အတွင်း နာဇီရန်ကြောင့် အရှေ့ဥရောပကနေ ပြေးလာရတဲ့ ဂျူးတွေ လက်နက်ကိုင်ပြီး ပါလက်စတိုင်းတွေကို သတ်ဖြတ်မောင်းထုတ်ကာ နယ်မြေသိမ်းပိုက်ပြီးနောက် ပေါ်ပေါက်လာတဲ့ အစ္စရေးနိုင်ငံဟာ ပတ်၀န်းကျင်နိုင်ငံတွေရဲ့ အချုပ်အခြာအာဏာကို အလေးမထားဘဲ ကျူးကျော်တိုက်ခိုက်မှုတွေကို နှစ်ပေါင်းများစွာ ပြုလုပ်နေတာ ဖြစ်ပါတယ်။ 

Ref: Aljazeera 

ဇန်န၀ါရီ ၂၊ ၂၀၂၃

M-Media 

-ပြီးခဲ့တဲ့ ၂၄ နာရီအတွင်း ဂါဇာကမ်းမြှောင်က အရပ်ဖက်နေရာ ၁၅ နေရာကို အစ္စရေးက တိုက်ခိုက်ကာ အနည်းဆုံး လူ ၂၀၀ လောက် သတ်ဖြတ်ခဲ့ပါတယ်။ 

တိုက်ခိုက်မှုအတွင်း ၃၃၈ ဦး ဒဏ်ရာရခဲ့တယ်လို့ ပါလက်စတိုင်း ကျန်းမာရေး၀န်ကြီးဌာနက ထုတ်ပြန်ပါတယ်။ 

အောက်တိုဘာ ၇ ရက်နေ့ အစ္စရေးရဲ့ လူသတ်ပွဲ စတင်ကတည်းက ဂါဇာမှာ အသတ်ခံရသူအရေအတွက်ဟာ ၂၂၁၈၅ ဦး ရှိလာပြီး ဒဏ်ရာ ရသူက အနည်းဆုံး ၅၇၀၀၀ ရှိနေပါတယ်။ 

အသတ်ခံရသူ အများစုဟာ အမျိုးသမီးတွေနဲ့ ကလေးငယ်တွေပါ။ 

ဟားမက်စ်ကို လက်တုန့်ပြန်တယ်လို့ အစ္စရေးက ထုတ်ပြန်ထားပေမယ့် နေအိမ်တွေ၊ စာသင်ကျောင်းတွေ၊ ဒုက္ခသည်စခန်းတွေနဲ့ ဆေးရုံတွေကို အဓိကထား တိုက်ခိုက်နေတာဖြစ်ပါတယ်။ 

ပါလက်စတိုင်းပိုင်နက်ဖြစ်တဲ့ အနောက်ဖက်ကမ်းမှာလည်း အစ္စရေးတပ်ဖွဲ့နဲ့ ဂျူးအစွန်းရောက်တွေက အောက်တိုဘာ ၇ ရက်နေ့နောက်ပိုင်း ပါလက်စတိုင်း ၂၃၀ ကျော်ကို သတ်ဖြတ်ထားပါတယ်။ 

Ref: Aljazeera

ဇန်န၀ါရီ ၂၊ ၂၀၂၃

M-Media 

-ဂါဇာကမ်းမြှောင်ကို ဒေသတွေခွဲပြီး လူမျိုးစုတွေကို အုပ်ချုပ်ခိုင်းကာ နောက်ကွယ်ကနေ ချုပ်ကိုင်ထားမယ့် အစ္စရေးရဲ့ အကြံအစည်ကို လက်မခံဘူးလို့ ပါလက်စတိုင်းလူမျိုးစုတွေက ထုတ်ပြန်ပါတယ်။ 

အောက်တိုဘာ ၇ ရက်နေ့ ဂါဇာမှာစတင်တဲ့ အစ္စရေးရဲ့ လူသတ်ပွဲကြောင့် သေဆုံးသူ ပါလက်စတိုင်းအရေအတွက်ဟာ ၂၂၀၀၀ ရှိလာပြီ ဖြစ်ပါတယ်။ 

အစ္စရေးဟာ ဂါဇာက ပါလက်စတိုင်းတွေကို အီဂျစ်ပိုင်နက်ထဲ အပြီးမောင်းထုတ်ဖို့ စီစဥ်နေတယ်ဆိုတဲ့ သတင်းတွေ ထွက်နေသလို၊ ဂါဇာကို အပိုင်းတွေပိုင်းကာ ပါလက်စတိုင်းလူမျိုးစုတွေထံ ခွဲ၀ေအုပ်ချုပ်ခိုင်းမယ်ဆိုတဲ့ သတင်းတစ်ခုလည်း အခုရက်ပိုင်းမှာ ထွက်လာပါတယ်။ 

လူမျိုးစုတွေအကြား သွေးကွဲစေမယ့် လက်၀ေခံ အုပ်ချုပ်ခိုင်းမှု စနစ်ကို လက်မခံဘူးလို့ ပါလက်စတိုင်း လူမျိုးစုကောင်စီက ဒီကနေ့မှာ ထုတ်ပြန်ပါတယ်။ 

“ကျူးကျော်သိမ်းပိုက်သူတွေဟာ ဂါဇာမှာ သူတို့ရဲ့ ကျရှုံးမှုကို ဖုံးကွယ်ဖို့နဲ့ ပါလက်စတိုင်း လူ့အဖွဲ့အစည်းမှာ ရှုပ်ထွေးမှုတွေ၊ ပြဿနာတွေ ဖန်တီးဖို့ လုပ်ဆောင်တာပါ” လို့ လူမျိုးစုကောင်စီရဲ့ ကော်မရှင်နာမင်းကြီး အက်ဖ် အလ်-မတ်စ်ဆာရီက ပြောပါတယ်။ 

ပါလက်စတိုင်း တော်လှန်ရေးအဖွဲ့တွေဖြစ်တဲ့ ဟားမက်စ်နဲ့ ဖာတာတို့အကြား အကွဲအပြဲတွေကို အဆုံးသတ်ကာ ညီညွတ်တဲ့ အမျိုးသားခေါင်းဆောင်မှုတစ်ရပ် ပေါ်ပေါက်လာဖို့လည်း သူက တိုက်တွန်းခဲ့ပါတယ်။

Ref: Aljazeera 

ဇန်န၀ါရီ ၁၊ ၂၀၂၃

M-Media 

• 

• 

-အသက် ၉ နှစ်အရွယ် ရာဇန်ရှာဘတ်ဟာ ဦးခေါင်းဒဏ်ရာ၊ ဦးနှောက်ထိခိုက်မှု၊ ခြေ၊ လက် သွင်သွင်ကြိုးနေကာ သတိလစ်တဲ့ အနေအအထားနဲ့ လွန်ခဲ့တဲ့ တစ်လအရင်က  အလ်အက္ကဆာဆေးရုံကို ရောက်ရှိလာခဲ့ပါတယ်။ 

ဘယ်သူဘယ်၀ါမှန်းမသိတဲ့အတွက် ပထမ ၄ ရက်အတွင်း သူမကို “အမည်မသိစာရင်း” ထဲ ထည့်သွင်းထားခဲ့ပါတယ်။

လက်ရှိအချိန်မှာတော့ ရာဇန်လေးဟာ အရေးပေါ်အခန်းကဆင်းကာ ဆေးရုံ၀န်းထဲက တဲတစ်ခုမှာ ဆေးကုသမှု ခံယူနေရဆဲပါ။ သူမရဲ့ မိဘနှစ်ပါးစလုံး အသတ်ခံလိုက်ရတယ်ဆိုတာကို ဆရာ၀န်တွေ၊ သူနာပြုတွေက သူမကို မပြော၀ံ့သေးပါဘူး။

ရာဇန်နဲ့ မိသားစုဟာ နူစီရတ် ဒုက္ခသည်စခန်းမှာ ခိုလှုံနေတဲ့အချိန် အစ္စရေးရဲ့ လေကြောင်းတိုက်ခိုက်မှု ခံခဲ့ရတယ်ဆိုတာ ကျန်းမာရေး၀န်ထမ်းတွေက စုံစမ်းသိရှိခဲ့ရပါတယ်။ အစ္စရေးရန်ကြောင့် ဂါဇာမြောက်ပိုင်း တူဖာမြို့ နေအိမ်ကနေ ထွက်ပြေးလာရပြီး ဒုက္ခသည်စခန်းမှာ နေထိုင်နေတဲ့အချိန် တိုက်ခိုက်ခံခဲ့ရတာလည်းဖြစ်ပါတယ်။ 

မိသားစုတစ်ခုလုံးမှာ ရာဇန်တစ်ယောက်သာ အသက်ရှင် ကျန်ရစ်ပါတယ်။ 

ဆေးရုံရောက်ပြီး ၅ ရက်မြောက်တဲ့နေ့ သတိရတဲ့အချိန်မှာ ရာဇန်က မိဘတွေအကြောင်း မေးပါတယ်။ 

“အသတ်ခံလိုက်ရတဲ့ မိဘတွေအကြောင်း ကလေးတွေက မေးတဲ့ မေးခွန်းတွေဟာ ဖြေရအခက်ဆုံး မေးခွန်းတွေပါ။ ရာဇန်လေး မေးတဲ့အချိန်မှာ ကျွန်တော် ဆွံ့အသွားတယ်။ သမီးလေးအဆင်ပြေသွားမှာပါလို့ပဲ ပြန်ဖြေခဲ့ရတယ်” လို့ အက်အက္ကဆာ ဆေးရုံရဲ့ အရေးပေါ်ဌာန ဆရာ၀န် ဒေါက်တာ အီဘရာဟင် မတ္တာရ်က ပြောပါတယ်။

“ရာဇန်လေးက သိပ်တော်တယ်၊ ချစ်ဖို့လည်းကောင်းတယ်။ တစ်မိသားစုလုံး အသတ်ခံလိုက်ရတယ်ဆိုသာ သူ မသိရှာဘူး။ အားလုံး ရှိနေသေးတယ်လို့ပဲ သူက ထင်နေသေးတယ်။ သူကို့ ဆေးကုသမှုမှာ အထစ်အငေါ့ မရှိစေချင်တာကြောင့် အမှန်ကို ပေးမသိရဲသေးဘူး” 

အောက်တိုဘာ ၇ ရက်နေ့နောက်ပိုင်း ဂါဇာက အစ္စရေးရဲ့ လူသတ်ပွဲမှာ ပါလက်စတိုင်းကလေးငယ် ၈၂၀၀ ကျော် အသတ်ခံထားရပါတယ်။ ရုပ်ပိုင်းဆိုင်ရာ၊ စိတ်ပိုင်းဆိုင်ရာ ထိခိုက်ဒဏ်ရာရသူ အရေအတွက်က အလွန်များပြားပါတယ်။ မိဘနှစ်ပါးလုံး၊ မိဘနဲ့ ဆွေမျိုးတွေအားလုံး အသတ်ခံလိုက်ရတဲ့ ကလေးငယ်တွေလည်း ရှိပါတယ်။ လက်ရှိမှာ ကျန်းမာရေး၀န်ထမ်းတွေက သူတို့ကို စောင့်ရှောက်ထားရပြီး အနာဂတ်မှာ ဘယ်လို စီမံရမလဲဆိုတာကိုလည်း မသိရှိသေးပါဘူး။ 

ဒီကလေးငယ်တွေမှာ သွားစရာမြေ မရှိတော့ပါဘူး။ 

မိဘမဲ့များ

အစ္စရေးရဲ့ တိုက်ခိုက်သတ်ဖြတ်မှုတွေကြောင့် ဆေးရုံရောက်လာသူ အများစုဟာ ကလေးငယ်တွေဖြစ်တယ်လို့ မတ္တာရ်က ပြောပါတယ်။ သူတို့ကို ကုသစောင့်ရှောက်ပေးဖို့ကလည်း ကျန်းမာရေး၀န်ထမ်းတွေအတွက် စိန်ခေါ်မှုတစ်ရပ်ပါ။ 

“တစ်ခြားလူနာတွေအားလုံး အိပ်ပျော်နေတဲ့အချိန် ညသန်းခေါင်လောက်မှာ ရာဇန်က ထပြီးအော်ငိုတယ်။ ဒဏ်ရာတွေကြောင့် အိပ်ဆေးမပေးရင် သူ မအိပ်နိုင်တော့ဘူး။ အိပ်ဆေးတွေ ထိုးထိုးပေးရတယ်။ နာတဲ့ဒဏ်တွေ လျော့သွားအောင် ညတိုင်း ကျွန်တော်သူ့ကို ပုံပြင်ပြောပြပြီး အာရုံလွှဲရပါတယ်” 

နာကျင်မှုဒဏ်ခံရပြီး၊ စိတ်ခြောက်ခြားနေတဲ့ ကလေးငယ်တွေကို ငြိမ်နေအောင်လုပ်ဖို့အတွက် ဂါဇာက ကျန်းမာရေး၀န်ထမ်းတွေဟာ အနာပျောက်ဆေးတွေ၊ အိပ်ဆေးတွေ ပိုမိုအသုံးပြုနေရပါတယ်။ ဒါဟာ သိပ်ကောင်းတဲ့အရာတော့ မဟုတ်ပါဘူး။ 

ကလေးငယ်တွေနဲ့ သင့်တော်မယ့် ဆေး၀ါး မရတဲ့အတွက် လူကြီးသုံးဆေး၀ါးတွေနဲ့ ကုသနေရတာပါ။ နောက်ပိုင်း ကျန်းမာရေးပြဿနာတွေ ဖြစ်လာမှာကို ဒေါက်တာ မတ္တာရ်က စိုးရိမ်နေပါတယ်။ 

အစ္စရေးရဲ့ အကြမ်းဖက် လူသတ်ပွဲ စတင်ကတည်းက သိန်းနဲ့ချီတဲ့ ဂါဇာပြည်သူတွေဟာ အိုးအိမ်စွန့်ခွာ ထွက်ပြေးခဲ့ရပြီး အန္တရာယ်ကင်းမယ်လို့ထင်တဲ့ ဆေးရုံတွေ၊ ကျောင်းတွေမှာ ခိုလှုံခဲ့ရပါတယ်။ အစ္စရေးကတော့ ဒီနေရာတွေကိုလည်း အလွတ်မပေးပါဘူး။ 

ဒဏ်ရာရတဲ့ ကလေးငယ်တွေ နေ့စဥ် ရောက်လာမှုနဲ့အတူ ဂါဇာက ဆေးရုံတွေဟာ မိဘမဲ့၊ မိသားစုမဲ့ကလေးငယ်တွေ ခိုလှုံရာနေရာ ဖြစ်လာပါတယ်။ 

အကောင်းဆုံးကြိုးစားနေ 

ဘေဘီ ဟာဆန် မက်ရှ်မက်ရှ်ကို အပျက်အဆီးတွေကြားထဲက ကယ်တင်ခဲ့ရချိန်မှာ အသက် ၅ ရက်သာ ရှိပါသေးတယ်။ ဒီရ် အလ်ဘာလာမြို့က သူတို့အိမ်ကို နို၀င်ဘာလမှာ အစ္စရေးက လေကြောင်းကနေ တိုက်ခိုက်ခဲ့ပြီး မိသာစုတစ်ခုလုံးနဲ့ ဆွေမျိုး စုစုပေါင်း ၅၈ ဦး သေဆုံးခဲ့ပါတယ်။ 

“သူနာပြုအဖွဲ့တစ်ခုလုံးက ဘေဘီ ဟာဆန် မက်ရှ်မက်ရှ်ကို စောင့်ရှောက်နေတယ်။ အန္တရာယ်ကင်းတယ်လို့ သူခံစားရပြီး ဆေးကုသမှုတွေကို အကောင်းဆုံးတုန့်ပြန်နိုင်အောင် ကျွန်မတို့ ကြိုးစားနေရပါတယ်”လို့ သူနာပြု ၀ါရ်ဒါ အလ်အာ၀ါဒါက ပြောပါတယ်။ 

နောက်ဆုံးမှာတော့ ဆွေမျိုးနီးစပ်တဲ့ အသက် ၅၄ နှစ်အရွယ် မိုဟာမက် မက်ရှ်မက်ရှ်ထံ ကလေးကို လွှဲပြောင်းပေးနိုင်ခဲ့ပါတယ်။ 

နောက်ထပ်ကလေးငယ်တစ်ဦးက မိုတက်ဇ် အဘူအီဆာ ဖြစ်ပါတယ်။ အသက် ၇ နှစ်အရွယ်ရှိပြီး မကြာသေးခင်ကမှ အရေးပေါ်ဌာနကနေ ဆင်းခဲ့ရသူပါ။ မိဘတွေကတော့ အသတ်ခံလိုက်ရပါတယ်။ တင်ပါးဆုံရိုး၊ လက်နဲ့ ခြေထောက် ကျိုးတဲ့ဒဏ်ကြောင့် ဆေးရုံမှာ ရက်ပေါင်း ၂၀ ကုသမှု ခံခဲ့ရပါတယ်။ 

“သူမှာ မိဘတွေမရှိတော့ဘူး။ အမျိုးဆိုလို့ ကျွန်တော်တစ်ယောက်တည်း ကျန်ပါတယ်။ သူဟာ တစ်ရက်ကို ထမင်းတစ်နပ်ပဲစားရတယ်။ ပါမုန့်နဲ့ ခရမ်းချဥ်းသီးအနည်းငယ်ပါ။ စစ်ပွဲပြီးရင် ယူအေအီးက သူ့ဦးလေးတွေဆီ သွားဖို့ အစက စီစဥ်ထားတာပါ။ အခုတော့ ဆေးသွားကုရမယ့် အနေအထား ဖြစ်သွားပါပြီ။ ဒီအခြေအနေ မကြာခင် ပြီးဖို့ သူ မျှော်လင့်နေပါတယ်”လို့ မိုတက်ဇ်ရဲ့ တစ်ဦးတည်းသော ဆွေမျိုး မိုဟာမက် အဘူအီဆာက ပြောပါတယ်။ 

Ref: Aljazeera