Tag: Palestine

ဇန်န၀ါရီ ၁၉၊ ၂၀၂၄

M-Media 

-အစ္စရေးရဲ့ အကြမ်းဖက်သတ်ဖြတ်မှုကို ၃ လကျော် ခံစားနေရတဲ့ ဂါဇာကမ်းမြှောင်က ပါလက်စတိုင်းပြည်သူတွေအတွက် အင်ဒိုနီးရှားက ဆေးရုံသင်္ဘောတစ်စီးကို ကြာသာပတေးနေ့မှာ စေလွှတ်လိုက်ပါတယ်။ 

အင်ဒိုနီးရှားဟာ ပါလက်စတိုင်းလွတ်မြောက်ရေး တစ်စိုက်မတ်မတ် ထောက်ခံလာတဲ့ နိုင်ငံတစ်ခုဖြစ်ပြီး အကူအညီတွေကိုလည်း မပြတ်တမ်း ပေးပို့နေတာ ဖြစ်ပါတယ်။ 

နို၀င်ဘာလအတွင်းက ဂါဇာကို လေယာဥ်နှစ်စီးစာ အကူအညီတွေ ပေးပို့ခဲ့ပါတယ်။ 

အခုတစ်ခေါက်မှာတော့ ဆေး၀ါးကုသရေး အခက်အခဲတွေ့နေတဲ့ ဂါဇာပြည်သူတွေအတွက် ဆေးရုံသင်္ဘော KRI Radjiman Wedyodiningrat-992 ကို စေလွှတ်ခဲ့တာပါ။ အီဂျစ်နိုင်ငံမှာ ဆိုက်ကပ်ပြီး ပါလက်စတိုင်းပြည်သူတွေကို အကူအညီပေးမှာဖြစ်ပါတယ်။ 

“လူသားဆန်မှုနဲ့ နိုင်ငံတကာ ဥပဒေတွေကို ကျော်လွန်ပြီး မရပ်မနား ပြုလုပ်နေတဲ့ တိုက်ခိုက်မှုတွေကြောင့် အတိဒုက္ခရောက် ထိခိုက်ခံစားနေရတဲ့ ဂါဇာက ညီအစ်ကိုမောင်နှမတွေကို အကူအညီတွေ ပေးဖို့အတွက် ဒီကနေ့ မင်းတို့ ထွက်ခွာရမှာဖြစ်တယ်။ စစ်ပွဲမှာ ငါတို့ မပါ၀င်ပေမယ့် ပါလက်စတိုင်းက ငါတို့ရဲ့ ညီအစ်ကိုမောင်နှမတွေနဲ့ အတူရှိကြောင်း၊ စာနာကြောင်း ပြသဖို့ ငါတို့မှာ တာ၀န်ရှိပါတယ်”လို့ အင်ဒိုနီးရှား ကာကွယ်ရေး၀န်ကြီး ပရာဘို၀ို ဆူဘီယန်တိုက သင်္ဘောပေါ် လိုက်ပါသွားတဲ့သူတွေကို ပြောကြားခဲ့ပါတယ်။ 

အင်ဒိုနီးရှား ဆေးရုံသင်္ဘောဟာ လုပ်ငန်းဆောင်ရွက်နိုင်ဖို့အတွက် အီဂျစ်အာဏာပိုင်တွေထံကနေ ခွင့်ပြုချက်တောင်းရမှာ ဖြစ်ပါတယ်။ 

ဂါဇာက အစ္စရေးရဲ့ တစ်ကျော့ပြန်လူသတ်ပွဲဟာ ၃ လကျော်လာခဲ့ပြီဖြစ်ပြီး ပါလက်စတိုင်းပြည်သူ ၂၄၀၀၀ ကျော် အသတ်ခံထားရပါတယ်။ 

လူနေအိမ်၊ ဆေးရုံ၊ စာသင်ကျောင်း၊ ဒုက္ခသည်စခန်း၊ ဘာသာရေးဆိုင်ရာနေရာတွေအပါအ၀င် ဂါဇာကမ်းမြှောင်က  အဆောက်အဦးတွေရဲ့ ၈၀ ရာခိုင်နှုန်းကျော်ကိုလည်း အစ္စရေးက ဖျက်ဆီးထားပါတယ်။ 

အခုတစ်ခေါက် အင်ဒိုနီးရှားရဲ့ အကူအညီမှာ ကလေးငယ်တွေအတွက် မရှိမဖြစ်လိုအပ်တဲ့ ပစ္စည်းတွေ၊ စားနပ်ရိက္ခာတွေ ပါ၀င်မှာဖြစ်ပါတယ်။ 

ဒီခရီးစဥ် အသွားအပြန် ရက်ပေါင်း ၅၀ ကြာမြင့်မယ်လို့ အင်ဒိုနီးရှား ရေတပ်က ပြောပါတယ်။ 

Ref: Arab News

ဇန်န၀ါရီ ၁၉၊ ၂၀၂၃

M-Media 

-ပါလက်စတိုင်းနိုင်ငံ ပေါ်ပေါက်လာရေးကို လက်မခံဘူးလို့ အစ္စရေး၀န်ကြီးချုပ် နေတန်ယာဟုက ထပ်မံ ပြောဆိုလိုက်ပါတယ်။ 

ဒုတိယကမ္ဘာစစ်က နာဇီရန်ကြောင့် အရှေ့ဥရောပကနေ ထွက်ပြေးလာတဲ့ ဂျူးတွေဟာ လက်နက်ကိုင်အဖွဲ့တွေ ဖွဲ့စည်းကာ ဒေသခံ ပါလက်စတိုင်းတွေကို သတ်ဖြတ်မောင်းထုတ်ပြီး ၁၉၄၈ ခုနှစ်မှာ အစ္စရေးနိုင်ငံကို ထူထောင်ခဲ့တာပါ။ 

အစ္စရေးရဲ့ မဟာမိတ်တွေဖြစ်တဲ့ အမေရိကန်နဲ့ ယူကေတို့ ကမကထပြုကာ သမိုင်း၀င်ပါလက်စတိုင်းဒေသရဲ့ ၆၅ ရာခိုင်နှုန်းကို ဂျူးတိုင်းပြည်၊ ၃၅ ရာခိုင်နှုန်းကို ပါလက်စတိုင်းနိုင်ငံအဖြစ် ကုလသမဂ္ဂကနေတစ်ဆင့် အဲဒီအချိန်က ခွဲ၀ေ သတ်မှတ်ပေးခဲ့တာ ဖြစ်ပါတယ်။

ဂျူးနိုင်ငံဖြစ်တဲ့ အစ္စရေးဟာ ၁၉၄၈ ခုနှစ်ကစလို့ ကုလက သတ်မှတ်ပေးထားတဲ့ ပါလက်စတိုင်းပိုင်နက်တွေကို နည်းပေါင်းစုံနဲ့ ကျူးကျော်သိမ်းပိုက်ကာ ပါလက်စတိုင်းပြည်သူတွေကိုလည်း ဖိနှိပ်သတ်ဖြတ်ခဲ့ပါတယ်။ 

ဂါဇာလူသတ်ပွဲစတင်ပြီး ၃ လကျော်အကြာမှာတော့ အစ္စရေးရဲ့ အဓိကမဟာမိတ် အမေရိကန်က ပါလက်စတိုင်းနိုင်ငံ ပေါ်ထွန်းလာရေးကိစ္စကို ထောက်ပြပြောဆိုလာပါတယ်။ နှစ်နိုင်ငံတည်ရှိရေးအဖြေကသာ အစ္စရေးအတွက် ပိုကောင်းမယ်လို့ အမေရိကန်က ဆိုပါတယ်။

အစ္စရေး၀န်ကြီးချုပ် နေတန်ယာဟုက ပါလက်စတိုင်းနိုင်ငံ ပေါ်ပေါက်လာရေးကို လက်မခံကြောင်း အမေရိကန်ကို တုန့်ပြန်ပြောကြားခဲ့တယ်လို့ ကြာသာပတေးနေ့ ရေဒီယိုအင်တာဗျူးမှာ ထည့်သွင်းပြောဆိုခဲ့ပါတယ်။ 

“အနာဂတ်အစီအစဥ်ကို ပြောရမယ်ဆိုရင် အစ္စရေးဟာ ဂျော်ဒန်မြစ်အနောက်ခြမ်းဒေသအားလုံးအပေါ် ထိန်းချုပ်ထားဖို့ လိုအပ်ပါတယ်။ ဒါဟာ (ပါလက်စတိုင်း)အချုပ်အခြာအာဏာဆိုတာနဲ့ သွားပြီး ပွတ်တိုက်နေတယ်။ အဲဒီတော့ ဘာလုပ်ရမလဲ။ ဒါကို လက်မခံဘူးဆိုတာ မိတ်ဆွေနိုင်ငံတွေကို ၀န်ကြီးချုပ်က ပြောနိုင်ဖို့ လိုအပ်ပါတယ်”

ကန်ကတုန့်ပြန် 

—————–

နေတန်ယာဟုရဲ့ ဒီမှတ်ချက်ကို အမေရိကန်ဖက်က ချက်ခြင်းဆိုသလို တုန့်ပြန်ပြောဆိုပါတယ်။ 

လက်ရှိစစ်ပွဲပြီးသွားရင် ဂါဇာကို သိမ်းပိုက်ထားတာမျိုး ရှိလို့မရတော့ဘဲ၊ နှစ်နိုင်ငံတည်ရှိရေးအဖြေကိုသာ အမေရိကန်က တစ်စိုက်မတ်မတ် ထောက်ခံရပ်တည်တယ်လို့ အမေရိကန် နိုင်ငံတော်လုံခြုံရေးအကြံပေး ဂျွန်ကီရ်ဘီက ပြောပါတယ်။ 

အမေရိကန်အစိုးရ ပြောရေးဆိုခွင့်ရှိသူ မက်သယူး မီလာကလည်း ဒေသတွင်းနိုင်ငံတွေက လုံခြုံရေး အာမခံချက်ပေးဖို့ အဆင်သင့်ဖြစ်နေတဲ့အတွက် ပါလက်စတိုင်းနိုင်ငံ ပေါ်ပေါက်လာရေးကို အစ္စရေးက လက်ခံကာ ဒီအခွင့်အလမ်းကို ရယူဖို့လိုတယ်လို့ ထောက်ပြ ပြောဆိုခဲ့ပါတယ်။ 

“အစ္စရေးက ကာလရှည် ရင်ဆိုင်နေရတဲ့ လုံခြုံရေးဆိုင်ရာ စိန်ခေါ်မှု၊ ဂါဇာပြန်လည်တည်ဆောက်ရေး၊ ဂါဇာမှာ အုပ်ချုပ်ရေးစနစ် ဖော်ဆောင်ရေး၊ ဂါဇာလုံခြုံရေးတို့လို လတ်တလော ကြုံရနိုင်တဲ့ စိန်ခေါ်မှုတွေကို ဖြေရှင်းဖို့ဆိုတာ ပါလက်စတိုင်းနိုင်ငံ တည်ထောင်ပေးတာကလွဲပြီး တစ်ခြားနည်းလမ်း မရှိပါဘူး”

Ref: Aljazeera 

ဇန်န၀ါရီ ၁၅၊ ၂၀၂၄
M-Media 

ကျွန်တော်ဟာ အစုလိုက်အပြုံလိုက် အသတ်ခံရမှု၊ ဒုက္ခသည်စခန်းတွေ၊ ခက်ခဲကြမ်းတမ်းမှုတွေနဲ့ နိုင်ငံပျောက်ဆုံးမှု (နက္ကဘာ)ကို ကြုံတွေ့ခဲ့ရတဲ့ မျိုးဆက်ထဲက လူတစ်ယောက်ပါ။ ဒုက္ခသည်ဘ၀ရောက်ပြီး၊ နေရပ်ပြန်ခွင့်ဆုံးရှုံးရတာမျိုး ကျွန်တော့်ဘ၀မှာ နောက်တစ်ခေါက် ထပ်မြင်ရလိမ့်မယ်လို့ မထင်မိခဲ့ဘူး။  ဂါဇာက ပါလက်စတိုင်းပြည်သူ ၇၀ ရာခိုင်နှုန်းလောက် ဒီလိုအခြေအနေ ကြုံနေရတာကို အခု မြင်နေရပါပြီ။ 

ရက်ပေါင်း ၁၀၀ အတွင်း ဂါဇာက ပါလက်စတိုင်းတစ်ဦးချင်းစီတိုင်းဟာ အကြိမ်ပေါင်းများစွာ အဓမ္မမောင်းထုတ်ခံရပါတယ်။ ဘေးအန္တရာယ် ကင်းဖို့အတွက် နေအိမ်တွေကနေ၊ ကုလစစ်ရှောင်စခန်း၊ အဲဒီကနေ ဒုက္ခသည်စခန်း အဆင့်ဆင့်ပြောင်းရွှေ့ခဲ့ရတယ်။ အသက်ရှင်ရေးကြိုးပမ်းတိုင်း ပါလက်စတိုင်းတွေ အသတ်ခံရပါတယ်။ အစ္စရေးဟာ အားလုံးကို ရည်ရွယ်ချက်ရှိရှိ ဖျက်ဆီးခဲ့တာပါ။ ကလေးတွေ၊ ဆရာ၀န်တွေ၊ ဂျာနယ်လစ်တွေ၊ အင်ဂျင်နီယာတွေ၊ ကဗျာဆရာတွေ၊ ပညာရှင်တွေ၊ လူ့အဖွဲ့အစည်းတည်ဆောက်ဖို့ လိုအပ်တာတွေ မှန်သမျှကို သတ်ဖြတ်၊ ရှင်းလင်းခဲ့ပါတယ်။ 

ဂါဇာမှာ နေစရာအိမ်မရှိဘူး၊ တက်စရာကျောင်းနဲ့ တက္ကသိုလ်တွေ မရှိတော့ဘူး၊ ကုစရာ ဆေးရုံတွေ မရှိဘူး၊ ၀တ်ပြုစရာ ဗလီတွေ၊ ဘုရားကျောင်းတွေ မရှိဘူး။ စိုက်ပျိုးစရာ လယ်ယာမြေတွေ မရှိဘူး၊ မုန့်ဖုတ်ဖို့ ဖိုတွေ မရှိတော့ဘူး၊ သောက်သုံးစရာ ရေမရှိဘူး၊ ၀ယ်စရာစျေးလည်း မရှိဘူး။ အန္တရာယ်မကင်းသလို၊ အနာဂတ်လည်း မရှိတော့ပါဘူး

(ကုလဆိုင်ရာ ပါလက်စတိုင်း ကိုယ်စားလှယ် မဂျစ် ဘမ်ယာ၏ ဇန်န၀ါရီ ၁၅ ရက်နေ့ မိန့်ခွန်းမှ…..)

ဇန်န၀ါရီ ၁၅၊ ၂၀၂၃

M-Media 

-ပါလက်စတိုင်းနိုင်ငံ အနောက်ဖက်ကမ်းဒေသမှာ ၂၀၂၃ ခုနှစ်အတွင်း သတ်ဖြတ်ခံရသူ အရေအတွက်ဟာ ၄၈၇ ဦး ရှိခဲ့တယ်လို့ သိရပါတယ်။ 

သတ်ဖြတ်မှုတွေကို အစ္စရေးတပ်ဖွဲ့တွေနဲ့ ပါလက်စတိုင်းပိုင်နက်အတွင်း ခိုး၀င်နေထိုင်နေတဲ့ တရားမ၀င် ဂျူးတွေက ကျူးလွန်တာဖြစ်ပါတယ်။ 

ဂါဇာက အစ္စရေးရဲ့ လူသတ်ပွဲစတင်တဲ့ အောက်တိုဘာ ၇ ရက်နေ့ နောက်ပိုင်း အနောက်ဖက်ကမ်းမှာလည်း ပါလက်စတိုင်းတွေအပေါ် သတ်ဖြတ်မှုတွေ ပိုမိုမြင့်တက်လာပါတယ်။ 

၂၀၂၃ ခုနှစ် ပထမ ၉ လအတွင်း အနောက်ဖက်ကမ်းမှာ ပျမ်းမျှ တစ်လကို ပါလက်စတိုင်း ၁၉၂ ဦး အသတ်ခံခဲ့ရပြီး အောက်တိုဘာ၊ နို၀င်ဘာနဲ့ ဒီဇင်ဘာလတွေမှာတော့ အသတ်ခံရသူ အရေအတွက်ဟာ တစ်လကို ၂၆၃ ဦးအထိ မြင့်တက်လာခဲ့ပါတယ်။ 

အနောက်ဖက်ကမ်းမှာ အစ္စရေးက ဓားစားခံအဖြစ် ဖမ်းဆီးထားတဲ့ ပါလက်စတိုင်းအရေအတွက် ထောင်နဲ့ချီ ရှိနေပါတယ်။ 

Ref: Aljazeera 

ဇန်န၀ါရီ ၁၄၊ ၂၀၂၄

M-Media 

-လူမျိုးတုန်းသတ်ဖြတ်မှုနဲ့ အစ္စရေးကို ICJ မှာ တရားစွဲဆိုနိုင်ခဲ့တာဟာ အလွန်အရေးပါတဲ့ အလှည့်အပြောင်းတစ်ခုလို့ တောင်အာဖရိက ရှေ့နေအဖွဲ့က ပြောကြားလိုက်ပါတယ်။ 

နယ်သာလန်မှာ ကြာသာပတေးနေ့နဲ့ သောကြောနေ့ ကြားနာမှုအပြီး တောင်အာဖရိကကို ပြန်ရောက်လာတဲ့ ရှေ့နေအဖွဲ့ကို ပြည်သူတွေက ကြိုဆိုခဲ့ကြပါတယ်။ 

ပါလက်စတိုင်းတွေအပေါ် အစ္စရေးရဲ့ ကျူးလွန်မှုတွေဟာ လူမျိုးတုန်းသတ်ဖြတ်မှုမြောက်တယ်လို့ ယူဆတဲ့အတွက် တောင်အာဖရိကဟာ ICJ ကို တင်ပြ တိုင်ကြားခဲ့တာ ဖြစ်ပါတယ်။ 

တောင်အာဖရိက ကိုယ်စားပြု ရှေ့နေအဖွဲ့ အဖွဲ့၀င် Tembeka Ngcukaitobi က သူတိုရဲ့တိုင်ကြားမှုဟာ အရေးပါတဲ့ အလှည့်အပြောင်း ဖြစ်ခဲ့ပြီး အစ္စရေးရဲ့ လုပ်ရပ်တွေကို ဥပဒေရှုထောင့်ကနေ ကမ္ဘာကြီးထံ ချပြနိုင်ခဲ့တယ်လို့ လေဆိပ်က သတင်းစာရှင်းလင်းပွဲမှာ ပြောကြားခဲ့ပါတယ်။ 

ပါလက်စတိုင်းပြည်သူတွေရဲ့ လွတ်မြောက်ရေးကြိုးပမ်းမှု ဆက်လက်ရှိနေအုံးမယ်လို့လည်းသူက မှတ်ချက်ပြုပါတယ်။ 

“ပါလက်စတိုင်းပြည်သူတွေ ရဲရဲရင့်ရင့် ကြိုးပမ်းလျှောက်လှမ်းနေတဲ့ လွတ်မြောက်ရေးခရီးရှည်မှာ တစ်ထောင့်တစ်နေရာကနေ ပါ၀င်ကူညီနိုင်ခဲ့တဲ့အတွက် တောင်အာဖရိက ရှေ့နေအဖွဲ့က ဂုဏ်ယူမိပါတယ်”

Ref: Aljazeera