Tag: Palestine

ဇူလိုင် ၂၈၊ ၂၀၂၁
M-Media

-ပါလက်စတိုင်းပိုင် အနောက်ဖက်ကမ်းမှာ မနေ့က အစ္စရေးတပ်ဖွဲ့တွေ သွေးအေးအေးနဲ့ ပစ်ခတ်သတ်ဖြတ်မှုကြောင့် ပါလက်စတိုင်းအမျိုးသားတစ်ဦး သေဆုံးခဲ့ပါတယ်။

အသက် ၄၁ အနှစ်အရွယ် ရှာဒီ အိုမာရ် လော့တ်ဖီ စလင်းဟာ ဘီတာရွာက သူ့ရဲ့နေအိမ်ကို အလုပ်ကနေ ပြန်လာစဉ်မှာ ရွာထိပ်မှာ တပ်စွဲထားတဲ့ အစ္စရေးတပ်ဖွဲ့တွေရဲ့ ပစ်ခတ်သတ်ဖြတ်မှုကို ခံလိုက်ရတာပါ။

ဘီတာရွာမှာ အစ္စရေးက တရားမဝင်အခြေချအိမ်ယာတွေ ဆောက်လုပ်မှုကြောင့် မတ်လကတည်းကစပြီး ဆန္ဒပြမှုတွေ ဖြစ်ပွားခဲ့ပါတယ်။ အစ္စရေးတပ်ဖွဲ့တွေကလည်း အင်အားသုံးနှိမ်နှင်းမှုကြောင့် အနည်းဆုံး ပါလက်စတိုင်း ၇ ဦး သေဆုံးခဲ့ပြီဖြစ်ပါတယ်။

မနေ့က အသက်ခံလိုက်ရတဲ့ စလင်းဟာ ကျေးရွာစည်ပင်ဌာနက ရေသန့်ဆိုင်ရာ အင်ဂျင်နီယာတစ်ဦးဖြစ်ပါတယ်။ ရွာမှာ တပ်စွဲထားတဲ့ သူတို့ တပ်ဖွဲ့ကို ခြုံခိုတိုက်ရာကနေ သေဆုံးသွားတာဖြစ်တယ်လို့ အစ္စရေးက ထုတ်ပြန်ခဲ့ပေမယ့် မျက်မြင်သက်သေတွေကတော့ စလင်းဟာ အလုပ်ကနေ အိမ်ပြန်လာစဉ်မှာ အသတ်ခံလိုက်ရတာလို့ ပြောကြားခဲ့ပါတယ်။

ဒီအသတ်ခံရမှုသတင်း ပြန့်နှံ့သွားပြီးနောက် ဘီတာရွာမှာ ဆန္ဒပြမှုတွေ ထပ်မံဖြစ်ပေါ်ခဲ့ပြီး အစ္စရေးတပ်ဖွဲ့တွေက အင်အားသုံးနှိမ်နှင်းတာကြောင့် အနည်းဆုံး ပါလက်စတိုင်း ၁၀၆ ဦး ဒဏ်ရာရရှိခဲ့ပါတယ်။

Ref: Aljazeera

ဇူလိုင် ၁၀၊ ၂၀၂၁
M-Media

-ပါလက်စတိုင်းပိုင် အနောက်ဖက်ကမ်းမှာ နယ်မြေကျူးကျော်ခံရမှုအတွက် ဆန့်ကျင်ဆန္ဒပြသူတွေကို အစ္စရေးတပ်ဖွဲ့က ပစ်ခတ်ဖြိုခွဲတာကြောင့် အနည်းဆုံး ပါလက်စတိုင်း ၄၀၀ နီးပါးလောက် ဒဏ်ရာရခဲ့ပါတယ်။

အနောက်​ဖက်ကမ်း နဘလုစ်မြို့နားက ဘိုင်တာဆိုတဲ့မြို့မှာ မနေ့က ဒီအဖြစ်အပျက် ဖြစ်ပွားခဲ့တာပါ။ ဂျူးအခြေချနေထိုင်သူတွေ၊ အစ္စရေးတပ်ဖွဲ့တွေက နယ်မြေတွေကို အဓမ္မသိမ်းယူပြီး စစ်စခန်းနဲ့ အခြေချအိမ်ယာတွေဆောက်လုပ်ဖို့ ကြိုးပမ်းမှုကို ပါလက်စတိုင်းတွေက ဆန့်ကျင်ဆန္ဒပြခဲ့တာ ဖြစ်ပါတယ်။

အစ္စရေးတပ်ဖွဲ့တွေဟာ မျက်ရည်ယိုဗုံးတွေ၊ ရာဘာကျည်ဆံတွေ၊ ကျည်အစစ်တွေ အသုံးပြုပြီး ဖြိုခွဲခဲ့တာ ဖြစ်ပါတယ်။

ဒီအဖြစ်အပျက်အတွင်း ပါလက်စတိုင်းပြည်သူ ၃၇၉ ဦး ဒဏ်ရာရခဲ့ပြီး ၃၁ ဦးက ကျည်အစစ်ဒဏ်ရာတွေဖြစ်တယ်လို့ ပါလက်စတိုင်း လခြမ်းနီအဖွဲ့က ပြောပါတယ်။

အနောက်ဖက်ကမ်းက ကာဖာရ် ကွဒ်ဒမ်မြို့နဲ့ ဟီဘရွန်မြို့တွေမှာလည်း နယ်မြေကျူးကျော်ခံရမှုအတွက် ပါလက်စတိုင်းတွေ ဆန္ဒပြခဲ့ကြပြီး အစ္စရေးတပ်ဖွဲ့တွေက အင်အားသုံး ဖြိုခွဲခဲ့ပါတယ်။

ပါလက်စတိုင်းပိုင် အနောက်ဖက်ကမ်းမှာ အစ္စရေးရဲ့ ကျူးကျော်အိမ်ယာ ၁၆၄ ခု၊ စစ်စခန်း ၁၁၆ ခုရှိပြီး ဂျူးအခြေချသူ ၆ သိန်းခွဲကျော် နေထိုင်နေကြတာ ဖြစ်ပါတယ်။ ကုလသမဂ္ဂနဲ့ ကမ္ဘာ့နိုင်ငံတွေက ဒီလုပ်ရပ်ဟာ တရားမဝင်ဘူးလို့ ပြောကြားထားပေမယ့် အစ္စရေးက ကျူးကျော်မှုတွေ ဆက်လက်လုပ်ဆောင်နေတာ ဖြစ်ပါတယ်။

Ref: Aljazeera

ဇွန် ၂၉၊ ၂၀၂၁
M-Media

-ပါလက်စတိုင်းပိုင် ​အရှေ့ဂျေရုစလင် အလ်-ဘူစတန်ရပ်ကွက်က ပါလက်စတိုင်း စီးပွားရေးလုပ်ငန်းတွေကို အစ္စရေးတပ်ဖွဲ့တွေက ဒီကနေ့မှာ ဖြိုချဖျက်ဆီးမှုတွေ လုပ်နေပြီး ပါလက်စတိုင်းတွေကလည်း ဆန္ဒပြ တုန့်ပြန်တာတွေ ရှိလာပါတယ်။

အစ္စရေးတပ်ဖွဲ့တွေဟာ ဘူဒိုဇာတွေနဲ့ ဝင်ရောက်လာတာဖြစ်ပြီး ဆန္ဒပြတဲ့ ပါလက်စတိုင်းတွေကို တုတ်တွေနဲ့ ရိုက်တာ၊ ရာဘာကျည်တွေနဲ့ ပစ်တာ၊ မျက်ရည်ယိုဗုံးသုံးပြီး လူစု​ခွဲတာတွေ လုပ်ခဲ့ပါတယ်။

ဒီအဖြစ်အပျက်မှာ အနည်းဆုံး ပါလက်စတိုင်း ၄ ဦး ဒဏ်ရာ ရရှိခဲ့တယ်လို့ ပါလက်စတိုင် လခြမ်းနီအဖွဲ့က ထုတ်ပြန်ပါတယ်။

အလ်-ဘူစတန်ရပ်ကွက်က ပါလက်စတိုင်းစီးပွားရေးလုပ်ငန်းတွေ၊ အဆောက်အဦးတွေကို ၂၁ ရက်အတွင်း ဖျက်ဆီးပေးဖို့ ဇွန်လ ၇ ရက်နေ့မှာ အစ္စရေးစည်ပင်ဌာနက ထုတ်ပြန်ခဲ့တာပါ။ ကိုယ်တိုင်မဖျက်ရင် ဖျက်ခ ကန်ဒေါ် ၆၀၀၀ ပေးရမယ်လို့လည်း ထုတ်ပြန်ချက်မှာ ပါဝင်ပါတယ်။

ဒီလုပ်ရပ်ကြောင့် ပါလက်စတိုင်းပြည်သူ ၁၃၀ လောက် အိုးမဲ့အိမ်မဲ့ ဖြစ်ခဲ့ရပါတယ်။

အရှေ့ဂျေရုစလင်က အလ်-ဘူစတန်ရပ်ကွက်မှာ အစ္စရေးဟာ ၂၀၀၅ ခုနှစ်ကစတင်ပြီး ပါလက်စတိုင်းတွေရဲ့ နေအိမ်တွေကို တစ်ဖြည်းဖြည်းချင်း ဖြိုချဖျက်ဆီးခဲ့တာ ဖြစ်ပါတယ်။

အရှေ့ဂျေရုစလင်က တစ်ခြားနေရာတွေမှာလည်း ဂျူးအခြေချနေထိုင်သူတွေနဲ့ အစ္စရေးတပ်ဖွဲ့တွေက ပါလက်စတိုင်းတွေရဲ့ နေအိမ်တွေကို လုယူတာ၊ ဖြိုချဖျက်ဆီးတာတွေ လုပ်လေ့ရှိတာကြောင့် ပါလက်စတိုင်း ပြည်သူတွေနဲ့ ထိပ်တိုက်တွေ့ဆုံမှု မကြာခဏ ဖြစ်ပေါ်လေ့ရှိပါတယ်။

Ref: Aljazeera

ဇွန် ၂၅၊ ၂၀၂၁
M-Media

-ပါလက်စတိုင်းပိုင်နက်တွေမှာ အိမ်ယာတွေဆောက်လုပ်နေတာဟာ နိုင်ငံတကာဥပဒေကို ချိုးဖောက်တာဖြစ်ပြီး ဒါကို ချက်ခြင်းရပ်တန့်ဖို့ ကုလသမဂ္ဂက အစ္စရေးကို ပြောကြားလိုက်ပါတယ်။

အနောက်ဖက်ကမ်းနဲ့ အရှေ့ဂျေရုစလင်တို့လို ပါလက်စတိုင်းဒေသတွေမှာ အစ္စရေးက ကျူးကျော်အိမ်ယာ ဆောက်လုပ်နေမှုတွေဟာ ‘တရားမဝင်ဘူး’ လို့ ကုလသမဂ္ဂလုံခြုံရေးကောင်စီက ၂၀၁၆ ခုနှစ်မှာ ဆုံးဖြတ်ချက် ချခဲ့တာပါ။

ကုလအတွင်းရေးမှူးချုပ် အန်တိုနီယိုဂူတာရက်စ်၊ ကုလရဲ့ အရှေ့အလယ်ပိုင်းဆိုင်ရာ သံအမတ် တောရ် ဝမ်နက်စ်လန်တို့က ဒီဆုံးဖြတ်ချက်ကို အကောင်အထည်ဖော်ဖို့ အစ္စရေးကို တိုက်တွန်းခဲ့ပါတယ်။

လုံခြုံရေးကောင်စီကို အတွင်းရေးမှူးချုပ်က တင်သွင်းတဲ့ ၁၂ မျက်နှာပါ အစီရင်ခံစာမှာ အရှေ့ဂျေရုစလင်က အိမ်အလုံးပေါင်း ၅၄၀ ပါဝင်တဲ့ Har Homa အိမ်ယာနဲ့ စစ်စခန်းတွေ တည်ဆောက်ဖို့ အစ္စရေးက စီစဉ်နေမှုဟာ ‘အလွန်အမင်း စိတ်ပျက်ဖွယ်ရာဖြစ်တယ်’ လို့ ဖော်ပြထားပြီး ဝမ်နက်စ်လန်ကလည်း ဒါဟာ ‘အစ္စရေးရဲ့ ဥပဒေနဲ့လည်း မကိုက်ညီဘူး’ လို့ ပြောကြားခဲ့ပါတယ်။

“အစ္စရေးရဲ့ အခြေချအိမ်ယာတွေဟာ ကုသမဂ္ဂ ဆုံးဖြတ်ချက်တွေနဲ့ နိုင်ငံတကာ ဥပဒေကို ပြောင်ပြောင်တင်းတင်း ချိုးဖောက်နေတာဖြစ်ကြောင်း ကျွန်တော် ရှင်းရှင်းလင်းပဲ ထောက်ပြပြောဆိုချင်ပါတယ်။ ​၂ နိုင်ငံတည်ရှိရေး၊ တရားမျှတ ပြည့်စုံပြီး ရေရှည်တည်တံ့တဲ့ ငြိမ်းချမ်းမှု ရရှိရေးမှာ ဒီအိမ်ယာတွေက ခလုပ်ကန်သင်းဖြစ်နေပါတယ်။ အိမ်ယာတွေ ထပ်တိုးဆောက်လုပ်နေတဲ့လုပ်ရပ်ကို ချက်ခြင်း ရပ်တန့်ရပါမယ်”

ပါလက်စတိုင်းပိုင်နက်တွေမှာ ပါလက်စတိုင်းနေအိမ်တွေကို ဖျက်ဆီးဖြိုချတဲ့လုပ်ရပ်တွေကို ရပ်တန့်ဖို့လည်း ဂူတာရက်စ်နဲ့ ကုလရဲ့ အရှေ့အလယ်ပိုင်း သံတမန်တို့က ထည့်သွင်းတောင်းဆိုခဲ့ပါတယ်။

ဂျူးအခြေချနေထိုင်သူတွေနဲ့ အစ္စရေးတပ်ဖွဲ့တွေဟာ ပါလက်စတိုင်းတွေရဲ့ နေအိမ်တွေကို လုယူတာ၊ ဖျက်ဆီးဖြိုချတာတွေ ပြုလုပ်တာကြောင့် နောက်ဆက်တွဲအဖြစ် ပါလက်စတိုင်းတော်လှန်ရေးအဖွဲ့တွေနဲ့ အစ္စရေးတို့အကြား တိုက်ခိုက်မှုတွေ ဖြစ်ပွားလေ့ရှိပါတယ်။

Ref: Reuters