Tag: Palestine

ဒီဇင်ဘာ ၁၈၊ ၂၀၂၁
M-Media

-အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ မနေ့က ဂျူးအခြေချသူတွေက ပါလက်စတိုင်းရွာတွေကို ဝင်ရောက်တိုက်ခိုက်မှု ဖြစ်ပွားခဲ့ပြီး အနည်းဆုံး ၂ ဦး ဒဏ်ရာရခဲ့ပါတယ်။

အနောက်ဖက်ကမ်းမြောက်ဖက် နဘ်လုစ်မြို့က ရွာတော်တော်များများကို သောကြာနေ့မနက် အစောင်းပိုင်းမှာ ဂျူးအခြေချသူတွေ အုပ်စလိုက် ဝင်ရောက်လာပြီး ကားတွေရိုက်ခွဲတာ၊ အိမ်တွေ၊ ဆိုင်တွေ၊ အဆောက်အဦး တိုက်ခိုက်ဖျက်ဆီးတာတွေ လုပ်ဆောင်ခဲ့ပါတယ်။

ဒီအဖြစ်အပျက်အတွင်း ပါလက်စတိုင်း ၂ ဦး ထိခိုက်ဒဏ်ရာရခဲ့ပြီး ဆေးရုံတင်ထားရပါတယ်။ ဂျူးအခြေချနေထိုင်သူတွေဟာ ပါလက်စတိုင်းတစ်ချို့ကို ပြန်ပေးဆွဲဖို့ ကြိုးစားတာတွေ၊ သေနတ်နဲ့ပစ်တာတွေ ရှိတယ်လို့ မျက်မြင်သက်သေတွေက ပြောပါတယ်။

ပါလက်စတိုင်းပိုင် အနောက်ဖက်ကမ်းဒေသမှာ အစ္စရေးက တရားမဝင်အိမ်ယာတွေ ဆောက်လုပ်ပြီး ဂျူးအခြေချနေထိုင်သူတွေကို နေထိုင်စေတာပါ။ ဒီလို နယ်မြေခိုးယူတာကို မကျေနပ်တဲ့အတွက် ပါလက်စတိုင်းတွေက အိမ်ယာတွေကို တိုက်ခိုက်တာမျိုး မကြာခဏ ဖြစ်ပွားလေ့ ရှိပါတယ်။

ကြာသာပတေးနေ့က အနောက်ဖက်ကမ်းက တရားမဝင်အခြေချအိမ်ယာမှာ ကားတစ်စီး သေနတ်နဲ့ အပစ်ခံရတာကြောင့် ဂျူးအခြေချနေထိုင်သူ ၁ ဦး သေဆုံးပြီး၊ ၂ ဦး ဒဏ်ရာရခဲ့ပါတယ်။

ပါလက်စတိုင်းပိုင် အနောက်ဖက်ကမ်းနဲ့ အရှေ့ဂျေရုစလင်မှာ အစ္စရေးရဲ့ တရားမဝင်အိမ်ယာပေါင်း ၂၈၀ လောက်ရှိပြီး ဂျူးအခြေချနေထိုင်သူ ၇ သိန်းကျော် နေထိုင်နေပါတယ်။

နိုင်ငံတကာဥပဒေအရေ ဒီအိမ်ယာတွေဟာ တရားမဝင်ဘဲ၊ ကမ္ဘာ့နိုင်ငံတွေကလည်း အစ္စရေးရဲ့ ဒီလုပ်ရပ်ကို တစ်စိုက်မတ်မတ် ရှုတ်ချထားပါတယ်။

Ref: Aljazeera

အောက်တိုဘာ ၂၅၊ ၂၀၂၁
M-Media

-ပါလက်စတိုင်းပိုင် အနောက်ဖက်ကမ်းက ဒေသတွေမှာ ကျူးကျော်အိမ်ယာ ၁၃၅၅ လုံး ဆောက်လုပ်မယ့် အစီအစဉ်ကို အစ္စရေးက ထုတ်ပြန်ကြေငြာလိုက်ပြီး ပါလက်စတိုင်းဖက်က အပြင်းအထန် ကန့်ကွက်ရှုတ်ချလာပါတယ်။

လက်ယာပါတီ New Hope က အဖွဲ့ဝင်တစ်ဦးဖြစ်ပြီး အစ္စရေး အိုးအိမ်ဝန်ကြီးလည်းဖြစ်တဲ့ ဇီဗ် အီလ်ကင်က ‘ဇိုင်ယွန်ရည်မှန်းချက် ပြည့်၀ဖို့အတွက် အနောက်ဖက်ကမ်းမှာ ဂျူးတွေအများအပြားတည်ရှိရေးဟာ အဓိကကျတယ်’ လို့ ပြောကြားခဲ့ပါတယ်။

ဇိုင်ယွန်ရည်မှန်းချက်ဆိုတာ ပါလက်စတိုင်းပိုင်နက်တစ်ခုလုံးကို သိမ်းပိုက်ရေးဖြစ်ပြီး ၁၈ ရာစုလောက်ကတည်းက ကမ္ဘာတစ်ဝှမ်းကဂျူးတွေ ပူးပေါင်းကြံစည်လာတာ ဖြစ်ပါတယ်။

နာဇီရန်ကြောင့် အရှေ့ဥရောပက ထွက်ပြေားလာတဲ့ဂျူးတွေ ၁၉၄၈ ခုနှစ်မှာ ပါလက်စတိုင်းပိုင်နက်တွေကို သိမ်းပိုက်ကာ အစ္စရေးနိုင်ငံအဖြစ် ထူထောင်ခဲ့ပြီး၊ အဲဒီအချိန်ကစလို့ ကျန်ရှိတဲ့ ပါလက်စတိုင်းပိုင်နက်တွေကို တစ်စတစ်စ အစ္စရေးက သိမ်းပိုက်လာတာပါ။

ပါလက်စတိုင်းတွေဟာ အရှေ့ဂျေရုစလင်အပါအဝင် အနောက်ဖက်ကမ်းနဲ့ ဂါဇာကမ်းမြှောင်ဒေသပေါင်းပြီး လွတ်လပ်တဲ့ ပါလက်စတိုင်းနိုင်ငံအဖြစ် ထူထောင်လိုနေတာ ဖြစ်ပါတယ်။

အစ္စရေးရဲ့ ပါလက်စတိုင်းပြည်သူတွေအပေါ် အခုလို ခြိမ်းခြောက်မှုတွေ၊ ကျူးကျော်မှုတွေကို နိုင်ငံတကာအသိုင်းအ၀ိုင်း အထူးသဖြင့် အမေရိကန်နိုင်ငံက ရင်ဆိုင်ဖြေရှင်းကြဖို့ ပါလက်စတိုင်းဝန်ကြီးချုပ် မိုဟာမက် ရှတေယာက မနေ့က အစိုးရအစည်းအဝေးမှာ ပြောကြားခဲ့ပါတယ်။

အစ္စရေးရဲ့ ဒီလုပ်ရပ်ဟာ နှစ်နိုင်ငံတည်ရှိရေးအဖြေကို ထိခိုက်စေတဲ့အတွက် ရှုတ်ချကြောင်း၊ ဒီကိစ္စကို အနီးကပ် စောင့်ကြည့်နေကြာင်း ရှတေယာက ထည့်သွင်းပြောဆိုခဲ့ပါတယ်။

အနောက်ဖက်ကမ်းက အစ္စရေးရဲ့ ကျူးကျော်အိမ်ယာတွေမှာ နေထိုင်တဲ့ ဂျူးအရေအတွက်ဟာ ၄၇၅၀၀၀ ရှိနေပါပြီ။ ဒီအိမ်ယာတွေဟာ နိုင်ငံတကာဥပဒေအရ တရားမဝင်ဘူးလို့လည်း နိုင်ငံတကာအသိုင်းအ၀ိုင်းက ပြောကြားထားပါတယ်။

ဂျော်ဒန်နိုင်ငံက အစ္စရေးရဲ့ ဒီလုပ်ရပ်ကို ရှုတ်ချခဲ့ပြီး ဒါဟာ နိုင်ငံတကာဥပဒေကို ချိုးဖောက်တာဖြစ်တယ်လို့ ပြောကြားခဲ့ပါတယ်။

Ref : Aljazeera

စက်တင်ဘာ ၂၆၊ ၂၀၂၁

M-Media

-အစ္စရေးရဲ့ ကျူးကျော်တိုက်ခိုက်မှုတွေကြောင့် အကြီးအကျယ် ပျက်ဆီးခဲ့ရတဲ့ ဂါဇာကမ်းမြှောင်ဒေသ ပြန်လည်တည်ဆောက်ရေး ပထမအဆင့်လုပ်ငန်းတွေကို မကြာခင် စတင်တော့မယ်လို့ သိရပါတယ်။

အစ္စရေးဟာ ဂါဇာဒေသကို မကြာခဏ လေကြောင်းကနေ တိုက်ခိုက်ဖျက်ဆီးလေ့ရှိပါတယ်။ ပါလက်စတိုင်းတော်လှန်ရေးအဖွဲ့ ဟားမက်စ်ကို တိုက်ခိုက်တာလို့ အကြောင်းပြပေမယ့် ထိခိုက်သေဆုံးမှုအများစုက အရပ်သားတွေပါ။ အစ္စရေးဟာ ဂါဇာက လူနေတိုက်တာတွေ အခြေခံအဆောက်အဦးတွေကိုလည်း ပစ်မှတ်ထား ဖျက်ဆီးလေ့ရှိပါတယ်။

ပြီးခဲ့တဲ့မေလ ၁၁ ရက်ကြာမြင့်တဲ့ အစ္စရေးရဲ့ နောက်ဆုံးတိုက်ခိုက်မှုအတွင်း ကလေးငယ် ၆၆ ဦးအပါအ၀င် ပါလက်စတိုင်းအရပ်သား ၂၆၀ ကျော် သေဆုံးခဲ့ပါတယ်။

လူနေအိမ်ပေါင်း ၂၀၀၀ လောက် လုံး၀ ဖျက်ဆီးခံလိုက်ရပြီး၊ တစ်စိတ်တစ်ပိုင်း ပျက်ဆီးသွားတဲ့ နေအိမ်ပေါင်း ၂၂၀၀၀ ကျော် ရှိပါတယ်။ တိုက်ခိုက်မှုကြောင့် ပါလက်စတိုင်းပြည်သူ သောင်းချီ အိုးအိမ်စွန့်ခွာ ထွက်ပြေးခဲ့ရပါတယ်။

အထပ်မြင့်အဆောက်အဦး ၄ ခု၊ စာသင်ကျောင်း၊ ဆေးရုံတို့အပါအ၀င် အများပြည်သူဆိုင်ရာ အဆောက်အဦး ၇၄ ခုကိုလည်း အစ္စရေးက တိုက်ခိုက်ဖျက်ဆီးခဲ့ပါတယ်။

ဒီတိုက်ခိုက်မှုကြောင့် ဂါဇာဒေသမှာ အနည်းဆုံး ကန်ဒေါ်လာ ၅၀၀ ဖိုးလောက် ပျက်ဆီးဆုံးရှုံးခဲ့ပါတယ်။

ပါလက်စတိုင်းပိုင် ဂါဇာဒေသ ပြန်လည်တည်ဆောက်ရေးလုပ်ငန်းတွေကို ဂါဇာ အိုးအိမ်ဌာန၊ ကာတာရဲ့ ဂါဇာ ပြန်လည်တည်ဆောက်ရေးကော်မတီ၊ အခြားနိုင်ငံတကာ အဖွဲ့အစည်းတွေက ပူးပေါင်းဆောင်ရွက်မှာဖြစ်ပြီး လာမယ့်လမှာ စတင်မှာပါ။

ကာတာက လူနေအိမ်တွေတည်ဆောက်ဖို့ ဒေါ်လာ သန်း ၅၀၀ ကူညီပေးမှာ ဖြစ်ပြီး၊ အီဂျစ်က လမ်းတံတားတွေအတွက် ဒေါ်လာသန်း ၅၀၀ ထောက်ပံ့မှာ ဖြစ်ပါတယ်။

အစ္စရေးဟာ ဂါဇာဒေသကို ဆောက်လုပ်ရေးပစ္စည်းတွေ လုံး၀ တင်သွင်းခွင့်မပြုဘဲ၊ အီဂျစ်ကလည်း ဂါဇာနယ်စပ်ကို ၁၄ နှစ်ကြာ ပိတ်ထားခဲ့တာပါ။

ဂါဇာကမ်းမြှောင် ပြန်လည်တည်ဆောက်ရေးလုပ်ငန်းမှာ အဆင့် ၃ ဆင့် ပါ၀င်မှာဖြစ်ပြီး ပထမအဆင့်မှာ လူနေအိမ်တွေကို စတင်ဆောက်လုပ်ပေးမှာ ဖြစ်ပါတယ်။ ကူ၀ိတ်က ဖျက်ဆီးခံလိုက်ရတဲ့ အထပ်မြင့်အဆောက်အဦး ပြန်လည်ဆောက်လုပ်ပေးမယ်လို့ အစောပိုင်းမှာ ကတိပြုထားပေမယ့် နောက်ဆုံးသဘောတူညီချက် ထွက်မလာသေးပါဘူး။

ဂါဇာအိုးအိမ်ဌာန တာ၀န်ရှိသူ နာဂျီ ဆာရ်ဟန်က ပြန်လည်တည်ဆောက်ရေးလုပ်ငန်းမှာ ပင်လယ်ကွေ့နိုင်ငံများအဖွဲ့(GCC)၊ ဥရောပသမဂ္ဂတို့ အပါအ၀င် အခြားတိုင်းပြည်တွေ၊ နိုင်ငံကတာအဖွဲ့အစည်းတွေ ပါ၀င်ကူညီပေးကြဖို့ တိုက်တွန်းခဲ့ပါတယ်။

Ref: Aljazeera

စက်တင်ဘာ ၂၅၊ ၂၀၂၁
M-Media

-ကျူးကျော်ထားတဲ့ ပါလက်စတိုင်းပိုင်နက်တွေကနေ တစ်နှစ်အတွင်း ထွက်သွားဖို့ အစ္စရေးကို ပါလက်စတိုင်း သမ္မတ အမဟ်မူးဒ် အဘတ်စ်က ရာဇသံပေးလိုက်ပါတယ်။

၁၉၆၇ ခုနှစ်က နယ်နမိတ်အတိုင်း ပါလက်စတိုင်းနိုင်ငံ တည်ထောင်ဖို့နဲ့ အပြန်အလှန်အားဖြင့် အစ္စရေးကို ပါလက်စတိုင်းက အသိအမှတ်ပြုဖို့ ၁၉၉၃ ခုနှစ်မှာ ပါလက်စတိုင်းနဲ့ အစ္စရေးတို့ သဘောတူညီခဲ့ကြတာပါ။ သဘောတူညီချက်အတိုင်း ပါလက်စတိုင်းက အစ္စရေးကို အသိအမှတ်ပြုခဲ့ပေမယ့် အစ္စရေးက အခုအချိန်အထိ ပါလက်စတိုင်းပိုင်နက်တွေကို ကျူးကျော်သိမ်းပိုက်နေတာ ဖြစ်ပါတယ်။

မနေ့က ကုလသမဂ္ဂ အထွေထွေညီလာခံကို ပေးပို့တဲ့မိန့်ခွန်းမှာ ပါလက်စတိုင်းသမ္မတ မဟ်မူးဒ်အဘတ်စ်က ကျူးကျော်ထားတဲ့ ပါလက်စတိုင်းပိုင်နက်တွေကနေ တစ်နှစ်အတွင်း မထွက်သွားဘူးဆိုရင် အစ္စရေးကို အသိအမှတ်ပြုမှု ရပ်ဆိုင်းမယ်လို့ သတိပေးခဲ့ပါတယ်။

“အရှေ့ဂျေရုစလင် အပါအဝင် ၁၉၆၇ ခုနှစ်ကတည်းက ကျူးကျော်သိမ်းပိုက်လာတဲ့ ပိုင်နက်တွေကနေ တစ်နှစ်အတွင်း ထွက်သွားဖို့ ကျူးကျော်သူ အစ္စရေးကို ပြောလိုပါတယ်။ တကယ်လို့ ဒါမျိုး မလုပ်ဘူးဆိုရင် ၁၉၆၇ ခုနှစ် နယ်နမိတ်အတိုင်း အစ္စရေးကို ဘာ့ကြောင့် ကျွန်တော်တို့ အသိအမှတ်ပြုတော့မလဲ”

ပါလက်စတိုင်းကိစ္စ နိုင်ငံတကာ ငြိမ်းချမ်းရေ ညီလာခံကျငးပဖို့ ကုလအတွင်းရေးမှူးချုပ် အန်တိုနီယို ဂူတာရက်စ်ကို အဘတ်စ်က တိုက်တွန်းခဲ့ပြီး၊ ကုလသမဂ္ဂက ထုတ်ပြန်ထားတဲ့ ဆုံးဖြတ်ချက်တွေအတိုင်း အစ္စရေး၊ ပါလက်စတိုင်းပြဿနာကို အပြီးသတ်ဖြေရှင်းဖို့ စိတ်ဆန္ဒရှိတယ်လို့လည်း ဆိုပါတယ်။

အဘတ်စ်ရဲ့ ကုလမိန့်ခွန်းမှာ အစ္စရေးက ပါလက်စတိုင်းနေမြေတွေကို ဆက်လက်ကျူးကျော် သိမ်းပိုက်နေတာတွေကို ရှုတ်ချခဲ့ပြီး အစ္စရေးဟာ ပါလက်စတိုင်းတွေအပေါ် ‘လူမျိုးစုလိုက် ရှင်းလင်းသုတ်သင်မှု’ လုပ်ဆောင်နေတယ်လို့ ထည့်သွင်းပြောဆိုခဲ့ပါတယ်။

အစ္စရေးရဲ့ နယ်မြေကျူးကျော်မှု ပိုမိုထင်ရှားစေဖို့အတွက် နိုင်ငံကာခုံသမာဓိရုံး (ICJ) အထိသွားဖို့ အဆင်သင့်ဖြစ်နေပြီလို့ အဘတ်စ်က ဆိုပါတယ်။

ကုလဆိုင်ရာ အစ္စရေးသံအမတ် ဂီလဒ် အာရ်ဒန်က ငြိမ်းချမ်းရေးနဲ့ ဆွေးနွေးညှိနှိုင်းမှုကို လိုလားသူတွေဟာ အဘတ်စ် ကုလမှာ ပြောခဲ့တဲ့မိန့်ခွန်းလို ဖြစ်နိုင်ဖွယ်မရှိတဲ့ ခြိမ်းခြောက်ရာဇသံတွေ ပေးမှာမဟုတ်ဘူးလို့ တုန့်ပြန်ခဲ့ပါတယ်။

Ref: Aljazeera