ဧပြီ ၁၈၊ ၂၀၂၂

M-Media

-အစ္စရေးဟာ ကလေးတွေကို စစ်ခုံရုံးတင်ပြီး ပြင်းထန်တဲ့ ပြစ်ဒဏ်တွေချမှတ်တဲ့ ကမ္ဘာ့တစ်ခုတည်းသော နိုင်ငံပါ။

ပါလက်စတိုင်းကလေးငယ်တွေကို အဓိကထားတာဖြစ်ပြီး ဖမ်းဆီး စစ်ဆေးစဥ်မှာလည်း အခြေခံအခွင့်အရေးတွေကို မကြာခဏ ချိုးဖောက်လေ့ရှိပါတယ်။

၂၀၀၀ ခုနှစ်နောက်ပိုင်း အစ္စရေးက ဖမ်းဆီးအကျဥ်းချခဲ့တဲ့ ပါလက်စတိုင်း ကလေးငယ်ပေါင်း ၁၂၀၀၀ ကျော် ရှိပါတယ်။

ကလေးငယ်အများစုဟာ ပါလက်စတိုင်းပိုင်နက်ထဲ ကျူးကျော်လာတဲ့ အစ္စရေးစစ်သားတွေကို ခဲနဲ့ပေါက်မှုအတွက် ဖမ်းဆီးခံရတာဖြစ်ပြီး အစ္စရေးစစ်ခုံရုံးက ကလေးတွေကို ထောင်ဒဏ် နှစ် ၂၀ လောက်အထိ ချမှတ်လေ့ရှိပါတယ်။

လက်ရှိ အစ္စရေးအကျဥ်းထောင်ထဲမှာ ပါလက်စတိုင်း ကလေးငယ်ပေါင်း ၁၆၀ ရှိပြီး သူတို့ကို တရားစွဲဆိုခြင်းမရှိဘဲ ဒီအတိုင်း ဖမ်းဆီးထားတာ ဖြစ်ပါတယ်။

Ref: Aljazeera

mmInternationalNews

ဧပြီ ၁၅၊ ၂၀၂၂

M-Media

-ပါလက်စတိုင်းပိုင် အရှေ့ဂျေရုစလင်က အလ်အက်ဆွာ ဗလီ၀တ်ကျောင်းတော်ကို အစ္စရေးတပ်ဖွဲ့တွေက ဒီနေ့မနက်ပိုင်းမှာ ၀င်ရောက်စီးနင်းခဲ့ပြီး ဒီအဖြစ်အပျက်မှာ အနည်းဆုံး ပါလက်စတိုင်း ၉၀ ကျော် ဒဏ်ရာရရှိခဲ့ပါတယ်။

အစ္စရေးတပ်ဖွဲ့တွေဟာ ရမ်ဇာန်ဥပုသ်လရောက်တိုင်း အလ်အက်ဆွာဗလီကို ၀င်ရောက်ကာ ပါလက်စတိုင်းပြည်သူတွေကို နှောက်ယှက်လေ့ရှိပြီး ပြီးခဲ့တဲ့နှစ်ကလည်း အလားတူ အဖြစ်အပျက်မျိုး ဖြစ်ပွားခဲ့ပါတယ်။ 

အရုဏ်တက် ၀တ်ပြုဆုတောင်းဖို့ လူထောင်ချီစု၀ေးနေတဲ့အချိန် အစ္စရေးတပ်ဖွဲ့တွေဟာ ရာဘာကျည်ဆံတွေ၊ မျက်ရည်ယိုဗုံးတွေသုံးကာ ရုတ်တရက် ၀င်ရောက်ခဲ့တာ ဖြစ်ပါတယ်။  ၀တ်ပြုသူတွေဟာ အစ္စရေးတပ်ဖွဲ့တွေ မ၀င်နိုင်ရေး လူတံတိုင်းကာခဲ့သလို ခဲလုံးတွေနဲ့လည်း ပစ်ပေါက်ခဲ့ကြပါတယ်။

အလ်အက်ဆွာဗလီ ဂေါပကအဖွဲ့က အစောင့်တစ်ဦး ရာဘာကျည်နဲ့ မျက်လုံးကို အပစ်ခံခဲ့ရတယ်လို့ ထုတ်ပြန်ပါတယ်။ ဒီအဖြစ်အပျက်အတွင်း အနည်းဆုံး ပါလက်စတိုင်းပြည်သူ ၉၀ လောက် ဒဏ်ရာရရှိခဲ့ပါတယ်။

ဒဏ်ရာရရှိသူတွေကို သယ်ဖို့သွားတဲ့ လူနာတင်ယာဥ်တွေကိုလည်း အစ္စရေးတပ်ဖွဲ့တွေက ဟန့်တားခဲ့တယ်လို့ ပါလက်စတိုင်း လခြမ်းနီအဖွဲ့က ပြောပါတယ်။

အစ္စရေးကတော့ ၀တ်ပြုမှုအပြီးမှာ ပါလက်စတိုင်းတွေ အုံကြွလာတာကို လူစုခွဲဖို့ စီးနင်းခဲ့တာဖြစ်ပြီး၊ ပါလက်စတိုင်းတွေက ခဲတွေနဲ့ ပစ်ပေါက်ခဲ့တယ်လို့ ထုတ်ပြန်ပါတယ်။ 

အစ္စရေးမှာရှိတဲ့ လက်ယာစွန်းရောက်ဂျူးတွေက အလ်အက်ဆွာဗလီကို စီးနင်းဖို့၊ ဂျူးဘာသာရေးပွဲတော် Passover ကို ဗလီပရ၀ုဏ်ထဲမှာ ကျင်းပဖို့ ပြီးခဲ့တဲ့ရက်ပိုင်းမှာ တိုက်တွန်းဆော်သြမှုတွေ လုပ်လာခဲ့ပြီးတဲ့နောက် အခုလို ၀င်ရောက်စီးနင်းမှု ဖြစ်ပေါ်လာတာ ဖြစ်ပါတယ်။ 

ပြီးခဲ့တဲ့နှစ် ရမ်ဇာန်ဥပုသ်လကလည်း အစ္စရေးတပ်ဖွဲ့တွေဟာ အလ်အက်ဆွာဗလီကို အကြိမ်ကြိမ်း၀င်ရောက်စီးနင်းခဲ့ပြီး၊ အဲဒီနောက်ဆက်တွဲ ဂါဇာကမ်းမြှောင်ဒေသမှာဖြစ်ပွားတဲ့ လူထုအုံကြွမှုမှာ အနည်းဆုံး ပါလက်စတိုင်းပြည်သူ ၂၃၂ ဦး အသတ်ခံခဲ့ရပါတယ်။

 Ref: Aljazeera 

မတ် ၁၅၊ ၂၀၂၂

M-Media 

-ပါလက်စတိုင်းပိုင်နက်တွေမှာ အစ္စရေးတပ်ဖွဲ့တွေက ၀င်ရောက်အကြမ်းဖက်မှုတွေကြောင့် ပြီးခဲ့တဲ့ ၂ ရက်အတွင်း ပါလက်စတိုင်း အနည်းဆုံး ၃ ဦး သေဆုံးကာ အများအပြား ဒဏ်ရာ ရရှိခဲ့ပါတယ်။ 

သေဆုံးသူတွေထဲမှာ အသက် ၁၇ နှစ်အရွယ် နဒါ ရိုင်ယန်ဆိုသူ ပါ၀င်ပါတယ်။ အင်္ဂါနေ့မနက်ပိုင်းက နဘ်လုစ်မြို့မှာရှိတဲ့ ပါလက်စတိုင်း ဒုက္ခသည်စခန်းကို အစ္စရေးတပ်ဖွဲ့တွေ ၀င်ရောက်စီးနင်းမှုအတွင်း နဒါတစ်ယောက် ခေါင်းကို ပစ်ခတ်သတ်ဖြတ်ခံလိုက်ရတာ ဖြစ်ပါတယ်။ 

အစ္စရေးက အလိုရှိနေတဲ့သူတစ်ဦးကို ၀င်ရောက်ဖမ်းဆီးတဲ့ အဲဒီအဖြစ်အပျက်အတွင်း ပါလက်စတိုင်း ၃ ဦး ဒဏ်ရာရခဲ့ပြီး တစ်ဦးက စိုးရိမ်ရတဲ့ အနေအထားမှာ ရှိပါတယ်။ 

အစ္စရေးရဲတပ်ဖွဲ့ရဲ့ ထုတ်ပြန်ချက်မှာတော့ အကြမ်းဖက်သမားက သူတို့ကို ပစ်ခတ်တဲ့အတွက် ပြန်ပစ်တာလို့ ဖော်ပြပါတယ်။  

ဂျေရုစလင်ဆင်ခြေဖုံးက ကွာလန်ဒီယာ ဒုက္ခသည်စခန်းကို အစ္စရေးတပ်ဖွဲ့တွေရဲ့ ၀င်ရောက်စီးနင်းမှုမှာလည်း အသက် ၂၀ ကျော်အရွယ် ပါလက်စတိုင်းအမျိုးသားတစ်ဦး ဦးခေါင်းကို ပစ်ခတ်သတ်ဖြတ်ခံလိုက်ရပြီး ၆ ဦး ဒဏ်ရာရရှိခဲ့ပါတယ်။ 

နာကဘ်သဲကန္တာရက ရာဟတ်မြို့မှာ ပါလက်စတိုင်း  အယောင်ဆောင်ထားတဲ့ အစ္စရေး ထောက်လှမ်းရေးတွေဟာ အသက် ၂၇ နှစ်အရွယ် အမျိုးသားတစ်ဦးကို ပစ်ခတ်သတ်ဖြတ်ခဲ့ပါတယ်။ 

ပါလက်စတိုင်း ဒုက္ခသည်စခန်းတွေနဲ့ ရွာတွေကို အစ္စရေးက ခေါင်းစဥ်အမျိုးမျိုးနဲ့ ၀င်ရောက် စီးနင်းလေ့ရှိပြီး ပါလက်စတိုင်းတွေ အသတ်ခံရတာ၊ ဒဏ်ရာရတာတွေ မကြာခဏ ဖြစ်ပွားနေတာ ဖြစ်ပါတယ်။

Ref: Aljazeera 

ဒီဇင်ဘာ ၁၈၊ ၂၀၂၁
M-Media

-အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အနောက်ဖက်ကမ်းမှာ မနေ့က ဂျူးအခြေချသူတွေက ပါလက်စတိုင်းရွာတွေကို ဝင်ရောက်တိုက်ခိုက်မှု ဖြစ်ပွားခဲ့ပြီး အနည်းဆုံး ၂ ဦး ဒဏ်ရာရခဲ့ပါတယ်။

အနောက်ဖက်ကမ်းမြောက်ဖက် နဘ်လုစ်မြို့က ရွာတော်တော်များများကို သောကြာနေ့မနက် အစောင်းပိုင်းမှာ ဂျူးအခြေချသူတွေ အုပ်စလိုက် ဝင်ရောက်လာပြီး ကားတွေရိုက်ခွဲတာ၊ အိမ်တွေ၊ ဆိုင်တွေ၊ အဆောက်အဦး တိုက်ခိုက်ဖျက်ဆီးတာတွေ လုပ်ဆောင်ခဲ့ပါတယ်။

ဒီအဖြစ်အပျက်အတွင်း ပါလက်စတိုင်း ၂ ဦး ထိခိုက်ဒဏ်ရာရခဲ့ပြီး ဆေးရုံတင်ထားရပါတယ်။ ဂျူးအခြေချနေထိုင်သူတွေဟာ ပါလက်စတိုင်းတစ်ချို့ကို ပြန်ပေးဆွဲဖို့ ကြိုးစားတာတွေ၊ သေနတ်နဲ့ပစ်တာတွေ ရှိတယ်လို့ မျက်မြင်သက်သေတွေက ပြောပါတယ်။

ပါလက်စတိုင်းပိုင် အနောက်ဖက်ကမ်းဒေသမှာ အစ္စရေးက တရားမဝင်အိမ်ယာတွေ ဆောက်လုပ်ပြီး ဂျူးအခြေချနေထိုင်သူတွေကို နေထိုင်စေတာပါ။ ဒီလို နယ်မြေခိုးယူတာကို မကျေနပ်တဲ့အတွက် ပါလက်စတိုင်းတွေက အိမ်ယာတွေကို တိုက်ခိုက်တာမျိုး မကြာခဏ ဖြစ်ပွားလေ့ ရှိပါတယ်။

ကြာသာပတေးနေ့က အနောက်ဖက်ကမ်းက တရားမဝင်အခြေချအိမ်ယာမှာ ကားတစ်စီး သေနတ်နဲ့ အပစ်ခံရတာကြောင့် ဂျူးအခြေချနေထိုင်သူ ၁ ဦး သေဆုံးပြီး၊ ၂ ဦး ဒဏ်ရာရခဲ့ပါတယ်။

ပါလက်စတိုင်းပိုင် အနောက်ဖက်ကမ်းနဲ့ အရှေ့ဂျေရုစလင်မှာ အစ္စရေးရဲ့ တရားမဝင်အိမ်ယာပေါင်း ၂၈၀ လောက်ရှိပြီး ဂျူးအခြေချနေထိုင်သူ ၇ သိန်းကျော် နေထိုင်နေပါတယ်။

နိုင်ငံတကာဥပဒေအရေ ဒီအိမ်ယာတွေဟာ တရားမဝင်ဘဲ၊ ကမ္ဘာ့နိုင်ငံတွေကလည်း အစ္စရေးရဲ့ ဒီလုပ်ရပ်ကို တစ်စိုက်မတ်မတ် ရှုတ်ချထားပါတယ်။

Ref: Aljazeera

အောက်တိုဘာ ၂၅၊ ၂၀၂၁
M-Media

-ပါလက်စတိုင်းပိုင် အနောက်ဖက်ကမ်းက ဒေသတွေမှာ ကျူးကျော်အိမ်ယာ ၁၃၅၅ လုံး ဆောက်လုပ်မယ့် အစီအစဉ်ကို အစ္စရေးက ထုတ်ပြန်ကြေငြာလိုက်ပြီး ပါလက်စတိုင်းဖက်က အပြင်းအထန် ကန့်ကွက်ရှုတ်ချလာပါတယ်။

လက်ယာပါတီ New Hope က အဖွဲ့ဝင်တစ်ဦးဖြစ်ပြီး အစ္စရေး အိုးအိမ်ဝန်ကြီးလည်းဖြစ်တဲ့ ဇီဗ် အီလ်ကင်က ‘ဇိုင်ယွန်ရည်မှန်းချက် ပြည့်၀ဖို့အတွက် အနောက်ဖက်ကမ်းမှာ ဂျူးတွေအများအပြားတည်ရှိရေးဟာ အဓိကကျတယ်’ လို့ ပြောကြားခဲ့ပါတယ်။

ဇိုင်ယွန်ရည်မှန်းချက်ဆိုတာ ပါလက်စတိုင်းပိုင်နက်တစ်ခုလုံးကို သိမ်းပိုက်ရေးဖြစ်ပြီး ၁၈ ရာစုလောက်ကတည်းက ကမ္ဘာတစ်ဝှမ်းကဂျူးတွေ ပူးပေါင်းကြံစည်လာတာ ဖြစ်ပါတယ်။

နာဇီရန်ကြောင့် အရှေ့ဥရောပက ထွက်ပြေားလာတဲ့ဂျူးတွေ ၁၉၄၈ ခုနှစ်မှာ ပါလက်စတိုင်းပိုင်နက်တွေကို သိမ်းပိုက်ကာ အစ္စရေးနိုင်ငံအဖြစ် ထူထောင်ခဲ့ပြီး၊ အဲဒီအချိန်ကစလို့ ကျန်ရှိတဲ့ ပါလက်စတိုင်းပိုင်နက်တွေကို တစ်စတစ်စ အစ္စရေးက သိမ်းပိုက်လာတာပါ။

ပါလက်စတိုင်းတွေဟာ အရှေ့ဂျေရုစလင်အပါအဝင် အနောက်ဖက်ကမ်းနဲ့ ဂါဇာကမ်းမြှောင်ဒေသပေါင်းပြီး လွတ်လပ်တဲ့ ပါလက်စတိုင်းနိုင်ငံအဖြစ် ထူထောင်လိုနေတာ ဖြစ်ပါတယ်။

အစ္စရေးရဲ့ ပါလက်စတိုင်းပြည်သူတွေအပေါ် အခုလို ခြိမ်းခြောက်မှုတွေ၊ ကျူးကျော်မှုတွေကို နိုင်ငံတကာအသိုင်းအ၀ိုင်း အထူးသဖြင့် အမေရိကန်နိုင်ငံက ရင်ဆိုင်ဖြေရှင်းကြဖို့ ပါလက်စတိုင်းဝန်ကြီးချုပ် မိုဟာမက် ရှတေယာက မနေ့က အစိုးရအစည်းအဝေးမှာ ပြောကြားခဲ့ပါတယ်။

အစ္စရေးရဲ့ ဒီလုပ်ရပ်ဟာ နှစ်နိုင်ငံတည်ရှိရေးအဖြေကို ထိခိုက်စေတဲ့အတွက် ရှုတ်ချကြောင်း၊ ဒီကိစ္စကို အနီးကပ် စောင့်ကြည့်နေကြာင်း ရှတေယာက ထည့်သွင်းပြောဆိုခဲ့ပါတယ်။

အနောက်ဖက်ကမ်းက အစ္စရေးရဲ့ ကျူးကျော်အိမ်ယာတွေမှာ နေထိုင်တဲ့ ဂျူးအရေအတွက်ဟာ ၄၇၅၀၀၀ ရှိနေပါပြီ။ ဒီအိမ်ယာတွေဟာ နိုင်ငံတကာဥပဒေအရ တရားမဝင်ဘူးလို့လည်း နိုင်ငံတကာအသိုင်းအ၀ိုင်းက ပြောကြားထားပါတယ်။

ဂျော်ဒန်နိုင်ငံက အစ္စရေးရဲ့ ဒီလုပ်ရပ်ကို ရှုတ်ချခဲ့ပြီး ဒါဟာ နိုင်ငံတကာဥပဒေကို ချိုးဖောက်တာဖြစ်တယ်လို့ ပြောကြားခဲ့ပါတယ်။

Ref : Aljazeera