Tag: Palestine

နိုဝင်ဘာ ၅၊ ၂၀၂၀
M-Media

-ပါလက်စတိုင်းပိုင် အနောက်ဖက်ကမ်းက ပါလက်စတိုင်းရွာ တစ်ခုလုံးက အိမ်တွေကို အစ္စ​ရေးစစ်တပ်က ဖြိုချဖျက်ဆီးလိုက်ပါတယ်။

ဂျော်ဒန်ချိုင့်ဝှမ်းဒေသက Khirbet Humsa ဆိုတဲ့ရွာမှာ အင်္ဂါနေ့က ဖြစ်ပွားခဲ့တဲ့ အဲဒီအဖြစ်အပျက်ကြောင့် ပါလက်စတိုင်းပြည်သူ စုစုပေါင်း ၈၀ လောက် အိုးမဲ့အိမ်မဲ့ ဖြစ်ခဲ့ပါတယ်။ အဲဒီအထဲမှာ ထက်ဝက်ကျော်က ကလေးငယ်တွေဖြစ်တယ်လို့ NGO အဖွဲ့ B’Tselem က ပြောကြားခဲ့ပါတယ်။

အစ္စရေးစစ်တပ်ဟာ အင်္ဂါနေ့ညဘက်မှာ မြေတူးစက်တွေအသုံးပြုပြီး နေအိမ်တွေကို ဖြိုချဖျက်ဆီးခဲ့တာပါ။ မဖြိုချခင်မှာ ပစ္စည်းပြောင်းရွှေ့ဖို့ ၁၀ မိနစ်သာ အချိန်​ပေးခဲ့တယ်လို့ အိုးအိမ်ဆုံးရှုံးရသူတွေက ပြောကြားခဲ့ပါတယ်။

ပါလက်စတိုင်းဝန်ကြီးချုပ် မိုဟာမက် ရှက်တာယာဟ်က ပါလက်စတိုင်းပြည်သူတွေ အိုးမဲ့အိမ်မဲ့ဘ၀ရောက်အောင် အစ္စရေးက လုပ်ဆောင်နေမှုကို နိုင်ငံတကာအသိုင်းအဝိုင်းက ကြားဝင်ဟန့်တားပေးဖို့ တောင်းဆိုခဲ့ပါတယ်။

ပါလက်စတိုင်းပိုင်နက်ဖြစ်တဲ့ အနောက်ဖက်ကမ်းက ဂျော်ဒန်ချို့ဝှမ်းဒေသမှာ လူ ၆ သောင်းလောက် နေထိုင်ပါတယ်။ ဒါပေမယ့် အဲဒီဒေသရဲ့ ၉၀ ရာခိုင်နှုန်းလောက်ကို အစ္စရေးက ထိန်းချုပ်ပိတ်ဆို့ထားပြီး တရားမဝင်အခြေချအိမ်ယာတွေ၊ စစ်စခန်းတွေ တည်ဆောက်ကာ ပါလက်စတိုင်းပြည်သူတွေ လျော့နည်းသွားအောင် လုပ်ဆောင်နေပါတယ်။

Ref: Aljazeera

အောက်တိုဘာ ၁၅၊ ၂၀၂၀
M-Media

-ပါလက်စတိုင်းပိုင် အနောက်ဖက်ကမ်းမှာ တရားမဝင် ခြေချအိမ်ယာတွေ ထပ်မံတိုးချဲ့ဆောက်လုပ်ဖို့အတွက် အစ္စရေးက မနေ့မှာ အတည်ပြုလိုက်ပါတယ်။

ပါလက်စတိုင်းပိုင်နက်တွေမှာ အစ္စရေးက အခြေချအိမ်ယာတွေ တည်ဆောက်တာဟာ နိုင်ငံတကာဥပဒေအရ တရားမဝင်ဘဲ ကမ္ဘာ့အသိုင်းအဝိုင်းကလည်း လက်ခံခြင်းမရှိပါဘူး။​ အနောက်ဖက်ကမ်းက ဒီတရားမဝင် အိမ်ယာတွေမှာ ဂျူလူမျိုး သန်းဝက်လောက်နေထိုင်နေပြီး ပါလက်စတိုင်း-အစ္စရေး ငြိမ်းချမ်းရေးရဲ့အဓိပြဿနာလည်း ဖြစ်ပါတယ်။

ဗုဒ္ဓဟူးနေ့က အတည်ပြုလိုက်တဲ့အစီအစဉ်မှာ အိမ်ယာ ၂၁၆၆ လုံး ဆောက်လုပ်ဖို့ ပါဝင်ပြီး၊ နောကထပ် အိမ်အလုံး ၂ ထောင်ကျော် ဆောက်လုပ်မယ့် အစီအစဉ်ကို ကြာသာပတေးနေ့မှာ အစ္စရေးက အတည်ပြုဖို့ ရှိနေပါတယ်။

ဒါဟာ ယူ​အေအီး၊ ဘာရိန်းတို့နဲ့ ဆက်ဆံရေးတည်ဆောက်ဖို့ သဘောတူညီချက်ရပြီး တစ်လမပြည့်ခင်မှာပဲ ပေါ်ပေါက်လာတာပါ။

ယူအေအီးနဲ့ ဘာရိန်းတို့က အနောက်ဖက်ကမ်းကို သိမ်းယူမယ့် အစ္စရေးရဲ့အစီအစဉ်ကို ဒီသဘောတူညီချက်နဲ့ ဟန့်တားနိုင်ခဲ့တယ်လို့ ထုတ်ပြန်ထားပါတယ်။

အန်ဂျီအိုအဖွဲ့တစ်ခုဖြစ်တဲ့ Peace Now က တရားမဝင်အခြေချအိမ်ယာတွေ ဆောက်လုပ်မယ့် အစ္စရေးရဲ့ အစီအစဉ်ဟာ ပါလက်စတိုင်းနိုင်ငံပေါ်လာရေးကို လက်မခံဘူးဆိုတဲ့ ထင်ရှားတဲ့လက္ခဏာ ဖြစ်တယ်လို့ ပြောကြားခဲ့ပါတယ်။

Ref: Aljazeera

အောက်တိုဘာ ၁၃၊ ၂၀၂၀
M-Media

-အစ္စရေးနဲ့ ဆက်ဆံရေးထူထောင်တဲ့ အာရပ်နိုင်ငံ​တွေကို သမိုင်းက ခွင့်လွှတ်မှာ မဟုတ်ဘူးလို့ ပါလက်စတိုင်းတော်လှန်ရေးအဖွဲ့ (ဟားမက်စ်) ရဲ့ နိုင်ငံရေးခေါင်းဆောင် အစ္စမာအီလ် ဟာနီယာက ပြောကြားလိုက်ပါတယ်။

အာရပ်စော်ဘွားများပြည်ထောင်စု(ယူအေအီး) နဲ့ ဘာရိန်းတို့ဟာ စက်တင်ဘာလအတွင်းက အစ္စရေးနဲ့ တရားဝင်ဆက်ဆံရေး ထူထောင်ခဲ့ပါတယ်။

ဟာနီယာက ဇိုင်ယွန်တွေရဲ့ စီမံကိန်းဟာ နယ်မြေ ချဲ့ထွင်သိမ်းပိုက်ဖို့ဖြစ်ပြီး အာရပ်နိုင်ငံတွေက ဒီကိစ္စမှာ အသုံးချခံတွေ ဖြစ်လာလိမ့်မယ်လို့ ပြောကြားခဲ့ပါတယ်။

“အစ္စရေးခေါင်းဆောင်တွေအကြောင်းနဲ့ သူတို့ ဘယ်လိုတွေးလဲဆိုတာတွေကို ကျွန်တော်တို့က ပိုသိပါတယ်။ သဘောတူညီချက်ကြောင့် အရှုံးပဲကျန်လိမ့်မယ်ဆိုတာ ယူအေအီးက ကျွန်တော်တို့ညီနောင်တွေကို ပြောချင်ပါတယ်။ အီရန်နဲ့နီးတဲ့ ​နေရာတွေမှာ စစ်ရေးနဲ့ စီးပွားရေးခြေကုပ်ရဖို့အတွက်ပဲ အစ္စရေးက စိတ်ဝင်စားတာပါ။ ခင်ဗျားတို့တိုင်းပြည်ကို အစ္စရေးက တံခါးပေါက်တစ်ခုအဖြစ် သုံးမှာပါ။ ယူအေအီးကို လက်နက်အဖြစ် အစ္စရေးက အသုံးပြုတာကို ကျွန်​တော်တို့ မမြင်ချင်ပါဘူး”

ယူအေအီးဟာ ပါလက်စတိုင်းပြည်သူတွေကို ထောက်ပံ့ကူညီခဲ့တဲ့ မိမိတို့ညီအစ်ကိုတွေသာဖြစ်ပြီး၊ အစ္စရေးနဲ့ အဆက်အဆံမလုပ်တော့တဲ့အချိန်အထိ စောင့်သွားမယ်လို့လည်း ဟာနီယာက ဆိုပါတယ်။

“ဇိုင်ယွန်စီမံကိန်းက နယ်ချဲ့သိမ်းပိုက်ရေး စီမံကိန်းပါ။ ပိုပြီးကြီးမားတဲ့ အစ္စရေးနိုင်ငံမျိုးကို ထူထောင်ဖို့ ဖြစ်ပါတယ်။ ဒီစီမံကိန်းမှာ ယူအေအီးနိုင်ငံသားတွေ၊ ဘာရိန်းနိုင်ငံသားတွေ၊ ဆူဒန်နိုင်ငံသားတွေက အသုံးချခံဖြစ်မှာကို ကျွန်တော်တို့ မလိုလားပါဘူး။ သမိုင်းကြောင်းက ခွင့်လွှတ်မှာ မဟုတ်ပါဘူး။ လူတွေက မေ့သွားမှာမဟုတ်သလို၊ လူသားချင်းစာနမှုတရားကလည်း မျက်နှာသာပေးမှာ မဟုတ်ပါဘူး”

ဂါဇာကမ်းမြှောင်ကို ထိန်းချုပ်ထားတဲ့ ဟားမက်စ်အဖွဲ့ဟာ၊ အစ္စရေးက ကျူးကျော်သိမ်းပိုက်ထားတဲ့ အနောက်ဖက်ကမ်းကို စီမံနေတဲ့ ဖာတာအဖွဲ့နဲ့ လက်ရှိမှာ ညီညွတ်သော ပါလက်စတိုင်းအစိုးရဖွဲ့စည်းရေး ဆွေးနွေးညှိနှိုင်းမှုတွေ လုပ်ဆောင်နေပါတယ်။

ဟာနီယာကတော့ ​ဆွေးနွေးမှုမှာ အပြုသဘောဆောင်တဲ့ တိုးတက်မှုတွေရှိနေပြီး စိန်ခေါ်မှုတွေလည်း အများအပြားရှိနေတယ်လို့ ပြောကြားခဲ့ပါတယ်။

Ref: Middle East Eye