Tag: Palestine

ဩဂုတ် ၁၅၊ ၂၀၂၀
M-Media

-အစ္စရေးနဲ့ သံတမန်ဆက်ဆံရေးထူထောင်တဲ့ အာရပ်စော်ဘွားများပြည်ထောင်စု (ယူအေအီး) ရဲ့ လုပ်ရပ်ဟာ နောက်ကျောကို ဓားနဲ့ထုိးတဲ့လုပ်ရပ် ဖြစ်တယ်လို့ ပါလက်စတိုင်းခေါင်းဆောင်တွေက​ ပြောကြားလိုက်ပါတယ်။

အမေရိကန်ရဲ့ ကြားဝင်စေ့စပ်ပေးမှုနဲ့ ယူအေအီးနဲ့ အစ္စရေးတို့ဟာ သံတမန်ဆက်ဆံရေး ထူထောင်ကြောင်း ကြာသာပ​တေးနေ့မှာ ကြေငြာခဲ့ပြီး လုံခြုံရေး၊ ခရီးသွားကဏ္ဍ၊ နည်းပညာ၊ ကုန်သွယ်မှုအပါအဝင် ကဏ္ဍပေါင်းစုံမှာ ပူးပေါင်းဆောင်ရွက်သွားမယ်လို့ ထုတ်ပြန်ခဲ့ပါတယ်။

ဒီကြေငြာမှုနဲ့ပတ်သက်ပြီး အံ့ဩရတယ်လို့ ပါလက်စတိုင်းအစိုးရနဲ့ ပါလက်စတိုင်းတော်လှန်ရေးအဖွဲ့တွေက ပြောကြားကာ ကန့်ကွက် ရှုတ်ချခဲ့ပါတယ်။

“ဒီသဘောတူညီချက်နဲ့ပတ်သက်ပြီး ကျွန်တော်တို့ ဘာမှ ကြိုမသိထားပါဘူး။ ပါလက်စတိုင်းလွတ်မြောက်ရေးလှုပ်ရှားမှု အရေးပါတဲ့အချိန်မျိုးမှာ ဒါမျိုးပေါ်လာတာဟာ အံ့ဩစရာပါပဲ” လို့ ပါလက်စတိုင်း အာဏာပိုင်အဖွဲ့ရဲ့ လူမှုရေးဝန်ကြီး အဟ်မဒ် မဂျ်ဒါလာနီက ပြောကြားခဲ့ပါတယ်။

ပါလက်စတိုင်းတော်လှန်ရေးအဖွဲ့တွေဖြစ်တဲ့ ဟားမက်စ်၊ အစ္စလာမ့်မစ်ဂျီဟတ်အဖွဲ့တွေကလည်း ဒီသဘောတူညီချက်ကို ရှုတ်ချကြောင်း ကြေငြာချက်တွေ ထုတ်ပြန်ခဲ့ပါတယ်။

“သူတို့ သံတမန်ဆက်ဆံရေးထူထောင်ဖို့ကိစ္စကို ​တိတ်တိတ်လေးဆွေးနွေးနေတယ်ဆိုတာ ကျွန်တော်တို့ သိထားပေမယ့် ဒီလို အရေးပါတဲ့အချိန်မျိုးမှာ တရားဝင်ကြေငြာလိုက်တာက သိပ်ကို အံ့အားသင့်စရာ ကောင်းပါတယ်။ ကျွန်တော်တို့နဲ့ အာရပ်နိုင်ငံအားလုံးရဲ့နောက်ကျောကို ဓားနဲ့ ထိုးလိုက်တာပါ” လို့ ပါလက်စတိုင်းအာဏာပိုင်အဖွဲ့ လူမှုရေးဝန်ကြီးဟောင်း မာဂျီဒါ အလ်-မက်စ်ရီက ပြောကြားခဲ့ပါတယ်။

ပါလက်စတိုင်းလွတ်မြောက်ရေးအဖွဲ့ PLO ခေါင်းဆောင်တွေက ဒီသဘောတူညီချက်ဟာ အစ္စရေးကို လက်ဆောင်ပေးလိုက်တာမျိုးဖြစ်တယ်လို့ ပြောကြားခဲ့ပါတယ်။

ယူအေအီး အိမ်ရှေ့မင်းသား မိုဟာမက် ဘင် ဇယဒ်က ဒီသဘောတူညီချက်ဟာ ပါလက်စတိုင်းဒေသတွေကို အစ္စရေးပိုင်နက်ထဲ ထပ်မံထည့်သွင်းရေး အစ္စရေးရဲ့ကြိုးပမ်းမှုကို ဟန့်တားဖို့ဖြစ်တယ်လို့ ပြောကြားခဲ့ပါတယ်။

အစ္စရေးဝန်ကြီးချုပ် နေတန်ယာဟုက ပါလက်စတိုင်းပိုင် အနောက်ဖက်ကမ်းက ဒေသတွေကို အစ္စရေးပိုင်နက်ထဲထည့်သွင်းရေးကိစ္စ စွန့်လွှတ်မှာမဟုတ်ဘူးလို့ ယူအေအီးနဲ့ သဘောတူညီချက်ရပြီး နာရီပိုင်းအတွင်းမှာ ထုတ်ပြန်ခဲ့ပါတယ်။

ပါလက်စတိုင်းခေါင်းဆောင်ပိုင်းကလည်း ဒီသဘောတူညီချက်ဟာ အစ္စရေးက ပါလက်စတိုင်းပိုင်နက်တွေကို သိမ်းယူကာ ပိုင်နက်ထဲ ထည့်သွင်းတဲ့ စီမံကိန်းကို ဟန့်တားနိုင်မှာ မဟုတ်ဘူးလို့ ပြောကြားခဲ့ပါတယ်။

Ref: Aljazeera

ဩဂုတ် ၁၄၊ ၂၀၂၀
M-Media

-အာရပ်စော်ဘွားများပြည်ထောင်စု (ယူအေအီး) နဲ့ ငြိမ်းချမ်းရေးသဘောတူညီချက် ရခဲ့ပေမယ့် ပါလက်စတိုင်းပိုင်နက်တွေကို အစ္စရေးပိုင်နက်ထဲ ထည့်သွင်းရေး အစီအစဉ်ကို စွန့်လွှတ်မှာ မဟုတ်ဘူးလို့ အစ္စရေးဝန်ကြီးချုပ် ဘင်ယာမင် နေတန်ယာဟုက ပြောကြားလိုက်ပါတယ်။

အမေရိကန်ရဲ့ ကြားဝင်ညှိနှိုင်းပေးမှုကြောင့် အစ္စရေးနဲ့ ယူအေအီးတို့ဟာ သမိုင်းဝင် ငြိမ်းချမ်းရေးသဘောတူညီချက်ကို မနေ့မှာ ရရှိခဲ့ပါတယ်။ သဘောတူညီချက်မှာ ပါလက်စတိုင်းပိုင် အနောက်ဖက်ကမ်းက ဒေသတွေကို ပိုင်နက်ထဲထည့်သွင်းရေး အစ္စရေးရဲ့ စီစဉ်မှုကို ရပ်ဆိုင်းထားဖို့ ပါဝင်ပါတယ်။

အနောက်ဖက်ကမ်းကို အစ္စရေးက လက်ရှိမှာ ကျူးကျော်သိမ်းပိုက် ပိတ်ဆို့ထားတာဖြစ်ပြီး ဒေသတစ်ခုလုံးရဲ့ ၃၀ ရာခိုင်နှုန်းကို အစ္စရေးပိုင်နက်အဖြစ် တရားဝင်ကြေငြာဖို့ နေတန်ယာဟု အစိုးရက စီစဉ်ထားတာပါ။

ယူအေအီးနဲ့ ငြိမ်းချမ်းရေးသဘောတူညီချက်အရ ဒီအစီအစဉ်ကို ရပ်ဆိုင်းထားပေမယ့် လုံး၀ စွန့်လွှတ်မှာ မဟုတ်ဘူးလို့ အစ္စရေးဝန်ကြီးချုပ် နေတန်ယာဟုက မနေ့က ရုပ်သံမိန့်ခွန်းမှာ ပြောကြားခဲ့ပါတယ်။

“အမေရိကန်နဲ့ပူးပေါင်းပြီး ဂျူဒီယာနဲ့ ဆာမာရီယာဒေသတွေမှာ ကျွန်တော်တို့ရဲ့ အချုပ်အခြာအာဏာကို ချဲ့ထွင့်မယ့်အစီအစဉ်က မပြောင်းလဲပါဘူး”

အနောက်ဖက်ကမ်းကိုရည်ညွှန်းတဲ့ ဂျူးအမည်တွေကို နေတန်ယာဟုက အသုံးပြုခဲ့တာဖြစ်ပါတယ်။

ယူအေအီးခေါင်းဆောင်တွေကတော့ သူတို့ရဲ့ ငြိမ်းချမ်းရေးသဘောတူညီချက်ဟာ အစ္စရေးရဲ့ အနောက်ဖက်ကမ်း သိမ်းပိုက်မယ့်အစီအစဉ်ကို အဆုံးသတ်နိုင်မယ်လို့ မျှော်လင့်နေပါတယ်။

“ပါလက်စတိုင်းပိုင်နက်တွေကို ပိုက်နက်ထဲထည့်သွင်းမယ့် အစ္စရေးရဲ့အစီအစဉ်ကို ရပ်တန့်မယ့် သဘောတူညီချက်တစ်ခု ရရှိခဲ့ပါပြီ” လို့ ယူအေအီးရဲ့ ဒုတိယ ကာကွယ်ရေးဦးစီးချုပ် မိုဟာမက် ဘင် ဇယဒ် အလ် နဟ်ယန်က Twitter စာမျက်နှာမှာ ရေးသားခဲ့ပါတယ်။

ယူအေအီး နိုင်ငံခြားရေးဝန်ကြီး အန်ဝါရ် ဂါဂက်ရှ်ကလည်း ဒီသဘောတူညီချက်ဟာ ညှိနှိုင်းဆွေးနွေးမှုအတွက် အချိန်ပိုရစေပြီး ပါလက်စတိုင်း၊ အစ္စရေး နှစ်နိုင်ငံတည်ရှိရေး ခိုင်မာတဲ့ ခြေလှမ်းတစ်ခု ဖြစ်လိမ့်မယ်လို့ ပြောကြားခဲ့ပါတယ်။

Ref: Aljazeera

ဇူလိုင် ၂၄၊ ၂၀၂၀
M-Media

-ယေရှုခရစ်တော် ဖွားမြင်ရာ ဘက်သလီဟန်မြို့ ဘုရားကျောင်းက ရှေးဟောင်းသမိုင်းဝင် ဘာသာရေး အထွဋ်အမြတ်ပစ္စည်းတစ်ခုကို အစ္စရေးစစ်တပ်ကနေ ခိုးယူသွားခဲ့တယ်လို့ ပါလက်စတိုင်း လွတ်မြောက်ရေးအဖွဲ့က စွပ်စွဲ ပြောကြားလိုက်ပါတယ်။

ပါလက်စတိုင်းပိုင် အနောက်ဖက်ကမ်းက ဘက်သလီဟန်ခရိုင်က တူကူမြို့က ရှေးဟောင်းခရစ်ယာန်ဘုရားကျောင်းမှာရှိပြီး နှစ်ခြင်းခံရာမှာ အသုံးပြုတဲ့ ရေဖလားကြီးတစ်ခုကို အစ္စရေးစစ်တပ်က အခုတစ်ပတ်အစောပိုင်းမှာ ထရပ်ကားနဲ့ ညဘက် လာရောက်သယ်ဆောင်သွားတာ ဖြစ်ပါတယ်။

ဘိုင်ဇန်တိုင်းခေတ်က ဖြစ်ပြီး နှစ်ပေါင်း ၁၅၀၀ သက်တမ်းရှိတဲ့ အဲဒီရေဖလားဟာ ကမ္ဘာပေါ်မှာ ၃ လုံးသာရှိပြီး ပါလက်စတိုင်းက ခရစ်ယာန်ဘုရားကျောင်းတွေမှာ ရှိနေတာဖြစ်ပါတယ်။ ခရစ်တော်မွေးဖွားရာနေရာမှာ တည်ထားတဲ့ Church of the Nativity ဘုရားကျောင်းမှာ တစ်လုံး၊ ရှေးဟောင်း ပါလက်စတိုင်းမြို့ဖြစ်တဲ့ Beit Jibrin က ဘုရားကျောင်းမှာ တစ်လုံး ရှိနေတာပါ။

ဂျူးတွေက အစ္စရေးနိုင်ငံတည်ထောင်ဖို့ ၁၉၄၈ ခုနှစ် ပါလက်စတိုင်း ပိုင်နက်တွေကို တိုက်ခိုက်သိမ်းပိုက်ချိန်မှာ Beit Jibrin မြို့ဟာ ပျက်ဆီးသွားခဲ့ပါတယ်။

အစ္စရေးစစ်တပ်က ရေဖလားကို ထရပ်ကားနဲ့ သယ်ဆောင်သွားတဲ့ ဗီဒီယိုကို ပါလက်စတိုင်းလွတ်မြောက်ရေးအဖွဲ့ PLO ရဲ့ ပြည်သူ့ဆက်ဆံရေးနဲ့ဌာနက Twitter စာမျက်နှာ လွှင့်တင်ခဲ့ပြီး စက်ဆုပ်ဖွယ်ရာကောင်းတဲ့ သူခိုးဓားပြလုပ်ရပ်ဖြစ်တယ်လို့ ဝေဖန်ခဲ့ပါတယ်။

PLO အမှုဆောင်ကော်မတီ အဖွဲ့ဝင် ဟာနန် အက်ရှ်ရာဝီက ကျူးကျော်သူအစ္စရေးရဲ့ ဒီလုပ်ရပ်ဟာ ပါလက်စတိုင်းဌာနေတွေရဲ့ အမှတ်သညာ၊ အထောက်အထားတွေ၊ ယဉ်ကျေးမှုနဲ့ သမိုင်းအမွေအနှစ်တွေကိုဖယ်ရှားတဲ့ လုပ်ရပ်မျိုးဖြစ်တယ်လို့ ပြောကြားခဲ့ပါတယ်။

အစ္စရေးသတင်းစာ Jerusalem Post က ရေဖလားကို အစ္စရေးစစ်တပ်က ခိုးယူသွားတာမဟုတ်ဘဲ မူလနေရာကို ပြန်သွားထားတာဖြစ်တယ်လို့ ဖော်ပြခဲ့ပါတယ်။

အစ္စရေးဟာ မှောင်ခိုသမားတွေ၊ ဓားပြဂိုဏ်းတွေနဲ့ပေါင်းပြီး ပါလက်စတိုင်းတွေရဲ့ ရှေးဟောင်း သမိုင်းအမွေအနှစ် ပစ္စည်းတွေကို ခိုးယူဖျောက်ဖျက်လေ့ရှိတယ်လို့ ပါလက်စတိုင်းအာဏာပိုင်အဖွဲ့ရဲ့ သတင်းဌာန Wafa က ဖော်ပြခဲ့ပါတယ်။

Ref: Middle East Eye

ဇူလိုင် ၂၃၊ ၂၀၂၀
M-Media

-ပါလက်စတိုင်းပိုင်းနက်က အစ္စရေးရဲ့လုပ်ရပ်တွေ၊ အစ္စရေး-ပါလက်စတိုင်းအကြား ဆက်ဆံရေး တင်းမာလာတာတွေက ကိုဗစ်ကာကွယ်တားဆီးရေးလုပ်ငန်းကို ထိခိုက်ပျက်ဆီးစေလိမ့်မယ်လို့ ကုလသမဂ္ဂက သတိပေး ပြောကြားလိုက်ပါတယ်။

အနောက်ဖက်ကမ်း ဟီဘရွန်မြို့က ကိုဗစ်ကုသရေးစင်တာကို အင်္ဂါနေ့မှာ ဆောက်လုပ်ရေးပါမစ်မရှိဘူးဆိုတဲ့ အကြောင်းပြချက်နဲ့ အစ္စရေးစစ်တပ်က ဖြိုချဖျက်ဆီးခဲ့ပါတယ်။ အဲဒီတစ်နေ့တည်းမှာပဲ ဆာလ်ဖစ်မြို့မှာ အစ္စရေးက နေအိမ်တစ်ခုကို ဖြိုချခဲ့ပြီး၊ ဗုဒ္ဓဟူးနေ့မှာတော့ အရှေ့ဂျေရုစလင်က ယဉ်ကျေးမှုစင်တာနှစ်ခုကို ဝင်ရောက်စီးနင်းခဲ့ပါတယ်။

အစ္စရေးဟာ ပါက်စတိုင်းပိုင် အနောက်ဖက်ကမ်းရဲ့ ၃၀ ရာခိုင်နှုန်းလောက်ကို ထပ်သိမ်းဖို့လည်း အစီအစဉ်ရှိနေပါတယ်။

အရှေ့အလယ်ပိုင်းငြိမ်းချမ်းရေးဆိုင်ရာ ကုလအထူးကိုယ်စားလှယ် နီကိုလေ ​မလာဒီနော့ဗ်က အစ္စရေးနဲ့ ပါလက်စတိုင်းမှာ ကိုဗစ်ကူးစက်မှုအခြေအနေဟာ ဆိုးရွားလာခဲ့ပြီး၊ အခုနှစ်အစောပိုင်းက ရှိခဲ့တဲ့ ပူးပေါင်းဆောင်ရွက်မှုမျိုး မမြင်ရတော့ဘဲ ပြည်သူတွေရဲ့ဘ၀ကိုပါ ထိခိုက်လာနိုင်တယ်လို့ ကုလလုံခြုံရေးကောင်စီမှာ မနေ့က သတိပေးခဲ့ပါတယ်။

အနောက်ဖက်ကမ်းက ဒေသတစ်ချို့ကို ပိုင်နက်ထဲသွတ်သွင်းမယ့်အစီအစဉ်ကို စွန့်လွှတ်ဖို့လည်း မလာဒီနော့ဗ်က သတိပေးခဲ့ပါတယ်။ ကိုရိုနာဗိုင်းရပ်စ် ပြန့်ပွားမှု တားဆီးတုန့်ပြန်ရေး၊ အစ္စရေးရဲ့ပိတ်ဆို့မှုကို ခံထားရတဲ့ ဂါဇာကမ်းမြှောင်က ဗိုင်းရပ်စ်ကူးစက်နေသူတွေကို လွှဲပြောင်းနိုင်ရေး ကုလက ကြားဝင်ကူညီပေးဖို့ အသင့်ရှိတယ်လို့လည်း သူက ထည့်သွင်း ပြောဆိုခဲ့ပါတယ်။

ပါလက်စတိုင်းပိုင်နက်တွေမှာ Covid-19 ကူစက်သူအရေအတွက် စုစုပေါင်း ၁၀၉၂၃ ဦး၊ သေဆုံးသူ ၆၇ ဦးရှိပြီး အစ္စရေးမှာ ကူးစက်သူ ၅၄၆၆၃ ဦး၊ သေဆုံးသူ ၄၃၀ ဦး ရှိနေပါတယ်။

Ref: Aljazeera