မတ် ၂၅၊ ၂၀၂၂
M-Media
-ယူကရိန်းစစ်ပွဲမှာ ရုရှားအသုံးပြုတဲ့ ပဲ့ထိန်းဒုံးကျည်တွေရဲ့ မအောင်မြင်မှုဟာ ၆၀ ရာခိုင်နှုန်းအထိ ရှိတယ်လို့ အမည်မဖော်လိုတဲ့ အမေရိကန် အာဏာပိုင်တွေက ရိုက်တာသတင်းဌာနကို ပြောပါတယ်။
ပဲ့ထိန်းဒုံးကျည်တွေဟာ ပစ်မှတ်ကို အတိအကျ ချိန်ရွယ်ပစ်ခတ်နိုင်တဲ့ လက်နက်တွေဖြစ်ပါတယ်။ ပစ်ခတ်မှု မအောင်မြင်တာတွေမှာ ပစ်လွှတ်စဥ်အတွင်း ပေါက်ကွဲသွားတာ၊ ပစ်မှတ်ကို ကျရောက်ပြီးမှ မပေါက်ကွဲတာ စသဖြင့် ပါ၀င်ပါတယ်။
ယူကရိန်းစစ်ပွဲ တစ်လကျော်လာတဲ့အချိန်မှာ ရုရှားက ဒုံးကျည်ပေါင်း ၁၁၀၀ ကျော်လောက် ပစ်လွှတ်ခဲ့တယ်လို့ အမေရိကန် ကာကွယ်ရေးဖက်က ထုတ်ပြန်ထားပါတယ်။
Kh-555 နဲ့ Kh-101 ပဲ့ထိန်းဒုံးကျည်အမျိုးအစားတွေကို ရုရှားက ယူကရိန်းစစ်ပွဲမှာ အဓိကထား အသုံးပြုနေတာပါ။ ဒုံးကျည်အမျိုးအစားကို လိုက်ပြီး မအောင်မြင်မှုဟာ ၅၀ ရာခိုင်နှုန်းကနေ ၆၀ ရာခိုင်နှုန်းလောက်အထိ ရှိတယ်လို့ ထောက်လှမ်းရေးအချက်အလက်တွေကို ကိုးကားပြီး အမေရိကန် တာ၀န်ရှိသူ ၂ ဦးက ပြောပါတယ်။
အခြား တာ၀န်ရှိသူတစ်ဦးက ၀ေဟင်ကပစ်ရတဲ့ ခရုဇ်ဒုံးကျည် မအောင်မြင်မှုဟာ ၂၀ ရာခိုင်နှုန်းကနေ ၆၀ ရာခိုင်နှုန်းအထိ ရှိတယ်လို့ ပြောပါတယ်။
ဒုံးကျည်ပစ်လွှတ်မှု မအောင်မြင်မှုနှုန်းဟာ ၂၀ ရာခိုင်နှုန်းရှိလာရင်ကို အလွန်မြင့်မားတဲ့နှုန်း ဖြစ်ပါတယ်။
ရုရှား ကာကွယ်ရေး၀န်ကြီးဌာနက စစ်သားတွေရဲ့ ပရော်ဖက်ရှင်နယ်ပီသမှု၊ ဒုံးကျည်နည်းပညာတွေကို ချီးကျူးခဲ့ပြီး၊ ဒုံးကျည်ပစ်ခတ်မှု မအောင်မြင်ဘူးဆိုတဲ့ အနောက်နိုင်ငံတွေရဲ့ ပြောကြားမှုဟာ ၀ါဒဖြန့်မှုသက်သက်တာဖြစ်တယ်လို့ ဆိုပါတယ်။
ရုရှားဟာ ပစ်မှတ်ကို ချိန်တွယ်ပစ်ခတ်ရတဲ့ ဒုံးကျည်အရေအတွက် သိိသိသာသာ လျော့နည်းလာပြီး ဗုံးတွေ၊ လက်နက်ကြီးတွေကိုသာ အဓိကထား အသုံးပြုနေရတယ်လို့ အမေရိကန် ကာကွယ်ရေးဆိုင်ရာ တာ၀န်ရှိသူတွေက ကြာသာပတေးနေ့မှာ ထုတ်ပြောထားပါတယ်။
Ref: US News
