မေ ၂၇၊ ၂၀၂၂
M-Media
-နိုင်ငံအတွင်း စွမ်းအင်လုပ်ငန်းတွေက နိုင်ငံတကာကုမ္ပဏီတွေ ထွက်ခွာသွားတဲ့အချိန် စစ်ကောင်စီဟာ ရုရှားထံကနေ ရေနံနဲ့ သဘာဓာတ်ငွေ့တွေကို ပိုက်လိုင်းသွယ် တင်သွင်းဖို့ ကြိုးပမ်းလာပါတယ်။
မြန်မာနိုင်ငံက ရေနံ၊ သဘာဓာတ်ငွေ့လုပ်ငန်းတွေမှာ လုပ်ကိုင်နေတဲ့ မလေးရှား ကုမ္ပဏီ Petronas၊ ထိုင်းကုမ္ပဏီ PTTEP၊ အမေရိကန်ကုမ္ပဏီ Chevron၊ ပြင်သစ်ကုမ္ပဏီ TotalEnergies တို့ဟာ စစ်တပ်ရဲ့ ရက်စက်ကြမ်းကြုတ်မှုတွေ၊ လူ့အခွင့်အရေး ချိုးဖောက်မှုတွေကို ဆန့်ကျင်တဲ့အနေနဲ့ စစ်တပ် အကျိုးအမြတ်ရနေတဲ့ စွမ်းအင်လုပ်ငန်းတွေကနေ နှုတ်ထွက်ကြောင်း ကြောငြာခဲ့ကြပါတယ်။
မြင့်တက်လာတဲ့စွမ်းအင်ပြဿနာကို ဖြေရှင်းဖို့အတွက် စစ်ကောင်စီဟာ ပြီးခဲ့တဲ့လက ရုရှားနိုင်ငံ တာတာဆန် ကိုယ်ပိုင်အုပ်ချုပ်ခွင့်ရဒေသ အာဏာပိုင်တွေကို ဖိတ်ခေါ်ပြီး ဆွေးနွေးခဲ့ပါတယ်။
စစ်ကောင်စီခန့် ၀န်ကြီးနှစ်ဦးဖြစ်တဲ့ ဦးမောင်မောင်ဦးနဲ့ ဦးအောင်နိုင်ဦးတို့ကလည်း ပြီးခဲ့တဲ့လမှာပဲ တရုတ်တာ၀န်ရှိသူတွေနဲ့ မြန်မာနိုင်ငံမှာ ရေအားလျှပ်စစ်ဆည်တွေဆောက်ရေး ဆွေးနွေးခဲ့ပါတယ်။
အိန္ဒိယ ဒါမှမဟုတ် တရုတ်ကိုဖြတ်ပြီး ရုရှားထံက ရေနံနဲ့ သဘာ၀ဓာတ်ငွေ့ တင်သွင်းရေးအတွက် ရုရှားဦးဆောင်တဲ့ ယူရေးရှား စီးပွားရေးသမဂ္ဂနဲ့ စစ်ကောင်စီက သဘောတူညီချက် ရခဲ့ပါတယ်။
ရန်ကုန်မြို့ သံလျင်မြို့နယ်က ရေနံသိုလှောင်ရုံနဲ့ ရေနံချက်စက်ရုံတို့ကို အဆင့်မြှင့်တင်ရေးလည်း သဘောတူညီချက်မှာ ပါ၀င်ပါတယ်။
ရုရှားဟာ မြန်မာနိုင်ငံကို ရေနံ၊ သဘာ၀ဓာတ်ငွေ့တွေ တင်ပို့ပေးဖို့လမ်းကြောင်း ၃ ခုကို စဥ်းစားနေပါတယ်။
ပင်လယ်နက် ဒါမှမဟုတ် ဂျပန်တို့ကိုဖြတ်ပြီး သင်္ဘောတွေနဲ့ သံလျင်ကို တိုက်ရိုက်ပို့ပေးဖို့၊ အိန္ဒိယက ကပ္ပလီပင်လယ်မှာ ဆိပ်ကမ်းသစ်တစ်ခု ဆောက်လုပ်ပြီး အဲဒီကနေတစ်ဆင့် ပိုက်လိုင်းနဲ့ သန်လျင်ကို ပို့ဆောင်ဖို့၊ ရခိုင်ပြည်နယ် ကျောက်ဖြူမြို့မှာရှိတဲ့ တရုတ်ဓာတ်ငွေ့ပိုက်လိုင်းကိုငှားပြီး ပို့ဆောင်ဖို့ ဖြစ်ပါတယ်။
ရုရှားထံကနေ စွမ်းအင်တွေကို မြန်မာနိုင်ငံက ရေနံနဲ့ သဘာ၀ဓာတ်ငွေ့ သန့်စင်စက်ရုံတွေက လက်ခံဖြန့်ဖြူးပေးနိုင်မယ့် အရည်အသွေးမရှိသေးဘဲ ဒါတွေကို အရင်ဆုံး အဆင့်မြှင့်တင်ဖို့ လိုအပ်တယ်လို့ ကျွမ်းကျင်သူတွေက ပြောပါတယ်။
Ref: South China Morning Post
