News @ M-Media

Tag: SaudiArabia

  • အရက်ဖက်သုံး နျူပါ၀ါနိုင်ငံဖြစ်အောင် ကြိုးစားလာတဲ့ ဆော်ဒီအာရေဗျ

    မေ ၁၀၊ ၂၀၂၅
    M-Media

    (ဓာတ်ပုံ – ရီယာ့ဒ်မြို့ မြင်ကွင်း)

    ကမ္ဘာ့အကြီးဆုံး ရေနံတင်ပို့တဲ့နိုင်ငံဖြစ်တဲ့ ဆော်ဒီအာရေဗျဟာ နျူကလီးယားစွမ်းအင် အသုံးပြုမှုမှာ ထိပ်တန်းနိုင်ငံတစ်ခုဖြစ်လာဖို့ အာရုံစိုက် ဆောင်ရွက်လာပါတယ်။

    နျူအစီအစဥ်ဟာ စွမ်းအင်အရင်းအမြစ်တွေ အမျိုးမျိုး အသုံးပြုနိုင်ဖို့၊ ပြည်တွင်းရေနံသုံးစွဲမှုကို လျှော့ချဖို့နဲ့ အိမ်ရှေ့မင်းသား ဘင်ဆလ်မန်ရဲ့ ၂၀၃၀ ဖွံ့ဖြိုးရေးစီမံကိန်းကို အထောက်အပံ့ဖြစ်စေဖို့လည်း ရည်ရွယ်ပါတယ်။ ဆော်ဒီဟာ လျှပ်စစ်ရဖို့နဲ့ သောက်သုံးရေ သန့်စင်ဖို့အတွက် ရေနံနဲ့ ဓာတ်ငွေ့သုံး စက်ရုံတွေကို အဓိက အားထားနေရတာပါ။ နျူစွမ်းအင်ဟာ ကာဗွန်ထုတ်လွှတ်မှုလျှော့ချနိုင်မှာဖြစ်သလို၊ စွမ်းအင်အတွက် ရေနံအသုံးပြုနေရတာကို ချွေတာနိုင်မှာဖြစ်တဲ့အတွက် ပြည်ပရေနံတင်ပို့မှုကို ပိုမိုအားကောင်းစေမှာဖြစ်ပါတယ်။

    ဆော်ဒီဟာ အရပ်ဖက်နျူစီမံကိန်းကနေ နျူလက်နက်ရဖို့ အားထုတ်နိုင်တယ်လို့ ထောက်ပြမှုတွေလည်း ရှိပါတယ်။ အီရန်က နျူလက်နက်ပိုင်ဆိုင်လာရင် သူတို့လည်း ပိုင်ဆိုင်အောင် လုပ်ဆောင်မယ်လို့ ဆော်ဒီအိမ်ရှေ့မင်းသားက ပြောကြားဖူးပါတယ်။

    အမေရိကန်ကတော့ ဆော်ဒီနဲ့ အရပ်ဖက်နျူစီမံကိန်းအတွက် ညှိနှိုင်းနေပါတယ်။ သဘောတူညီချက်မှာ နျူလက်နက်ပျံ့နှံ့မှု ထိန်းချုပ်ဖို့ မဟာဗျူဟာကျတဲ့ ကန့်သတ်ချက်တွေ ပါ၀င်လာမှာဖြစ်ပြီး အမေရိကန်အတွက် စီးပွားရေးအခွင့်အလမ်းတွေ ပွင့်လာမှာ ဖြစ်ပါတယ်။

    အမေရိကန်နဲ့ညှိနှိုင်းမှုမအောင်မြင်ရင်တော့ ဆော်ဒီဟာ တရုတ်၊ ရုရှား၊ တောင်ကိုရီးယား ဒါမှမဟုတ် ပြင်သစ်တို့ကို ဆက်သွယ်ကာ အရပ်ဖက်နျူစီမံကိန်း အကောင်အထည်ဖော်ဖို့ ကြိုးစားလာနိုင်ပါတယ်။ စီမံကိန်းအတွက် အဓိကပြဿနာက ယူရေနီယံ သန့်စင်မှုပါ။ အင်အားကြီးနိုင်ငံတွေက ဆော်ဒီကို ပြည်တွင်းမှာ ယူရေနီယံ သန့်စင်ခွင့်ပေးမလား၊ ပေးခဲ့မယ်ဆိုရင် နျူကလီးယားလက်နက်အဖြစ် ပြောင်းလဲသုံးစွဲနိုင်တဲ့အန္တရာယ် မြင့်တက်လာစေမလားဆိုတဲ့ မေးခွန်းတွေက ရှိနေဆဲဖြစ်ပါတယ်။

    Ref: Reuters

  • နို၀င်ဘာ ၂၈ ရက် နိုင်ငံတကာသတင်းများ

    နို၀င်ဘာ ၂၈ ရက် နိုင်ငံတကာသတင်းများ

    (ဓာတ်ပုံ – ခါမေနီနှင့် အီရန်ရေတပ် အရာရှိများ တွေ့ဆုံပွဲ)

    M-Media

    ရီယာ့ဒ်မြို့မှ မက်ထရိုရထားလိုင်းသစ် ဖွင့်လှစ်
    ————–
    မြို့တော်ရီယာ့ဒ်မှာ ၁၇၆ ကီလိုမီတာရှည်လျားပြီး ဘူတာပေါင်း ၈၅ ခုပါ၀င်မယ့် မက်ထရို ရထားလိုင်းသစ်ကို ဆော်ဒီဘုရင် ဆလ်မန်က ဗုဒ္ဓဟူးနေ့မှာ ဖွင့်လှစ်ခဲ့ပါတယ်။ ဒီဇင်ဘာ ၁ ရက်နေ့စတင်ပြီး အများပြည်သူတွေ အသုံးပြုလို့ရမှာ ဖြစ်ပါတယ်။ ဆော်ဒီအစိုးရရဲ့ ၂၀၃၀ ဖွံ့ဖြိုးရေး စီမံကိန်းမှာ ရီယာ့ဒ်မြို့အတွင်း အများပြည်သူ သယ်ယူပို့ ဆောင်ရေးစနစ် ပိုမိုကောင်းမွန်စေဖို့ ပါ၀င်ပြီး မက်ထရိုရထားလိုင်းဟာ ဒီစီမံကိန်း တစ်စိတ်တစ်ပိုင်း ဖြစ်ပါတယ်။

    ရေကြီးမှုနှင့် ရေရှားပါးမှု တိုက်ဖျက်ရေး စီမံကိန်းသစ် ယူအေအီးစမည်
    —————
    နိုင်ငံတစ်၀ှမ်း ရေလှောင်တမံနဲ့ တူးမြောင်းတွေ တစ်ဒါဇင်လောက် ဆောက်လုပ်မယ့် စီမံကိန်းသစ်တစ်ခုကို အာရပ်စော်ဘွားများပြည်ထောင်စု (ယူအေအီး)နိုင်ငံက ထုတ်ပြန်ကြေငြာပါတယ်။ ရာသီဥတုဖောက်ပြန်မှု နောက်ဆက်တွဲ ဖြစ်ပေါ်လာတဲ့ ရေကြီးရေလျှံမှု၊ သောက်သုံးရေရှားပါးမှု ပြဿနာကို ဖြေရှင်းဖို့ ရည်ရွယ်တာ ဖြစ်ပါတယ်။ ရေပြဿနာကို တိုက်ဖျက်ဖို့အတွက် ယူအေအီးဟာ ၂၀၃၆ စီမံကိန်းကြီးတစ်ခုကို ချမှတ် ဖော်ဆောင်နေပါတယ်။

    ကာကွယ်ရေးစွမ်းအား မြှင့်တင်ရန် အီရန် အဓိပတိ တိုက်တွန်း
    ————–
    စစ်တပ်ရဲ့ တိုက်ခိုက်ရေးနဲ့ ကာကွယ်ရေးစွမ်းအားကို ပိုမိုမြှင့်တင်ဖို့ ရေတပ်ဦးစီးချုပ်တွေနဲ့ တွေ့ဆုံပွဲမှာ အီရန် အဓိပတိ အယာတိုလာ အလီခါမေနီက တိုက်တွန်းလိုက်ပါတယ်။ ရေတပ်ဟာ ဒေသတွင်းမှာ အရေးပါကာ အဆုံးအဖြတ်ပေးနိုင်တဲ့ တပ်တစ်ခုဖြစ်ပြီး၊ ရန်စလာရင် ဆုံးရှုံးမှု ကြီးမားသွားအောင် လုပ်နိုင်တဲ့ အင်အားမျိုး ရှိနေတာဆိုတာကို ရန်သူတွေ သိစေဖို့ လုပ်ဆောင်သွားရမယ်လို့လည်း ခါမေနီက ထည့်သွင်းပြောဆိုခဲ့ပါတယ်။

    Ref: Arab News, Khaleej Times, Press TV


  • အောက်တိုဘာ ၁၁ ရက်နေ့ နိုင်ငံတကာသတင်းများ

    အောက်တိုဘာ ၁၁ ရက်နေ့ နိုင်ငံတကာသတင်းများ

    M-Media

    (ဓာတ်ပုံ – ဆော်ဒီတက္ကသိုလ် မြင်ကွင်းတစ်ခု)

    အစ္စရေးမှ ကျူးကျော်လာရင် အီရန်က ပြင်းပြင်းထန်ထန် တုန့်ပြန်မည်
    ————
    အစ္စရေးက အီရန်ကို ကျူးကျော်တိုက်ခိုက်လာမယ်ဆိုရင် ပြင်းထန်တဲ့ ခုခံတိုက်ခိုက်မှုတွေလုပ်ဖို့ တွန့်ဆုတ်နေမှာ မဟုတ်ဘူးလို့ အီရန်နိုင်ငံခြားရေး၀န်ကြီး အဘတ်စ် အာရဂ်ချီက ကမ္ဘာတစ်၀ှမ်း နိုင်ငံခြားရေး၀န်ကြီးတွေကို ပေးပို့တဲ့စာမှာ ဖော်ပြထားပါတယ်။ အီရန်ဟာ အစ္စရေးရဲ့ ကျူးကျော်မှုအတွက်လည်း အပြည့်အ၀ ပြင်ဆင်ထားပြီးဖြစ်တယ်လို့ သူက ဆိုပါတယ်။

    ကမ္ဘာ့ထိပ်တန်းရောက်လာတဲ့ ဆော်ဒီတက္ကသိုလ်
    ————
    ဆော်ဒီ ရေနံနဲ့ ဓာတ်သတ္ထုဆိုင်ရာ တက္ကသိုလ် King Fahd University of Petroleum and Minerals ဟာ ၂၀၂၄ ခုနှစ်အတွင်း အရှေ့အလယ်ပိုင်းနဲ့ အာဖရိက ထိပ်တန်း တက္ကသိုလ်များစာရင်းမှာ ပါ၀င်လာပါတယ်။ ၂၀၂၀ ခုနှစ်က ကမ္ဘာအဆင့် ၅၀၇ ရှိတဲ့ အဲဒီတက္ကသိုလ်ဟာ ပြုပြင်ပြောင်းလဲမှုတွေလုပ်ပြီး ၄ နှစ်အကြာမှာပဲ ၁၇၆ ကို ရောက်လာတာဖြစ်ပါတယ်။ ဆော်ဒီက အခြားတက္ကသိုလ်တွေလည်း ကမ္ဘာ့အဆင့်တွေ မြင့်တက်လာပါတယ်။

    ဘင်္ဂလားဒေ့ရှ်တွင် သွေးလွန်တုပ်ကွေးပြဿနာ ရင်ဆိုင်နေရ
    ———-
    အခုနှစ်အတွင်း သွေးလွန်တုပ်ကွေးကြောင့် သေဆုံးသူအရေအတွက်ဟာ ၂၀၁ ဦးရှိလာပြီလို ဘင်္ဂလားဒေ့ရှ်က ထုတ်ပြန်ပါတယ်။ ရောဂါဖြစ်ပွားမှုအရေအတွက်က ၄၀၈၉၅ ဖြစ်ပါတယ်။ ပြီးခဲ့တဲ့နှစ်က ဘင်္ဂလားဒေ့ရှ်မှာ သွေးလွန်တုပ်ကွေးကြောင့် သေဆုံးသူ အရေအတွက်ဟာ ၁၇၀၅ ဦး ရှိပါတယ်။


  • စက်တင်ဘာ ၂၁ ရက်နေ့ နိုင်ငံကတာ သတင်းတို

    စက်တင်ဘာ ၂၁ ရက်နေ့ နိုင်ငံကတာ သတင်းတို

    M-Media

    (ဓာတ်ပုံ – ဆော်ဒီမှ အာရဘီစင်တာတစ်ခုကို မြင်ရစဥ်)

    လူ ၇၀ ကျော်ကို အွမ္မရာ ဘုရားဖူးပို့ပေးမယ့် ဒူဘိုင်းရဲဌာန
    ———
    ဒူဘိုင်းရဲတပ်ဖွဲ့ဟာ လက်ရှိ၀န်ထမ်းနဲ့ အငြိမ်းစား၀န်ထမ်း စုစုပေါင်း ၇၆ ဦးကို စားရိတ်ငြိမ်း ဆော်ဒီအာရေဗျကို အွမ္မရာဘုရားဖူး ပို့ပေးဖို့ စီစဥ်နေပါတယ်။ ဒီခရီးစဥ်ဟာ ၆ ရက်တာ ကြာမြင့်မှာဖြစ်ပြီး ဘုရားဖူးကာလမှာ ကျင့်မူဆောက်တည်ရမယ့် ကျင့်စဥ်တွေကို ကာလတို သင်တန်းပေးသွားမယ်လို့ ရဲတပ်ဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။

    အာရဘီဘာသာဆိုင်ရာ နိုင်ငံတကာညီလာခံတစ်ခု ဆော်ဒီတွင် ကျင်းပမည်
    ————–
    အောက်တိုဘာ ၆ ရက်နေ့ကနေ ၇ ရက်နေ့အထိ ဆော်ဒီအာရေဗျနိုင်ငံမှာ ၃ ကြိမ်မြောက် အာရဘီဘာသာစကားဆိုင်ရာ နိုင်ငံတကာညီလာခံတစ်ခု ကျင်းပဖို့ ရှိနေပါတယ်။ ကွန်ပျူတာနဲ့ ဉာဉ်ရည်တု နယ်ပယ်မှာ အာရဘီဘာသာစာပေကို အခုထက်ပိုပြီး ပိုမိုအသုံချနိုင်ရေး ညီလာခံမှာ ဆွေးနွေးမှာဖြစ်ပြီး နိုင်ငံပေါင်း ၂၂ နိုင်ငံက ပညာရှင်တွေ အများအပြား တက်ရောက်ဖို့ ရှိနေပါတယ်။

    အီရန်က ဒရုန်းနှင့် ဒုံးကျည်သစ်များ ထုတ်ပြ
    ————-
    အီရန်က တိုက်ချင်းပစ်ဒုံးကျည်သစ် Jihad နဲ့ အဆင့်မြှင့်တင်ထားတဲ့ Shahed-136B အသေခံဒရုန်းတို့ကို စနေနေ့ စစ်ရေးပြပွဲမှာ ထုတ်ပြလာပါတယ်။ ဒုံးကျည်ဟာ မိုင်ပေါင်း ၆၀၀ ကျော် အကွာအ၀ေးအထိ ပစ်ခတ်နိုင်ပြီး၊ ဒရုန်းက မိုင် ၂၅၀၀ လောက် ပျံသန်းနိုင်ပါတယ်။ စစ်ရေးပြပွဲမှာ အခြား စစ်လက်နက်ပစ္စည်းတွေကိုလည်း အီရန်က ထုတ်ပြခဲ့ပါတယ်။

    Ref: Arab News


  • စက်တင်ဘာ ၅ ရက်နေ့ သတင်းတို

    စက်တင်ဘာ ၅ ရက်နေ့ သတင်းတို

    စက်တင်ဘာ ၅၊ ၂၀၂၄
    M-Media

    အကျဥ်းသားကိစ္စ ကူညီခဲ့သည့် ဆော်ဒီကို ရုရှား ကျေးဇူးတင်
    —————–
    သြဂုတ်လ ရုရှားနဲ့ အမေရိကန်တို့ အကျဥ်းသား အပြန်အလှန် လဲလှယ်ရေးမှာ ကူညီပေးခဲ့တဲ့ ဆော်ဒီ အိမ်ရှေ့မင်းသား မိုဟာမက် ဘင် ဆလ်မန်ကို ကျေးဇူးတင်တယ်လို့ ရုရှားသမ္မတ ဗလာဒီမီရ်ပူတင်က ပြောပါတယ်။ နှစ်ဖက် အကျဥ်းသား ၂၄ ဦး ပါ၀င်တဲ့ ဒီလဲလှယ်ရေးဟာ စစ်အေးနောက်ပိုင်း ရုရှားနဲ့ အနောက်နိုင်ငံတွေအကြား အကြီးဆုံးလဲလှယ်မှုလည်း ဖြစ်ပါတယ်။

    အစ္စရေးကို အီရန်၏ တုန့်ပြန်မှု ထူးထူးခြားခြားဖြစ်မည်ဟုဆို
    ————–
    ဟားမက်စ်အဖွဲ့ရဲ့ နိုင်ငံရေးခေါင်းဆောင် အစ္စမာအီလ် ဟာနီယာကို သြဂုတ်လအတွင်း တီဟီရန်မှာ အစ္စရေးက လုပ်ကြံမှုအတွက် တုန့်ပြန်မှုဟာ ထူးခြားပြီး အံ့သြစရာဖြစ်လာလိမ့်မယ်လို့ အီရန် တော်လှန်ရေးအစောင့်တပ်ဖွဲ့ တပ်မှူး ဗိုလ်ချုပ် မိုရှန် ချိုင်ဇာရီက ပြောပါတယ်။ တိုက်ခိုက်ဖို့အတွက် သင့်တော်တဲ့ အချိန်တစ်ခုကို စောင့်နေတာလို့လည်း ချိုင်ဇာရီက ထည့်သွင်းပြောဆိုခဲ့ပါတယ်။

    စင်ကာပူ-အိန္ဒိယ နည်းပညာပူးပေါင်းဆောင်ရွက်မှု တိုးမြှင့်မည်
    —————–
    ကွန်ပျူတာချစ်ပ်နဲ့ ဒစ်ဂျစ်တယ်နည်းပညာမှာ ပူးပေါင်းဆောင်ရွက်မှု တိုးမြှင့်ရေး နားလည်မှုဆိုင်ရာ စာချွန်လွှာတစ်ရပ်ကို အိန္ဒိယနဲ့ စင်ကာပူတို့ စက်တင်ဘာ ၅ ရက်နေ့မှာ လက်မှတ်ရေးထိုးလိုက်ပါတယ်။ အိန္ဒိယဟာ ကွန်ပျူတာချစ်ပ်ထုတ်လုပ်ရေးမှာ ကမ္ဘာ့အင်အားကြီးနိုင်ငံတစ်ခု ဖြစ်လာရေး ကြိုးပမ်းဆောင်ရွက်နေပြီး စာချွန်လွှာဟာ ဒီရည်မှန်းချက် ပိုမိုအားကောင်းလာရေး အထောက်အပံ့ ဖြစ်လာလိမ့်မယ်လို့ အိန္ဒိယက ပြောပါတယ်။

    Ref: Arab News, CNA