နို၀င်ဘာ ၂၆၊ ၂၀၂၃
M-Media
-ဒူဘိုင်းဘုရင် ရှိခ် မိုဟာမက် ဘင် ရာရှစ် အလ် မခ်တွမ်က ချီးမြှင့်တဲ့ ၂၀၂၃ ခုနှစ် အာရပ်ကမ္ဘာ ဆေးဘက်ဆိုင်ရာထူးချွန်ဆုကို အမေရိကန်အခြေစိုက် ဆော်ဒီ နှလုံးပါရဂူ ဒေါက်တာ ဟာနီ နဂျမ်က ရရှိသွားပါတယ်။
Arab Minds Award လို့ အမည်ပေးထားတဲ့ အဲဒီထူးချွန်ဆုကို အာရပ်နိုဘယ်ဆုလို့လည်း ခေါ်ပါတယ်။ အာရပ်စော်ဘွားများပြည်ထောင်စု (ယူအေအီး) ဒုတိယသမ္မတနဲ့ ၀န်ကြီးချုပ် ရှိခ်မိုဟာမက်က ၂၀၂၂ ခုနှစ်မှာ စတင်ချီးမြှင့်တာပါ။
ယခုနှစ် ဆေးဘက်ဆိုင်ရာဆုကို ရရှိသွားတဲ့ ဒေါက်တာ ဟာနီ နဂျမ်ဟာ အမေရိကန်ပြည်ထောင်စု အိုဟိုင်းယိုးပြည်နယ် ကလိဗ်လန်းဆေးရုံက နှလုံးဌာန အကြီးအကဲ ဖြစ်ပါတယ်။
မိခင်၀မ်းဗိုက်ထဲက ကလေးငယ်ရဲ့ နှလုံးကို ခွဲစိပ်ကုသပေးမှုအပြင် ခက်ခဲတဲ့ နှလုံးခွဲစိပ်မှု တော်တော်များများကို အောင်မြင်အောင် ဆောင်ရွက်နိုင်သူပါ။
ရှိခ်မိုဟာမက်ရဲ့ ထုတ်ပြန်ချက်မှာ နှလုံးခွဲစိပ်ကုသမှု နယ်ပယ်အတွင်း ဒေါက်တာ နဂျမ်ရဲ့ ပြောင်မြောက်တဲ့ စွမ်းဆောင်ရည်တွေ၊ တီထွင်ကြံဆမှုတွေကို အသိအမှတ်ပြုတဲ့အနေနဲ့ Arab Minds Award ဆု ကို ချီးမြှင့်ခဲ့တာလို့ ဖော်ပြထားပါတယ်။
သက်တမ်းတစ်လျှောက် အောင်မြင်တဲ့ နှလုံးခွဲစိပ်မှုပေါင်း တစ်သောင်းကျောင် ဆောင်ရွက်ခဲ့တဲ့ နဂျမ်ဟာ Arab Minds Award ဆုရဲ့ ဆေးပညာထူးချွန်ဆုကို ပထမဆုံး ရရှိခဲ့သူ ဖြစ်ပါတယ်။
Arab Minds Award ဆုဟာ အင်ဂျင်နီယာ၊ စီးပွားရေး၊ စာပေနဲ့ အနုပညာနယ်ပယ်တွေမှာ ထူးချွန်တဲ့ အာရပ်လူမျိုးတွေကို ရွေးချယ်ချီမြှင့်တာ ဖြစ်ပါတယ်။
ဒေါက်တာနဂျမ်ရဲ့ အပြောင်မြောက်ဆုံး ခွဲစိပ်မှုဟာ လွန်ခဲ့တဲ့ ၂ နှစ် ကလိဗ်လန်းဆေးရုံမှာ ပြုလုပ်တဲ့ ခွဲစိပ်မှုပါ။ ၂၆ ပတ်သာရှိတဲ့ သန္ဓေသားလောင်းရဲ့ နှလုံးမှာ အကြိတ်ဖြစ်နေတာကို ဖယ်ရှားပေးခဲ့ရတာဖြစ်ပါတယ်။
မိခင်ဗိုက်ကိုခွဲ သန္ဓေသားလောင်းကိုထုတ်ပြီး ရင်ကိုခွဲ နှလုံးက အကြိတ်ကို ဖယ်ကာ၊ သန္ဓေသားလောင်ကို မိခင်ဗိုက်ထဲ ပြန်ထည့်ပေးရတဲ့ ဒီခွဲစိပ်မှုဟာ အလွန်အဖြစ်နည်းပြီး ရှုပ်ထွေးတဲ့ လုပ်ငန်းစဥ် ဖြစ်ပါတယ်။ ကမ္ဘာမှာ ဒီလိုခွဲစိပ်မှု ၂ ခုသာ ရှိပါတယ်။
Ref: Khaleej Times
