ဒီဇင်ဘာ ၁၅၊ ၂၀၁၅
M-Media
ဆီးရီးယားအမျိုးသမီးတစ်ဦးက ၎င်း၏ရောဂါကို ပြသနေစဉ်
– စစ်ဘေးစစ်ဒဏ်ခံနေရတဲ့ ဆီးရီးယားက IS အဖွဲ့ထိန်းချုပ်တဲ့ဒေသတွေမှာ ကျန်းမာရေးစောင့်ရှောက်မှုစနစ်တွေ ပျက်သုဉ်းကုန်တာက Leishmaniasis လိုခေါ်တဲ့ အသားကိုလှိုက်စားတဲ့ ဗိုင်းရပ်စ်တစ်မျိုးကို ပြန့်နှံ့စေခဲ့ပါတယ်။
အရေပြားကနေတစ်ဆင့် အသားတွေကို လှိုက်စားပြီး ရုပ်ပျက်ဆင်းပျက်ဖြစ်စေတဲ့ ဒီဗိုင်းရပ်စ်ပိုးဟာ လမ်းတွေပေါ်မှာပုံထားတဲ့ အလောင်းတွေကို သွားရောက်စားသောက်ကြတဲ့ ကပ်ပါးပိုးတွေကနေတစ်ဆင့် ကူးစက်တာလည်းဖြစ်ပါတယ်။
“အပြစ်မဲ့ပြည်သူတွေကို သတ်ဖြတ်ပြီး၊ အလောင်းတွေကို လမ်းပေါ်မှာ ပစ်စလခတ် လွှင့်ပစ်ထားတဲ့ IS အဖွဲ့ရဲ့ စက်ဆုပ်ဖွယ်ရာ လုပ်ရပ်တွေရဲ့ ရလဒ်ပါပဲ။ ဒါဟာ Leishmaniasis ရောဂါကို အလျင်အမြန်ပြန့်နှံစေတဲ့ နောက်ကွယ်က အဓိကအကြောင်းအရင်းတစ်ခုပါပဲ” လို့ ကာ့ဒ်လခြမ်းနီအဖွဲ့ အကြီးအကဲ ဒီလ်ကက်ရှ် အီဆာက ဆိုပါတယ်။
ဆီးရီးယားက ကာ့ဒ်တိုက်ခိုက်ရေးသမားတွေကတော့ ဒီရောဂါကို IS က ဆီးရီးယားနိုင်ငံတစ်ဝှမ်း လွှမ်းမိုးပြီး ရက်စက်ကြမ်းကြုတ်မှုတွေ မပြုလုပ်ခင်က မတွေ့ရဘူးလို့ ပြောပါတယ်။ Leishmaniasis ရောဂါဟာ အသက်အန္တရာယ်ကို မထိခိုက်ပေမယ့် အရေပြားပေါ်မှာ ရုပ်ပျက်ဆင်းပျက် အနာတွေ ဖြစ်စေပြီး ဆေးဘက်ဆိုင်ရာအပါအ၀င် အခြေခံလိုအပ်ချက်တွေ မရရှိနိုင်တဲ့ စစ်ဖြစ်ဆဲ ဆီးရီးယားလိုနိုင်ငံမျိုးမှာတော့ ဆိုးဆိုးရွားရွားတွေ ဖြစ်စေတယ်လို့ တိုက်ခိုက်ရေးသမားတစ်ယောက်က ဆိုပါတယ်။
“ကျွန်တော်တို့ဟာ စစ်မြေပြင်မှာ လေးနှစ်လောက် တိုက်ခိုက်နေရတယ်။ ဒီရောဂါဟာ ယေဘူယျအားဖြင့် စစ်တလင်းဒေသတွေဖြစ်တဲ့ တာလ် ဟာမစ်၊ ဟွန်နဲ့ ကိုဆာမြို့တွေမှာဖြစ်ပါတယ်” လို့ သူက ထည့်သွင်းပြောကြားခဲ့ပါတယ်။
“စစ်ရေးလှုပ်ရှားမှု အများအပြားနဲ့ လူတွေ ရွှေ့ပြောင်းကြတဲ့ဒေသတွေမှာ ဒါမျိုးဖြစ်ပွားတယ်ဆိုတာ တော်တော်လေးဖြစ်နိုင်ပါတယ်။ အဲဒီလိုအဖြစ်အပျက်တွေက leishmaniasis ရောဂါဖြစ်ပွားဖို့ အကြောင်းအရင်းတွေပါပဲ” လို့ ဒေါက်တာ ၀ီလီယံ ရှက်ဖ်နာက ဆိုပါတယ်။
သဲကန္တာရ ယင်ကောင်တွေကြောင့် ဒီရောဂါပြန့်နှံ့မှုကို ၂၀၁၃ ခုနှစ်စက်တင်ဘာလမှာ ကြားခဲ့ရပြီး ၂၀၁၄ မေလအထိ လူ ၅၀၀ ၀န်းကျင်လောက်ကို ကူးစက်ခဲ့ပါတယ်။
“ဒီရောဂါဖြစ်နေတဲ့လူ သေဆုံးသွားလို့ရှိရင် ယင်ကောင်တွေကလာအုံပြီး သူတို့မှာ ရောဂါပိုးကူးသွားမယ်။ အဲဒီယင်ကောင်တွေက ဒေသမှာရှိတဲ့ အခြားသူတွေကို ကူးစက်စေပါတယ်” လို့ ရှက်ဖ်နာက ရှင်းပြခဲ့ပါတယ်။
၎ နှစ်ကျော်ကြာ ပဋိပက္ခတွေကြောင့် ဆီးရီးယာရဲ့ ကျန်းမာရေးစနစ်ဟာ တော်တော်လေး ယိုယွင်းပျက်ဆီးနေပါတယ်။ နိုင်ငံတစ်ဝှမ်းမှာရှိတဲ့ ပြည်သူ့ဆေးရုံတွေရဲ့ ထက်ဝက်ကျော်ဟာ စောင့်ရှောက်မှု အပြည့်အ၀မပေးနိုင်ပါဘူး။ IS အဖွဲ့က ထိန်းချုပ်ထားတဲ့ ဒေသတွေက ဆေးရုံးတွေမှာတော့ ၀န်ထမ်းတွေ မရှိကြပါဘူး။ ကျန်းမာရေးဝန်ထမ်းတွေဟာ အသက်ရှင်ရပ်တည်ဖို့အတွက် ထွက်ပြေးကြရပါတယ်။
မရှိမဖြစ်လိုအပ်နေတဲ့ ဆေးဘက်ဆိုင်ရာ အထောက်အပံ့တွေကို နိုင်ငံတကာအကူအညီပေးရေး အေဂျင်စီတွေက ပေးပို့ဖို့ဟာလည်း တော်တော်လေးဆိုးရွားတဲ့ အခြေအနေမျိုးမှာ ရှိနေပါတယ်။ ကမ္ဘာ့ကျန်းမာရေးအဖွဲ့ WHO ကတော့ ဆီးရီးယားပြည်သူ ၁၃ သန်းကျော်လောက်ဟာ လူသားချင်းစာနာထောက်ထားမှုဆိုင်ရာ အကူအညီတွေကို ချက်ခြင်းလိုအပ်နေတယ်လို့ ဆိုပါတယ်။
အသားကို လှိုက်စားတတ်တဲ့ Leishmaniasis ရောဂါဟာ ကမ္ဘာပေါ်က တိုက်ကြီးတစ်တိုက်ချင်းစီရဲ့ အဆင်းရဲဆုံးနိုင်ငံတွေမှာ တွေ့ရလေ့ရှိတဲ့ ရောဂါမျိုးဖြစ်ပါတယ်။ မခံမရပ်နိုင်အောင် နာကျင်တဲ့ ဒီရောဂါကို ဆီးရီးယားမှာ Aleppo Button Disease ဒါမှမဟုတ် Aleppo boil လို့ ခေါ်ပါတယ်။
အဲလစ်ပိုဟာ ၂၀၁၂ ခုနှစ် နှစ်အလယ်လောက်က စခဲ့တဲ့ တိုက်ခိုက်မှုတွေကြောင့် ဖြူခါပြာခါကျနေတဲ့မြို့ ဖြစ်ပြီး အနောက်ဘက်ကို အစိုးရက ထိန်းချုပ်ထားကာ အရှေ့ဘက်ကိုတော့ သူပုန်တွေက ထိန်းချုပ်ထားပါတယ်။ မြို့ရဲ့ ပတ်ပတ်လည်ကိုတော့ IS နဲ့ အလ်ကိုင်းဒါးသစ္စာခံ Al-Nusra Front အဖွဲ့တို့အပါအ၀င် လက်နက်ကိုင်အဖွဲ့ တော်တော်များများက ထိန်းချုပ်ထားကြပါတယ်။
ဆီးရီးယားက Leishmaniasis ရောဂါဖြစ်ပွားမှုကို စုံစမ်းလေ့လာပြီး ရေးသားခဲ့တဲ့ Acta Dermato-Venereologica အဖွဲ့ရဲ့ အဆိုအရတော့ ၂၀၁၂ ခုနှစ်ကစလို့ နိုင်ငံတစ်ဝှမ်း ဒီရောဂါဖြစ်ပွားသူ ၅၃၀၀၀ ခန့် စာရင်းရရှိခဲ့တယ်လို့ ဆိုပါတယ်။ ၂၀၁၃ ခုနှစ် ပထမ ၆ လအတွင်းမှာပဲ ဖြစ်ပွားသူဟာ ၄၁၀၀၀ ရှိတယ်လို့ ပြောပါတယ်။ အဲလစ်ပိုမှာရှိတဲ့ Leishmaniasis စောင့်ကြည့်စင်တာရဲ့ အဆိုအရတော့ ၂၀၁၃ ခုနှစ်အတွင်း အဲလစ်ပိုတစ်မြို့တည်းမှာပဲ ရောဂါဖြစ်ပွားသူ ၂၂၃၅၆ ဦးရှိခဲ့တယ်လို့ သိရပါတယ်။ ဆီးရီးယားပြည်တွင်းစစ် အရှိန်ရလာတာနဲ့ IS အဖွဲ့ရဲ့အင်အား ကြီးလာတာကြောင့် အဲဒီအချိန်ကနေစပြီး ကူးစက်ဖြစ်ပွားမှု အရေအတွက် တိုးလာခဲ့ပါတယ်။
Leishmaniasis ရောဂါအတွက် ကာကွယ်ဆေး မရှိသေးပါဘူး။ ရေရှည်ကုသရတဲ့နည်းလမ်း ရှိပေမယ့် စစ်ပွဲဖြစ်ပွားနေတဲ့ ဆီးရီးယားလိုနိုင်ငံမျိုးမှာတော့ ဒီကုသမှုဟာ ရရှိနိုင်မှာမဟုတ်ပါဘူး။ ဒီရောဂါကို ရှောင်ရှားဖို့ တစ်ခုတည်းသော နည်းလမ်းက သဲကန္တာရ ယင်ကောင်တွေ အကိုက်ခံရခြင်းကနေ ရှောင်ကြဖို့ပါပဲ။ ဒါပေမယ့် ဒေါက်တာ ရှက်ဖ်နာက လူသားချင်းစာနာထောက်ထားမှုဆိုင်ရာ အခြေအနေ ဆိုးရွားနေတဲ့ အခြေအနေမျိုးမှာ ဆီးရီးယားပြည်သူတွေဟာ ဒီရောဂါ ဆက်လက်ကူးစက်ခံရမှာ မလွဲဧကန်ပါပဲလို့ ပြောကြားခဲ့ပါတယ်။
“ဒါက အရေပြားရောဂါဖြစ်ပြီး ရုပ်ပျက်ဆင်းပျက် ပြည်တည်နာတွေကို ဖြစ်စေနိုင်ပါတယ်။ အဲဒီအနာ ဒီအတိုင်းပျောက်ဖို့ဆိုရင် တစ်နှစ်လောက် ကြာတတ်ပါတယ်။ တစ်ခါတစ်ရံမှာ ကပ်ပါးပိုးတွေက ခန္ဓာကိုယ်ထဲ ၀င်ရောက်နိုင်ပြီး ဆိုးရွားတဲ့ ကူးစက်ပြန့်နှံ့မှုတွေ ဖြစ်ပွားနိုင်ပါတယ်”
(RT မှ ဖော်ပြသည့် Flesh-eating skin disease grips ISIS-controlled areas in Syria ဆောင်းပါးကို ဆီလျော်အောင် ဘာသာပြန်ဆိုသည်)
