မေ ၁၆၊ ၂၀၂၀
M-Media

-ထိုင်းနိုင်ငံမှာ ဒီကနေ့ Covid-19 ကြောင့်သေဆုံးသူ၊ ထပ်မံကူးစက်သူ မရှိတော့ဘဲ အခြေအနေတွေ တိုးတက်လာတဲ့အတွက် စီးပွားရေးလုပ်ငန်းတွေ၊ ကုန်တိုက်တွေ ပြန်ဖွင့်ဖို့ အစိုးရက စီစဉ်နေပါတယ်။

ထိုင်းနိုင်ငံမှာ ကူးစက်သူအရေအတွက် စုစုပေါင်း ၃၀၂၅ ဦး ရှိပြီး၊ သေဆုံးသူက ၅၆ ဦး ရှိပါတယ်။ တစ်ရက်အတွင်း ရောဂါကူးစက်သူ မရှိတာဟာ မတ်လ ၉ ရက်နေ့ကစလို့ ဒုတိယအကြိမ်မြောက်ဖြစ်ပါတယ်။

တနင်္ဂနွေနေ့မှာ စျေးဝယ်စင်တာတွေ ပြန်ဖို့ အစိုးရက ခွင့်ပြုခဲ့ပြီး ညမထွက်ရအချိန်ကိုလည်း တစ်နာရီလျော့ပေးကာ ည ၁၀ နာရီ- မနက် ၄ နာရီအထိ သတ်မှတ်ခဲ့ပါတယ်။ အဆောက်အဦးထဲမှာဖွင့်လှစ်တဲ့ စားသောက်ဆိုင်တွေ၊ လက်ကားအရောင်းဆိုင်တွေ၊ ကိုယ်ကာယ​ လေ့ကျင့်ရေးစင်တာတွေကိုလည်း အကန့်အသတ်နဲ့ အစိုးရ ပြန်ဖွင့်ခွင့် ပေးထားပါတယ်။

Covid-19 အခြေအ​နေ စီမံခန့်ခွဲရေးစင်တာ CCSA ပြောရေးဆိုခွင့်ရှိသူ စီးပွားရေးအရ လိုအပ်တဲ့အတွက် ကန့်သတ်ချက်တွေကို ဖြေလျော့ပေးတာဖြစ်ပေမယ့် ရောဂါကူးစက်မှု ဒုတိယလှိုင်း ဖြစ်လာမှာကို စိုးရိမ်မိတယ်လို့ မနေ့မှာ ပြောကြားခဲ့ပါတယ်။

Ref: CNA

ဇန်နဝါရီ ၁၃၊ ၂၀၂၀
M-Media

-တရုတ်နိုင်ငံကနေ ရောက်ရှိလာတဲ့ အမျိုးသမီးတစ်ဦးဟာ အသက်ရှုလမ်းကြောင်းဆိုင်ရာ ဗိုင်းရပ်စ်တစ်မျိုး ကူးစက်နေတာကို တွေ့ရတယ်လို့ ထိုင်းအာဏာပိုင်တွေက ဒီကနေ့မှာ ထုတ်ပြန်ကြေငြာလိုက်ပါတယ်။

တရုတ်နိုင်ငံအလယ်ပိုင်း ဝူဟန်ပြည်နယ်မှာ အဆုတ်ရောင်ရောဂါလို အမျိုးအမည်မသိ ရောဂါတစ်မျိုး ကူးစက်ပြန့်နှံ့နေပြီး ပြီးခဲ့တဲ့တစ်ပတ်မှာ အသက် ၆၁ နှစ်အရွယ် အမျိုးသားတစ်ဦး သေဆုံးခဲ့ပါတယ်။

ဇန်နဝါရီ ၃ ရက်နေ့ကစပြီး တရုတ်နိုင်ငံက ရောက်ရှိလာသူတွေထဲက လူ ၁၂ ဦးကို သီးသန့်ခွဲထား စောင့်ကြည့်နေရာမှာ အသက် ၆၁ နှစ်အရွယ် အမျိုးသမီးတစ်ဦးဟာ ထူးဆန်းတဲ့ အသက်ရှုလမ်းကြောင်းဆိုင်ရာ ဗိုင်းရပ်စ်ပိုးတစ်မျိုး ကူးစက်နေတာကို တွေ့ရတယ်လို့ ထိုင်းကျန်းမာရေးဝန်ကြီးဌာနက ဒီကနေ့မှာ ထုတ်ပြန်ခဲ့ပါတယ်။

အဲဒီအမျိုးသမီးဟာ ပြီးခဲ့တဲ့တစ်ပတ် ဗုဒ္ဓဟူးနေ့က ထိုင်းနိုင်ငံကို ဝင်ရောက်လာတာဖြစ်ပြီး လက်ရှိမှာ တရုတ်ပြည်ကို ပြန်နိုင်လောက်တဲ့ အနေအထားအထိ စောင့်ရှောက်ကုသပေးထားတယ်လို့လည်း ဆိုပါတယ်။

ကမ္ဘာ့ကျန်းမာရေးအဖွဲ့ကလည်း ထိုင်းနိုင်ငံက ဒီအဖြစ်အပျက်ဟာ တရုတ်နိုင်ငံက အမျိုးအမည်မသိ အဆုတ်ရောင်ရောဂါမျိုး ဖြစ်တယ်လို့ အတည်ပြုခဲ့ပြီး၊ ဒီပြန့်နှံ့မှုအတွက် အရေးပေါ်အစည်းအဝေး ခေါ်ဆိုကာ ဆွေးနွေးသွားမယ်လို့ ထုတ်ပြန်ခဲ့ပါတယ်။

လွန်ခဲ့တဲ့ ၁၀ နှစ်အရင်က တရုတ်နိုင်ငံမှာ စတင်ဖြစ်ပွားခဲ့တဲ့ SARS ရောဂါကြောင့် ကမ္ဘာတစ်ဝှမ်း လူအများအပြား သေဆုံးခဲ့ပါတယ်။ လက်ရှိ ဝူဟန်မြို့မှာ ပြန့်နှံ့ဖြစ်ပွားနေတဲ့ ဒီရောဂါသစ်ဟာ ပင်လယ်စာစျေးတစ်ခုကနေ စတင်တာဖြစ်ပြီး လူအချင်းချင်း ကူးစက်တာမျိုး မတွေ့ရသေးဘူးလို့ တရုတ်အာဏာပိုင်တွေက ထုတ်ပြန်ထားပါတယ်။

စင်ကာပူ၊ ဟောင်ကောင်တို့အပါအဝင် အာရှနိုင်ငံတစ်ချို့မှာတော့ တရုတ်နိုင်ငံကနေ ဝင်ရောက်လာသူတွေကို စောင့်ကြည့်မှုတွေ လုပ်ဆောင်နေပါတယ်။ အခုလအတွင်း ကျရောက်မယ့်တရုတ်နှစ်သစ်ကူးကာလမှာ တရုတ်နိုင်ငံက လူသန်းချီ ခရီးသွားမှာကြောင့် ကူးစက်ရောဂါသစ် ထိန်းချုပ်မရအောင် ပြန့်နှံ့သွားနိုင်တယ်ဆိုတဲ့ စိုးရိမ်မှုတွေလည်း ရှိနေပါတယ်။

Ref: CNA

ဒီဇင်ဘာ ၂၅၊ ၂၀၁၉
M-Media

-နိုင်ငံတောင်ပိုင်း နာရာသီဝပ်ပြည်နယ်မှာ အရပ်သားတွေကို ပစ်ခတ်သတ်ဖြတ်မှုအတွက် စစ်သား ၂ ဦးကို တရားစွဲဆိုလိုက်တယ်လို့ ထိုင်းရဲတပ်ဖွဲ့က ဒီကနေ့မှာ သတင်းထုတ်ပြန်ခဲ့ပြီး၊ လူ့အခွင့်အရေးအဖွဲ့တွေက ဒီလုပ်ရပ်ကို ကြိုဆိုခဲ့ပါတယ်။

ပြီးခဲ့တဲ့တစ်ပတ်အတွင်း နာရာသီဝပ်ပြည်နယ်ရဲ့ တောတွင်းတစ်နေရာမှာ အမျိုးသား ၃ ဦး အသတ်ခံခဲ့ရတာပါ။ ဒီကိစ္စနဲ့ပတ်သက်ပြီး စစ်သား ၂ ယောက်က သူတို့လုပ်တယ်လို့ဝန်ခံကာ တနင်္လာနေ့မှာ အဖမ်းခံခဲ့တယ်လို့ ရဲတပ်ဖွဲ့က ဆိုပါတယ်။

စစ်သားတွေကို လူသတ်မှုနဲ့ တရားစွဲဆိုကာ အာမခံနဲ့ ပြန်လွှတ်ပေးခဲ့ပြီး စုံစမ်းစစ်ဆေးမှုတွေကို ဆက်လက်လုပ်ဆောင်နေပါတယ်။

မလေးလူမျိုးတွေရဲ့ဒေသဖြစ်တဲ့ ထိုင်းနိုင်ငံတောင်ပိုင်းမှာ ကိုယ်ပိုင်အုပ်ချုပ်ခွင့် ရရှိလိုတဲ့ လူမျိုးစုလက်နက်ကိုင်တွေနဲ့ ထိုင်းအစိုးရတို့အကြား ပဋိပက္ခဟာ ၁၅ နှစ်တာကြာမြင့်လာပြီဖြစ်ပြီး အနည်းဆုံး လူပေါင်း ၇၀၀၀ ကျော် သေဆုံးကာ အများစုက အရပ်သားတွေဖြစ်ပါတယ်။

လူ့အခွင့်အရေး စောင့်ကြည့်အဖွဲ့ Human Rights Watch က ထိုင်းတောင်ပိုင်းမှာ စစ်သားတွေရဲ့ အရပ်သားတွေအပေါ် ကျူးလွန်မှုတွေဟာ များသောအားဖြင့် လစ်လျူရှုခံရပြီး အခုအရေးယူမှုက မကြုံစဖူးဖြစ်ရပ်လို့ ပြောကြားခဲ့ပါတယ်။

ထိုင်နိုင်ငံတောင်ပိုင်းမှာ ထိုင်းစစ်တပ်ရဲ့ဖမ်းဆီးခြင်းကို ခံခဲ့ရတဲ့ အမျိုးသားတစ်ဦးဟာ စစ်ကြောမှုအတွင်း ကိုမားရကာ ဩဂုတ်လ ဆေးရုံမှာ သေဆုံးသွားခဲ့ပါတယ်။ ဒီအဖြစ်အပျက်အတွက် ထိုင်းစစ်တပ်ဟာ အကြီးအကျယ် ဝေဖန်ခံခဲ့ရပါတယ်။

Ref: Daily Mail