Tag: thailand

အောက်တိုဘာ ၃၀၊ ၂၀၁၉
M-Media

-ထိုင်းဘုရင် မဟာ ဝိဇယလောင်ကွန်ဟာ နန်းတွင်းအရာရှိ ၄ ဦးကို ရာထူးကနေ ထပ်မံ ထုတ်ပယ်လိုက်ပြီး တစ်ပတ်အတွင်း မိဖုရားငယ်တစ်ပါးနဲ့ နန်းတွင်းအရာရှိ ၁၀ ဦးကို ထုတ်ပယ်မှုလည်း ဖြစ်ပါတယ်။

မနေ့ကထုတ်ပြန်တဲ့ကြေငြာချက်တစ်ခုမှာ အိပ်ဖန်စောင့်အရာရှိ ၂ ဦးကို ‘အလွန်ဆိုးရွားတဲ့ အပြုအမူတွေလုပ်တာ’ ‘အိမ်ထာင်ရေးဖောက်ပြန်တာ’ ကြောင့် ရာထူးကနေ ထုတ်ပယ်လိုက်ပြီး ဒါဟာ ကျေးတော်မျိုး၊ ကျွန်တော်မျိုးတွေ လိုက်နာရမယ့် ကျင့်ဝတ်စည်းကမ်းတွေကို ချိုးဖောက်မှုဖြစ်တယ်လို့ ဖော်ပြထားပါတယ်။

နောက်ထပ် ကြေငြာချက်တစ်ခုမှာတော့ နန်းတွင်း ကိုယ်ရံတော်တာဝန်ကို ပြည့်ပြည့်၀၀ ထမ်းဆောင်ခြင်းမရှိဘဲ၊ ရာထူး အဆင့်အတန်းနဲ့ ထိုက်တန်တဲ့ အပြုအမူမျိုး မရှိတဲ့အတွက် စစ်ဖက်အရာရှိ ၂ ဦးကို အဆောင်အယောင်တွေ ရုပ်သိမ်းကာ ရာထူးကနေ ထုတ်ပယ်လိုက်တယ်လို့ ဖော်ပြထားပါတယ်။

ထိုင်းဘုရင်ဟာ ပြီးခဲ့တဲ့တစ်ပတ်က ကိုယ်လုပ်တော် စီနီနတ်ကို အဆောင်အယောင်တွေရုပ်သိမ်းခဲ့ပြီး ဘုရင်မင်းမြတ်အပေါ် သစ္စာမဲ့မှု၊ မိဖုရားခေါင်ကြီးနေရာကို ရရှိဖို့ ကြိုးစားမှုတွေကြောင့်ဖြစ်တယ်လို့ နန်းတော်ကထုတ်ပြန်တဲ့ ကြေငြာချက်မှာ ဖော်ပြထားပါတယ်။

အဲဒီနောက်မှာတော့ နန်းတွင်းအရာရှိ ၆ ပြီးကို ရာထူးကနေ ထပ်မံ ထုတ်ပယ်ခဲ့ပါတယ်။

၂၀၁၆ ခုနှစ်မှာ ခမည်းတော် နတ်ရွာစံပြီး ထီးနန်းဆက်ခံရတဲ့နောက် ထိုင်းဘုရင် မဟာဝိဇယလောင်ကွန်ဟာ နန်းတွင်းရေးရာကိစ္စတွေနဲ့ ဘဏ္ဍာတော်တွေကို တိုက်ရိုက် ကိုင်တွယ်ထိန်းချုပ်နိုင်ဖို့ ကြိုးစားလာခဲ့ပြီး စစ်တပ်က တပ်ဖွဲ့ ၂ ခုကိုလည်း သူ့ရဲ့ ကွပ်ကဲမှုအောက်ကို ပြောင်းရွှေ့ခဲ့ပါတယ်။

Ref: Ajazeera

အောက်တိုဘာ ၂၇၊ ၂၀၁၉
M-Media

-အလုပ်သမားတွေ ကျွန်ပြုခံရမှု၊ ခေါင်းပုံဖြတ်ခံရမှုကို ထိုင်းအာဏာပိုင်တွေက ထိထိရောက်ရောက် မဖြေရှင်းနိုင်တာကြောင့် ထိင်းပင်လယ်စာလုပ်ငန်းကို ပေးထားတဲ့ အခွန်ကင်းလွတ်ခွင့်ကို ရုပ်သိမ်းသွားမယ်လို့ အမေရိကန်က ကြေငြာလိုက်ပါတယ်။

ထိုင်းနိုင်ငံဟာ ကမ္ဘာ့ တတိယအကြီးဆုံး ပင်လယ်စာတင်ပို့တဲ့နိုင်ငံဖြစ်ပြီး ဒီလုပ်ငန်းမှာ ပြောင်းရွှေ့အခြေချ လုပ်သားတွေကို ကျွန်ပြုခိုင်းစေမှု၊ လူကုန်ကူးမှုတွေကြောင့် ပြီးခဲ့တဲ့နှစ်အနည်းငယ်အတွင်း ဝေဖန်မှုတွေ ဆိုးဆိုးဝါးဝါး ခံစားခဲ့ရပါတယ်။

‘ပင်လယ်စာလုပ်ငန်းနဲ့ ပို့ဆောင်ရေးလုပ်ငန်းတွေမှာ အလုပ်သမားအခွင့်အရေးချိုးဖောက်မှုတွေ အချိန်အတော်‌ကြာ ရှိနေတာကြောင့် ကုန်သွယ်ရေးခံစားခွင့်တွေအားလုံး ဆုံးရှုံးလိမ့်မယ်’ လို့ အမေရိကန်ကုန်သွယ်ရေးအာဏာပိုင်တွေကို ကိုးကားပြီး Bloomberg သတင်းဌာနက မနေ့မှာ ဖော်ပြခဲ့ပါတယ်။

အခွန်ကင်းလွတ်ခွင့်နဲ့ အခြား ကုန်သွယ်ရေးခံစားခွင့်တွေကို အမေရိကန်က ရုပ်သိမ်းမှုဟာ ၂၀၂၀ ခုနှစ် ဧပြီလ ၂၅ ရက်နေ့မှာ စတင်သက်ရောက်မှာ ဖြစ်ပါတယ်။ ပင်လယ်စာအပါအဝင် ထိုင်နိုင်ငံက တင်ပို့နေတဲ့ အသီးအနှံ၊ ဟင်းသီးဟင်းရွက်၊ ချည်ထည်ပစ္စည်းနဲ့ လျှပ်စစ်ပစ္စည်းတွေလည်း အခွန်ကင်းလွတ်ခွင့် ဆုံးရှုံးမှာ ဖြစ်ပါတယ်။

ထိုင်းနိုင်ငံကနေ အမေရိကန်ကိုတင်ပို့တဲ့ ကုန်သွယ်မှုတန်ဖိုးဟာ ၂၀၁၈ ခုနှစ်မှာ ကန်ဒေါ်လာ ၃၁.၉ ဘီလီယံ ရှိခဲ့ပြီး လျှစ်စစ် စက်ပစ္စည်းတွေကို အဓိကထား တင်ပို့တာ ဖြစ်ပါတယ်။

Ref: Aljazeera

အောက်တိုဘာ ၂၄၊ ၂၀၁၉
M-Media

-ထိုင်းဘုရင် မဟာဝိဇယလောင်ကွန်ဟာ မနေ့က နန်းတွင်း ထိပ်တန်းတာဝန်ရှိသူ ၆ ဦးကို ရာထူးကနေ ထုတ်ပယ်လိုက်ပြီး ရာထူးအာဏာကို အလွဲသုံးစားပြုမှုတာကြောင့်ဖြစ်တယ်လို့ နန်းတော်ရဲ့ ကြေငြာချက်မှာ ဖော်ပြထားပါတယ်။

ကြင်ယာတော်ငယ်တစ်ပါးဖြစ်တဲ့ ကိုယ်လုပ်တော် စီနီနတ်ကို သစ္စာမဲ့တယ်လို့ဆိုကာ တနင်္လာနေ့က အဆောင်အယောင် ရုပ်သိမ်းပြီး ၂ ရက်အကြာမှာပဲ နန်းတွင်းက ဒီအပြောင်းအလဲ ဖြစ်ပေါ်လာခဲ့တာပါ။

မနေ့က ရာထူးကနေ ထုတ်ပယ်ခံလိုက်ရတဲ့ ထိပ်တန်း တာဝန်ရှိသူ ၆ ဦးမှာ အိပ်ဖန်စောင့်အဖွဲ့က သူနာပြုတစ်ဦးနဲ့ နန်းတွင်းတိရစ္ဆာန်ဆရာဝန်တစ်ဦးတို့ ပါဝင်ပါတယ်။

“ဆိုးဝါးတဲ့လုပ်ရပ်တွေလုပ်ဆောင်ကာ စည်းမျဉ်းစည်းကမ်းတွေကို လွန်လွန်ကျူးကျူး ချိုးဖောက်ခဲ့ပြီး သူတို့ကိုယ်တိုင်နဲ့ တစ်ခြားသူတွေအကျိုးအတွက် ရာထူးကိုလည်း အလွဲသုံးစား လုပ်ခဲ့ပါတယ်” လို့ နန်းတွင်းက ထုတ်ပြန်တဲ့ကြေငြာချက်မှာ ဖော်ပြထားပါတယ်။

ပြီးခဲ့တဲ့ရက်ပိုင်းအတွင်း နန်းတွင်းမှာ ဖြစ်ပွားခဲ့တဲ့ အပြောင်းအလဲတွေကြောင့် ထိုင်းပြည်သူတွေက အံ့အားသင့်ခဲ့ကြပြီး အဆောင်အယောင် ရုပ်သိမ်းခံလိုက်ရတဲ့ ကိုယ်လုပ်တော် စီနီနတ်ကို အားပေးထောက်ခံတဲ့ လှုပ်ရှားမှုတွေလည်း ဆိုရှယ်မီဒီယာတွေမှာ ပေါ်ပေါက်လာပါတယ်။

ဘုရင့်ကိုယ်ရံတော်တပ်ဖွဲ့က အရာရှိဖြစ်ပြီး ပြီးခဲ့တဲ့ ၃ လကမှ ကိုယ်လုပ်တော်နေရာ ခန့်အပ်ခံရတဲ့ စီနီနတ်ဟာ မိဖုရားခေါင်ကြီး ဆုသီဒါနေရာကို ရယူဖို့ကြိုးပမ်းတာကြောင့် ဘုရင်မင်းမြတ်ရဲ့‌ ကျေးဇူးသစ္စာကို မစောင့်သိဘူးလို့ နန်းတော်က ထုတ်ပြန်တဲ့ ကြေငြာချက်မှာ ဖော်ပြခဲ့ပါတယ်။

ထိုင်းနိုင်ငံမှာ တော်ဝင်မိသားစုကို အသရေဖျက်ပြောဆိုတာဟာ ရာဇဝတ်မှုမြောက်ပါတယ်။

လက်ရှိဘုရင် ဝိဇယလောင်ကွန်ဟာ ၂၀၁၆ ခုနှစ်က ခမည်းတော် နတ်ရွာစံသွားပြီးတဲ့နောက် ထီးနန်းအရိုက်အရာကို ဆက်ခံခဲ့တာ ဖြစ်ပါတယ်။

Ref: AFP

အောက်တိုဘာ ၂၂၊ ၂၀၁၉
M-Media

-မကြာသေးခင်ကမှ ချီးမြှင့်မြှောက်စားထားတဲ့ ကိုယ်လုပ်တော်ကို ထိုင်းဘုရင် မဟာဝိဇယလောင်ကွန်က မနေ့မှာ အဆောင်အယောင်တွေ ပြန်လည်ရုပ်သိမ်းလိုက်ပြီး ထီးနန်းစည်းကမ်းတွေကို ချိုးဖောက်က သစ္စာမဲ့လို့ ဖြစ်တယ်လို့ ကြေငြာချက်မှာ ဖော်ပြထားပါတယ်။

အဆောင်အယောင် ရုပ်သိမ်းခံလိုက်ရတဲ့ ကိုယ်လုပ်တော်ဟာ အသက် ၃၄ နှစ်အရွယ် စီနီနတ် ဝွန်ဗာဂျီရာပက္ကဒီဖြစ်ပြီး ကိုယ်ရံတော်တပ်ဖွဲ့ဝင်ဟောင်း ဖြစ်ပါတယ်။ စီနီနတ်ဟာ ဇူလိုင်လ ၂၈ ရက်နေ့ မဟာဝိဇယလောင်ကွန်ရဲ့ သက်တော် ၆၇ နှစ်ပြည့် အခမ်းအနားမှာ ကိုယ်လုပ်တော်အဖြစ် ချီးမြှောက်ခံခဲ့ရတာပါ။ ဒါဟာ နှစ်ပေါင်း ၅၀ နီးပါးအတွင်း ထိုင်းဘုရင်က ပထမဆုံး ကိုယ်လုပ်တော် ခန့်အပ်မှု ဖြစ်ပါတယ်။

မနေ့က နန်းတော်ကနေထုတ်ပြန်တဲ့ ၂ မျက်နှာပါ ကြေငြာချက်မှာ စီနီနတ်ဟာ ထီးနန်းစည်းကမ်းတွေကို ချိုးဖောက်ပြီး ဘုရင်မင်းမြတ်အပေါ်မှာ သစ္စာမဲ့တဲ့အတွက် အဆောင်အယောင် ပြန်လည်ရုပ်သိမ်းရတာ‌ဖြစ်တယ်လို့ ဖော်ပြထားပါတယ်။

“ကိုယ်လုပ်တော် စီနီနတ်ဟာ ကျေးဇူးသစ္စာမဲ့ခဲ့ပြီး သူမရဲ့ အဆောင်အယောင်နဲ့ မသင့်လျော်တဲ့ အပြုအမူမျိုးတွေ ပြုမူခဲ့ပါတယ်။ လက်ရှိ ချီးမြှင့်မြှောက်စားမှုကို မတင်းတိမ်နိုင်ဘဲ မိဖုရားခေါင်ကြီးဖြစ်ဖို့ နည်းလမ်းမျိုးစုံနဲ့ ကြိုးပမ်းခဲ့ပါတယ်”

စီနီနတ်ဟာ ကိုယ်လုပ်တောင်အဆောင်အယောင်အပြင်၊ စစ်တပ်မှာရရှိထားတဲ့ ဗိုလ်မှူးချုပ်ရာထူးကိုလည်း ရုပ်သိမ်းခံလိုက်ရပါတယ်။

နန်းတွင်းက သူမရဲ့အပြုအမူတွေနဲ့ပတ်သက်လို့ ကြေငြာချက်မှာ အသေးစိတ်မဖော်‌ပြပေမယ့် စီနီနတ်ဟာ မိဖုရားခေါင်မဖြစ်ရတဲ့အတွက် မကျေနပ်ကြောင်း၊ ဒီနေရာကို ရရှိဖို့အတွက် ပစ်မှတ်ထားကြိုးစားခဲ့ကြောင်း၊ ထီးနန်းစည်းမျဉ်းတွေ လိုက်နာခြင်းမရှိဘဲ ဘုရင်နဲ့ မိဖုရားခေါင်ကြီးတို့အပေါ်မှာလည်း မခန့်လေးစားလုပ်ဆောင်ခဲ့ကြောင်း ထည့်သွင်းဖော်ပြခဲ့ပါတယ်။

နှစ်ပေါင်း ၇၀ ကြာ တိုင်းပြည်ကို စိုးစံခဲ့တဲ့ ခမည်းတော် ၂၀၁၆ ခုနှစ်မှာ နတ်ရွာစံသွားပြီးတဲ့နောက် မဟာ ဝိဇယလောင်ကွန်ဟာ အခုနှစ်မေလမှာ ထီးမွေနန်းလျာကို တရားဝင် ဆက်ခံခဲ့ပါတယ်။

ဘိသိက်မခံခင် ရက်ပိုင်းအလိုမှာပဲ မဟာဝိဇယလောင်ကွန်ဟာ သူ့ရဲ့ ကိုယ်ရံတော်တပ်ဖွဲ့က ဒုတိယအကြီးအကဲ အသက် ၄၁ နှစ်အရွယ် ဆုသီတာ တီဂျိုင်းကို မိဖုရားခေါင်အဖြစ် တင်မြှောက်ခဲ့ပြီး Queen Suthida Bajrasudhabimalalakshana ဘွဲ့ကိုလည်း အပ်နှင်းခဲ့ပါတယ်။

သက်ဦးစံပိုင်ဘုရင်စနစ်ကို ပယ်ဖျက်လိုက်တဲ့ ၁၉၃၂ ခုနှစ်နောက်ပိုင်း ထိုင်းဘုရင်တွေဟာ မိဖုရားခေါင်အပြင် အခြား ကိုယ်လုပ်တော်တွေကို ထားရှိခြင်း မရှိဘဲ အခုဘုရင်လက်ထက်မှာ ပထဆုံးအကြိမ် ပြန်လည်ထားရှိတာပါ။

ကိုယ်လုပ်တော်အဖြစ် တင်မြှောက်မှုအခမ်းအနားက ပုံတွေအပါအဝင် စီနီနတ်ရဲ့ ပုံတွေကိုလည်း နန်းတော်ဝဘ်ဆိုက်ကနေ မနေ့မှာ ဖယ်ရှားခဲ့ပါတယ်။

Ref: Reuters