Tag: thailand

အောက်တိုဘာ ၁၆၊ ၂၀၂၀
M-Media

-အစိုးရဆန့်ကျင်ရေး ဆန္ဒပြမှုတွေ ဖြစ်ပေါ်နေပေမယ့် ရာထူးကနေ နှုတ်ထွက်သွားမှာ မဟုတ်ဘူးလို့ ထိုင်းဝန်ကြီးချုပ် ပရာယွတ်ချန်အိုချာက ပြောကြားလိုက်ပြီး ကျောင်းသားတွေကလည်း ပိုမိုကြီးမားတဲ့ ဆန္ဒပြမှုတွေ ပြုလုပ်ဖို့ စီစဉ်နေပါတယ်။

တိုင်းပြည်အတွင်း ဒီမိုကရေစီ ပြန်လည်ဖော်ဆောင်ရေး၊ တော်ဝင်အသိုင်းအဝိုင်းရဲ့ အာဏာဆုပ်ကိုင်ထားမှုကို လျော့ချရေး စတာတွေအတွက် ထိုင်းကျောင်းသားလူငယ်တွေ ဦးဆောင်ပြီး ဇူလိုင်လကတည်းက စတင်ဆန္ဒပြခဲ့ကြတာပါ။

အခုတစ်ပတ်မှာ ဆန္ဒပြမှု အရှိန်မြင့်လာခဲ့ပြီး ၂၀၁၄ ခုနှစ်က အာဏာသိမ်းကာ ဝန်ကြီးချုပ်တာဝန်ယူထားတဲ့ ပရာယွတ် နှုတ်ထွက်ရေးပါ တောင်းဆိုလာခဲ့ကြပါတယ်။ ထိုင်းအစိုးရဟာ ကြာသာပတေးနေ့က တိုင်းပြည်ကို အရေးပေါ်အခြေအနေ ကြေငြာခဲ့ပြီး ဒီကနေ့မနက်မှာတော့ အစိုးရအဖွဲ့က အရေးပေါ်အစည်းအဝေး ကျင်းပခဲ့ပါတယ်။

“ကျွန်တော် နှုတ်ထွက်မှာမဟုတ်ပါဘူး။ အစိုးရအနေနဲ့ အရေးပေါ်အမိန့်အာဏာကို အသုံးချရမှာပါ။ အခြေအနေတွေ ကြမ်းတမ်းလာတာကြောင့် ကျွန်တော်တို့ ဆက်ရှိနေရမှာ ဖြစ်ပါတယ်။ အခြေအနေပေါ်မူတည်ပြီး အရေးပေါ်အမိန့်အာဏာကို တစ်လလောက် အသုံးသွားမှာပါ” လို့ ပရာယွတ်က ပြောကြားခဲ့ပါတယ်။

အရေးပေါ်အခြေအနေအရ ရဲတပ်ဖွဲ့ဟာ ဆန္ဒပြသူတွေကို ၀ရမ်းမပါဘဲ ဖမ်းဆီးနိုင်မှာဖြစ်ပြီး၊ ဆက်အသွယ်ရေးပစ္စည်း၊ ဒေတာအချက်အလက်နဲ့ လက်နက်တွေ ရှာဖွေသိမ်းဆည်းခွင့် အခွင့်အာဏာလည်း ရရှိမှာ ဖြစ်ပါတယ်။ နိုင်ငံတော်လုံခြုံရေးကို ခြိမ်းခြောက်တယ်လို့ ယူဆတဲ့ အွန်လိုင်း ရေးသားပြောဆိုမှုတွေကိုလည်း ပိတ်ပင်သွားမှာ ဖြစ်ပါတယ်။

အရေးပေါ်အခြေအနေ ကြေငြာထားပေမယ့် ဆန္ဒပြသူတွေဟာ မနေ့ညပိုင်းက ရှော့ပင်းမောလ်တွေ၊ ဟိုတယ်တွေမှာ စုရုံးခဲ့ကြပြီး ဒီကနေ့မှာ ပိုမိုကြီးမားတဲ့ ဆန္ဒပြမှုတွေကို ပြုလုပ်သွားဖို့ ရှိနေပါတယ်။

Ref: Aljazeera

စက်တင်ဘာ ၂၀၊ ၂၀၂၀
M-Media

-ဖွဲ့စည်းပုံအခြေခံဥပဒေအထက်မှာ တော်၀င်မိသားစု ရှိနေမှုကို ပြုပြင်ပြောင်းလဲရေးအတွက် ထိုင်းပြည်သူတွေက မြို့တော်ဘန်ကောက်မှာ မနေ့က ဆန္ဒပြခဲ့ကြပြီး ၂၀၁၄ ခုနှစ် စစ်အာဏာသိမ်းမှုနောက်ပိုင်း အကြီးမားဆုံး ဆန္ဒပြမှုလည်း ဖြစ်ပါတယ်။

နန်းတော်ရှေ့က Sanam Luang ရင်ပြင်မှာ ဆန္ဒပြသူတွေ စုဝေးခဲ့ကြပြီး ၀န်ကြီးချုပ် ပရာယွတ် ချန်အိုချာအစိုးရကို ဆန့်ကျင်ကာ၊ အစိုးရနဲ့ တောင်၀င်မိသားစု ပြုပြင်ပြောင်းလဲရေးလုပ်ဖို့ တောင်းဆိုခဲ့ကြပါတယ်။

ဘုရင်နဲ့ တော်၀င်မိသားစုကို ၀ေဖန်ပြောဆိုတာဟာ ထိုင်းနိုင်ငံမှာ ရာဇ၀တ်မှုဖြစ်ပြီး အမြင့်ဆုံး ထောင်ဒဏ် ၁၅ နှစ်အထိ ချမှတ်နိုင်ပါတယ်။

ဒါပေမယ့် ပြီးခဲ့တဲ့သီတင်းပတ်တွေက ကျောင်းသားလူငယ်တွေ ပြုလုပ်တဲ့ ဆန္ဒပြမှုတွေမှာတော့ ဒီဥပဒေကို ဖျက်သိမ်းရေးအပါအ၀င် နိုင်ငံအတွင်း ပြုပြင်ပြောင်းလဲရေးတွေလုပ်ဆောင်ဖို့ တောင်းဆိုခဲ့ကြပါတယ်။

“ဒါကို ကျွန်တော်တို့ မပြောင်းလဲနိုင်ရင် ဒီမိုကရေစီ ရမှာ မဟုတ်ပါဘူး” လို့ နိုင်ငံသားအခွင့်အရေးဆိုင်ရာ ရှေ့နေဖြစ်ပြီး တက်ကြွလှုပ်ရှားသူလည်းဖြစ်တဲ့ အေနွန် နမ်ဖာက ပြောခဲ့ပါတယ်။

ပြုပြင်ပြောင်းလဲရေး တောင်းဆိုမှုတွေထဲမှာ တော်၀င်မိသားစုအပေါ် ထောက်ပံ့ငွေ လျှော့ချရေး၊ ဘုရင်ရဲ့အာဏာလျှော့ချရေး၊ အစိုးရက အတိုက်အခံတွေအပေါ် နှိပ်ကွပ်မှု ရပ်ဆိုင်းရေး စတာတွေ ပါ၀င်ပါတယ်။

“တိုင်းပြည်မှာ စည်းမျဥ်းခံဘုရင်စနစ်ကိုပဲ ကျွန်တော်တို့ လိုချင်ပါတယ်။ တစ်ခြားပုံစံမျိုး မလိုချင်ပါဘူး” လို့ အေနွန်က ဆိုပါတယ်။

ဆန္ဒပြမှုတွေကို ဒီကနေ့မှာလည်း ဆက်လက်လုပ်ဆောင်သွားဖို့ စီစဥ်ထားပါတယ်။

Ref: CNA

ဩဂုတ် ၄၊ ၂၀၂၀
M-Media

-စစ်​တပ်အကြီးအကဲဟောင်း ပရာယွတ် ချန်အိုချာ ဦးဆောင်တဲ့ အစိုးရကို ဆန့်ကျင်ရေး၊ ဒီမိုကရေစီဖော်ဆောင်ရေး ထိုင်းပြည်သူတွေရဲ့ ဆန္ဒပြမှုမှာ ဘုရင်နဲ့ တော်ဝင်မိသားစုကို မကြုံစဖူး ဝေဖန်ထောက်ပြမှုတွေ ရှိလာပါတယ်။

ထိုင်းနိုင်ငံမှာ တော်ဝင်မိသားစုကို ပုတ်ခတ်ပြောဆိုရင် ထောင်ဒဏ် ၁၅ နှစ်အထိ ချမှတ်နိုင်တဲ့ ပြင်းထန်တဲ့ ဥပဒေတစ်ရပ် ရှိနေတာပါ။

ဟယ်ရီပေါ်တာရုပ်ရှင်ကားထဲက ဇာတ်ကောင်ဝတ်စုံတွေဝတ်ပြီး လူ ၂၀၀ လောက်ပါဝင်တဲ့ မနေ့က ဆန္ဒပြမှုမှာတော့ အစိုးရကို ဆန့်ကျင်တဲ့ ပြောဆိုမှုတွေအပြင် ဘုရင်နဲ့ တော်ဝင်မိသားစုတွေကို ပွင့်ပွင့်လင်းလင်း ဝေဖန်မှုတွေပါ ပါဝင်လာခဲ့ပါတယ်။

အသက် ၄၃ နှစ်အရွယ် ရှေ့နေ Anon Nampa က တော်ဝင်မိသားစုရဲ့ အာဏာကို ပိုမိုဆုပ်ကိုင်ထားမှုဟာ ဒီမိုကရေစီကို ထိခိုက်စေပြီး၊ ပရာယွတ်အစိုးရက အတိုက်အခိုက်တွေကို နှိပ်ကွပ်တာကိုလည်း ဘုရင်က ဝင်ရောက်တားဆီးတာမျိုး မရှိဘူးလို့ ပြောကြားခဲ့ပါတယ်။

လက်ရှိထိုင်းဘုရင် Maha Vajiralongkorn ဟာ ခမည်းတော် နတ်ရွာစံပြီးနောက်ပိုင်း ၂၀၁၆ ခုနှစ်မှာ ထီးနန်းဆက်ခံခဲ့တာပါ။ ပရာယွတ်လက်ထက် ၂၀၁၇ ခုနှစ်မှာ ပြဌာန်းခဲ့တဲ့ အခြေခံဥပဒေသစ်မှာ ထိုင်းဘုရင်ကို အရေးပေါ်အာဏာ ပိုပေးထားပြီး၊ စစ်တပ်က တစ်ချို့တပ်ဖွဲ့တွေကို ထိန်းချုပ်ခွင့်၊ နန်းတော်ရဲ့ ဒေါ်လာဘီလီယံချီ ပိုင်ဆိုင်မှု ခံစားခွင့်တွေကို ဘုရင်က ရရှိခဲ့ပါတယ်။

Anon က သူတို့ဟာ ဘုရင်စနစ်ကို ဖြုတ်ချဖို့ ပြောနေတာမျိုမဟုတ်ဘဲ ထိုင်းလူ့အဖွဲ့အစည်းမှာ သိက္ခာရှိတဲ့ ဒီမိုကရေစီနည်းကျ စည်းမျဉ်းခံဘုရင်စနစ်မျိုး ဖြစ်လာအောင် တိုက်တွန်းဆော်ဩနေတာဖြစ်တယ်လို့ ထည့်သွင်း ပြောဆိုခဲ့ပါတယ်။

မနေ့က အစိုးရဆန့်ကျင်ရေးဆန္ဒပြမှုအတွင်း ဘုရင်နဲ့ တော်ဝင်မိသားစုကို ဝေဖန်သူ ၆ ဦးအထိရှိခဲ့ပြီး နန်းတော်ကတော့ ဒီအတွက် သတင်းဌာနတွေကို မှတ်ချက်ပေးတာမျိုး မရှိပါဘူး။

ထိုင်းအစိုးရရဲ့ ပြောရေးဆိုခွင့်ရှိသူ Ratchada Thanadirek က တော်ဝင်မိသားစုအပေါ် ဝေဖန်သူတွေကို အရေးယူမလားဆိုတာဟာ ရဲတပ်ဖွဲ့နဲ့သာ ဆိုင်တယ်လို့ ပြောကြားခဲ့ပါတယ်။ ရဲတပ်ဖွဲ့ကလည်း ဆန္ဒပြမှုအတွင်း ဥပဒေချိုးဖောက်မှု ရှိ၊ မရှိ စုံစမ်းစစ်ဆေးမယ်လို့ ဆိုပါတယ်။

Ref: Reuters

ဇူလိုင် ၁၉၊ ၂၀၂၀
M-Media

-စစ်ခေါင်းဆောင်ဟောင်း ပရာယွတ်ချန်အိုချာ ဦးဆောင်တဲ့ အစိုးရ ဆင်းပေးရေး၊ နိုင်ငံအတွင်း ဒီမိုကရေစီ ပြန်လည်ထွန်းကားရေးအတွက် ထိုင်းပြည်သူတွေဟာ မနေ့က မြို့တော်ဘန်ကောက်မှာ ဆန္ဒပြခဲ့ကြပါတယ်။

ဘန်ကောက်ရဲ့ ဒီမိုကရေစီအထိမ်းအမှတ် ကျောက်တိုင်နားမှာ ကျောင်းသားတွေက စတင်ဆန္ဒပြခဲ့ကြတာဖြစ်ပြီး လူပေါင်း ၂၅၀၀ လောက် ပါဝင်ခဲ့ပါတယ်။ လွှတ်တော်ဖျက်သိမ်းရေး၊ အတိုက်အခံတွေအပေါ် ဖိနှိပ်မှု အဆုံးသတ်ရေး၊ စစ်တပ်ကရေးထားတဲ့ အခြေခံဥပဒေ ပြင်ဆင်ရေးတွေ စတဲ့ အချက် ၃ ချက်ကို ဆန္ဒပြသူတွေက တောင်းဆိုခဲ့ကြပါတယ်။

ပရာယွတ်ဦးဆောင်တဲ့ အစိုးရအပေါ်​ ထိုင်းပြည်သူတွေရဲ့ မကျေနပ်မှုဟာ ပြီးခဲ့တဲ့လအနည်းငယ်အတွင်းမှာ ပိုမို မြင့်တက်လာခဲ့ပါတယ်။ ဆန္ဒပြမှုဖြစ်ပွားရာတစ်ဝိုက်ကို ရဲတပ်ဖွဲ့က စောင့်ကြပ်ခဲ့ပေမယ့် ဆန္ဒပြသူတွေကို တားဆီးဟန့်တားတာမျိုးတော့ မရှိပါဘူး။ ဘုရင်ဝိဇယလောင်ကွန် ဂျာမနီမှာ ဇိမ်ခံအိမ် ဝယ်ထားမှုကိုလည်း ဆန္ဒပြသူတွေက မေးခွန်းထုတ်ခဲ့ပါတယ်။

ဆန္ဒပြသူတွေဟာ သန်းခေါင်ယံအချိန်မှာ လူစုခွဲသွားကြပြီး သူတို့ရဲ့ တောင်းဆိုချက်တွေကို မလုပ်ပေးရင် နှစ်ပတ်အကြာမှာ နောက်ထပ်ဆန္ဒပြမှုတွေ လုပ်မယ်လို့ ပြောကြားခဲ့ပါတယ်။

ဝန်ကြီးချုပ် ရာယွတ်ချန်အိုချာဟာ စစ်တပ်အကြီးအကဲဟောင်းတစ်ဦးဖြစ်ပြီး လွန်ခဲ့တဲ့ ၆ နှစ် ယင်လပ် ရှင်နာဝပ်ထရာဦးဆောင်တဲ့ အရပ်သားအစိုးရကို ဖြုတ်ချ အာဏာသိမ်းခဲ့တာပါ။ ပရာယွတ်ဦးဆောင်တဲ့ အာဏာသိမ်းအစိုးရဟာ ဖွဲ့စည်းပုံအခြေခံဥပဒေအသစ် ရေးကာ မနှစ်က ရွေးကောက်ပွဲ ကျင်းပခဲ့ပြီး ပရာယွတ်ပဲ ပြန်အနိုင်ရခဲ့ပါတယ်။

အဲဒီနောက်ပိုင်း နိုင်ငံရဲ့ ဒုတိယအကြီးဆုံး အတိုက်အခံပါတီကို ပရာယွတ်အစိုးရက တရားမဝင်ကြေငြာခဲ့သလို အတိုက်အခံတွေကိုလည်း ပိုမိုဖိနှိပ်တာတွေ လုပ်ဆောင်ခဲ့ပါတယ်။ ​ပရာယွတ်အစိုးရအတွင်း အကွဲအပြဲတွေလည်း ရှိလာခဲ့ပြီး ကြာသာပတေးနေ့မှာ အစိုးရအဖွဲ့ဝင်တစ်ချို့ နှုတ်ထွက်ခဲ့ပါတယ်။

Ref: Aljazeera