Tag: thailand

နိုဝင်ဘာ ၂၅၊ ၂၀၂၁
M-Media

-မိမိအနေနဲ့ လက်ရှိအချိန် ရာထူးကနေ ဆင်းပေးမှာမဟုတ်သေးဘဲ အနည်းဆုံး အာရှပစိဖိတ် စီးပွားရေးကော်ပိုရေးရှင်း (အေပက်) ထိပ်သီးအစည်းအဝေးကျင်းပမယ့် ၂၀၂၂ ခုနှစ်အထိ ဆက်ရှိသွားမယ်လို့ ထိုင်းဝန်ကြီးချုပ် ပရာယွတ်ချန်အိုချာက ပြောပါတယ်။

မနေ့က ကာကွယ်ရေးကောင်စီအစည်းအဝေးအပြီး သတင်းထောက်တွေကို ပရာယွတ်က ဖြေကြားခဲ့တာပါ။

“တိုင်းပြည်ကို လည်ပတ်အောင်လုပ်ရမယ့် ကိစ္စပါ။ ဥပဒေအရ ကျွန်တော်တို့ ရာထူးမှာ ဆက်နေသွားမှာ ဖြစ်ပါတယ်။ တိုင်းပြည်မှာ ပြဿနာတွေအများကြီးဖြစ်နေတယ်။ အဲဒါတွေကို ဖြေရှင်းရအုံးမှာပါ”

သူ့လက်ထက် တိုင်းပြည်မှာ တိုးတက်မှုတွေ ရရှိနေတယ်လို့လည်း ပရာယွတ်က ဆိုပါတယ်။

လက်ရှိဝန်ကြီးချုပ်သက်တမ်းကုန်တဲ့ ၂၀၂၃ ခုနှစ်အထိ ဆက်ရှိနေမလားလို့ သတင်းထောက်တစ်ဦးက မေးမြန်းရာမှာ ပရာယွတ်က ခေါင်းညိမ့်ပြခဲ့ပါတယ်။ အာဏာရ PPRP နဲ့ ဆက်လက် ပူးပေါင်းဆောင်ရွက်သွားမှာဖြစ်သလို၊ သူတို့ရဲ့ ညွန့်ပေါင်းအစိုးရ ချည့်နဲ့နေပြီဆိုတဲ့ အတိုက်အခံတွေရဲ့စကားကိုလည်း ပရာယွတ်က ပယ်ချခဲ့ပါတယ်။

အေပက် ထိပ်သီးအစည်းအဝေးကို လာမယ့် ဒီဇင်ဘာ ၁ ရက်နေ့ကနေ ၃ ရက်နေ့အထိ ထိုင်းနိုင်ငံ ဖူးကတ်မြို့မှာ ကျင်းပမှာဖြစ်ပါတယ်။

ထိုင်းစစ်တပ်အကြီးအကဲဖြစ်တဲ့ ပရာယွတ်ချန်အိုချာဟာ ၂၀၁၄ ခုနှစ် နိုင်ငံရေးအကြပ်အတည်ဖြစ်တဲ့အချိန် အာဏာသိမ်းခဲ့​ပြီး ဆန့်ကျင်တဲ့ ပြည်သူတွေကို ပြင်းပြင်းထန်ထန် နှိပ်ကွပ်ခဲ့ပါတယ်။ အဲဒီနောက်ပိုင်း ဝန်ကြီးချုပ်အဖြစ် တိုင်းပြည်ကို အုပ်ချုပ်ကာ ၂၀၁၇ ခုနှစ်မှာတော့ သူအာဏာတည်မြဲရေး အာမခံချက်ရှိစေမယ့် အခြေခံဥပဒေတစ်ခုကို ပြဌာန်းခဲ့ပါတယ်။

အဲဒီ အခြေခံဥပဒေအောက်က ပြုလုပ်တဲ့ ၂၀၁၉ ခုနှစ် ရွေးကောက်ပွဲမှာ ပရာယွတ်ဟာ ဝန်ကြီးချုပ်အဖြစ် ပြန်လည်အရွေးခံခဲ့ရပါတယ်။

Ref: Bangkok Post

နိုဝင်ဘာ ၁၊ ၂၀၂၁
M-Media

-ကွာရန်တင်းဝင်ဖို့မလိုဘဲ လာရောက်ခွင့်ပေးမယ့် နိုင်ငံပေါင်း ၆၃ နိုင်ငံကို ထိုင်းက ဒီကနေ့ ထုတ်ပြန်ရာမှာ မြန်မာနိုင်ငံ ပါဝင်လာခဲ့ပြီး ခရီးသွားလုပ်ငန်း ပြန်လည်အားကောင်းလာအောင် ထိုင်းအစိုးရရဲ့ ကြိုးပမ်းမှုတစ်ခု ဖြစ်ပါတယ်။

ကိုဗစ်အန္တရာယ် နည်းပါးတယ်လို့ ယူဆတဲ့ နိုင်ငံက လူတွေကို နိုဝင်ဘာ ၁ ရက်နေ့ကစပြီး တိုင်းပြည်အတွင်း ဝင်ရောက်ခွင့်ပေးမယ်လို့ ထိုင်းအစိုးရက အောက်တိုဘာအစောပိုင်းမှာ ကြေငြာခဲ့တာပါ။ ဝင်ခွင့်ပေးမယ့် နိုင်ငံ ၄၅ ခုစာရင်းကို အောက်တိုဘာ ၂၂ ရက်နေ့မှာ ထုတ်ပြန်ခဲ့ပြီး၊ မနေ့က မြန်မာအပါအဝင် နိုင်ငံတစ်ချို့ကို ထပ်ပေါင်းထည့်ကာ စုစုပေါင်း ၆၃ နိုင်ငံ ဖြစ်လာပါတယ်။

ခွင့်ပြုနိုင်ငံတွေက ခရီးသွားတွေဟာ လေကြောင်းနဲ့သာ ဝင်ရောက်ခွင့်ရမှာဖြစ်ပြီး ကာကွယ်ဆေး ၂ ကြိမ်ထိုးထားတဲ့ အသိအမှတ်ပြုလက်မှတ်၊ ကန်ဒေါ်လာ ၅ သောင်းထက်မနည်းတဲ့ အာမခံ ပါရှိရမှာဖြစ်ပါတယ်။ ထိုင်းနိုင်ငံကို ဆိုက်ရောက်ရောက်ချင်းမှာ ကိုဗစ်စစ်ဆေးမှုခံယူရမှာပါ။ ခွင်ပြုနိုင်ငံတွေမှာ အနည်းဆုံး ၂၁ ရက်နေထိုင်ပြီး၊ ကိုဗစ်ကာကွယ်ဆေးထိုးထားမှသာ ကွာရန်တင်းမလိုဘဲ ထိုင်းနိုင်ငံကို ဝင်ခွင့်ရမှာ ဖြစ်ပါတယ်။

မနေ့က ထပ်ပေါင်းထည့်လိုက်တဲ့ နိုင်ငံတွေက ထိုင်ဝမ်၊ မွန်ဂိုလီးယား၊ ဖိလစ်ပိုင်၊ အင်ဒိုနီးရှား၊ ဗီယက်နမ်၊ လာအို၊ မြန်မာ၊ အိန္ဒိယ၊ သီရိလင်္ကာ၊ နီပေါ၊ မော်ဒိုက်၊ ကူဝိတ်၊ အိုမန်၊ ရိုမေးနီးယား၊ ဆလိုဗက်ကီးယား၊ ခရိုအေးရှားနဲ့ လူဇင်ဘတ်နိုင်ငံတွေ ဖြစ်ပါတယ်။

ဝင်ရောက်လာတဲ့ ခရီးသွားတွေဟာ ကိုဗစ်စစ်ဆေးမှု ရလဒ်ကို ချက်ခြင်း ရနိုင်မှာမဟုတ်သေးဘဲ ထိုင်းအစိုးရက အသိအမှတ်ပြုထားတဲ့ ဆေးရုံမှာ တစ်ညစောင့်ရမှာပါ။

ခရီးသွားလုပ်ငန်းဟာ ထိုင်းနိုင်ငံ GDP ရဲ့ ၂၀ ရာခိုင်နှုန်းအထိ ရှိပါတယ်။ အခုလို ခရီးသွားလုပ်ငန်းကို ပြန်ဖွင့်ပေးလိုက်တာဟာ မိမိတို့တိုင်းပြည် ပုံမှန်ပြန်ဖြစ်ရေး အရေးပါတဲ့ ခြေလှမ်းရဲ့ အစသာ ဖြစ်တယ်လို့ ထိုင်းဝန်ကြီးချုပ် ပရာယွတ် ချန်အိုချာက ပြီးခဲ့တဲ့လ မိန့်ခွန်းမှာ ထည့်သွင်းပြောကြားခဲ့ပါတယ်။

ဝင်ခွင်ပြုတဲ့နိုင်ငံတွေကို စီးပွားရေးအကျိုးအမြတ်၊ ကျန်းမာရေးဆိုင်ရာ ဘေးအန္တရာယ်ကင်းစင်နိုင်မှု အချက်အလက်တွေနဲ့ ရွေးချယ်တာဖြစ်တယ်လို့ ထိုင်းအစိုးရက ပြောပါတယ်။ ၂၀၁၉ ခုနှစ်က ထိုင်းနိုင်ငံကို အများဆုံး လာရောက်လည်ပတ်ခဲ့တဲ့ နိုင်ငံ ၂၀ က အများစု ခွင့်ပြုစာရင်းထဲ ပါဝင်လာခဲ့ပါတယ်။

Ref: Nikkei Asia

အောက်တိုဘာ ၁၂၊ ၂၀၂၁

M-Media

-နိုင်ငံ ၁၀ နိုင်ငံက ကိုဗစ်ကာကွယ်ဆေး ၂ ကြိမ်ထိုးပြီးသားသူတွေကို နို၀င်ဘာ ၁ ရက်နေ့ကစပြီး ကွာရန်တင်းမလိုဘဲ လေကြောင်းကနေ ၀င်ခွင့်ပေးတော့မယ်လို့ ထိုင်း၀န်ကြီးချုပ် ပရာရွတ်ချန်အိုချာက ဒီကနေ့မှာ ကြေငြာလိုက်ပါတယ်။

အဲဒီ ၁၀ နိုင်ငံစာရင်းမှာ တရုတ်၊ ဂျာမနီ၊ စင်ကာပူ၊ ယူကေနဲ့ အမေရိကန်တို့ ပါ၀င်မှာ ဖြစ်ပါတယ်။ ဒီဇင်ဘာ ၁ ရက်နေ့ ထုတ်ပြန်မယ့်စာရင်းမှာ နောက်ထပ်နိုင်ငံတွေ တိုးသွားမယ်လို့လည်း ပရာယွတ်က ဆိုပါတယ်။

မိခင်နိုင်ငံမှာ RT-PCR စစ်ပြီး ကိုဗစ်မရှိမှ လာလို့ရမှာဖြစ်သလို၊ ထိုင်းနိုင်ငံကို ရောက်ရင်လည်း နောက်ထပ်တစ်ကြိမ် ထပ်မံ စစ်ဆေးရမှာ ဖြစ်ပါတယ်။ ကိုဗစ်ကင်းတယ်ဆိုရင် နိုင်ငံတစ်၀ှမ်း လွတ်လပ်စွာ သွားခွင့်ရမယ်လို့ ထိုင်း၀န်ကြီးချုပ်က ထည့်သွင်းပြောဆိုခဲ့ပါတယ်။

၁၀ နိုင်ငံစာရင်းမှာ မပါတဲ့ နိုင်ငံတွေက လာရောက်မယ့်သူတွေကတော့ ကွာရန်တင်း၀င်ရမှာ ဖြစ်ပါတယ်။ ဒီဇင်ဘာ ၁ ရက်နေ့ကျရင် အရက်သောက်သုံးမှု ပိတ်ထားတာကို ပြန်ဖွင့်ဖို့ ဖျော်ဖြေရေးလုပ်ငန်းတွေ ပြန်ဖွင့်ခွင့်ပေးဖို့ စဥ်စာထားတယ်လို့လည်း ပရာယွတ်က ဆိုပါတယ်။

“ဒီဆုံးဖြတ်ချက်မှာ အန္တရာယ်ရှိတယ်ဆိုတာကို ကျွန်တော်တို့ သိပါတယ်။ လျော့ပေါ့မှုတွေ လုပ်ပေးလိုက်ရင် ယာယီအားဖြင့် ကူးစက်မှု မြင့်တက်လာနိုင်တယ်ဆိုတာ ကျွန်တော်တို့ သိပါတယ်။ ဒီအခြေအနေကို ကိုင်တွယ်နိုင်မလားဆိုတာ ကျွန်တော်တို့ စောင့်ကြည့် သုံးသပ်ရမှာပါ။ အခွင့်အရေးကို လက်လွှတ်ခံလို့ မဖြစ်ပါဘူး”

ခရီးသွားလုပ်ငန်းဟာ ထိုင်းနိုင်ငံအတွက် နိုင်ငံခြား၀င်ငွေ အဓိကရှာပေးတဲ့ လုပ်ငန်းဖြစ်ပါတယ်။ ရက်ပေါင်း ၁၂၀ အတွင်း နယ်စပ်တွေ ပြန်ဖွင့်ပေးမယ်လို့ ပရာယွတ်က ဇွန်လ ၁၆ ရက်နေ့မှာ ထုတ်ပြန်ခဲ့ပါတယ်။

Ref: CNA

ဩဂုတ် ၂၆၊ ၂၀၂၁
M-Media

-ထိုင်းနိုင်ငံအနောက်ပိုင်း နာခွန်ဆာဝမ်ပြည်နယ်မှာ ခရိုင်ရဲမှူးနဲ့အဖွဲ့က သံသယရှိသူတစ်ဦးကို ရက်ရက်စက်စက် သတ်ဖြတ်ခဲ့တဲ့ဗီဒီယိုတစ်ခု ထိုင်းဆိုရှယ်မီဒီယာမှာ ပြီးခဲ့တဲ့ရက်ပိုင်းက ပြန့်နှံ့လာခဲ့ပါတယ်။

Muang ခရိုင်က ရဲမှူးဟောင်း ရဲမှူးကြီး Thitisan Utthanaphon နဲ့ ရဲအရာရှိ ၆ ဦးဟာ ခရိုင်ရဲစခန်းမှာ မူးယစ်ဆေးရောင်းမှု သံသယနဲ့ ဖမ်းဆီးထားတဲ့ အသက် ၂၄ အရွယ် Chiraphong Thanaphiphat ထံကဘတ် ၂ သန်းပေးဖို့ ငွေညှစ်ရာကနေ မရတဲ့အတွက် ဦးခေါင်းကို ကြွပ်ကြွပ်အိတ်စွပ်ကာ အသက်ရှုကြပ်အောင်လုပ်ပြီး သတ်ဖြတ်ခဲ့တာပါ။

ဒီဗီဒီယိုကို အခင်းဖြစ်ပွားရာ စခန်းမှာရှိတဲ့ အရာရှိငယ်တစ်ဦးက ရှေ့နေ Sittha Biabangkerd ထံ ပေးပိုးခဲ့ပြီး ရဲချုပ်ကို တိုင်ကြားဖို့ အကူအညီတောင်းခံခဲ့တာ ဖြစ်ပါတယ်။ ရှေ့နေ Sittha Biabangkerd က ဗီဒီယိုကို ဆိုရှယ်မီဒီယာပေါ်မှာ အင်္ဂါနေ့က လွှင့်တင်ခဲ့ပါတယ်။

ထိုင်းဝန်ကြီးချုပ် ပရာယွတ်ချန်အိုချာက ဒီကိစ္စကို စုံစမ်းစစ်ဆေးဖို့ ညွှန်ကြားခဲ့ပြီး ရဲချုပ် Suwat Jangyodsuk က ခရိုင်ရဲမှူး Thitisan Utthanaphon ဟာ ထွက်ပြေးလွတ်မြောက်နေတယ်လို့ မနေ့က သတင်းထုတ်ပြန်ပါတယ်။

သတ်ဖြတ်မှုမှာပါဝင်တဲ့ ရဲအရာရှိ ၇ ဦးစလုံးဟာ Muang ခရိုင်က ခရိုင်အဆင့် ထိပ်တန်းရဲအရာရှိတွေ ဖြစ်ပါတယ်။ အားလုံးကို ရာထူးကနေ ထုတ်ပယ်ခဲ့ပြီး ဖမ်းဝရမ်းထုတ်ထားသလို ၅ ဦးကို ဖမ်းဆီးထားတယ်လို့ ထိုင်းရဲတပ်ဖွဲ့က ထုတ်ပြန်ပါတယ်။

လွတ်မြောက်နေသူ ၂ ဦးက ရဲမှူးကြီး Thitisan နဲ့ ဒုတိယ ရဲမှူးကြီး Thoranin Matwanna တို့ ဖြစ်ပါတယ်။

ရဲမှူးကြီး Thitisan ရဲ့ ဘန်ကောက်မြို့က ဘတ် သန်း ၆၀ တန် ဇိမ်ခံအိမ်ကို ရဲတပ်ဖွဲ့က ဝင်ရောက်ရှာဖွေရာမှာ သူ့ကို မတွေ့ခဲ့ပါဘူး။ ရဲမှူးကြီးဟာ ဇိမ်ခံကား ၂၉ စီး ပိုင်ဆိုင်ထားပြီး စုစုပေါင်းတန်ဖိုး ဘတ်သန်း ၁၀၀ ကျော် ရှိပါတယ်။

အိမ်ကို ထိန်းသိမ်းစောင့်ရှောက်တဲ့ မြန်မာ ၂ ဦးက ရဲမှူးကြီးဟာ စနေ၊ တနင်္ဂနွေနေ့တွေမှသာ အိမ်ကို ရောက်လာတတ်ပြီး များသောအားဖြင့် တစ်ယောက်တည်းလာကာ တစ်ခါတစ်ရံမှာ ချစ်သူကို ခေါ်လာကြောင်း ထွက်ဆိုခဲ့ပါတယ်။

ထိုင်းရဲတပ်ဖွဲ့ဟာ ထွက်ပြေးသွားတဲ့ ရဲအရာရှိ ၂ ဦးကို ဖမ်းဆီးနိုင်ရေး နယ်စပ်ဂိတ်တွေမှာ တင်းတင်းကြပ်ကြပ် စစ်ဆေးမှုတွေ လုပ်ဆောင်နေပါတယ်။

ရဲမှူးကြီး Thitisan နဲ့အဖွဲ့ဟာ သံသယရှိသူကို သတ်ဖြတ်ခဲ့ပြီးတဲ့နောက် မူးယစ်ဆေးလွန် သေဆုံးတယ်လို့ အစိုးရဆေးရုံ Sawanpracharak မှာ ဆေးစာ ရေးခိုင်းခဲ့ပါတယ်။ ဆေးရုံကတော့ သူတို့ထုတ်ပေးလိုက်တဲ့ ဆေးစာဟာ ကနဦးဆေးစာသာဖြစ်ပြီး လာမယ့်တစ်ပတ် သွေးစစ်ချက်ရမှ အဖြေမှန်ကို သိရှိနိုင်မယ်လို့ ကာကွယ်ပြောဆိုခဲ့ပါတယ်။

Ref: Bangkok Post