Tag: thailand

သြဂုတ် ၂၄၊ ၂၀၂၂
M-Media

-အခြေခံဥပဒေက ပြဌာန်းထားတဲ့အတိုင်း တာ၀န်သက်တမ်း ကုန်ဆုံးသွားပြီလားဆိုတာ စစ်ဆေးဖို့အတွက် ထိုင်း အခြေခံဥပဒေခုံရုံးဟာ ၀န်ကြီးချုပ် ပရာယွတ် ချန်အိုချာရဲ့ တာ၀န်ကို ဒီကနေ့မှာ ရပ်ဆိုင်းလိုက်ပါတယ်။

စစ်ခေါင်းဆောင်ဟောင်း ချန်အိုချာဟာ ၂၀၁၄ ခုနှစ်က အာဏာသိမ်းပြီး ထိုင်းနိုင်ငံကို အုပ်ချုပ်လာတာ ဖြစ်ပါတယ်။ သူ့အကြိုက် ရေးထားတဲ့ အခြေခံဥပဒေကို ၂၀၁၇ ခုနှစ်မှာ ပြဌာန်းပြီး ၂၀၁၉ ခုနှစ်မှာ ရွေးကောက်ပွဲလုပ်ကာ ၀န်ကြီးချုပ်အဖြစ် ဆောင်ရွက်နေတာပါ။

သူ့ကို ဆန့်ကျင်သူတွေက ပရာယွတ်ဟာ ၂၀၁၄ ခုနှစ်မှာ အာဏာသိမ်းလိုက်တဲ့အတွက် ၂၀၁၇ ခုနှစ် အခြေခံဥပဒေအရ ၀န်ကြီးချုပ်သက်တမ်း ၈ နှစ်ပြည့်ပြီလို့ ထောက်ပြပါတယ်။

ပရာယွတ် ရာထူးကနေ ဆင်းပေးဖို့အတွက် ပြည်သူတွေဟာ ဘန်ကောင်မြို့မှာ မနေ့ကစတင်ပြီး ဆန္ဒပြခဲ့ကြပါတယ်။

အဓိက အတိုက်အခံပါတီက ပရာယွတ် ရာထူးကနှုတ်ထွက်ရေး ဆုံးဖြတ်ပေးဖို့ အခြေခံဥပဒေခုံရုံးကို စာတင်ခဲ့ပြီးတဲ့နောက် အခုလို တာ၀န်ရပ်ဆိုင်းဖို့ ညွှန်ကြားချက် ထွက်လာတာပါ။

ပရာယွတ်ဟာ ဒီကိစ္စကို ခုံရုံးမှာ ပြန်လည်ဖြေရှင်းဖို့ ၁၅ ရက် အချိန်ရမှာ ဖြစ်ပါတယ်။ အခြေခံဥပဒေခုံရုံးက ၀န်ကြီးချုပ်ရဲ့သက်တမ်း ၈ နှစ် ပြည့်ခြင်း ရှိ၊ မရှိ ဆုံးဖြတ်မှာဖြစ်ပြီး အမိန့်ချမယ့်ရက်ကိုတော့ မသိရသေးပါဘူး။

အရင်က လွှတ်တော်အတွင်း အယုံအကြည်မရှိအဆိုတင်သွင်းကာ အတိုက်အခံတွေက ဖြုတ်ချဖို့ ကြိုးစားမှုကို ပရာယွတ်ဟာ အနည်းဆုံး ၂ ကြိမ်လောက် ကျော်ဖြတ်ခဲ့ဖူးပါတယ်။

Ref: CNA

ဇွန် ၂၆၊ ၂၀၂၂

M-Media 

-မြန်မာနိုင်ငံက လူတွေကို တရားမ၀င် ခေါ်လာတဲ့ လူကုန်ကူးဂိုဏ်းကို ဖမ်းဆီးလိုက်တယ်လို့ ဘန်ကောက်ပို့စ် သတင်းဌာနက ဖော်ပြပါတယ်။ 

ကချန်နာဘူရီပြည်နယ် ဆန်ခလာ ဘူရီခရိုင်က အိမ်တစ်အိမ်မှာ တရားမ၀င် ၀င်ရောက်လာတဲ့ မြန်မာနိုင်ငံသား ၁၉ ဦးနဲ့ ထိုင်းနိုင်ငံသား ၆ ဦးကို ရဲတွေက မနေ့မှာ ၀င်ရောက်ဖမ်းဆီးခဲ့တာ ဖြစ်ပါတယ်။ 

ထိုင်းနိုင်ငံသားတွေက  သူတို့ဟာ လူပွဲစားတွေဖြစ်ပြီး၊ မြန်မာနိုင်ငံက လူတွေကို အလုပ်ရအောင် လုပ်ပေးမယ်လို့ပြောကာ ခေါ်ဆောင်လာတာဖြစ်ကြောင်း ထွက်ဆိုခဲ့တယ်လို့ ရဲတပ်ဖွဲ့က ပြောပါတယ်။ 

ဖမ်းဆီးခံလိုက်ရတဲ့ မြန်မာနိုင်ငံသားတွေဟာ နိုင်ငံတစ်၀ှမ်းကဖြစ်ပြီး စားရေးသောက်ရေး ခက်ခဲတဲ့အတွက် ထိုင်းနိုင်ငံမှာ အလုပ်ရဖို့ ထွက်လာတာြဖစ်ကြောင်း၊ တစ်ဦးကို ဘတ် ၃၂၀၀၀ ဆီပေးခဲ့ရကြောင်း ထွက်ဆိုခဲ့ပါတယ်။ 

သူတို့ဟာ ဘုရားသုံးဆူနယ်စပ်ကနေ ဖြတ်လာခဲ့ပြီး ပွဲစားတွေ နောက်ထပ်လာခေါ်မယ့်ကားကို စောင့်ဆိုင်းနေတဲ့အချိန် ဖမ်းဆီးခံလိုက်ရတာပါ။  

ထိုင်းရဲတပ်ဖွဲ့ဟာ လူကုန်ကူးဂိုဏ်းနဲ့အတူ ဘတ် ၅၃၆၆၀၊ မော်တော်ဆိုင်ကယ်တစ်စီးနဲ့၊ မိုဘိုင်းဖုန်း ၅ လုံးကိုလည်း သိမ်းဆည်းရမိခဲ့ပါတယ်။ 

၂၀၂၁ ခုနှစ် ဖေဖော်၀ါရီ ၁ ရက်နေ့ စစ်တပ်က အာဏာသိမ်းပြီးနောက်ပိုင်း မြန်မာနိုင်ငံကနေ ထိုင်းနိုင်ငံထဲ ၀င်ရောက်အလုပ်ရှာသူတွေ မြင့်တက်လာပြီး ထိုင်းအာဏာပိုင်တွေကလည်း နယ်စပ်မှာ ကင်းလှည့်ရှာဖွေမှုတွေ တိုးမြှင့် လုပ်ဆောင်နေပါတယ်။ 

Ref: Bangkok Post 

ဧပြီ ၂၉၊ ၂၀၂၂

M-Media 

-ထိုင်းနဲ့ ကပ်နေတဲ့ မြန်မာနယ်စပ်မြို့ မြ၀တီက ကာစီနိုရုံတွေမှာ ထိုင်းအမျိုးသမီး ၃၀၀ လောက် ပြည့်တန်ဆာအဖြစ် အဓမ္မ ခိုင်းစေခံနေရတယ်လို့ လွတ်မြောက်လာတဲ့ အမျိုးသမီးတစ်ဦးက ထုတ်ဖော်ပြောဆိုလိုက်ပါတယ်။ 

အဲဒီအမျိုးသမီးဟာ ဧပြီ ၁၀ ရက်နေ့က သူလုပ်ကိုင်နေတဲ့ ကာစီနိုရုံကနေ ခိုးထွက်ကာ နယ်စပ်က အစောင့် မြန်မာစစ်သားတွေ အဆိုင်းပြောင်းနေတဲ့အချိန် နယ်ခြားစည်းကို ပြေးပြီး ထိုင်းဖက်က စစ်သားတွေထံ ဟစ်အော် အကူအညီတောင်းခဲ့တာ ဖြစ်ပါတယ်။ 

ဒါကို မြန်မာစစ်သားတွေကတွေ့ပြီး လိုက်ဖမ်းပေမယ့် ထိုင်းစစ်သားတွေက နယ်ခြားချောင်းကိုဖြတ်ကာ ပြေးလာဖို့ပြောတာကြောင့် ဒီအမျိုးသမီး လွတ်မြောက်သွားခဲ့ပါတယ်။ 

အခုနှစ်အစောပိုင်းက အွန်လိုင်းဆယ်လီတစ်ဦးရဲ့ Live လွှင့်မှုအတွင်း မြန်မာဘက်နယ်စပ်မှာ အလုပ်ရှိကြောင်း၊ ဖျော်ဖြေရးကဏ္ဍမှာ လုပ်ရမှာဖြစ်ပြီး လိင်ကိစ္စမပါကြောင်းပြောကာ လူခေါ်တဲ့အတွက် သွားမိတယ်လို့ ထွက်ပြေးလာသူအမျိုးသမီးက မနေ့က အမှုဖွင့်စဥ်မှာ ပြောကြားခဲ့ပါတယ်။ 

ဒါပေမယ့် မြ၀တီက ကာစီနိုရုံကို ရောက်တဲ့အချိန်မှာတော့ ပြည့်တန်ဆာလုပ်ရမှာဖြစ်ပြီး မလုပ်နိုင်ရင် ပြန်ပေးငွေ ဘတ် ၂၅၀၀၀ ပေးရမယ်လို့ အကြပ်ကိုင်ခံခဲ့ရပါတယ်။ 

ဒီလိုအကြပ်ကိုင်မှုကြောင့် ပြည့်တန်ဆာအဖြစ် အလုပ်လုပ်နေရသူ ထိုင်းအမျိုးသမီး ၃၀၀ လောက်ရှိတယ်လို့လည်း သူမက ထည့်သွင်းပြောဆိုခဲ့ပါတယ်။ 

ထိုင်းရဲတပ်ဖွဲ့ လွတ်မြောက်လာတဲ့အမျိုးသမီးကို သေချာစွာ စစ်ဆေးနေပြီး၊ အဲဒါပြီးမှ လုပ်သင့်တာ ဆက်လုပ်သွားမယ်လို့ ထုတ်ပြန်ပါတယ်။

Ref: Bangkok Post