Tag: turkey

အောက်တိုဘာ ၁၉၊ ၂၀၂၀
M-Media

-ရုရှားထံကနေ ဝယ်ယူထားတဲ့ နည်းပညာမြင့် S-400 ဒုံးခွင်းစနစ်ကို စမ်းသပ်အသုံးပြုရင် နောက်ဆက်တွဲဆိုးကျိုးတွေ ရင်ဆိုင်ရမယ်လို့ အမေရိကန်က တူရကီကို သတိပေးလိုက်ပါတယ်။

ပင်လယ်နက် ကမ်းရိုးတန်းဒေသမှာ S-400 ဒုံးခွင်းစနစ်ကို တူရကီက စတင်စမ်းသပ် အသုံးပြုဖို့ရှိနေပြီး ဒီအတွက် လေကြောင်းသတိပေးချက် ထုတ်ပြန်ထားတယ်လို့ Reuters သတင်းဌာနက ပြီးခဲ့တဲ့တစ်ပတ်မှာ ဖော်​ပြခဲ့ပါတယ်။

အမေရိရန်ကအစိုးရ ပြောရေးဆိုခွင့်ရှိသူ မော်ဂန် အော်တာဂက်စ်က ဒီသတင်းသာ မှန်ကန်မယ်ဆိုရင် ဒီလုပ်ရပ်ကိုရှုတ်ချကြောင်း၊ ဒါဟာ နေတိုးအဖွဲ့ဝင်နိုင်ငံရဲ့ တာဝန်၀တ္တရား၊ အမေရိကန်ရဲ့ မဟာဗျူဟာ မဟာမိတ်ဖြစ်မှုတွေနဲ့ မကိုက်ညီကြောင်း သောကြာနေ့မှာ ပြောကြားခဲ့ပါတယ်။

“S-400 ဒုံးခွင်းစနစ်ကို အသုံးမပြုသင့်ဘူးဆိုတဲ့ အမေရိကန်ရဲ့သဘောထားကို ရှင်းရှင်းလင်းလင်း ပြောထားပြီးသားပါ။ တူရကီက ဒီစနစ်ကို Activate လုပ်အသုံးပြုမယ်ဆိုရင် ကျွန်မတို့ကြားက လုံခြုံရေးဆိုင်ရာ ဆက်ဆံရေးကို ဆိုးဆိုးရွားရွား ထိခိုက်နိုင်ခြေရှိတယ်ဆိုတာကိုလည်း ပြောထားပြီးသား ဖြစ်ပါတယ်”

တူရကီဟာ ပြီးခဲ့တဲ့နှစ်က S-400 ဒုံးခွင်းစနစ်ရဲ့ ရေဒါကို စမ်းသပ်အသုံးပြုခဲ့ပါတယ်။ ပြီးခဲ့တဲ့ ဩဂုတ်လမှာ စစ်ရေးလေ့ကျင့်မှုကနေ ပြန်လာတဲ့ ဂရိလေတပ်က F-16 တိုက်လေယာဉ်တစ်စင်းကို S-400 ရေဒါစနစ်နဲ့ ပစ်မှတ်ချိန်ခဲ့လို့ တူရကီဟာ ဝေဖန်မှုတွေ ခံခဲ့ရပါတယ်။

S-400 ဝယ်ယူရေး ကန်ဒေါ်လာ ၂.၅ ဘီလီယံတန် စာချုပ်တစ်ခုကို တူရကီက ၂၀၁၇ ခုနှစ်မှာ ရုရှားနဲ့ ချုပ်ဆိုခဲ့ပြီး ပြီးခဲ့တဲ့နှစ် ဇူလိုင်လမှာတော့ ဒီစနစ်ကို စတင်လက်ခံရရှိခဲ့ပါတယ်။ အခုနှစ်ဧပြီလကစတင်ပြီး ဒီစနစ်ကို အသုံးပြုနိုင်ပြီလို့ တူရကီက ကြေငြာခဲ့ပေမယ့် အခုအချိန်အထိ Activate မလုပ်သေးပါဘူး။

S-400 ဒုံးခွင်းစနစ်ဟာ နေတိုးအဖွဲ့ရဲ့ ကာကွယ်ရေးစနစ်တွေနဲ့ ကိုက်ညီမှုမရှိဘူးလို့ဆိုကာ အမေရိကန် တူရကီကို ပြင်းပြင်းထန်ထန် ဆန့်ကျင်ကန့်ကွက်ခဲ့ပြီး F-35 တိုက်လေယာဉ် ပူးပေါင်းထုတ်လုပ်မယ့်အစီအစဉ်ကို ရပ်ဆိုင်းတာ၊ နောက်ထပ် ပိတ်ဆို့မှုတွေ လုပ်ဆောင်သွားမယ်လို့ ခြိမ်းခြောက်တာတွေ ရှိခဲ့ပါတယ်။

Ref: Ruters

ဩဂုတ် ၂၂၊ ၂၀၂၀
M- Media

-​အစ္စတန်ဘူလ်မြို့က သမိုင်းဝင်ပြတိုက်တစ်ခုကို ဗလီအဖြစ် ပြန်ပြောင်းဖို့ တူရကီ သမ္မတ အာဒိုဂန်က အခုရက်ပိုင်းမှာ အမိန့်ပေးလိုက်ပြီး နှစ်လအတွင် ပြတိုက်နှစ်ခုကို ဗလီအဖြစ် ပြောင်းလဲလိုက်တာပါ။

အခု ဗလီပြောင်းလိုက်တဲ့ ပြတိုက်ဟာ အစ္စတန်ဘူလ်မြို့ရဲ့ ဥရောပဘက်ခြမ်းက Kariye ပြတိုက်ဖြစ်ပါတယ်။ ရောမတွေအုပ်စိုးချိန် ဘိုင်ဇန်တိုင်းအင်ပါယာလက်ထက် ၁၄ ရာစုမှာ အော်သိုဒေါ့စ်ဘုရားကျောင်းအဖြစ် ဆောက်လုပ်ခဲ့တဲ့ အဲဒီအ​ဆောက်အဦးကို ၁၄၅၃ ခုနှစ် အော်တိုမန်တွေက ကွန်စတီနိုပယ်မြို့ကို သိမ်းပိုက်ပြီးတဲ့နောက် ဗလီအဖြစ် ပြောင်းခဲ့တာပါ။

ဒုတိယကမ္ဘာစစ်အပြီး ဘာသာရေးမစွက်တဲ့ တူရကီနိုင်ငံကို တည်ထောင်ရာမှာ ဒီဗလီကို ပြတိုက်အဖြစ် ပြောင်းခဲ့ပါတယ်။

အာဒိုဂန်အစိုးရဟာ ပြီးခဲ့တဲ့လကလည်း အစ္စတန်ဘူလ်မြို့က Hagia Sophia ပြတိုက်ကို ဗလီအဖြစ်ပြောင်းလဲခဲ့ပါတယ်။ Hagia Sophia ဟာလည်း ဘိုင်ဇန်တိုင်းလက်ထက်က ခရစ်ယာန်ဘုရားကျောင်းဖြစ်ပြီး အော်တိုမန်အောင်နိုင်ပြီးတဲ့နောက် ဗလီ၊ နောက်ပိုင်း ဘာသာရေးမစွက်တဲ့ တူရကီနိုင်ငံမှာ ပြတိုက်အဖြစ် အသွင်ပြောင်းခြင်း ခံခဲ့ရပါတယ်။

အလယ်ခေတ် ကမ္ဘာတစ်ဝှမ်းက ပဒေသရာဇ်ဘုရင်တွေ အားပြိုင်စစ်တိုက်ကြတဲ့အချိန်မှာ စစ်ရှုံးတဲ့တိုင်းပြည်တွေက ဘာသာရေး၊ လူမှုရေး၊ ယဉ်ကျေးမှုအမွေအနှစ်တွေကို ဖျက်ဆီးတာ၊ သိမ်းပိုက်တာ၊ စစ်ရှုံးဒေသတွေက ဝတ်ပြုရာနေရာတွေကို မိမိတို့စိတ်ကြိုက် နေရာတွေအဖြစ် ပြောင်းလဲတာတွေ လုပ်ဆောင်ခဲ့ကြပါတယ်။

အလယ်ခေတ် မွတ်စလင်အင်ပါယာတွေကို ခရစ်ယာန်ပဒေသရာဇ်တွေက သိမ်းပိုက်ချိန် ဗလီတွေကို ခရစ်ယာန်ဘုရားကျောင်းတွေ၊ အရက်ဆိုင်တွေ၊ ပြည့်တန်ဆာရုံတွေအဖြစ် ပြောင်းလဲတာမျိုးရှိခဲ့သလို၊ မွတ်စလင်ဘုရင်တွေက ခရစ်ယာန်အင်ပါယာတွေကို ပြန်လည်သိမ်းပိုက်နိုင်တဲ့အချိန်မှာလည်း ခရစ်ယာန်​ဘုရားကျောင်းတွေကို ဗလီအဖြစ် ပြောင်းတာတွေ ရှိခဲ့ပါတယ်။

တူရကီအစိုးရရဲ့ ဒီလုပ်ရပ်ဟာ အလယ်ခေတ် သက်ဦးဆံပိုင်ဘုရင်တွေရဲ့ အာဏာရှင်ဆန်ဆန် အနိုင်ကျင့်ဗိုလ်ကျတဲ့လုပ်ရပ်မျိုးကို ပြန်လည်ထင်ဟပ်စေတယ်လို့ ကမ္ဘာ့အသိုင်းအဝိုင်းက ဝေဖန်ခဲ့ကြပါတယ်။

သမ္မတ အာဒိုဂန်က အလယ်ခေတ် ခရစ်ယာန်အင်ပါယာတွေ မွတ်စလင်နယ်မြေတွေကို သိမ်းတဲ့အခါ ဗလီတွေ၊ အခြားဘာသာရေးအဆောက်အဦးတွေကို မီးရှို့ဖျက်ဆီးတာ၊ အရက်ဘား၊ ပြည့်တန်ဆာရုံတို့လို ညစ်ညမ်းရာနေရာတွေအဖြစ်ပြောင်းတာတွေရှိခဲ့ပြီး မိမိတို့က မူလအတိုင်း မပျက်မယွင်းဘဲ ဆက်လက်ထိန်းသိမ်းထားတယ်လို့ Hagia Sophia ပြတိုက်ကို ဗလီပြောင်းတဲ့ ပြီးခဲ့တဲ့လမှာ တုန့်ပြန်ပြောကြားခဲ့ပါတယ်။

Ref: Aljazeera

ပြည်တွင်းဖြစ် သင်္ဘောဖျက်ဒုံးစနစ်ကို တူရကီ စမ်းသပ်အောင်မြင်

Source – RT