Tag: turkey

ဖေဖော်ဝါရီ ၁၁၊ ၂၀၂၀
M-Media

-ဆီးရီးယားနိုင်ငံ အနောက်မြောက်ဖက် အီဒလစ်ဘ်ပြည်နယ်မှာ ဆီးရီးယားအစိုးရတပ်တွေနဲ့ တူရကီတပ်ဖွဲ့တွေအကြား အပြန်အလှန် ပစ်ခတ်မှုတွေ ဖြစ်ပွားပြီး တင်းမာမှု မြင့်တက်လာပါတယ်။

တနင်္လာနေ့က တက်ဖ်တာနက်ဇ်ဒေသမှာ ဆီးရီးယားတပ်ဖွဲ့တွေရဲ့ ပစ်ခတ်မှုကြောင့် တူရကီစစ်သား ၅ ဦး သေဆုံးကာ ၅ ဦး ဒဏ်ရာရခဲ့ပါတယ်။ ဒီတိုက်ခိုက်မှုကြောင့် ရန်သူ့ပစ်မှတ် ၁၀၀ ကျော်ကို တုန့်ပြန်တိုက်ခိုက်ခဲ့တယ်လို့ တူရကီ ကာကွယ်ရေးဝန်ကြီးဌာနက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

တူရကီနိုင်ငံခြားရေးဝန်ကြီး Mevlut Cavusoglu က မိမိတို့တပ်ဖွဲ့တွေအနေနဲ့ လိုအပ်ရင် လိုအပ်သလို ဆက်လက်လုပ်ဆောင်သွားမယ်လို့ ပြောကြားခဲ့ပါတယ်။

ပြီးခဲ့တဲ့တစ်ပတ်ကလည်း တက်ဖ်တာနက်ဇ်မှာ ဆီးရီးယားအစိုးရတပ်တွေရဲ့ တိုက်ခိုက်မှုကြောင့် တူရကီစစ်သား ၈ ဦး သေဆုံးပြီး၊ တူရကီရဲ့လက်တုန့်ပြန်မှုကြောင့် အနည်းဆုံး ဆီးရီးယားစစ်သား ၁၃ ဦး သေဆုံးခဲ့ပါတယ်။

တူရကီကတော့ ၂၀၁၈ ခုနှစ် ဖေဖော်ဝါရီလက ရရှိထားတဲ့ အပစ်ရပ်ရေးသဘောတူညီချက်ပါ နယ်မြေမျဉ်းအနောက်ကို ပြန်ဆုတ်ဖို့ ဆီးရီးယားအစိုးရကို သတိပေးခဲ့ပါတယ်။

သူပုန်တွေရဲ့ နောက်ဆုံးခြေကုပ်စခန်းဖြစ်တဲ့ အီဒလစ်ဘ်ပြည်နယ်ကို ပြန်လည်သိမ်းပိုက်နိုင်ရေးအတွက် ဆီးရီးယားအစိုးရတပ်တွေဟာ ပြီးခဲ့တဲ့ သီတင်းပတ်အနည်းကစလို့ ထိုးစစ်အရှိန်မြှင့်လာတာပါ။ အီဒလစ်ဘ်မှာ တူရကီရဲ့ စစ်စခန်း တစ်ဒါဇင်လောက်လည်း ရှိနေတာ ဖြစ်ပါတယ်။

Ref: Aljazeera

ဖေဖော်ဝါရီ ၈၊ ၂၀၂၀
M-Media

-ဆီးရီးယားနိုင်ငံက သူပုန်တွေရဲ့ နောက်ဆုံးခြေကုပ်ဖြစ်တဲ့ အီဒလစ်ပြည်နယ်က စစ်စခန်း း ၁၂ ခုမှာ ကွန်မန်ဒိုတွေ၊ ၊ လက်နက်ခဲယမ်းတွေပါဝင်တဲ့ စစ်တပ်ယာဉ် အစီးပေါင်း ၁၅၀ လောက်ကို ထပ်မံစေလွှတ် အင်အားဖြည့်တင်းခဲ့တယ်လို့ တူရကီ နိုင်ငံပိုင်သတင်းဌာန Anadolu က မနေ့မှာ ဖော်ပြခဲ့ပါတယ်။

ရုရှားကျောထောက်နောက်ခံပြုထားတဲ့ အာဆတ်အစိုးရတပ်တွေဟာ ပြီးခဲ့တဲ့ သီတင်းပတ်တွေအတွင်း အီဒလစ်ပြည်နယ်ကို ပြန်လည်သိမ်းပိုက်နိုင်ရေး ထိုးစစ်ဆင်မှုတွေ အကြီးအကျယ်ပြုလုပ်နေပြီး တူရကီနဲ့ တင်းမာမှုတွေ မြင့်တက်လာတာ ဖြစ်ပါတယ်။

၂၀၁၈ ခုနှစ် ရုရှားနဲ့ရရှိခဲ့တဲ့ သဘောတူညီချက်အရ အီဒလစ်ပြည်နယ် အရှေ့တောင်ပိုင်းမှာ စစ်စခန်း ၉ ခု တည်ဆောက်ထားရာမှာ လက်ရှိ အားလုံးကို ‌ဆီးရီးယားအစိုးရတပ်တွေရဲ့ ဝန်းရံပိတ်ဆို့မှုကို ခံနေရတယ်လို့ တူရကီက ပြောကြားခဲ့ပါတယ်။ အာဆတ်အစိုးရတပ်ရဲ့ ထိုးစစ်ဆင်မှုကြောင့် အီဒလစ်ပြည်နယ်ကနေ ဒုက္ခသည် သိန်းချီ တူရကီထဲကို ထွက်ပြေးခဲ့ရပြီး ဖေဖော်ဝါရီလကုန်ပိုင်းမှ ဒါတွေကို မရပ်တန့်ဘူးဆိုရင် ဆီးရီးယားအစိုးရတပ်ကို ပြန်တိုက်မယ်လို့ တူရကီသမ္မတ အာဒိုဂန်က ခြိမ်းခြောက်ခဲ့ပါတယ်။

ဆီးရီးယားနဲ့ တူရကီတို့အကြား တင်းမာမှုတွေ လျော့ချဖို့အတွက် ရုရှားအာဏာပိုင်တွေဟာ အန်ကာရာကို လာရောက်ဆွေးနွေးမှုတွေ လုပ်ဆောင်နေပါတယ်။

၂၀၁၇ နဲ့ ၂၀၁၈ ခုနှစ်တွေအတွင်း ရုရှား၊ တူရကီနဲ့ အီရန်တို့အကြား ရရှိခဲ့တဲ့ သဘောတူညီချက်တွေမှာ အီဒလစ်ပြည်နယ်နဲ့ အရှေ့ဂူတာဒေသက မြို့တွေကို တင်းမာမှုလျော့ချရေးဇုန်အဖြစ် သတ်မှတ်ထားပြီး တိုက်ခိုက်မှုကို ပြင်းပြင်းထန်ထန် တားမြစ်ထားတာ ဖြစ်ပါတယ်။ သဘောတူညီချက်အရ တူရကီ စစ်စခန်း ၁၂ ခု တည်ဆောက်ခွင့်ရခဲ့တာပါ။

Ref: Aljazeera

ဖေဖော်ဝါရီ ၁၊ ၂၀၂၀
M-Media

-ဆီးရီးယားနိုင်ငံ အနောက်မြောက်ပိုင်း အီဒလစ်ဘ်ပြည်နယ်မှာ တိုက်ခိုက်မှုတွေ မြန်မြန်ဆန်ဆန် မရပ်ဆိုင်းဘူးဆိုရင် တူရကီက စစ်ဆင်ရေးလုပ်သွားမယ်လို့ သမ္မတ အာဒိုဂန်က ပြောကြားလိုက်ပါတယ်။

၉ နှစ်ကျော် ကြာမြင့်လာပြီဖြစ်တဲ့ ဆီးရီးယားပြည်တွင်းစစ်မှာ ‌အီဒလစ်ဘ်ပြည်နယ်ဟာ သူပုန်တွေရဲ့ နောက်ဆုံးခြေကုပ်ဖြစ်ပြီး ပြီးခဲ့တဲ့ သီတင်းပတ်တွေအတွင်း ရုရှားကျောထောက်နောက်ခံပြုထားတဲ့ အာဆတ်အစိုးရတပ်တွေက ထိုးစစ်ဆင်မှု ပြုလုပ်လာတာကြောင့် လူသိန်းချီ တူရကီဖက်ကို ထွက်ပြေးခဲ့ရပါတယ်။

အစိုးရက မိမိပြည်သူတွေအပေါ် သွေးချောင်းစီးသတ်ဖြတ်တာကို မိမိတို့အနေနဲ့ လက်ခံခွင့်ပြုမှာမဟုတ်ဘူးလို့ တူရကီသမ္မတ အာဒိုဂန်က မနေ့မှာ ပြောကားခဲ့ပါတယ်။

“ဆီးရီးယား တည်ငြိမ်ရေးနဲ့ လုံခြုံရေးကို တူရကီက စိတ်စေတနာသန့်သန့်နဲ့ လိုလားပါတယ်။ အဲဒီအတွက် စစ်အင်အားအသုံးပြုတာအပါအဝင် လိုအပ်တာမှန်သမျှ လုပ်ဆောင်ဖို့ နောက်တွန့်နေမှာ မဟုတ်ပါဘူး”

ဆီးရီးယားပြည်တွင်းစစ်မှာ ဆန့်ကျင်ဖက်အုပ်စုတွေကို ကျောထောက်နောက်ခံပြုထားတဲ့ တူရကီနဲ့ ရုရှားတို့အကြား အီဒလစ်ဘ်က တိုက်ပွဲတွေအတွက် တင်းမာမှု မြင့်တက်နေတာပါ။ ရုရှား၊ အီရန်တို့နဲ့ ရရှိထားတဲ့ ၂၀၁၇ ခုနှစ် သဘောတူညီချက်အရ အီဒလစ်ဘ်ပြည်နယ်တစ်၀ိုက်မှာ တူရကီက စစ်စခန်း ၁၂ ခုရှိပေမယ့် အာဆတ်အစိုးရတပ်တွေရဲ့ ထိုးစစ်ကြောင့် ပိတ်ဆို့ခံထားရသလို ဖြစ်နေပါတယ်။

အီဒလစ်ဘ်မှာ တိုက်ခိုက်မှုလျော့ချရေး သဘောတူညီချက်ကို ရုရှားက ချိုးဖောက်တယ်လို့ အာဒိုဂန်က စွပ်စွဲခဲ့ပြီး ရုရှားဖက်ကတော့ ဒါကို ငြင်းဆိုခဲ့ပါတယ်။

တူရကီဟာ ဆီးရီးယားဒုက္ခသည် ၃.၆ သန်းလောက်ကို လက်ခံထားရတာပါ။ တိုက်ပွဲတွေ ပြင်းထန်လာတာကြောင့် ဒီဇင်ဘာ ၁ ရက်နေ့ကနေ ဇန်နဝါရီ ၂၇ ရက်နေ့အထိ အီဒလစ်ဘ်ပြည်နယ်က လူပေါင်း ၃ သိန်း ၉ သောင်းလောက် ထွက်ပြေးခဲ့ရတယ်လို့ ကုလကဆိုပါတယ်။

အာဒိုဂန်က ဆရီးယားဒုက္ခသည်တွေ နောက်ထပ်ဝင်ရောက်လာမှုအတွက် မိမိတို့က ကိုင်တွယ်ဖြေရှင်းမပေးနိုင်တော့ဘူးလို့လည်းသောကြာနေ့က ထပ်မံပြောကြားခဲ့ပါတယ်။

Ref: Aljazeera